Lubaakico N̰amaakeetee Iisa Masi 7
7
Beneyti Etiyen
1Gaa tattuwco oko taattuweeco soƴoowee ku saɗikaŋgeyyo inniyya Etiyen gaa: «Beneyyi keeke maa gu beneyya ma gaarcam ay tirta aɗɗe?» 2Gaa Etiyen tiiliyyoo gaa: «Kuŋ gayyee o seneeta, giyyino ƴa! Maa ga kaakatine kee Biraayim#7.2 Garrarritee Biraayim pa aaye oko Kitamne ta Diilo ta Lawwi Paracco 12–22. alɗo missa gonek kiɗa ta Mezopotami, omma min maa ga alɗe parakka ɗa missa geegar ka Haraan, ga Mella Miltí darjanti oomiyee. 3Gaa beneyyiyyee gaa ga cappayo oko gimtee o oko kiɗaati, gaa kaatiɗo oko kiɗa maa ga garee.
4«Gaa Biraayim waciɗe min kiɗa ta Kaldeyennigeyyo, gaa deeɗe nunta Haraan. Gaa maa ga tatti maatiɗe pa, ga Mella beneyyiyee gaa ga paru min Haraan, gaa asiɗo nunta oko kiɗa teete maa ku nowoɗɗe haŋka. Gaa oyyiɗe, ga parɗe. 5Mella pa berewweeca ɗa missa kiɗa taata, ya tee ta urpiti asinni ka kulla. Innasoopa, ga beneyyiyee gaa ga bereeca ta kaw kiɗa teete oko gata o oko ronco rontee. A oko wikinne kaaka pa, ga Biraayim lekka ɗa missa miica. 6Gaa Mella pa beneyyiyyee gaa gu ronco rontee akka nunta oko kiɗa ma ay tanco ɗa. Guu leeɗiy lawwee. Guu diigiyɗiy ƴilaakee miyaŋgee pooɗi. 7Guu giimi ma leyyiy lawwee kotti pa ga Mella asiyyo caaɗa parlane. Gaa min iŋaa kiɗa ta lawwuwwi pa, gu asiɗo ooma, guu asiyya aabida Mella iŋee oko kiɗa teete. 8Maa ga Mella beneyyiyyeega beneyti kaaka, ga onnicca liŋganti ma gata ma gaaro ta taharriti. Ay ɗakko appe ga Biraayim taharriyee oko runti kee Isaaka maa ga leeɗe meeni poppoɗi. Gaa Isaaka pa kulla taharriyee oko Yakub. Yakub pa taharriyoo pe oko kookuweetine ku orro o seera.
9«Guu kookuweetine guta pa leeɗiye galbigee koo ku namta oko sinco kee Yuusup#7.9 Garrarritee Yuusup pa aaye oko Kitamne ta Diilo ta Lawwi Paracco 37–50.. Guu giɗikkiki oko giimi ma deekkiki giɗa aleŋ lawwu iŋaa Masir. Gaa Mella pa alɗo ma gata. 10Gaa min oko diigaŋgeetee paracco ga Mella cimmiyya, gaa biriyyee ibino ta gaari maani. Gaa Yuusup deeɗiyee daanee oko sultan ka tatta ka Masir kee Parawon. Ay ɗakko appe ga duwiyya Yuusup tattuwe ka kiɗa ta Masir, o lawwi ku giiri kulla ga Parawon kappeegu.
11«Gaa maa gu leeɗe ƴilaakee maani omma, gi maya yaata asiɗe kiɗa ta Masir o ta Kanaan. Guu giimi paracco diigiyɗe ta tirta teete. Guu kookuweetine alɗo lekka ɗa ya maatiki ka tiyaawi. 12Maa ga Yakub leeɗe kabarre kadar ga Masir gu lekka lawwi ku tiyaawi, ga n̰aamiy kookuweetine gu deeɗe giɗa. Ay taata appe ay kaatico ta omma. 13Oko kaatico ma daa ta seera pa, ga Yuusup deyyo gaɗipa paaɗe oko seneetee, gu ibiniyya. Gaa sultan ka tatta ka Masir kee Parawon pa ibinɗiy kadar gu giimi kotti ay gimtee Yuusup. 14Gaa Yuusup n̰aamiyyo oko tatti kee Yakub ma gimtee paracco gu asiɗo. Guta pa paracco appe gu orooruwee paysara o beeƴa. 15Gaa Yakub waciɗe ga kaatiɗe Masir, ga deeɗe nunta ga dummiɗe iŋaa. Gaa maatiɗe o ronco rontee kulla ma ay kookuweetine matte. 16Guu giimi icciɗiy zeneeco gu kaatikkiko geegar ka Sikem, guu deeɗiy issa gur̰ba maa ga Biraayim geɗekke min oko Hamor miltí kiɗa ta Sikem.
