YouVersion Logo
Search Icon

Lubaakico N̰amaakeetee Iisa Masi 6

6
Giimi paysara ma gayay n̰amaakeetee Iisa
1Oko meeni kotti, gu giimi ma jobokkaa ka Iisa Masi selaa ka diiman. Guu ku ma beneyya beneyyi ka Gireknigeyyo sakkiyɗiy gicco ma beneyya beneyyi ka Ebireenigeyyo, goo gu daacco maa gu miɗicco matakke gu leewiyooca asan gu gasakka ɗa lawwi ku tiyaawi maa gu edekka kulla meene. 2Guu n̰amaakeetee Iisa ku orro o seera giyyiyya beneyyi kaaka, guu timmiɗiy giimi paracco ma jobokkaa ka Iisa. Guu beneyyiyyoo goo: «Ay tirta ɗa ni leeɗo ka ɗedditi lawwi ku tiyaawi nii duwɗo taaso ta beneyti Mellayi. 3Kaaka pa seneeta, ku apiroŋ miɗi paysara min aattoŋ maa gu giimi paracco ibiniy kadar gu daŋgam o gu unenta ma Ruuhanti Mellayi o ma ibino tee ta gaaro, kee kapiyyooga lubbi keeke. 4Gaa nii pa nuntiɗo pe inniti Mellayi ka o taaso ta beneyti oko giimo.»
5Guu giimi paracco oyyiyya beneyco n̰amaakeetee Iisa kaaka. Guu apiriyya Etiyen maa gi amanniti yaata o ga unenta ma Ruuhanti Mellayi. Guu apirɗiy payya ini Pilip#6.5 Pilip keeke soopa ay min aacco ɗa oko n̰amaakeetee Iisa. o Porokkor o Nikkanor o Timon o Palmenas o Nikolas ma ay ka geegar ka Antiyos ma deero Yawudince. 6Guu itiriyyoogu oko n̰amaakeetee Iisa, guu asiyyoo inna Mella ma gagaw ta picco kayyeeco.
7Gaa beneyti Mellayi tacalɗo ka ta ƴiila, guu giimi ma jobokkaa ka Iisa Masi dewɗo ka maani aatti Zerizalem, o soƴoowee ku saɗikaŋgeyyo kulla maani ma ecekka botol kee ka amanniti oko Iisa.
Etiyen gu bakammaa
8Etiyen pa, ga Mella onokkiya ma gidaanuwe, o ga biryee gudirane maani maa ga lewɗo unco giimo garaawi ku ajjibiti. 9Guu lekkiɗo miɗi ma meeliki. Min aacco miɗi kotti pa gu daare ay Yawudigee koo ku geegar ka Siren o ka Alekzandiri. Guta pa asee min girco ka giraaniti maa gu kolaa goo ‘Ger ka lawwee ku cappenta’, o daare pa asee min kiɗa ta Silisi o ta Aazi. Guu waciɗe paracco gu meelikkikii Etiyen. 10Guu alɗe gederra ɗa soo gu tiiliyyee oko Etiyen asan gi ibinti ta beneyyi taata okomma min oko gudirane ta Ruuhanti Mellayi. 11Ay kaaka pe gu giɗiɗe giimi ma deeɗo beneyya goo: «Ni giyyiya gaa beneyya beneyyiŋgee ku n̰ilaawi oko Muusa o oko Mellayi.»
12Guu issiyyooca gu boŋsiɗiy giimi ku maani o ajaawaŋgee o aalimnigee ku Kitamniti Muusa ku maa gu baamiyya Etiyen, gu kaatikkiki wikirco taattuwee ku parlanti. 13Guu deeɗe itira payya bowookee daare gu asiɗo beneyya goo: «Gimu keeke beneyya diiman miɗɗa ma ka girti Mellayi keeke ma duwenta oko gata ka o ma gaari ku hukumnigeetee Muusa! 14Ni giyyiya saa maa ga beneyɗo gaa ga Iisa ma ay ka geegar ka Nazaret yeyekkaa girti Mellayi keeke, o ga magakkay aadaŋgeetine maa ga Muusa garawwine.»
15Guu taattuwee ku parlanti paracco elelɗiya ƴoy Etiyen. Gaa wigisanti ɓelewɗiyo aleŋ ka malaykaddi.

Highlight

Share

Copy

None

Want to have your highlights saved across all your devices? Sign up or sign in