Yohana 6

Abhantö okoheteera ëbhëkwë bhitaanobharahaanwa ibhyakorya na Yëësu

(Mataayo 14:13-21; Maariko 6:33-44; Ruuka 9:12-17)

1Hano ghayö ghaahööyë, Yëësu akaamboka inyansha iya Ghariraaya, iriina iryëndë erabherekerwa igha, inyansha iya Tibhëëria. 2Rikomo rinene irya abhantö ryaasoorananga Yëësu, ko bhoora ryaarenga rërööshë ebhemanyërryö ibhya amakono ghano yaakoranga agha ukuhwënia abharööyë. 3Ku bhuyö Yëësu akariina ku-nguku hamwë na abheegha abhaaye, akaikara nabho-ko. 4Enkaagha iyö, inyangi iya Abhayahudi iya Epasaka n-haangʼë yaarë.

5Hano Yëësu yaarööshë rikomo rinene irya abhantö reraasha ko-we, akabhöörya Firipö igha, “Hai tokaaghora ibhyakorya tohaane abhantö bhano bharaaghere?” 6Yëësu yaabhöörri Firipö igho, ku ukumushaashya, ko bhoora yaarenga amanyirë umwene bhono akaakörrë. 7Firipö akamohonshora igha, “Kora emekaate ighya sidinaari amaghana abhërë,#6:7 Sidinaari amaghana abhërë. Ekerengere kiyö ni-ikya ehoorohooro iya ömöntö iya imyëri monaane kyaarë. tighikwisa hë, nokatwenera ömöntö kakekake igho.” 8Hayö ho Anderea umwegha uwöndë uwa Yëësu, mumura uwaabho Simööni Peetero enda ëmwë, akatëëbhya Yëësu igha, 9“Aahano umumura uwöndë, aana emekaate etaano ighya ishayiri, na sinswë ibhërë. Bhoono ibhyakorya bhiyö mbiisa rikomo ryangʼana hano?” 10Mbe, Yëësu akaraghërrya abheegha abhaaye igha, “Mötëëbhi abhantö bhaikare.” Ahasë hayö haarë na ubhunyanki ubhwaru, abhantö bhakaikara ko-manyanki. Ekerengere ikya abhashaasha abheene igho, bhano bhaare-ho, nkyaaheteeranga abhantö ëbhëkwë bhitaano. 11Mbe Yëësu akaghegha emekaate ghiyö, akakumya Waryobha, akatwenera abhantö bhano bhaarenga bhaikaayë. Akakora ighoigho na sinswë syonswe, kera ömöntö akanyoora ko okorengʼaana na bhono yaatunanga.

12Hano abhantö bhonswe igho bhaaighötirë, Yëësu akatëëbhya abheegha abhaaye igha, “Mokomani ebhesansa bhyonswe igho ibhya ibhyakorya bheno bhetamirë, okore bhetakaasareka.” 13Mbe, bhakakomania ebhesansa ibhya ibhyakorya bhyonswe igho bheno bhyaatamirë, bhakaishörya ebhekapo ikömi na bhibhërë ibhya emekaate ighya ishayiri.

14Hano abhantö bhayö bhaarööshë rikono irya ekemanyërryö kiyö Yëësu yaakörrë, bhakaghamba igha, “Obhoheene ömöntö ono, nö-mörööti uwa Waryobha, ono twaitengʼeranga igha, naraashe ko-kebhara kono.”#6:14 Maaha Eheetoko iya Etoraati 18:15-19. 15Ko bhono Yëësu yaamanyirë igha, abhantö bhayö mbaatunanga bhamokore igha abhe omokama uwaabho kwa nguru, akatanora akarwa hayö, akaghya ghwiki mu-nguku umwene igho.

Yëësu araghenda ku-nyansha kighörö

(Mataayo 14:22-33; Maariko 6:45-52)

16Enkaagha iya omoghoroobha, abheegha abha Yëësu bhakangʼaaraara ukughya ku-nyansha iya Ghariraaya. 17Bhakariina mu-bhwato, na ukusimya oroghendo urwa ukwamboka inyansha ukughya mu-mughi ughwa Kaperenaumu. Enkaagha iyö, n-kisuntë kyaarë, kasi Yëësu tuwaanyöörrë araasha hë.

