Lubaakico N̰amaakeetee Iisa Masi 19

Pol yokaa geegar ka Epez

1Maa ga Apolos alɗo geegar ka Korente, ga Pol tappiy kiɗaayee ma lekka dambabbi, gaa kaatiɗe geegar ka Epez. Iŋaa pa, ga gasse giimi minnaw ma jobokkaa ka Iisa Masi. 2Gaa inniɗiy gaa: «Min maa ku duwɗiy galbigeetoŋ oko Iisa Masi, ku gasse aɗe Ruuhanti Mellayi?» Guu guta pa tiiliyyee goo: «Ni giyye ɗa kulla kaytiŋ kadar gi lekka Ruuhanti Mellayi.» 3Gaa Pol inniɗiy gaa: «Batisiytoŋ batisiyo ŋawwa?» Guu tiiliyee goo: «Batisiyni batisiyti Yaaya.» 4Gaa Pol beneyyiyyoo gaa: «Yaaya batisiyiy giimi ma aŋka gu meeliɗiy gaari ku miɗɗa. Gaa beneyyiyyoo kulla gaa gu duwiy galbigeeco oko ma akka asa taarti, gata pa ay Iisa.»

5Maa gu giimi kotti giyyiya beneyyi keeke, guu batisiyɗiy ma semeetee Miltine kee Iisa. 6Gaa Pol gagiyyoogu pittee kayyeeco, gii Ruuhanti Mellayi beeriyyo. Guu waciɗe gu beneyɗo beneyyiŋgee ma ay kunco ɗa, o gu tasaa beneyyiŋgee ma asaa min Mellayi. 7Guta pa min paracco appe gu deewa latta ka orro o seera miɗi.

8Pol pa tan̰aa diiman girco Yawudigeyyo ka giraaniti, gaa nuntiɗe iŋaa koyyee subba o ga beneyya purta bala ɓayaw. Gaa beneyɗo ma gaari ku mulunniti Mellayi o ga dekerre asan gu giimi kotti ma geewa oyyiya beneyti kaaka kadar ga ay seene. 9Guu daare leeɗe kayyee ku talta gu alɗo aŋka ɗa amanno. Guu noƴoɗɗee gaari oko butulti Miltine kee Iisa unco giimi paracco. Gaa Pol oomiɗe min ger ka giraaniti, gaa uttiyyoo o ga marrikoo gimtee ma jobokkaa ka Iisa Masi ga garawɗiyo beneyti Mellayi meeni paracco ger ka giraaniti kee ka Tiranus. 10Ma lubbiti kaaka pa, ga Pol lekka ƴilaakee seera namma gu giimi paracco ma nowotte kiɗa ta Aazi, ma ay Yawudigee o ma ay Yawudigee ɗa giyyiyya beneyti Miltine kee Iisa.

