Yaaya 12

Mariyam kalaayo itir oko asintee Iisa

(Elloŋ Matiye 26.6-13, Mark 14.3-9)

1Meeni bizgiƴi omma min oko laalane ta Pakti, ga Iisa kaate Beetani darriti Lazar, miiɗi maa ga naɗiya min muuti. 2Maa ga Iisa asiɗe Beetani, gu giimi daare aɗe asiyee lee tiyaw, gii Marsa biriyyeeca. Lazar pa kulla aaye ma giimi ma teero ma Iisa. 3Gii Mariyam icciɗe nussane ka litirri kaƴi unenta ma itir ka kaali ta tirta maa gu kolaa goo nar o ga amsenta ɗa. Gii icciyya itir kaaka gi kalliyyeega asintee Iisa. Gii simmiyeegu ma laawa ku kayaati. Gaa itir icciyya ger paratti ma nubaw.

4Gaa lekkiɗo kaƴi min oko jobookeetee Iisa ma aaye iŋaa maa gu semeetee goo Yudas Iskariyot, ma akkiya bira Iisa oko taattuweeco Yawudigeyyo. Maa ga elliyya liyawti Mariyam kaaka, gaa beneyyiɗe gaa: 5«Ampane kee ke geɗekkiki itir keeke, kee gassiɗo gurus ma arakka latta ka lubbiti gimi ka ƴila kaƴi, kee ɗeddiyooga oko giimi ku saamo.» 6Gata pa beneyyiya beneyti keeke, ay asan ga moyaa ɗa oko saamuwco giimi ku saamo, innasoopa, ga ay asan ga ay mariŋ o ga gata aɗe kulla ma bakammiyooga gurusco. Gaa tewɗiyooga kulla diiman. 7Iisa soopa beneyyiyyee gaa: «Duwaati ka, gi leeɗo. Gita leyya keeke oko meene maa gu asinno issa mooniti. 8Giimi ku saamo ɗe aayitoŋ aɗe goŋŋa diiman, naa soopa akkitoŋ ala ɗa diiman.»

9Maa gu Yawudigee maani giyyiɗe kadar ga Iisa aaye Beetani, guu kaatiɗe. Kaatico soopa ay oko Iisa ɗa ka, guta aŋka gu elliyya kulla Lazar, maa ga Iisa naɗiya min muuti. 10Maa gu taattuweeco soƴoowee ku saɗikaŋgeyyo elliyya liyaw kaaka, guu boodiɗe ma ka diyawti Lazar kulla, 11asan ga ay ma saananti Lazar appe gu Yawudigee maani poociyya kanco, guu duwɗiy galbigeeco oko Iisa.

Iisa on̰aa Zerizalem

(Elloŋ Matiye 21.1-11, Mark 11.1-11, Lik 19.28-40)

12Ma ta sokkoŋ kaƴi pa, gu lekke payya giimi maani ƴiila ma aaye Zerizalem laalane ta Pakti. Maa gu giyyiɗe kadar ga Iisa asaa, 13guu ɗimmiɗe gulumgee ku tomorri gu bamaɗɗe picco, guu oomiɗe min geegarri joobiti Iisa. Guu beneyɗo ma raɗɗa goo: «“Ozanna#12.13 Ozanna ma beneyco Arameyennigeyyo goo ‘logaw ay oko Mellayi’. Beneyyi ka Arameyennigeyyo pa, gu beneyya wikinniti Iisa Masi., logokkineega Mella! Ga Mella baarikiya gata ma asaa ma semeetee#12.13 Elloŋ Soom 118.25-26..” Ga Mella Miltine baarikiya gata ma ay sultan ka Isirayel!» 14Gaa Iisa gassiɗe deheesane ga kalpiɗe, aleŋ maa ga beneyti Kitamniti Mellayi beneyye. Gita pa gee: 15«Aɗoŋ ɓaya ɗa kuŋ giimi ku geegar ka Siyon! Elloŋga sultantoŋ asaa o ga kalappe deheesani#12.15 Elloŋ Zakariya 9.9..» 16Oko wikinne kaaka pa, gu jobookeetee ebenniy ɗa gaari kooko maa ga Iisa leelo. A innasoopa, ga maa ga gassicca pe darjanti samaani gu mooyiɗe kadar ga beneyti Kitamniti Mellayi ma beneyye ma gaartee ase butulti.