18Mbe, inyansha ekasareka, ko bhoora rikama rirörö ryaaherranga. 19Hano abheegha abha Yëësu bhaarenga bhahikirë obhotambë ubhwa sikiromiita isaano handë isansabha igho, bhakamaaha Yëësu araghenda ko-manshë kighörö, haangʼë na ubhwato, bhakoobhoha. 20Yëësu akabhatëëbhya igha, “Motakoobhoha nö-öni!” 21Mbe, bho bhakatuna igha ariine mu-bhwato. Kamwë igho, ubhwato bhokahika humbu eno bhaaghyanga.

Yëësu we ibhyakorya bheno bhekohaana abhantö öbhöhöru

22Hano bhwaakëëyë, rikomo irya abhantö bhano bhaatighaayë humbu iya inyansha eera, bhakamaaha igha ubhwato m-bömwë igho bhwaare-ho. Kora mbaamanyirë igha, Yëësu tiyaahinaini hamwë na abheegha abhaaye, mu-bhwato moora hë, kasi abheegha abhaaye, na-bheene igho bhaaghëëyë. 23Mbe, bhakaasha abhantö na amaato aghandë ukurwa Tibhëëria, bhakahika ahasë hano rikomo irya abhantö bhaarëëyë emekaate hano Omonene Yëësu yaakumiri Waryobha. 24Hano rikomo irya abhantö bhayö ryaamanyirë igha Yëësu tiyaarë hayö hë, kora abheegha abhaaye bhonswe tebhaare-ho hë, bhakariina mo-maato ghayö, bhakaghya Kaperenaumu ukutuna Yëësu.

25Hano abhantö bhayö bhaahikirë humbu iya inyansha, bhakanyoora-yo Yëësu, bhakamöbhöörya igha, “Raabhi, n-dööhë waasha eno?” 26Yëësu akabhahonshora igha, “No-bhoheene nkobhatëëbhya igha, nemanyirë keno mokontonera. Nkuntuna mörë te-ko bhoora igha momanye ensonga iya ebhemanyërryö ibhya amakono bheno naakora, kasi n-ko bhoora naabhahaayë emekaate, mokarya, mokeeghota. 27Motakaakoranga emeremo ko okoghera iya ukunyoora ibhyakorya bheno bhekosareka, kasi mokorenga emeremo ko okoghera iya ibhyakorya bheno bhëköghëndërrya okobha-ho kora nkohaana bhërë abhantö öbhöhöru ubhwa amakora ghonswe igho. Ibhyakorya bhiyö, mbyo öni Omoona uwa Ömöntö nkohaana abhantö, ko bhoora Taata Waryobha yaangʼaana obhotoro ubhwa okokora ghayö.” 28Mbe, bhakabhöörya Yëësu igha, “N-kë tokaakora, okore tokore amangʼana ghano Waryobha akutuna?” 29Yëësu akabhahonshora igha, “Amangʼana ghano Waryobha akutuna mokore n-gaano hano, munkumi öni, ono naatomwa nawe.”

30Mbe, bhakamöbhöörya igha, “Bhoono n-kemanyërryö kë oraakore ikya rikono keno toraamaahe, tukukumi? Ne-ngʼana kë oraakore? 31Abhakörö abhëëtö bhaarëëyë ibhyakorya bheno bhyaabherekerwanga igha, emana#6:31a Maaha mo-ketabho ikya Ukurishoka 16:4-36. hano bhaarenga ku-riköngö, kya bhono Amaandeko Amahörëëru ghakoghamba igha, ‘Yaabhahaayë ibhyakorya ibhya ukurwa mu-ryobha bharaaghere.’ #6:31b Maaha mo-ketabho ikya Zabhuri 78:24.” 32Mbe Yëësu akabhatëëbhya igha, “No-bhoheene nkobhatëëbhya igha, tërëngë igha Mosa we yaahaayë bhaaghuuka wëënyu ibhyakorya bheno bhyaaruurë mu-ryobha, kasi n-Taata we akobhahaana ibhyakorya ibhya obhoheene bheno bhikurwa mu-ryobha. 33Ko bhoora ibhyakorya ibhya Waryobha m-beno bhikurwa mu-ryobha, na ibhyakorya bhiyö, nö-öni ono nkohaana öbhöhöru abhantö bhonswe igho abha ko-kebhara.” 34Mbe, abhantö bhayö bhakatëëbhya Yëësu igha, “Omonene, tohaanenga ibhyakorya ibhya eteemo iyö sinsikö syonswe igho.” 35Yëësu akabhahonshora igha, “Öni nö-öni ibhyakorya bheno bhekohaana abhantö öbhöhöru. Ömöntö wowonswe igho ono akuusha ku-öni, na ukunkumya, tariighwa röndë umweko hë. Ghwiki tariighwa inyonta kora hake hë.

