Ruuka 20

Yëësu arabhööribhwa hano yaaruusya ubhwera ubhwaye

(Mataayo 21:23-27; Maariko 11:27-33)

1Urusikö nyabhorebhe, Yëësu yëëghyanga na okoraarekera abhantö Amangʼana Amaiya, mo-bhogho ubhwa risengerro irya Waryobha. Akaseetwa-mo na abhanene abha abhasëngëri, abhëëghya abha amaraghërryö agha Mosa, na abhaghaaka abha Ikiyahudi. 2Hano bhaahikirë, bhakamöbhöörya igha, “Tötëëbhi, m-bwera kë bhokoghera orakora amangʼana ghano? Nawë yaakohaana ubhwera bhuyö?”

3Akabhahonshora igha, “Tigha öni wonswe mbabhööri-ko engʼana. 4Ubhwera ubhwa Yohana ubhwa okobhatiisya abhantö, hai yaabhuruusiri? Nku-Waryobha, kasi nko-bhantö?”

5Bhakabhoorania abheene ko abheene igha, “Hano toraaghambe igha, nku-Waryobha bhwaaruurë, naraatöbhööri igha, ‘Ndarra mbe temwamukumiri hë?’ 6Na ghwiki hano toraamohonshore igha, ‘Ubhwera bhuyö, nko-bhantö bhwaarwërëëyë,’ abhantö bhonswe igho bhano bharëngë hano, mbatotema na amaghena, ko bhoora mbaakumiri igha, Yohana m-mörööti yaarë.” 7Mbe, bhakamohonshora igha, “Bhëëtö tetomanyirë hano bhwaarwërëëyë hë.”

8Yëësu wonswe akabhatëëbhya igha, “Kora öni wonswe tembatëëbhi hano naaruusya ubhwera ubhwa okokora amangʼana ghano.”

Abhatangati abha Ikiyahudi n-kya abharëmi abhaghogho

(Mataayo 21:33-46; Maariko 12:1-12)

9Mbe, Yëësu akabharëngërya ëkërëngyö igha, “Yaare-ho ömöntö, ono yëëmëri emezabhibhu kö-möghöndö ughwaye. Hano akomara, akaghosagharya ko-bharëmi, akaghya ikyaro ikya ahare, akaikara-yo sinsikö sinsharu. 10Hano enkaagha iya okoghesa yaahikirë, akatoma omoghorwa uwaaye, ko-bharëmi bhayö yaasaghaayi ömöghöndö ughwaye. Yaamötömirë, okore bhamohaane ikitweno ikyaye, keno bhaarenga bhaikererraini. Kasi hano yaahikirë, abharëmi bhaara, bhakamotema, bhakamurughya amabhoko masa igho.

11“Mwene ömöghöndö uyö, akatoma ghwiki omoghorwa uwöndë. Kasi uyö wonswe, bhakamotema, bhakamösöökërrya mo-bhantö, bhakamurughya amabhoko masa igho. 12Akatoma omoghorwa uwa katatö. Uyö wonswe bhakamunyahaara, bhakamorekera kebhara.

13“Mbe, mwene ömöghöndö uyö, akaibhöörya igha, ‘Bhoono iyakë nkaakora? Tigha mbe ntome omoona uwaane omoghonshe. Ndamanya uyö, mbaraamosooke.’

14“Kasi abharëmi bhayö, hano bhaarööshë omoona uwa mwene ömöghöndö, bhakatëëbhania igha, ‘Ono we arerya umwandö ughwa suwaabho. Bhoono tumwite, okore ömöghöndö ghobhe ughwëtö.’ 15Mbe, bhakamorekera kebhara iya ömöghöndö, bhakamwita.”

Ho Yëësu yaabhöörri igha, “Bhoono mbe möntëëbhi, iyakë mwene ömöghöndö uyö araakore abharëmi bhayö? 16Mwene ömöghöndö uyö naraashe, abhaite, aghosaghari ko-bharëmi abhandë.”

Mbe hano bhaaighuurë amangʼana ghayö, bhakaghamba igha, “Ghahetere hare iyö.” 17Yëësu akabhamoghorra amaiso, akabhabhöörya igha, “Möntëëbhi ensonga iya amaandeko ghano,

‘Reghena reno abhahaghaashi bhaangirë,

ndyo rebhaayë reghena rinene irya ko-koona iya umusingi ughwa inyumba.’#20:17 Maaha mo-ketabho ikya Zabhuri 118:22.

