Yohana 5

Yëësu arahwënia ritengʼo

1Hano ghayö ghaahööyë, Yëësu akatiira ukughya Yërusarëëmu okorya-yo inyangi nyabhorebhe iya Abhayahudi. 2Yërusarëëmu muyö, ghwaare-mo ughuhiita oghonene ghono ghwaabherekerwanga ku-Kiëbhuraania igha, “Ughuhiita ughwa amangʼöndi.”#5:2 Umughi ughwa Yërusarëëmu ghwaahaghaashëëywë obhogho ubhwa amaghena, bhono bhwaainaarrë umughi ghwonswe igho. Obhogho bhuyö, bhwaarë na ebhesaku ibhyaru. Kera ekesaku kyaarë na iriina irya-ko. Ekesaku ëkëmwë kyaahaaywë iriina irya Ughuhiita ughwa amangʼöndi, ko bhoora ekesaku kiyö kyaarë haangʼë na omoteera, ghono bhaaghörryanga-mo amangʼöndi na sityënyi isyëndë. Maaha mo-ketabho ikya Nëhëmia 3:1, 12:39. Haangʼë na ughuhiita ghuyö, ryaare-ho riribha reno ryaabherekerwanga ku-Kiëbhuraania igha Bhëtizaata. Riribha riyö, ryaarë na obhosekerro bhutaano ubhwa imitimö, bhono mbwaainaarri riribha riyö. 3Abharööyë m-baaru bhaarenga bharaayë hayö, abhahukuru, amatengʼo, na abharööyë abha amasusu. [Bhaaghanyanga igha amanshë ghabhurungwe, 4ko bhoora maraika uwa Omonene Waryobha#5:4a Maraika uwa Omonene Waryobha. Maaha mo-faharaasa. yaashanga abhurunga amanshë mwi-ribha riyö, ömörööyë ono yaasohanga-mo mbere, uyö we yaahwenanga öbhörööyë ubhwaye bhono yaarë nabho.]#5:3-4b Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani. 5Yaarenga-ho umushaasha uwöndë ahasë hayö, umushaasha uyö, m-mörööyë yaarë ku-ribhagha irya imyoka merongo etatö na monaane. 6Mbe, hano Yëësu yaarööshë araayë hayö, akamanya igha yaaroora ribhagha ritambë, akamöbhöörya igha, “Uwe, nkutuna örë uhwene?” 7Ömörööyë uyö akahonshora Yëësu igha, “Omonene, teneena ömöntö uwa okontoora mwi-ribha hano amanshë ghabhorongorwa. Hano natuna igha nsohe mwi-ribha muyö, ömöntö uwöndë antangatera okosoha-mo.” 8Mbe, Yëësu akatëëbhya ömörööyë uyö igha, “Emoka ogheghe rishambi iryaho, oghende.” 9Kamwë igho, ömöntö uyö akahwena, akaghegha rishambi iryaye, akasimya okoghenda.

Urusikö ruyö Yëësu yaahwënëri ömöntö uyö, nu-urwa Obhotooro#5:9 Obhotooro. Maaha mo-faharaasa. rwaarë. 10Ku bhuyö, abhatangati abha Abhayahudi bhakatëëbhya ömöntö uyö yaahwëniibhwi igha, “Reero nu-rusikö urwa Obhotooro, amaraghërryö teghakukwikërërrya okoghegha rishambi iryaho hë.” 11Kasi umwene akabhahonshora igha, “Ömöntö ono anhwënëri, we antëëbhëri igha, ‘Emoka ogheghe rishambi iryaho, oghende.’” 12Bhakamöbhöörya igha, “M-möntö kë uyö akötëëbhëri igha, ‘Ghegha rishambi iryaho oghende?’” 13Kasi ömöntö uyö yaahwëniibhwi, tiyaamanyirë ono yaamuhwënëri hë, ko bhoora Yëësu tiyaamaahekaini mo-bhantö abhaaru bhano bhaarë hayö.