17Guu giimi paracco ma aaye wikinne maa ga Iisa kolliyya Lazar ma raɗɗa gaa ga oomu min mooniti, gaa naɗiyya min muuti, jeppiyyoogu oko gicco gaari kotti maa gu elle. 18Ay ɗakko appe gu giimi maani asiɗe joobiti, asan gu giyyiki latta ka ajjibiti kaaka maa ga leelo. 19Guu Pariziyennigee beneyyiɗe aacco goo: «Ku ella, gimu keeke beterrine. Giimi paracco jobokka pe gata ka.»

Giimi ma ay Yawudigee ɗa deyekka Iisa

20Min oko giimi kotti ma asee Zerizalem oko laalane ta Pakti aabiditi Mellayi pa, gu lekka kulla Gireknigee. 21Guu kaatiɗe gu deeɗiya gassa Pilip ka Betsayda kiɗa ta Galilee, guu beneyyiyyee goo: «Garaawa, ni aŋka ni elliyya Iisa.» 22Gaa Pilip kaatiɗe ga deeɗiyee beneyya oko Andire, gaa serco gu kaatiɗe gu deeɗiyee beneyya oko Iisa.

23Gaa Iisa beneyyiyyoo gaa: «Ay haŋka pe ga wikinne ase maa ga Runti Gimi gassicca darjanti samaani. 24Giyyoŋ! Na beneyyatoŋca seene: Korƴu kaƴi, gaa gale ɗa kiɗaati gu sayiyya, ga mataa ɗa, nowotta haddanti gita ka. Gaa maate soopa, ga waa korƴo maani. 25Gimu ma jobokka aŋko tanti ka, mesellaca hayaatanti ta kaw, a ma jobokka ɗa soopa aŋko tanti ka, aattí dunuune teete gasakkaca hayaatane ma gakamma ɗa ta kaw. 26Gimu ma aŋka ga lubbiyyaw, jobokkano. Were maa na alɗo, ga gata kulla alaa. Mella Baaba bereega ka samaane oko gimu ma lobokkaw.»

Iisa beneyyayo oko giimo ma gaari ku muutti

27Gaa Iisa beneyyiɗe kulla gaa: «Haŋka gi galbantu naŋge. Na beneyye pe naa me oko Tattu? Alka na leyyee naa: Baaba, gi diigane teete aɗaw asa ɗa e? Haha, na beneyya ɗa goŋŋa asan na ase dunuune teete oko keeke appe na asicca aawa diigane. 28Na beneyyee soo naa Tattu, cipiliy uwwa semeecam.» Gii ur̰e cawwiɗe min samaani gee: «Na cipiliy paaɗe, o na akkiy cipila missa.» 29Guu giimi ma aaye iŋaakite, guu giyyicca ur̰e taata, gu beneyyiɗe goo: «Ay galgilo!» Daare pa goo: «Ay malaykat ma beneyyiyee.» 30Gaa Iisa beneyyiyyoo gaa: «Ay oko naa ɗa gi ur̰e taata beneyya. Ay oko kunta. 31Ay haŋka appe ay wikinne maa ga Mella caaɗiyyo parlane oko giimi ku dunuune teete o ga petekka Seetanne ma ay sultan ka dunuune teete. 32A wikinne maa guu giimi asinoo paapa kuruwayi pa, guu cipilinnoo uwwa, na akkiy asaɓɓa giimi paracco sariptu.» 33Ma beneyti keeke pa, ga Iisa garaa baŋ ga akka maata gaa me.