36“Kasi öni naabhatëëbhya igha, nokaanyoora möndööshë, kasi timukukumya hë. 37Abhantö bhonswe igho bhano Taata akongʼaana, mbaraashe ku-öni. Umukumya ono akuusha ku-öni, tinkumwanga hë. 38Öni tenaasha ukurwa mu-ryobha okore nkore bhono nkutuna, kasi naasha igha, nkore bhono akutuna Taata ono yaantoma. 39Keno akutuna ono yaantoma ni-igha, ntakasirya ömöntö kora ömwë ko bhano akongʼaana, kasi mbaryöki urusikö urwa umuhiko. 40Keno Taata akutuna ni-igha, kera ömöntö ono akomanya igha öni m-moona uwa Taata Waryobha ndë, na ukunkumya, ni-igha abhe na öbhöhöru ubhwa amakora ghonswe igho. Uyö öni nindimuryökya urusikö urwa umuhiko.”

41Mbe Abhayahudi abha hayö, bhakasimya ukwibhëmbëërya ko bhoora Yëësu yaighambirë igha, “Nö-öni ibhyakorya bheno bhikurwa mu-ryobha.” 42Bhakabhoorania igha, “Kanaa, ono ti-Yëësu omoona uwa Yusufu, kora abhaibhöri abhaaye bhonswe igho ntobhamanyirë? Bhoono n-kwakë akoghamba igha, ‘Naarwa mu-ryobha?’” 43Yëësu akabhahonshora igha, “Mutighe ukwibhëmbëërya abheene ko abheene ko amangʼana aghaane. 44Taaho ömöntö ono akotora ukuusha ku-öni, hano atatangatirwë na Taata Waryobha ono yaantoma. Na ömöntö uyö, we ndiryökya urusikö urwa umuhiko. 45Amaandeko Amahörëëru agha abharööti gharaghamba igha, ‘Abhantö bhonswe igho, mbaryëghibhwa na Waryobha.’#6:45 Maaha mo-ketabho ikya Isaaya 54:13. Mbe ömöntö wowonswe igho ono akwitegherra na ukwegha ukurwa ko-Taata, nkuusha arë ku-öni. 46Taaho ömöntö ono yaamaaha Taata Waryobha, kasi nö-öni umwene igho namomaaha, ko bhoora nku-mwene uyö naarwa.

47“No-bhoheene nkobhatëëbhya igha, ömöntö wowonswe igho ono akunkumya, uyö naana öbhöhöru ubhwa amakora ghonswe igho. 48Öni nö-öni ibhyakorya bheno bhekohaana abhantö öbhöhöru. 49Nokaanyoora abhakörö abhëënyu bhaarëëyë emana ku-riköngö, kasi mbaakuurë. 50Kasi hano, bheeho ibhyakorya bheno bhiruurë mu-ryobha. Ku bhuyö ömöntö ono araaraaghere ibhyakorya bhiyö, uyö tarikwa hë. 51Öni nö-öni ibhyakorya ibhya öbhöhöru bheno bhyaarwa mu-ryobha. Ömöntö ono araaraaghere ibhyakorya bhiyö, nkobha arë na öbhöhöru ubhwa amakora ghonswe igho. Ibhyakorya bheno ndaahaane abhantö bhonswe igho ko okoghera iya öbhöhöru, nö-möbhërë ughwane.”

