Yaaya 10

Iisa ay maggu ka ɗayaŋ

1Gaa Iisa beneyyiyyoo payya gaa: «Giyyoŋ! Na beneyyatoŋca seene. Gaa gimu on̰aa ɗa ma burgo ta jaam ka tameyyo gaa kawaɗɗo ma tirpo ka, ga on̰owɗo jaammi, ga gata kaaka ay mariŋ o ga caɗaaka ka bottollo. 2Ma on̰aa soopa ma biití burgo ta jaammi ay maggu ka tameyyo. 3Oko gata kaaka, ga taraaka eyeeca biití burgo. Gaa maggu jooriɗiy tameetee ma semeeco. Guu giyyica ur̰uuti pa, gaa cimmiɗiy renta. 4Gaa cimmiy pa, gaa ommiyyo, guu jobbiyya asan gu ibinca ur̰uuti. 5Gimu maa gu ibina ɗa soopa, gu jobokkaa ɗa ta kaw. Gaɗakka pe arro min oko gata asan gu ibinca ɗa ur̰uuti.» 6Maa ga Iisa gaariyyooca masal teete, guu giimi pa alɗiya ibina ɗa balti beneyti keeke.

7Ay ɗakko appe ga Iisa beneyyiyyoo payya gaa: «Giyyoŋ! Na beneyyatoŋca seene. Naa ay aleŋ burgo ta jaam ka tameyyo. 8Giimi paracco ma asee omma min oko naa, ay marŋi o gu caɗaakee ku bottollo. Guu tamee soopa alɗiy giyya ɗa. 9Naa pa ay biití burgo. Ma aɗaa ma wikirtu deewa najjiyenta. Gata gederra ga un̰n̰iɗo gaa oomiɗo, o ga gasakkaca tiyawti. 10Mariŋ pa, asaa maasiti, o diyaawi, o niŋgiti ka. Naa soopa, ase ku maa gu giimi gassicca hayaatane, hayaatane ta tirta ma gakamma ɗa ta kaw.

11«Naa pa ay maggu ka ɗayaŋ. Maggu ka ɗayaŋ pa, beraaca hayaatanti oko tameetee. 12Gimu maa gu kerkeyya ka soopa, ay maggu ɗa ka ɗayaŋ. Gata lobokka guruzzi ka, o gu tamee ay kuntee ɗa. Gaa ellica boor̰i gi asaa, ga gaɗakka ga cappiyyoo oko tameyyo, gii boor̰i asiɗiy omma, guu ma marakke idirɗo. 13Gata pa gaɗakka temekkiya ɗa, asan gu tamee ay kuntee ɗa, kerkeyyiya ka. 14-15Naa pa ay maggu ka ɗayaŋ. Mella Baaba ibinno, o naa kulla ibinya. Aleŋ teete appe, na ibinɗiy tameetaw, o guta kulla ibinno. Naa beraaca hayaatantu oko tameetaw. 16Naa lekkiɗo payya tamee daare, ma aaye ɗa missa aatti jaam kee. Guta kulla na aŋka na asikkiko aacco gicco. Guu asicca giyya ur̰uutu. Guu deeɗo pe hidibe kaƴi ka o ma maggico kulla kaƴi ka. 17Mella Baaba ƴekkano, asan na beraaca hayaatantu naa gassicca payya. 18Lekka ɗa gimu ma gederra ga deeɗino, naa oyee ɗa. Ay naa milco saa ma oyowwiki muutu. Na lekka gudirane maa na biricca, o na lekka gudirane maa na gassicca. Ay keeke appe ay latta maa ga Tattu gaa na leyya.»

19Maa ga Iisa beneyyiyyoo goŋŋa, guu Yawudigee maani giyyiyya beneyti kaaka, guu darɗe payya aacco. 20Guu giimi maani min aacco beneyyiɗe goo: «Gata lekka aarinne kayaati! Awaaka! Ayme ku gewɗiya?» 21Daare pa beneyye goo: «Gimu ma lekka aarinne kayaati, beneyya ɗa goŋŋa. Aarinne pa gederra ɗa ga eyewɗo iɗiico koor̰eyyo.»