Gaari ku rontee Seeba

11Gaa Mella leeɗe gaari ku ajjibiti ma Pol, 12namma gu giimi eterɗiyo oko gimco ma parayya kaɗiŋgee ku rootta ma esewwiya ziiti Pol, guu ma parayya rayyaɗɗo, o ma lekka awaaradgee kulla gu awaaradgeeco okomma. 13Iŋaa were kaaka pa, gu lekka Yawudigee daare aɗe ma tan̰aa darre ma darre gu peteɗɗiyoogu awaaradgeeco giimi maa gu bamakke. Guu cokkiɗe pitto ta sawaataŋgeyyo ma wakko ta semeetee Miltine kee Iisa goo: «Ma semeetee Iisa keeke maa ga Pol tasaa, ku oomoŋ!» 14Ma leewa kotti goŋŋa pa, ay rontee Seeba ku paysara. Seeba kaaka pa, ay Yawudince kaƴi aɗe ma ay kaƴi min oko taattuweeco soƴoowee ku saɗikaŋgeyyo. 15Gaa aarinne tiiliyyoo gaa: «Na ibinya Iisa, o na ibinya kulla Pol baŋ ga ay we. A kuŋ pa ay ini we?» 16Gaa gimu kaaka ma lekka aarinne torooriyɗiy rontee Seeba paracco. Gata pa ga ammuwti kaawiy gaa waggiɗiy ta tirta teete namma gu gaɗɗiɗe min girti sor̰omborta o ma awaareeco. 17Maa gu giimi paracco ku Epez ma ay Yawudigee o ma ay Yawudigee ɗa giyyiɗiy gaari kooko, guu paracco gu ɓayɗe ta tirta o gu karmiyiy ta tirta semeetee Miltine kee Iisa. 18Guu maani min aacco giimi ma dowwiy galbigeeco oko Iisa asiɗe gu asiɗiy beneyya unco giimo ma raɗɗa gaarco ku miɗɗa maa gu leelo. 19Guu maani min oko giimi ma leewa ambulla asikkiko kutubgeeco gu asiɗiy timma, guu iggiɗiy unco giimi paracco. Tamanne ka kutubgee kotti pa deewa latta ka orooruwee beeƴa alpaŋgee (50 000) ku tammayigeyyo#19.19 Orooruwee beeƴa alpaŋgee (50 000) ku tammayigeyyo ay orooruwee paysara o beeƴa maliyun (75 000 000) Fcfa. ma deewa pilko ta gurus maani ta kaw. 20Ay goŋŋa appe ga beneyti Mellayi tacilɗe ma gudiranti Miltine kee Iisa were paratti.

Giimi ku geegar ka Epez cepella hawwane

21Maa gu gaari kooko ƴiiliɗe, gaa Pol ma gaayo ta Ruuhanti Mellayi, icciɗe niyyane maa ga tappicca kiɗa ta Maseduwan o ta Akaay, gaa kaatiɗo Zerizalem. Gaa beneyɗo gaa: «Naa sare gonek Zerizalem aŋka na sarɗo kulla geegar ka Rooma.» 22Gaa n̰aamiɗiy gittee ku seera ma gayaa gu ommiɗe Maseduwan. Guta pa ay ini Timote ma giiti Eraste. Gata pa mare ga nambiɗe paalta kiɗa ta Aazi.

23Oko wikinne kaaka pa aatti Epez, gu giimi cipile hawwane yaata saananti butulti Miltine kee Iisa. 24Gaa lekkiɗo pe gimu kaƴi aɗe ma gu semeetee goo Demetiriyus. Gata pa ay kalaawa ka poddani. Gaa kalawɗo aleŋ gerra rootta ma saabayye ger ka aabidití zooraco tee Artemis. Gii kalliti taata eterɗiyo gurus maani oko giimi paracco ma ay kalaawee aleŋ gata. 25Gaa meene kaƴi, ga Demetiriyus tappiɗiy gittee o giimi daare maa ga lubbico ay aleŋ kanti. Gaa beneyyiyyoo gaa: «Miɗi, ku lekka kabarre kadar ga ayaawuwtine asaa min oko lubbi keeke. 26Innasoopa ku elle o ku giyyica paaɗe kabarre teete ma ase, maa ga gimu kee maa gu semeetee goo Pol beneyyayo oko giimo maa gaa gu zorri kooko maa ga kee giimi panakka ay ku tirta ɗa ta kaw. Guu giimi maani oyowɗiya beneyti. Gaa gederriyyo oko giimi maani, o ga iŋaa ɗa ka Epez innasoopa hadda gi kiɗa ta Aazi parattí appe. 27A gaa beneyya diiman goŋŋa soopa, ga lubbitine keeke nagakka, o ga keeke ɗa ka, giimi bakamki ɗa payya ger ka aabidití zoora ta yaata tee Artemis, o zooratine ta yaata maa gu giimi ku kiɗa ta Aazi o ku dunuuniti paracco aabaddaca ɗa payya.»

