Lubaakico N̰amaakeetee Iisa Masi 20

Turguwti Pol kiɗa ta Maseduwan o ta Gires

1Maa gu giimi ƴaapiɗe yil min hawwanco taata, gaa Pol timmiɗiy giimi ma jobokkaa ka Iisa Masi. Gaa beneyyiyyoo beneyyi maa gu baamicca talta amannico. Gaa leeɗiyoo paaɗe maraw, gaa kaatiɗe pe kiɗa ta Maseduwan. 2Gaa maa ga tapaɗɗica kiɗa ta Maseduwan, ga beneyyiyoo beneyyiŋgee maani oko giimi ma dowwiy galbigeeco oko Iisa, beneyyiŋgee ku maa gu baamicca talta amannico. Gaa sarɗe kiɗa ta Gires. 3Iŋaa pa, ga dee nunta koyyee subba. Gaa oko wikinne maa ga aŋkiɗo kalpo markabati ga kaatiɗo kiɗa ta Sirii, gaa giyyiɗe kadar gu Yawudigee bodowwiyee ma gaari ku miɗɗa. Ay ɗakko appe ga yookiɗe ta Maseduwan. 4Guu lekkiɗo gittee ma ezekkiya. Guta pa ay: ini Sopateer runti Pirus ma ay ka geegar ka Beree, o Aristaarke o Sekondus ma ay ku geegar ka Tesalonik, o Gayuus ma ay ka geegar ka Derbe, o Timote, o Tisik o Toropim ma ay ku kiɗa ta Aazi. 5Guta pa omme gu deeɗini uca geegar ka Torowas. 6Niita pa, leeca laalane ta mappayi bala muɗugu maa ni kolaa nii Pak geegar ka Pilip. Gaa min iŋaa nii kalpiɗe markaba ni kaatiɗe Torowas. Gaa meeni beeƴa omma ni deeɗiy gassa gittini geegar ka Torowas. Gaa iŋaa, ma guta, ni deeɗe nunta meeni paysara.

Pol o Utikus

7Gaa oko meene ta ahatti, ma pootimooko, ni timmiɗe, nii teeɗe sawa tiyaw ta mooyiti Iisa#20.7 Tiyaw teete pa garaa wikinne ka mutti Iisa. Mappa kaaka pa ay gaaro ta ziiti, o mirmi kotti ay gaaro ta baartee.. Mileŋ ga Pol kataa paaɗe ta sokkonta pa, ga beneyyiyyoo oko giimi kotti ma temekke namma ya ɗaɗɗakkiti aandoŋŋi. 8Ger kaaka pa maa ni temeɗɗe geewenta kayaati giiti. Gaa iŋaa gu lekkiɗo pe lampiŋgee maani maa gu zegewwiy. 9Gaa ɗibilu kaƴi maa gu semeetee goo Utikus nowoɗɗe pe buule ta ger kaaka. Maa ga Pol beneyyiɗe pa ga dummiɗe, guu waani suura icciyya ɗibilu kaaka. Gaa parsiɗe min iŋaa ger ma daa ka subba ga galɗe bup kiɗaati. Maa gu giimi beeriɗe goo gu cepellaa, guu elliɗe kadar ga maate paaɗe. 10Gaa Pol beeriɗe, gaa asiyyee ooƴa ga zubbiyyee ziiti, gaa googiyya pittee. Gaa beneyyiyyoo oko giimo gaa: «Aɗoŋ ɓaya ɗa. Ruuhanti yookiyee.»

11Gaa Pol kalpiɗe payya, gaa erriyya mappa, gu teeɗe. Gaa beneyɗo kanti missa namma ga were walɗe ta cee. Gaa kaatiɗe paaɗe. 12Gaa ɗibilu kee Utikus gata, gu kaatikkiki giyyenta girti. Guu paracco gu galbigeeco ooliɗe.

Pol torgowwa min Torowas namma ya geegar ka Milet

13Gaa min iŋaa, ni oomiɗe ni deeɗe kalpa markaba, nii kaatiɗe geegar ka Assos ni deeɗiya icca Pol, asan ga gata saa ma ecekke niyyane ga kaatiɗo namma ya iŋaa Assos ma botol. 14Maa ga Pol deeɗini gassa geegar ka Assos pa, nii icciyya markabati, ni kaatiɗe geegar ka Mitilen. 15Min iŋaa pa, ni ƴiile. Gaa ma ta sokkonta kaƴi, ni sarɗe untí kiɗa ma kadirenta ma ammi maa goo Kiyo. Gaa meene ma daa ta subba ni sarɗe geegar ka Samos. Gaa ma meene ma daa ta pooɗi pa, ni sarɗe geegar ka Milet. 16Pol pa aŋke ɗa ga warriɗo Epez asan ga aŋka ɗa dummo kiɗa ta Aazi. Gata pa asarre ga sarɗo koɗok Zerizalem, gaa gederra oko meene ta laalane ta Pantekotti.

