Yohana 7

Bhawamwabho Yëësu bharanga ukumukumya

1Hano ghayö ghaahööyë, Yëësu akabha arainaaranaara mo-mokowa ughwa Ghariraaya. Tiyaatunirë ainaarenaare Yudea, ko bhoora abhatangati abha Abhayahudi bhaatunanga bhamwite. 2Mbe, bhoono inyangi iya Ibhighutu#7:2 Inyangi iya Ibhighutu. Yaarenga inyangi eno Abhayahudi bhaashengeranga righesa irya emezabhibhu na Ëmëzëituuni, na okosaasaama bhanyoore imbura omooka ghuyö ghukuusha. Hano bhaashengeranga inyangi iyö, bhaaikaranga mu-bhighutu bheno bhaahaghaashëëyë amatö agha ëmëtë. Bhaakoranga igho ukuhiitoka bhono bhaaghuuka abhaabho bhaaghëndirë na ukwikara ku-riköngö imyoka merongo ene. Maaha mo-ketabho ikya Amangʼana agha Abharaawi 23:33-36, 23:39-43; Eheetoko iya Etoraati 16:13-16. Abhantö abhaaru bhaaghendanga Yërusarëëmu okorya hamwë inyangi iyö. ibhya Abhayahudi okanyoora ihikirë haangʼë. 3Bhawamwabho bhakamötëëbhya igha, “Karwe hano oghende Yudea, okore abheegha abhaaho bhamaahe amakono ghano okokora. 4Hano ömöntö yatuna igha amanyekane ko-bhantö, takokora emeremo ighyaye kwa ikibhisirë hë. Nyoore oratora okokora amangʼana ghano, kaghi wiyöröki ko-bhantö bhonswe igho, okore bhakomanye.” 5Bhawamwabho bhayö bhaamötëëbhëri igho, ko bhoora kora abheene bhonswe tebhaamukumyanga hë. 6Mbe, Yëësu akabhahonshora igha, “Enkaagha iyaane iya ukughya iyö, teraahika hë, kasi bhëënyu moratora ukughya enkaagha yoyonswe igho. 7Abhantö abha ko-kebhara kono, tebhaana ikibhuno keno keraaghere bhabhareghe hë, kasi öni bharaandegha, ko bhoora nkobhatëëbhya igha, amangʼana aghaabho m-maghogho. 8Mutiire bhëënyu abheene ukughya Yërusarëëmu ku-nyangi. Öni tinkughya ku-nyangi iyö hë, ko bhoora enkaagha iyaane teraabha hë.” 9Hano Yëësu yaamarrë okoghamba amangʼana ghayö, akatighara mo-mokowa ughwa Ghariraaya.

10Kasi hano bhawamwabho bhaaghëëyë Yërusarëëmu ku-nyangi, Yëësu wonswe akatiira ukughya-yo, kasi kwa bhubhise, te-harabhuharabhu igho hë. 11Mbe, abhatangati abha Abhayahudi, bhano bhaarë ku-nyangi, bhakatuna Yëësu. Bhakabhöörërrya abhantö igha, “Kanaa ömöntö oora hai arëngë?” 12Abhantö abhaaru bhakabha bharanyeerana senkaani ko okoghera iya Yëësu. Abhandë bhakaghamba igha, Yëësu m-möntö uwa heene, kasi abhandë bhakaghamba igha, ti-igho hë, kasi na-bhantö akongʼaina. 13Kasi tiyaare-ho ömöntö ono yaaghambirë Yëësu harabhurabhu igho, ko bhoora mboobhohanga abhatangati abha Abhayahudi.