28Maa gu giyyiyya beneyti kaaka, guu boŋsiɗe guu cayyakɗo goo: «Yaata ay zoora ta Epez tee Artemis!» 29Gii hawwane tacilɗe geegar paratti. Guu bammiɗiy ini Gayuus ma giiti Aristaarke, miɗi ku seera ku Maseduwan ma ezekkiya Pol turguwwi. Guu giimi paracco kaatikkiko paar ka tatta oko were ka baramta maa gu giimi temeɗɗo#19.29 Were ka timmiti ka Epez kaaka ecekka latta ka orooruwee seera o bizgiƴi alpaŋgee (26 000) ku giimo.. 30Gaa Pol aŋkiɗo kaato ga deeɗo beneyya unco giimi kotti ma temekke, guu giimi ma jobokkaa ka Iisa Masi soopa toɗɗiyyee. 31Guu taattuwee daare ku kiɗa ta Aazi, ma ay lanjigeetee Pol n̰aamiyyee beneyyi goo ga addo kaata ɗa paari were maa gu giimi temeɗɗo. 32Gaa wikinne kaaka, gu giimi ma temekke amsiɗe pe gonek ka. Daare ƴa goo goŋŋa, daare pa goo goŋŋa ɗa. Guu ku maani appe alɗiy ibina ɗa kulla gaari ma katawwiko timmiti. 33Guu Yawudigee n̰aamiyya ta omma gimu maa gu semeetee goo Alekzandir unco giimo. Guu giimi minnaw jeppiyyeegu gaari ma deero ku maa ga gata pa beneyyiyyoogu oko giimi ku maani. Gaa cipiliyya pitti maa ga gaariɗo kadar ga aŋka beneyyi ku maa ga pirɗiy seneetee. 34Gaa maa gu giimi ibiniyya kadar ga ay Yawudince, guu cayyikiɗe paracco sawa, guu alɗo ƴapaa ɗa latta ka sahaŋgee seera goo: «Ma yaata pa ay zooratine tee Artemis aɗe ta Epez!»

35Gaa sulaayi pa, ga kitipaayaco giimi ku geegarri gederriyo oko giimo ga ƴaapiɗiy. Gaa leeɗiyoo gaa: «Giimi ku Epez! Giimi paracco ku dunuuniti ibina kadar gu giimi ku Epez ay guta appe ma pakarree oko ger ka aabidití zooratine ta yaata tee Artemis o buunití ma galee min samaani. 36Ma gederra ɗe ga meeliyya keeke lekka ɗa. Kaaka pa, ku ƴaapoŋ kantoŋ! Warroŋ maaƴi. Aɗoŋ lee ɗa maatiki bala mooyo. 37Ku askiko giimi kooko iŋeekite. Guta soopa negekke ɗa o gu masee ɗa ya maatiki min girti zoorati ka lollikiti o gu n̰elekkica ɗa zooratine. 38Gaa Demetiriyus ma gittee maa ga lubbico ay aleŋ kanti aŋka gu luumiyɗo kaƴi, gu ayya sakkiya ma meene, were maa gu giimi caɗawɗo parlane o gu asawki beneyco ka sakaaniti! 39A kuu lekka soopa gaari daare maa ku aŋka ellico, ke lekka timmo ta ajaawaŋgee ku geegarri ma caɗaa parlane. 40Goneka kee gi timmitine teete ma deero meente eterreene pe gaari ku suura kayyeetine, o gu giimi ku Rooma loomoyyane pe goo ke poocica mulunnico, gii timmitine teete ke alɗo gederra ɗa kee gaaricca baltí. A guu inninee goo ga ayme ma temekkine meente pa, ke gederra ɗa ke tiiliyyoo ma beneyyi ma wagaa.» Maa ga kitipaaya gaamiyya beneyti, gaa leeɗiyo oko giimo gaa gu tacilu.

Currently Selected:

Lubaakico N̰amaakeetee Iisa Masi 19: mmy

Highlight

Copy