52Mbe, Abhayahudi bhakasimya ukunyeerana senkaani kö okobhoorania igha, “Ömöntö ono iyakë araatore okotohaana ömöbhërë ughwaye, toraaghere?” 53Ku bhuyö Yëësu akabhatëëbhya igha, “No-bhoheene nkobhatëëbhya igha, hano moraange okorya ömöbhërë ughwane, na ukunywa amaanyinga aghaane öni Omoona uwa Ömöntö, temoobhe na öbhöhöru ubhwa amakora ghonswe igho hë. 54Ömöntö ono akorya ömöbhërë ughwane na ukunywa amaanyinga aghaane, uyö naana öbhöhöru ubhwa amakora ghonswe igho, na uyö, we ndiryökya urusikö urwa umuhiko. 55Ko bhoora ömöbhërë ughwane, ngo ibhyakorya ibhya obhoheene, na amaanyinga aghaane, ngo ikinywebhwa ikya heene. 56Ömöntö ono akorya ömöbhërë ughwane na ukunywa amaanyinga aghaane, uyö nköghëndërrya arë okobha na öbhömwë na öni na öni wonswe nköghëndërrya ndë okobha öbhömwë nawe. 57Taata Waryobha ömöhöru yaantoma, na öni wonswe neena öbhöhöru ukurwa ku umwene uyö. Ku bhuyö ömöntö ono araandaaghere, uyö naraanyoore öbhöhöru ukurwa ku-öni.#6:57 Maaha mo-ketabho ikya Yohana 5:21. 58Mbe, öni nö-öni ibhyakorya bheno bhiruurë mu-ryobha. Ibhyakorya bheno bhetatuubhaini na ibhyakorya bheno abhakörö abhëënyu bhaarëëyë, bhakakwa. Kasi ömöntö ono araandaaghere öni, uyö naraabhe na öbhöhöru ubhwa amakora ghonswe igho.” 59Yëësu yaaghambirë amangʼana ghayö, enkaagha eno yëëghyanga mu-nyumba iya esango iya Abhayahudi,#6:59 Inyumba iya esango iya Abhayahudi. Maaha mo-faharaasa. Kaperenaumu haara.

Abheegha abhaaru bharatigha ukukumya Yëësu

60Hano abhantö abhaaru mo-bheegha abhaaye bhaaighuurë amangʼana ghayö, bhakaghamba igha, “Amëëghyö ghano m-marito bhököngʼu! N-nawë akaghakumya?” 61Hano Yëësu yaangʼurrë igha, abheegha abhaaye nkwibhëmbëërya bharë ko okoghera iya amangʼana ghayö yaaghambirë, akabhabhöörya igha, “Kasi, engʼana iyö nebhatimbirë? 62Bhoono iyakë erebha hano moreemmaaha öni Omoona uwa Ömöntö, ndatiira ukughya mu-ryobha ahasë hano naarë ekembere? 63Umwika uwa Waryobha we akohaana abhantö öbhöhöru. Esemoko iya ömöntö, teena obhotoro bhwobhwonswe bhoora hë. Amangʼana ghano mbatëëbhëri, na-agha Umwika uwa Waryobha, kora ngaana öbhöhöru ubhwa amakora ghonswe igho. 64Kasi hobharë abhandë mö-bhëënyu, bhano bhakwanga ukunkumya.” Yëësu yaaghambirë igho, ko bhoora yaamanyirë ukurwa okosemoka igha, m-baabho wë bhaamukumyanga, na ghwiki igha n-nawë akaamunyëërëëyë inikö. 65Mbe akaghëndërrya okobhatëëbhya igha, “Kiyö nkyo këghërrë nkabhatëëbhya igha, taaho ömöntö ono akotora ukuusha ku-öni, hano atatangatirwë na Taata.”

66Hano bhaaighuurë amangʼana ghayö, abhaaru mo-bhasoorani abhaaye, bhakamutigha, ghwiki tebhamara bhamosoorane hë. 67Mbe, Yëësu akabhöörya abheegha ikömi na bhabhërë bhaara igha, “Kasi, na bhëënyu bhonswe nkutuna mörë okotanora?” 68Simööni Peetero akamohonshora igha, “Omonene, nkö-öwë toraabhate? Uwe noona amangʼana ghano ghakotohaana öbhöhöru ubhwa amakora ghonswe igho. 69Bhëëtö nkukumya törë, kora ntomanyirë igha, uwe m-Möhörëëru uwa Waryobha örë.” 70Ho bhoono Yëësu yaabhatëëbhëri igha, “Tenaabhashaaghora bhëënyu ikömi na bhabhërë? Kasi ömwë mö-bhëënyu muyö, aamo uwa Oghosambwa.”#6:70 Oghosambwa. Maaha mo-faharaasa. 71Hayö Yëësu yaashumaasheranga Yuuda omoona uwa Simööni Isikariyote. Ko bhoora uyö, we yaanyëërëëyë Yëësu inikö, nokaanyoora yaarenga ömwë mo-bheegha ikömi na bhabhërë bhaara.

Currently Selected:

Yohana 6: ssc

Highlight

Copy