14Hano ghayö ghaahööyë, Yëësu akasikana na ömöntö uyö kö-bhööri ubhwa risengerro, akamötëëbhya igha, “Bhoono uhwënirë, kasi wangarre, utighe okokora ëbhëbhë. Hano otaatighe, engʼana indito bhököngʼu, irikunyoora okokera iyö waarenga nayo.” 15Këmwë ömöntö uyö akaghya ökötëëbhya abhatangati abha Abhayahudi igha, Yëësu we yaamuhwënëri. 16Mbe, abhatangati abha Abhayahudi bhakasimya kunyankya Yëësu, ko bhoora yaahwënianga abhantö kora ku-rusikö urwa Obhotooro.

17Kasi Yëësu akabhahonshora igha, “Waryobha n-Taata, nkokora arë emeremo sinkö syonswe igho, nkyo kekoghera na öni wonswe ndakora emeremo.” 18Ko okoghera iya amangʼana ghayö Yëësu yaaghambirë, abhatangati abha Abhayahudi bhakasimya ukutuna enshera iya ukumwita. Te-ko okoghera iya obhosarya ubhwa urusikö urwa Obhotooro ubhwene igho, kasi na ko bhoora yaaghambanga igha, Waryobha n-Suwaabho. Ku bhuyö bhakamaaha igha, nkwirengʼaania arë na Waryobha.

Obhotoro ubhwa Omoona uwa Waryobha

19Yëësu akahonshora abhatangati bhayö igha, “No-bhoheene nkobhatëëbhya igha, Omoona uwa Waryobha, takotora okokora ryoryonswe igho ko obhotoro ubhwaye hë. Kasi nkokora arë ghano akomaaha Suwaabho arakora. Ghonswe igho ghano Suwaabho akokora, ngo ghayöghayö na Omoona wonswe araakore. 20Ko bhoora Taata nahanshirë Omoona uwaaye, nkyo kekoghera aramwörökya kera ëkëntö keno akokora, kora naraamwöröki amangʼana amarito okokera ghano, okore moroghoore bhököngʼu. 21Kya bhono Taata akuryökya abhaku, na okobhahaana öbhöhöru, ni-ighoigho Omoona wonswe akohaana öbhöhöru ömöntö wowonswe ono akutuna igha ahaane. 22Taata takobhotorra ikiina ömöntö wowonswe igho, kasi yaahaana Omoona ubhwera bhwonswe igho ubhwa okobhotorra ikiina abhantö bhonswe igho. 23Yaakörrë igho, okore abhantö bhonswe igho bhasooke Omoona kya bhono bhakosooka Taata. Ömöntö ono atakonsooka öni Omoona, uyö takosooka Taata ono yaantoma. 24No-bhoheene nkobhatëëbhya igha, ömöntö ono akwighwa engʼana iyaane na ukukumya Waryobha ono yaantoma, uyö naana öbhöhöru ubhwa amakora ghonswe igho. Ömöntö kya uyö, tarebhotorrwa ikiina hë. Uyö amarrë ukwamboka ukurwa mu-ruku, bhoono asöhirë mö-bhöhöru. 25No-bhoheene nkobhatëëbhya igha, enkaagha eraasha, kora bhoono ihikirë, eno abhaku bharaaighwe engamba iya Omoona uwa Waryobha. Abhaku bhano bharaaighwe engamba iyö, mbaraabhe na öbhöhöru. 26Kya bhono Taata arëngë esemoko iya öbhöhöru, ni-ighoigho kora yaahaana Omoona uwaaye esemoko iya öbhöhöru bhuyö. 27Ghwiki, yaamohaana ubhwera ubhwa okobhotorra abhantö ibhiina, ko bhoora m-Moona uwa Ömöntö. 28Motakaaroghoora amangʼana ghayö ngambirë, ko bhoora enkaagha irihika-ho, eno abhaku bhonswe igho abha mo-sembeehera, bhariighwa engamba iyaaye. 29Mbarirwa-mo, mbariryökibhwa na Waryobha. Bhano bhaakora amangʼana amaiya, mbarehaanwa öbhöhöru. Kasi bhano bhaakora amangʼana amaghogho, mbarebhotorrwa ikiina.”