17«Maa gu nuntiɗe ƴilaakee maani omma, guu weeɗe pe gu deeɗe maani ta kaw Masir. Gaa wikinne asiɗe maa ga beneyti Mellayi kee maa ga beneyyiyee oko Biraayim deeɗo. 18Gaa Masir ga tattuwe ka tatta kaƴi kalpiɗe pe mulunniti. Yuusup soopa, ga ibinya ɗa. 19Gata kaaka pa daɓalliy gimtine. Gaa lewɗiyo miɗɗa oko kookuweetine. Gaa asarɗiy gu soƴoɗɗiy ronco gu mataɗɗo. 20Ay oko wikinne kaaka appe gu weeɗiya Muusa#7.20 Garrarritee Muusa pa aaye oko Kitamne ta Oomiti min Masir.. Gata pa, ay miica samaane ta kaw o ga daanee oko Mellayi, guu gaayitee kiiliyya namma ga nuntiɗe koyyee subba giiri. 21Gaa maa ga alɗiyo awayya ɗa payya kiilo pa, gu cimmiyya biití baharre ta yaata. Gii runti Parawon asiyya gassa, gii icciyya gi deeɗiya miiɗa aleŋ runti ka aattí. 22Guu ɓeldiyya ma ibinco giimi ku Masir ta gaaro, o ga deero gimu ka karaamanti ma beneyyi o ma lubbi.
23«Gaa maa gu ƴilaakeetee deeɗe orooruwee pooɗi, mileŋ ga Isirayelitnice, ga mooyiy pe seneetee, guta ma ay Isirayelitnigee. 24Gaa waciɗe ga kaatiɗe ellico. Maa ga katawɗo pa, ga gasse gimu ka Masir ma tamannaa kaƴi min oko seneetee. Gaa maaliyya sinti ma ay Isirayelitnice, gaa deeɗiya ma ay kee ka Masir. 25Ma gaari kooko pa, ga Muusa moyee gaa walaŋ pe gu seneetee ku Isirayelitnigeeta ebenna paaɗe kadar ga ay ma gata appe ga Mella asiɗiy cimma min oko lawwuwe ka Masir. Guu guta soopa alɗiya ibina ɗa keeke. 26Gaa ta sokkonta ga deeɗe gassa payya seneeta seera guu bokaa. Gaa aŋkiɗo ga taaciɗiy. Gaa beneyyiyyoo gaa: “Seneetaw, ayme ku bokowɗo, kuŋ ma ku ay seneeta ka?” 27Gaa ma ecekkeeca oko giiti pa nekerɗo, gaa n̰aamiyya Muusa, gaa beneyyiyee gaa: “Ay we ma duwum tattuwe ki caɗawɗini parlane? 28Ki aŋka ki deeɗino kulla aleŋ ta gimu ka Masir maa ki deero mooko kee e?” 29Maa ga Muusa giyyiyya beneyyi keeke pa, gaa gaɗɗiɗe min Masir gaa deeɗe nunta kiɗa ta Madiyan. Gaa weeɗe miici seera ku miɗitta.