Pol leewayo maraw oko ajaawaŋgeeco giimi ku Epez

17Gaa min Milet, ga Pol n̰aamiɗe gimu Epez ga deeɗiy kolla ajaawaŋgeeco oko giimi ma temekka saananti Iisa Masi. 18Maa gu asiɗe saripti, gaa Pol beneyyiyyoo gaa: «Ku ibinca nuntitu baŋ na nunte naa me ma kuŋ wikinnitu paratti kiɗa ta Aazi min oko meentu ta omma maa na asiɗe. 19Na lubbiyee oko Miltine aattoŋ bala cipilo ta kayaatu. Na erce maani, o na diigiye ta tirta asan gu Yawudigee daare aŋkaw miɗɗa. 20Ku ibina kadar na kiilitoŋ ɗa ya maatiki kaƴi ma gayaatoŋca amannitoŋ. Na taasitoŋga o na gaaritoŋga paratti unco giimo o aacco gerratoŋ. 21Na taasiyoo oko Yawudigeyyo o oko giimi ma ay Yawudigee ɗa gu meeliɗiy gaarco ku miɗɗa, guu ribilɗo oko Mellayi guu duwɗiy galbigeeco oko Miltine kee Iisa. 22Haŋka pa, na kataa Zerizalem. Ma asarrano pa ma guu naa kaatiɗo ay Ruuhanti Mellayi. Na ibina ɗa soopa latta ma deeɗino lee gonek. 23Maa na ibina soopa ay ga kulla geegar aɗe maa naa katee gi Ruuhanti Mellayi tasaw kadar gu bakammano daŋayi o gu deegeyyano maani. 24Naa soopa maa na ƴekka, ay hayaatantu ɗa. Ay na gaamiyya lubbitu paratti maa ga Miltine kee Iisa berewwiyaw, ma ay taaso ta kabarre ta daana ta gidaanuwti Mellayi.

25«Na nunte aattoŋ parattoŋ na tasawɗitoŋgu gaari ku mulunniti Mellayi. Haŋka soopa, na lekka kabarre kadar ku ellano ɗa payya ta kaw. 26Ay ɗakko appe na beneyɗitoŋ meente naa ku giyyoŋ samaane. Gaa gimu kaƴi min aattoŋ masile, ga naata pa gi kayaatu ceereŋ, 27asan na beneyyitoŋgu gaari paracco maa ga Mella aŋakke bala kiilo. 28Pakarraniyo samaane oko kayyeetoŋ o oko giimi paracco ma temekka saananti Iisa Masi wikirtoŋ. Guta pa, ay aleŋ tamee maa gi Ruuhanti Mellayi berewwitoŋ ku maa ku pakarɗiy. Baamoŋgu samaane gimtee Mellayi paracco ma temekka saananti Iisa Masi wikirtoŋ, guta maa ga Mella geɗekkiy ma baartee Runti. 29Na lekka kabarre kadar ga naa kaate, gu giimi daare ma ay aleŋ ɓiliwɓiliwnigee ma deewa akkitoŋ un̰n̰a aattoŋ ku maa gu leeɗitoŋ miɗɗa, 30o ga min aattoŋ saa kulla gu daare deeɗo garaawo beneyyiŋgee ma ay seene ɗa, o gu akkiy ribila giimi ma jobokka kee ka Iisa Masi oko guta gu jobbiɗiy. 31Kaaka pa, ku nuntoŋ nadiraŋgee. Mooyoŋ ƴa ƴilaakee subba keeke, paato o aandoŋ, na nambe ɗa bala iyyo ta deytee oko kulla kaƴi min aattoŋ were daare namma ma tootti kulla.

32«Haŋka pa na duwtoŋ pitti Mellayi, o oko beneyti ka gidaanuwti. Beneyti pa lekka gudirane maa ku maaɗiɗo aattí amannitoŋ, o ga ma gata ku gasakkay barkaŋgee maa ga Mella beraayo oko giimi ma duwenta oko gata. 33Naa soopa aŋke ɗa ya maatiki min oko kuŋ: bala ga gurus o bala ga dahamne o bala ga kaɗiyyu. 34Kuŋ saa kulla lekka kabarre kadar na lubbeero ma pittaw ku maa na gassiɗo maatiki ma nowottikino ma gittaw ma ezekkino. 35Lubbitu paratti maa na leewa na gaaritoŋga naa ke lobokkine maani ku maa ke gaayiɗiy giimi ku saamo o ke aɗikinii rawta ɗa beneyyi maa ga Miltine kee Iisa saa ma kayaati gaa: “Gimu ma beraa gi barkanti yaata ƴiila min oko ma gasakka.”»

36Maa ga Pol gaamiyya beneyti kaaka, gaa darsiɗe ma guta, guu inniɗe paracco Mella. 37Guu giimi paracco waciɗe erciti ta tirta. Guu googiyya gu leeɗiyee maraw. 38Guu zorontiyɗe asan ga beneyyiyoo gaa gu ellaa ɗa payya ta kaw. Guu iziyya ga deeɗe kalpa markaba.

Currently Selected:

Lubaakico N̰amaakeetee Iisa Masi 20: mmy

Highlight

Copy