18“Mbe, ömöntö wowonswe ono araaghwere reghena riyö, uyö naraabhonekebhoneke. Na ömöntö ono reghena riyö reraaghwere, nderaamoghoshe anyike.”

19Abhëëghya abha amaraghërryö agha Mosa, na abhanene abha abhasëngëri, bhakamanya igha, m-bo arëngëëyi ëkërëngyö kiyö igha, m-barëmi abhaghogho! Bhakarerra bhököngʼu, bhakatuna bhamoghootere-ho, kasi bhakoobhoha abhantö.

Yëësu arabhööribhwa engʼana iya righööti

(Mataayo 22:15-22; Maariko 12:13-17)

20Ku bhuyö abhanene abha Abhayahudi bhayö, bhakabha bharaitaaha Yëësu bhököngʼu. Bhakatoma abhashamishi, bhatune enshera iya okoghashania Yëësu ko-mangʼana aghaaye. Abhashamishi bhayö, bhakaikora igha m-bantö abha heene. Bhakamöbhöörya amangʼana agha ukumunshinshighania, okore bhamoghoote, bhamuhire kö-mötöngi ono yaatöörrwë-ho na Kaisaari.

21Ku bhuyö, abhashamishi bhayö bhakamöbhöörya igha, “Umwëghya, ntomanyirë igha, nkoghamba örë na ukwëghya amangʼana agha obhoheene. Uwe tokoobhoha ikyeo ikya ömöntö wowonswe hë, kasi no-bhoheene ubhwa amangʼana agha Waryobha mbo ukwëghya abhantö. 22Tötëëbhi mbe, amaraghërryö aghëëtö gharaikërrya igha tohakenga Kaisaari righööti, kasi nkwanga gharë?”

23Yëësu akangʼura ubhwihunaania ubhwabho bhuyö, ku bhuyö akabhatëëbhya igha, 24“Munyöröki idinaari.” Hano bhaamwörökëri ëtöngörö iyö, akabhabhöörya igha, “Ekesosa na iriina bheno bhërëngë ku-dinaari kono, ni-ibhya wë?”

Bhakamohonshora igha, “Ni-ibhya Kaisaari.”

25Yëësu akabhatëëbhya igha, “Bhoono mbe ni-igha, ibhya Kaisaari mohaanenga Kaisaari. Na ibhya Waryobha, mohaanenga Waryobha.”

26Rihonshoro irya Yëësu riyö, rekabharöghöörya bhököngʼu, ko bhoora yaaibhashirë obhoghashaghasha ubhwabho. Bhakabhorwa engʼana iya okoghamba. Tebhaatörrë okomoghashania hë, ko-mangʼana ghano yaaghambirë mo-bhantö.

Yëësu arashumaashera amangʼana agha ukuryoka ukwa abhaku

(Mataayo 22:23-33; Maariko 12:18-27)

27Mbe, Abhasadukaayo#20:27 Abhasadukaayo ni-rikomo irya Abhaisiraëri ryaarë. Abhantö bhayö tebhaakumyanga igha, abhantö bhariryoka. Maaha mo-faharaasa. nyabhorebhe, bhonswe bhakaasha ku-Yëësu. Abhasadukaayo, ni-rikomo irya Abhayahudi reno ryëëghyanga abhantö igha, abhaku tebhariryoka hë. Mbe bhakamöbhöörya igha, 28“Umwëghya, omanyirë Mosa yaatoraghërrëëyi mo-maraghërryö igha, hano umushaasha akuurë atighirë mokaaye, kasi tiyebhora-ko omoona kora ömwë hë, ni-igha mura uwaabho atwenerwe omokari uyö, okore akorre mura uwaabho uyö yaakwa umughi. 29Toghambe igha, bhaare-ho abhamura muhungatë abha enda ëmwë. Umumura omotangi akateta, umumura uyö, akaheta akakwa, atatighirë-ko omoona kora ömwë. 30Mura uwaabho ono yaamooseranga, [akatwenerwa umusinö uyö. Wonswe akakwa igho atatighirë-ko omoona.]#20:30 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani. 31Bhakatwenera uwa katatö. Uyö wonswe akakwa ighoigho atatighirë-ko omoona. Amangʼana m-buyöbhuyö ghaabhaayë, ko bhonswe igho muhungatë. Mbaakuurë bhonswe igho, bhataibhööyë na omokari uyö. 32Omokari uyö wonswe, akakamba akakwa. 33Bhoono mbe ötötëëbhi, nyoore ukuryoka kooho, urusikö urwa ukuryoka roora, m-mokaa wë arebha? Ko bhoora yaatëtirwë na abhashaasha muhungatë bhonswe igho.”