30«Gaa ƴilaakee orooruwee pooɗi omma, ga malaykat oomiyyee aattí okko ma bakamme tetteesani, goosine ma aaye katta dambu ka Sinayi. 31Gaa elelɗiya paaɗe tetteesane kaaka ma bakamme okko o ga agakka ɗa. Gaa ajjibiɗe ta tirta teete. Gaa saapiɗe katta gaa ga elliyya samaane. Gaa giyyiɗe ur̰e ta Mella Miltine ma kolaa gee: 32Ay naa Mella ka kookuweecam, ma ay Mella Milti Biraayim, o ka Isaaka, o ka Yakub. Gii ɓayaw icciyya, namma ga azarɗo ta cim cim, gaa alɗo gederra ɗa payya ga ellicca okko taata. 33Gaa Mella Miltine beneyyiyyee payya gaa: Settiy n̰uurcam asan ga were keeke maa ki waraɗɗe, duwenta oko naata ka. 34Na ellicca ma tirta diiganco gimtaw ma aaye Masir, o na giyyica neƴƴico, naa asiɗe moogico. Haŋka pa ki asu na n̰aamiɗum Masir.»
35Gaa Etiyen beneyɗiyo missa gaa: «Ay Muusa kee aɗe maa gu Isirayelitnigee poociya goo: “Ay we ma duwum tattuwe ki caɗawɗini parlane?” Ay gata aɗe payya maa ga Mella n̰aamiya ga asiyyoo dee tattuwe o ga moogiy ma gaayo tee ta malaykatti Mellayi ma oomiyee aatti tetteesane ma bakamme okko. 36Muusa pa, ay gata appe ma cimmiy giimi ku Isirayel min Masir, ma garaawi ku ajjibiti maa ga leelo kiɗa ta Masir, o oko wikinne maa gu tapaɗɗica baharre maa gu kolaa goo ta Binta, o oko wikinne maa gu nowoɗɗe goosigeyyo orooruwee pooɗi ƴila. 37Gaa Muusa gata kee aɗe payya beneyyiyyoo oko Isirayelitnigeyyo gaa: “Mella akkitoŋ cimma min aacco seneetoŋ nabiinice kaƴi ma ay aleŋ naata#7.37 Elloŋ Ɗillico Hukumnigeyyo 18.15..” 38Wikinne maa gu Isirayelitnigee temeɗɗe goosigeyyo, ga ay Muusa aɗe ma nowotte beenannico kookuweetine ma malaykatti Mellayi ma beneyyiyyee kayaati dambu ka Sinayi. Gaa Muusa gassiɗiy beneyyiŋgeetee Mellayi ma beraa hayaatane ku maa ga gaarinneegu.
39«Kookuweetine soopa icciya ɗa beneyti, poociya. Gaa oko kanco ka, gu aŋkiɗo yooko gonek Masir. 40Maa ga Muusa alɗo kayaati dambu ka Sinayi, gu kookuweetine beneyyiyyee oko Harun goo ga panaayo lawwi ma saabayye zorri ma omokkayo unco guu tan̰aa, asan goo gu ibinya ɗa payya latta ma asiyee oko Muusa ma cimmiy min Masir. 41Gaa oko meeni kotti aɗe gu panɗe latta aleŋ ijille ma saabayye zooru. Guu saɗikiyiyyee oko ijille kaaka maa gu lollikiyya. Guu leeɗiyee laalane ma parhane yaata oko maatiki maa gu pane ma picco. 42Ay ɗakko appe ga Mella pa miriyyoo kupo, gaa duwiyyoo gu aabaɗɗo kalli, o paato o kooyo aleŋ zorco. Keeke pa kitipiyenta kutubgeeco nabiinigeyyo goo:
“Kuŋ giimi ku Isirayel, ay oko naa aɗɗe
ku sooƴinaw saɗikaŋgee ma gaaruwi
e baŋ gu ma lawwi daare
maa ku leeɗe ƴilaakee orooruwee pooɗi goosigeyyo?
43Haha, ay goŋŋa ɗa.
Ku icce soo zubaati zooru kee Molok,
o latta kaƴi ma saabayye kaalu oko zooritoŋ
maa ku kolaa kuu Repan.
Lawwi kotti pa ku panakkiy ma pittoŋ,
kuu aabidiɗiy aleŋ zortoŋ.
Ay ɗakko appe na asittoŋ pitta arro min kiɗaatoŋ,
naa kaatikkitoŋ ya untí kiɗa ta Babilon#7.43 Elloŋ Amos 5.25-27..”»
