Ruuka 19

Yëësu aratöörya Zakaayo

1Yëësu yaasöhirë mu-mughi ghono ghwaabherekerwanga igha Yërikö, akaheta ghatëghatë iya umughi ghuyö, araghya Yërusarëëmu. 2Mu-mughi muyö, yaare-mo ömöntö nyabhorebhe ono yaabherekerwanga igha Zakaayo. Uyö we yaarë omonene uwa abhaghööti abha righööti, kora m-mwamë yaarë. 3Yaatunanga amaahe Yëësu iyakë arë. Kasi tiyaatörrë okomomaaha hë, ko okoghera iya rikomo irya abhantö reno ryaare-ho, na umwene wonswe m-mwëngʼë yaarë. 4Ku bhuyö, akakenya akatangata, akariina kö-mökö, okore amaahe Yëësu hano araahetere hayö.

5Hano Yëësu yaahikirë hayö, akagharamera kö-mökö, akaghamba igha, “Iika bhöngö Zakaayo, ko bhoora ni-igha reero mbe ömöghëni waaho ka.” 6Zakaayo akaika bhöngö ukurwa kö-mökö, akasërëënia Yëësu ukughya waaye ka, na eno ashömëëywë.

7Hano abhantö bhonswe igho bhaarööshë ghayö, bhakasimya ukwibhëmbëërya bharaghamba igha, “Aghëëyë okokora öbhöghëni uwa ömöntö uwa ëbhëbhë!”

8Kasi Zakaayo akemerra, akatëëbhya Omonene igha, “Ighwa Omonene uwëëtö nkötëëbhi. Ukurwa bhoono igho, ritënë irya ëbhëntö ibhyane, nendaahaane abhatöbhu. Na nyoore naaruusya ömöntö wowonswe ëkëntö ikyaye, n-kane ndaamukyörri, ko-kerengere keno naamuruusya.”

9Yëësu akaghamba igha, “Reero abhantö abha mu-nyumba mono, bhatööribhwi, ko bhoora Zakaayo ono wonswe, öörökëri igha, m-moona uwa Ibhurahimu ku-mukumo ghono aanagho. 10Omoona uwa Ömöntö nnaasha ukutuna, na ökötöörya abhantö bhano bhaasira.”

Ëkërëngyö ikya abhaghorwa bhano bhaatëghëëywë seehera

(Mataayo 25:14-30)

11-12Hano Yëësu yaarenga haangʼë ahike Yërusarëëmu, abhantö bhano bhaamwitegherranga, bhaakanyanga igha, Obhokama ubhwa Waryobha mbokaaishirë hayö na hayö.#19:11-12 Abhayahudi mbaamanyirë igha, Kiristo naakasimiiyi Yërusarëëmu haara obhokama ubhwaye, ko bhoora ngwo ghwaarë umughi ughwa omokama Daudi. Ku bhuyö, Yëësu akabharëngërya ëkërëngyö keno igha, “Yaare-ho ömöntö nyabhorebhe uwa eka iya ekekama. Ömöntö uyö, yaaghëëyë mu-kyaro ikya ahare, okore ahaanwe obhokama, akyore okotonga ikyaro ikyaye.

13“Hano waanyöörrë ataraatanora, akabherekera abhaghorwa abhaaye ikömi. Akabhahaana kera ömöntö ekerengere ekenene ikya seehera.#19:13 Ekerengere ekenene ikya seehera. Mu-Kiyunaani ni-igha, Akabhahaana kera ömöntö imina. Ko-nkaagha iya Yëësu imina yo yaarë ehoorohooro iya ömököri uwa emeremo ku imyëri etatö. Akabhatëëbhya igha, ‘Seehera seno, moghende musyëbhöri, okohekera hano ndikyora.’ 14Kasi ömöntö uyö, waanyöörrë yareghwa na abhantö abha mu-kyaro ikyaye. Abhantö abha mu-kyaro ikyaye, bhakatoma abhantö bhahire amangʼana igha, ‘Ömöntö ono titukutuna abhe omokama uwëëtö hë.’ 15Nokaanyoora bhaakörrë igho, kasi akahaanwa obhokama. Hano yaakyörrë, akabherekera abhaghorwa abhaaye bhayö yaatëghëëyë seehera, okore bhamötëëbhi ehoorohooro eno bhaanyoora-mo.