34Yëësu akabhahonshora igha, “Abhantö abha ko-kebhara kono, nkotetana bharë. 35Kasi bhaara Waryobha araamaahe igha mbaingʼarëëyë ukuryökibhwa mo-bhaku, na okomenya mu-kyaro ekehya, bhayö tebharetetana hë. 36Ko bhoora tebharikwa ghwiki röndë hë. Mbarebha kya igho abhamaraika bharë. Mbarebha abhaana abha Waryobha, ko bhoora bhariryökibhwa ukurwa mo-bhaku.

37“Ukuryoka hökörë, kora Mosa ni-igho yaandëkirë ko amangʼana agha Omonene Waryobha mo-Maandeko Amahörëëru, ko ngʼana iya ekesaka keera kyookanga omorro. Yaandëkirë igha, ‘Nö-öni Waryobha uwa Ibhurahimu, Isaaka na Yaakobho.’#20:37 Maaha mo-ketabho ikya Ukurishoka 3:6. 38Ku bhuyö nokaanyoora igha abhantö bhayö n-kare bhaakwa, Waryobha yaaghambirë igha, m-bahöru ko-we. Abhaku na abhahöru, bhonswe igho m-bahöru bhaiki ku-Waryobha.”

39Ho abhëëghya abhandë abha amaraghërryö agha Mosa bhaaghambirë igha, “Umwëghya, m-buuya oghambirë.” 40Ukusimirya hayö, bhakoobhoha ököbhöörya Yëësu amangʼana aghandë.

Yëësu we umwebhorwa Daudighwiki m-Monene uwa bhonswe igho

(Mataayo 22:41-46; Maariko 12:35-37)

41Ho Yëësu yaabhatëëbhëri igha, “Ndarra abhantö bharaghamba igha, Kiristo narebha umwebhorwa uwa omokama Daudi! 42Na eno mbe Daudi umwene, mo-ketabho ikya Zabhuri yaandëkirë igha,

‘Omonene Waryobha yaatëëbhëri Omonene uwaane igha,

“Ikara bhoryo ubhwane hano, ahasë hano hakosookwa bhököngʼu,

43okohekera hano ndekokora otashere hansë abhabhisa abhaaho.” ’#20:43 Mu-Kiyunaani ni-igha, okohekera ntoore abhabhisa abhaaho hansë iya amaghörö aghaaho. Maaha mo-ketabho ikya Zabhuri 110:1.

44“Hano Daudi akobherekera Kiristo igha m-Monene uwaaye, bhoono iyakë ghwiki eraabhe igha Kiristo m-mwebhorwa uwaaye?”#20:44 Yëësu nu-uwa ekesaku ikya Daudi yaarë, nkyo kyaagheranga bharamobherekera igha m-moona uwa Daudi. Kasi ukurwa kare Yëësu yaarenga mu-ryobha. Daudi yaamobherekeranga igha Omonene ko bhoora Yëësu we Waryobha. Maaha mo-ketabho ikya Zabhuri 110.

Yëësu arashumaashera ekeghaaka ikya abhëëghya abha amaraghërryö agha Mosa

(Mataayo 23:1-36; Maariko 12:38-40; Ruuka 11:37-54)

45Enkaagha eno abhantö bhaamwitegherranga, ho Yëësu yaaraghërrëëyi abheegha abhaaye igha, 46“Mwiyangarre na abhëëghya abha amaraghërryö agha Mosa. Abhantö bhayö bhahanshirë okoghenda ko-nshera bhatöörrë sengansho isyabho sentambë, na ökökëëribhwa mo-meteera kwa okosookwa. Ghwiki mbahanshirë ukwikara ku-bhitumbë ibhya abhanene mu-sinyumba isya esango iya Abhayahudi. Na hano bharaarekwa inyangi, bhahanshirë ukwikara ahasë aha abhatangati. 47Amangʼana aghaabho m-maaru hano bhasaasaama Waryobha mo-bhantö. Nkokora bharë igho, okore abhantö bhakanye igha, m-bantö abha heene. Bhaana eteemo iya ököngʼënërrya abhasinö, bhabhatuhe ëbhëntö. Abhantö bhayö, Waryobha narebhashibhya bhököngʼu!”

Currently Selected:

Ruuka 20: ssc

Highlight

Copy