34Guu giimi beneyyiyyee goo: «Ni ɓeldeero Kitamniti Mellayi kadar ga Masi, gata maa ga Mella aparre, nowotta ya diiman#12.34 Elloŋ Esaya 9.6 o Daniyel 7.14.. A kiita pa ayme ki beneyɗo kii gu akkiya paapa kuruwayi Runti Gimi guu cipiliyya uwwa? Runti Gimi kaaka pa ay we?» 35Gaa Iisa beneyyiyyoo gaa: «Bahaarane aayitoŋ missa wikinne paalta. Tan̰n̰oŋ wikinne maa gi alɗitoŋ missa. Goŋŋa ga namtuwe gasakkatoŋ ɗa. Giimi ma tan̰aa namtuwwi, ibinya ɗa were maa gu katawɗo. 36A kunta pa, duwoŋgu galbigeetoŋ oko bahaarane teete, wikinne maa gi alɗitoŋ missa, ku maa ku deeɗo gímtí.» Maa ga Iisa beneyyiɗe goŋŋa pa, gaa kaatiɗe ga deeɗe gubba arro min aacco.

Gaari maa ga nabiinice Esaya beneyye tippa

37Ma maantuwco oko garaawi ku ajjibiti kotti aɗe maa ga Iisa leelo unco, gu giimi duwiy ɗa galbigeeco kulla oko gata. 38Keeke pa ase, ku maa ga beneyti nabiinice Esaya asiɗo butulti. Gata pa beneyye gaa: «Mella Miltini, ay we ma amanneero oko beneyyi maa ni taase? Ay oko we ki gaareeca gudirancum#12.38 Elloŋ Esaya 53.1.?» 39Giimi kooko pa gederra ɗa gu dowɗiy galbigeeco oko Iisa aleŋ maa ga nabiinice Esaya beneyye gaa: 40«Mella taggiyoogu iɗiico, ku maa gu alɗo ella ɗa, o ga sidiliyoogu galbigeeco kulla ku maa gu alɗiy ebenna ɗa gaari maa ga leelo, o gu alɗee rebella ɗa oko gata, ga rayyidiɗiy#12.40 Elloŋ Esaya 6.9-10..» 41Nabiinice Esaya beneyyiya keeke, asan ga ellica darjanti Iisa, o ga beneyye ma gaartee.

42Gaa ma kaaka aɗe soopa, gu maani min oko taattuweeco Yawudigeyyo kotti saa kulla duwɗiy galbigeeco oko Iisa, innasoopa, gu beneyye ɗa purta unco giimo asan gu ɓayakke gu Pariziyennigee pittiɗiy min ger ka giraaniti. 43Guta pa aŋakke gu giimi un̰n̰iɗiy min maa ga Mella un̰n̰iɗiy.

Caaɗo ta parlanti ma beneyyiŋgeetee Iisa

44Gaa Iisa beneyyiɗe ma raɗɗa gaa: «Gimu ma dowwica galbanti oko naa, dowwica ɗa oko naata ka, dowwica soo oko ma n̰akamminoo kulla. 45Giimi ma ellano, ellaa kulla ma n̰akamminoo. 46Na ase dunuune teete aleŋ bahaarane, ku maa ga ma dowwica galbanti oko naata, alɗo nunta ɗa namtuwwi. 47Gimu ma geewaa beneytu, o ga jobokkaa ɗa, ay naa ɗa ma caɗee parlane. Na ase soo dunuune teete ku maa na asiɗiy najjiya giimi, na asee ɗa na asiyyo caaɗa parlane. 48Gimu ma poocinoo o ga oyay ɗa beneyyiŋgeetaw gu caɗee parlane. Ay beneyyiŋgeetaw saa ma caaɗe parlane meene ta gammití dunuune teete. 49Innasoopa, gu beneyyiŋgeetaw asaa ɗa min oko naata, guta asaa min oko Mella Baaba ma n̰akamminoo, o ga gata ma garawwawgu gaari maa na tasaa, 50o na lekka kabarre kadar ga maa ga Mella beneyye, ay ma beraa hayaatane ma gakamma ɗa ta kaw oko giimo. Ay goŋŋa appe, ga paratti maa na tasaa alɗo maa ga Mella Baaba beneyyiyaw.»

Currently Selected:

Yaaya 12: mmy

Highlight

Copy