16“Omoghorwa uwaaye uwa mbere, akaasha, akaghamba igha, ‘Omonene uwëëtö, ko-seehera seno waantëghëëyë, naanyoora-mo sehoorohooro isyëndë ikömi.’

17“Omonene akamötëëbhya igha, ‘Ökörrë bhuuya, uwe omoghorwa, m-möntö uwa heene örë, kora m-moheene örë! Ko bhoora obhaayë omoghorwa uwa heene kö-këntö ekeke bhököngʼu kya kiyö, ndakohaana ubhwera ubhwa ukwimererra imighi ikömi.’

18“Omoghorwa uwa kabhërë wonswe akahika, akatëëbhya omonene uyö igha, ‘Omonene uwëëtö, ko-seehera seno waantëghëëyë, naanyoora-mo sehoorohooro isaano.’

19“Omonene akamötëëbhya igha, ‘Uwe wonswe ndakohaana ubhwera ubhwa ukwimererra imighi etaano.’

20“Omoghorwa uwöndë uwa katatö, akahika, akatëëbhya omonene uyö igha, ‘Omonene uwëëtö, seehera isyaho seno waantëghëëyë, n-seeno hano. Naasësënënëkirë mu-ngibho okore setakaasira. 21Naakörrë igho, ko bhoora nkokoobhoha ndë. Uwe nö-möntö ömöbhë örë! Nkoghegha örë kora keno otatöörrë-ho. Nkoghesa örë kora keno ötëëmëri.’

22“Omonene uyö akamohonshora igha, ‘Uwe no-moghorwa omoghogho örë! Nda oghambirë igha öni nö-möntö ömöbhë ndë? Nkoghegha ndë keno ntatöörrë-ho? Nkoghesa ndë keno ntëëmëri? Bhoono nendaakobhotorre ikiina ikyaho kya bhuyö uwe umwene oghambirë. 23Nyoore ni-igho ndë, n-kwakë otaatöörrë seehera isyane siyö mö-bhënki, okore hano nkaakyörrë nyoore-ko ehoorohooro?’

24“Omonene akatëëbhya abhantö bhano bharenga bhaimërëëyë haangʼë na omonene uyö igha, ‘Mumuruusi seehera siyö, mohaane uyö yaanyöörrë sehoorohooro ikömi.’

25“Bho bhakamohonshora igha, ‘Omonene uwëëtö, maaha uyö naana sehoorohooro ikömi!’

26“Akabhatëëbhya igha, ‘Kera ömöntö ono akokora bhuuya emeremo gheno aanaghyo, nkumwëngërya ndë ughwöndë. Kasi ömöntö ono atakokora bhuuya omoremo ghono aanagho, keno aanakyo nkuruusibhwa arë. 27Bhoono abhabhisa abhaane, bhaara bhataatunanga igha mbe omokama uwaabho, mobhareete bhöröngë ubhwane hano, mobhaite.’ ”

Yëësu araturungʼanwa Yërusarëëmu kya omokama

(Mataayo 21:1-11; Maariko 11:1-11; Yohana 12:12-19)

28Hano Yëësu yaamarrë okoghamba ghayö, akaghëndërrya na oroghendo urwaye, urwa ukutiira ukughya Yërusarëëmu, atangatirë mbere iya abhantö bhayö yaarë nabho. 29Hano yaahikirë haangʼë na ibhishishi ibhya Bhetifaghe na Bhetania, ku-nguku eno yaabherekerwanga igha iya Ëmëzëituuni, akatoma abheegha abhaaye abhabhërë. 30Akabharaghërrya igha, “Moghende mu-kishishi kiyö kërëngë mbere hayö. Hano moraahike-mo, moraanyoore-mo ekeghaini ikya itikërë kisibhirwë, keno ketaraaikarrwa na ömöntö. Moketashore, mokendeetere. 31Nyoore ömöntö nabhabhöörya igha, ‘Ndarra moratashora ekeghaini kiyö!’ Momohonshore igha, ‘Omonene uwëëtö we akukituna.’ ”

32Mbe, abheegha bhayö bhakaghya. Hano bhaahikirë, bhakanyoora bhoora Yëësu yaabhatëëbhëri, mbo amangʼana gharë. 33Hano bhaatashoranga ekeghaini ikya itikërë kiyö, abheene-kyo bhakabhabhöörya igha, “Ndarra moratashora ekeghaini ikya itikërë kiyö?” 34Bhakabhahonshora igha, “Omonene uwëëtö we akukituna.” 35Mbe, bhakaherra Yëësu, ekeghaini ikya itikërë kiyö. Bhakaarya-ko singibho isyabho, Yëësu akariina-ko, akaikara.