30Yëësu akaghëndërrya okoghamba igha, “Tentore okokora engʼana yoyonswe igho öni umwene igho hë. Kasi bhono nkwighwa, mbo nkobhotorra abhantö ikiina. Öbhöbhötöri ubhwane ubhwa ikiina, m-bwa heene, ko bhoora tenkokora bhono öni umwene nkutuna hë, kasi bhono Taata Waryobha ono yaantoma akutuna, mbo nkokora. 31Hano ndaaimererre amangʼana aghaane öni umwene, ubhwimërërri ubhwane bhuyö, tebhoobhe ubhwa obhoheene hë. 32Kasi aaho uwöndë ghwiki ono akwimererra amangʼana aghaane, uyö n-Waryobha, na öni nemanyirë igha, ubhwimërërri ubhwaye, nu-bhwa obhoheene. 33Bhëënyu mwaatömirë abhantö ku-Yohana Omobhatiisya, wonswe akaimererra obhoheene ubhwa amangʼana aghaane. 34Tërëngë igha nu-bhwimërërri ubhwa abhantö nkutuna, kasi nkobhatëëbhya ndë ghonswe igho ghayö, okore mötööribhwi. 35Yohana Omobhatiisya yaarenga kya etara eno ekooka na ökömërëkya mu-kisuntë, na bhëënyu mwaashëngëëyë obhorabhu bhuyö ku-ribhagha ike igho. 36Kasi ubhwimërërri bhono öni neenabho, m-bonene okokera ubhwa Yohana bhoora. Ubhwimërërri bhuyö, ne-meremo gheno Taata yaangʼaayë igha ngemarërri. Emeremo ighyane nkwörökya ghërë igha, Taata Waryobha we yaantoma. 37Taata Waryobha ono yaantoma, yaanyimererra kö-bhëënyu. Engamba iyaaye, temwakaaighuurë kora hake hë. Ituubho iyaaye, temomanyirë bhono ërë hë. 38Kora engʼana iyaaye, temoonayo mo-senkoro isyënyu hë. Ghayö ngo ghakoghera motakunkumya, öni ono naatomwa na Waryobha kö-bhëënyu.

39“Moraitaaha bhököngʼu Amaandeko Amahörëëru ko bhoora mokokanya igha, moratora ukunyoora muyö öbhöhöru ubhwa amakora ghonswe igho. Kasi obhoheene Amaandeko Amahörëëru ghayö, ngo ghakunyimererra. 40Kora timukutuna muushe ku-öni, okore mbahaane öbhöhöru ubhwa amakora ghonswe igho. 41Tinkutuna ukukumibhwa na abhantö hë. 42Kasi öni mmarrë okomanya igha, temohanshirë Waryobha mo-senkoro isyënyu hë. 43Öni nishirë ku ubhwera ubhwa Taata Waryobha, kasi bhëënyu timukunyikërrya hë. Kasi hano ömöntö uwöndë ariisha ku ubhwera ubhwaye umwene, mmurimwikërrya. 44Bhoono iyakë moraankumi rëndë mbe keno mukutuna n-sinkuma isyënyu abheene ko bheene, kasi sinkuma seno sikurwa ku-Waryobha timukusituna hë? 45Motakaakanya igha, öni nembashongera ko-Taata, Mosa ono mukwesegha, we akobhashongera. 46Ko bhoora singa mwaakumya amangʼana agha Mosa, öni wonswe mokaankumiri, ko bhoora Mosa yaandëkirë amangʼana aghaane. 47Kasi bhoono hano motakukumya amangʼana ghano Mosa yaandëkirë, n-kë keraaghere mukumi amangʼana aghaane?”

Currently Selected:

Yohana 5: ssc

Highlight

Copy