Yawudigee pocaa Iisa

22Gata pa ay wikinne ka sitiini oko wikinne kaaka pa, gu leewica laalane ta iyyiti payya girti Mellayi#10.22 Laalane ta iyyiti payya girti Mellayi pa, gu kolaaca kulla goo laalane ta bahaaranti. Yawudigee moyaa wikinne maa gu pittiɗiy giimi ku kiɗa ta Sirii ma niŋgiya girti Mellayi. Guu sawwiyya, guu diiliɗe paaɗe sooƴo ta saɗikaŋgee ku samaane oko Mellayi. geegar ka Zerizalem. 23Gaa meene kaƴi ga Iisa tan̰awɗo aattí doorane ta girti Mellayi. Gaa alɗo aatti zuba kaƴi aɗe siƴƴa maa gu kolaa goo ‘Zubaati Suleman’. 24Guu Yawudigee asiyya kadira, guu beneyyiyyee goo: «Ya minke pe ki akkiniica gaara seenicum baŋ ki ay Masi, gata maa ga Mella aparre e, e baŋ ki ay Masi ɗa? Beneyyani saa purta.»

25Gaa Iisa tiiliyyoo gaa: «Na beneyyitoŋ appe, kuu alɗo amanna ɗa. Gaari ku ajjibiti maa na leewa ma semeetee Tattu garaa kadar na ay Masi. 26Gaa kuŋ pa alɗo amanna ɗa, asan ku ay min tameetaw ɗa. 27Tameetaw geewaca ur̰uutu, na ibiniy o guta jobokkano. 28Na beraayo hayaatane ma gakamma ɗa ta kaw, guta matakka ɗa ta kaw, o ga lekka ɗa gimu ma gederra ga cawwiɗiy min pittu. 29Tattu tatta ƴiila min oko lawwi paracco, o ga gata ma birawgu tameetaw. Lekka ɗa gimu ma gederra ga cawwiyyeegu min pitti. 30Mella Baaba o naata, ni kaƴi ka.»

31Maa gu Yawudigee giyyiyya beneyti kaaka guu bulɗe payya dambee, gu aŋkiɗo diyawti ma daawo. 32Gaa Iisa beneyyiyyoo gaa: «Na leelo gaari maani ku ajjibiti ma gudiranti Mella Baaba, o ku elliy. A min oko gaari ku ajjibiti ku maani kooko maa na leelo, ay ŋawwa ma miɗɗa maani, ku aŋkiɗo diyawtu ma daawo ta dambeyyo?» 33Guu Yawudigee beneyyiyyee goo: «Ay oko gaari ku samaane ɗa maa ki leewe ni aŋkiɗo diyawcum ma dawwo ta dambeyyo. Maa ni aŋkiɗo diyawcum ma dawwo ta dambeyyo pa, ay asan ki n̰elekka Mella. Kii kulla ay gimu ka, kii lewɗe kii ki ay Mella.» 34Gaa Iisa tiiliyyoo gaa: «Mella beneyye saa pe aattí Kitamnitoŋ gaa: “Kulla kaƴi aɗe ay aleŋ Mella#10.34 Elloŋ Soom 82.6..” 35Keeta pa lekka kabarre kadar ga lekka ɗa borooli aattí Kitamniti Mellayi. Giimi kotti maa ga Mella taasiyooga beneyti pa, ga beneyyiyoo gaa gu ay aleŋ gata. 36A gaa ay goŋŋa appe pa, ayme ku beneyɗe kuu na n̰elekka Mella maa na leeɗe naa na ay Runti Mellayi, ga naa maa ga Mella Baaba dowwinoo oko gata ka, gaa n̰aaminnoo dunuune teete? 37Naa leewa ɗa gaartee Tattu, ku aɗoŋ amanna ɗa oko beneytu. 38Naa leewa gaartee Tattu, caŋ ku amanna ɗa kulla oko beneytu, ku amannoŋ oko garrarritaw ku ajjibiti maa na leewa, goŋŋa ku leewa saa pe ma tirta kabarre kadar ga Mella Baaba aayaw ɗakko oko naa, o naa kulla aayee ɗakko oko gata.» 39Guu taattuweeco Yawudigeyyo cokkiɗe payya baamiti, gaa n̰oor̰iɗe ga ƴiiliɗe.

40Gaa Iisa yookiɗe ma tappuwtí ƴiiro ta Yurden ma sorotta diiman oko were kee maa ga Yaaya batasayɗiy giimi omma. Gaa deeɗe nunta iŋaa. 41Guu giimi maani asiyya gassa, guu beneyɗo goo: «Yaaya leelo ɗa kaytiŋ garaawi ku ajjibiti, innasoopa, gu gaari paracco maa ga beneyye ma gaartee gimu keeke ay seene.» 42Guu giimi maani ma aaye were kaaka dowɗiy galbigeeco oko Iisa.

Currently Selected:

Yaaya 10: mmy

Highlight

Copy