36Yëësu akaghëndërrya na oroghendo urwaye, abhantö bhakabha bharatandeka singibho isyabho ko-nshera. 37Hano yaahikirë haangʼë na ikihiringityö ikya Inguku iya Ëmëzëituuni, rikomo ryonswe igho irya abheegha abhaaye, rekasimya ukukumya Waryobha bhököngʼu, rishömëëywë, ko okoghera iya amakono ghonswe igho ghano rikomo irya abhantö ryaarööshë. 38Bhakatöönia igha,

“Waryobha angʼoore omokama ono akuusha ko okohetera iriina irya Omonene Waryobha.#19:38 Maaha mo-ketabho ikya Zabhuri 118:26.

Omorembe ghobhe ku-Waryobha na abhantö abhaaye,

na atöönibhwi Waryobha ono arëngë kighörö iya ëbhëntö bhyonswe igho.”

39Abhafarisaayo nyabhorebhe bhano bhaarë mu-rikomo muyö, bhakatëëbhya Yëësu igha, “Umwëghya, takaania abheegha abhaaho bhayö, bhatakaghamba igho.”

40Yëësu akabhahonshora igha, “Hano bhano bharaakire, amaghena ngaraasherre.”

Yëësu arakoorra umughi ughwa Yërusarëëmu

41Hano Yëësu yaahikirë haangʼë na umughi ughwa Yërusarëëmu, bhuyö yaaghörööshë igho, akasimya okoghokorra. 42Akaghushumaashera igha, “Singa bhëënyu abhantö abha Yërusarëëmu, mokaamanyirë reero enshera iya ukunyoora omorembe, kasi bhoono yaabha ikibhisirë kö-bhëënyu. 43Enkaagha iriihika-ho, eno abhabhisa abhëënyu bharebhainaarrya obhogho, okore bhabharööni, ukurwa mbaara syonswe igho. 44Hayö ho bhëënyu murisikibhwa, hamwë na abhaana bhëënyu bhonswe igho. Tereeho reghena reno riritighara ku-ryëndë hë. Umughi ghono ngoretemorwa, ko bhoora enkaagha eno Waryobha yaaishirë okobhatöörya, temwamanyirë hë.”

Yëësu ararughya abhaköri abha ibhyashara mo-bhogho ubhwa risengerro

(Mataayo 21:12-17; Maariko 11:15-19; Yohana 2:13-22)

45Yëësu akaghya igho, akasoha mo-bhogho ubhwa risengerro irya Waryobha. Akasimya ökökënyia abhantö bhano bhaaghöryanga muyö ëbhëntö. 46Akabhatëëbhya igha, “Yandëkirwë mo-Maandeko Amahörëëru agha Waryobha igha, ‘Risengerro iryane nderaabhe ahasë aha amasabhi.’#19:46a Maaha mo-ketabho ikya Isaaya 56:7. Kasi bhoono bhëënyu mörëkörrë kya ‘risana irya abhasaki!’#19:46b Maaha mo-ketabho ikya Yeremia 7:11.”

47Mbe, Yëësu akabha arëëghya abhantö mo-bhogho ubhwa risengerro irya Waryobha muyö, kera urusikö. Abhanene abha abhasëngëri na abhëëghya abha amaraghërryö agha Mosa na abhaghaaka abha Ikiyahudi, bhakabha bharatuna enshera iya ukumwita. 48Kasi tebhaanyöörrë umweya hë, ko bhoora abhantö bhonswe igho, mbaamosoorananga, bharamwitegherra.

Currently Selected:

Ruuka 19: ssc

Highlight

Copy