44Gaa Etiyen jeppiɗe payya gaa: «Maa gu kookuweetine alɗo goosigeyyo gu lekka bazzane ta waagiti ma Mella, gita pa lekkiy hukumnigee ku liŋganti maa ga onokke ma gimtee. Bazzane taata pa, ga Mella beneyyiyee oko Muusa gaa ga panica aleŋ daggane maa ga garawwiyee. 45Bazzane taata pa gu kookuweetine miriyooca oko ronco. Guu ronco pa gulmicca wikinne maa ga Zoozuwe omoɗɗikoo. Guu kaatiɗe gu deeɗiy cawwa kiɗaayee min oko ballee maa ga Mella biryoogu, guu pittiɗiy. Gii bazzane taata nuntiɗe kiɗa taata namma ya wikinniti sultan Dawud. 46Gaa Dawud deeɗiyee daanee oko Mellayi. Gaa Dawud inniɗe min oko Mellayi ku maa ga geewiɗo ger ka aabiditi oko giimi ku balti Yakub. 47Innasoopa ay Dawud ɗa ma geewiya ger ka aabiditi Mellayi, ay sultan kee Suleman ma ay runti Dawud.
48«Kee soopa ibina kadar ga Mella ka Uwwa ta kaw nowotta ɗa aacco gerra maa gu giimi ka panakke, aleŋ maa ga nabiinice kee Esaya beneyye gaa:
49“Mella Miltine beneyya gaa:
Samaane ay wikirtu ka mulunniti,
o kiɗa ay were maa na dowɗiy asintaw ka.
A ay ger ŋawwa pe maa ku gederra ku geewinnaw
na nuntiɗo ga naa?
Ay were ŋawwa ma ecekkano?
50Ay naata ɗa aɗe ma kilgiyiy samaane o kiɗa e#7.50 Elloŋ Esaya 66.1-2.?”»
51Gaa Etiyen beneyyiyyoo payya oko taattuweeco Yawudigeyyo ma caɗaa parlane gaa: «Kayyeetoŋ talta, o ku aŋka ɗa giyyo ta beneyti Mellayi. Ku poociya kanti, kuu sedelɗiy diiman galbigeetoŋ oko Ruuhanti Mellayi. Ku jobokke saa kookuweetoŋ aɗe! 52Ay nabiinice ŋawwa maa gu diigiye ɗa? Guta deyyiy nabiinigee ma taasica asawti oko gata ka kayti ka ma ay ka ɗayaŋ unti Mellayi, haŋka pa ku boodiyee ku deeɗiya! 53Mella gaaritoŋgu hukumnigeetee ma butulco malaykatnigeetee, gaa ma kaaka aɗe ku alɗiy jobba ɗa!»
Muutti Etiyen
54Maa gu taattuwee ku parlanti giyyiyya beneyti Etiyen kaaka, guu boŋsiɗe saa pe ta kaw, namma gu beneeco warawɗo. 55Gaa Etiyen pa, gi Ruuhanti Mellayi onoɗɗiya, gaa elelɗo ƴoril ta uwwa samaani, gaa ellicca bahaarantí darjanti Mellayi ma ɓelaa, o Iisa waraɗɗe ta tiyaawati Mellayi. 56Gaa leeɗiyoo gaa: «Giyyoŋ! Na ellaa samaane gaa eyee, gaa Runti Gimi waraɗɗe tiyaawati Mellayi.»
57Gaa maa gu giyyiyya beneyti kaaka, gu cayyikiɗe ma raɗɗa o gu son̰okkiy deyco. Guu kabisiyiyya paracco. 58Guu cimmiyya renta min geegarri, guu dawaɗɗiya ma dambee ku maa gu deeɗiya. Ku ma ay suyuudigee pa soor̰iy kaɗiŋgeeco guu uttiyyo saripti miiɗi kaƴi aɗe maa gu semeetee goo Sol. 59Gaa maa gu dawaɗɗiya ma dambee, ga Etiyen pa lollokkaa Mella gaa: «Miltu Iisa iccicca ruuhantu.» 60Gaa galɗe ga darsiɗe, gaa cayyikiɗe ma raɗɗa gaa: «Miltu, saamiyayoogu zunubgeeco kooko.» Maa ga beneyyiɗe goŋŋa pa, gaa galɗe ga maatiɗe.
Currently Selected:
Lubaakico N̰amaakeetee Iisa Masi 7: mmy
Highlight
Share
Copy

Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.