Yëësu arëëghya abhantö mu-risengerro

14Hano sinsikö isya inyangi syaahikirë ghatëghatë, Yëësu akaghya, akasoha kö-bhööri ubhwa risengerro, akasimya ukwëghya abhantö. 15Hayö ho abhatangati abha Abhayahudi bhaaröghöörrë, kora bhakaghamba igha, “Ömöntö ono hai yaamanyera amangʼana ghano ghonswe igho, na mbe tiyasoma hë?” 16Mbe, Yëësu akabhahonshora igha, “Amëëghyö ghano nkwëghya, tegharëngë aghaane hë, kasi na-mëëghyö agha ono yaantoma. 17Ömöntö wowonswe igho ono akutuna okokora bhono Waryobha akutuna, uyö naraamanye igha, amëëghyö ghano nku-Waryobha ghaarwa. Kora ghwiki naraamanye igha, tenkoghamba ku ubhwera ubhwane umwene hë. 18Ömöntö wowonswe igho ono akoghamba ku ubhwera ubhwaye umwene, uyö nu-bhuhika ubhwaye umwene akwitonera. Kasi ono akutuna ubhuhika ubhwa oora yaamotoma, uyö no-bhoheene akoghamba, takoghamba obhorongo hë.”

19Yëësu akaghëndërrya okobhatëëbhya igha, “Mmomanyirë igha, Mosa yaabhahaayë amaraghërryö agha Waryobha. Kasi taaho ömöntö mö-bhëënyu, ono akoghoota amaraghërryö ghayö. Bhoono n-kwakë mukutuna ukunyita?” 20Rikomo irya abhantö rekamohonshora igha, “Uwe n-disambwa onaryo! N-nawë akutuna ukukwita?” 21Yëësu akabhahonshora igha, “Naakörrë hano rikono rimwë urusikö urwa Obhotooro, bhëënyu bhonswe igho mokaroghoora.#7:21 Maaha mo-ketabho ikya Yohana 5:1-15. 22Maaha, Mosa yaabhahaayë amaraghërryö agha okosaara abhaana abhëënyu abha ikishaasha. Ti-igha amaraghërryö ghayö, nko-Mosa ghaarwërëëyë, nko-bhaaghuuka bhëënyu#7:22 Bhaaghuuka bhëënyu. Ensonga yaamo m-baabho Ibhurahimu, Isaaka na Yaakobho. ghaarwërëëyë. Maaha nkosaara mörë abhaana abhëënyu, kora urusikö urwa Obhotooro. 23Morakora omotono ughwa okosaara kora urusikö urwa Obhotooro ko okoghera iya okoghoota amaraghërryö agha Mosa. Bhoono n-kwakë mokondererra ko bhoora igha naahwënëri ömöntö urusikö urwa Obhotooro? 24Motakaabhotora ikiina ko okoghera iya amangʼana ghano ghakomaahekana agheene igho, kasi mobhotore ikiina bhwaheene.”

Abhantö bharabhoorania nyoore Yëësu we Kiristo

25Mbe, abhantö abhandë Yërusarëëmu hayö, bhakabhoorania igha, “Kasi, ömöntö ono te-we ono abhatangati abhëëtö bhakutuna igha bhaite? 26Maaha nkoghamba arë harabhurabhu igho, kasi tebhakömötëëbhya engʼana hë! Eratora okobha igha, abhatangati bhamarrë okomanya obhoheene igha we Kiristo? 27Ömöntö ono ntomanyirë hano akurwa, kasi Kiristo umwene hano ariisha, taaho ömöntö aremanya hano arwërëëyë hë!” 28Hano Yëësu yëëghyanga kö-bhööri ubhwa risengerro, akakonga araghamba harabhurabhu igho igha, “No-bhoheene igha mommanyirë, na iyö nkurwa mohamanyirë. Momanye igha, tenaasha hano ku ubhwera ubhwane umwene hë, kasi ono yaantoma, nu-uwa obhoheene, kora bhëënyu temomomanyirë hë. 29Öni nemomanyirë, ko bhoora nku-uyö naarwa, kora we yaantoma.” 30Ku bhuyö bhakatuna igha bhamoghoote, kasi taaho ömöntö ono yaamöghöötirë hë, ko bhoora enkaagha iyaaye, tiyaarenga eraahika hë.

31Kasi abhantö abhaaru bhano bhaarë hayö bhakakumya Yëësu. Abhantö bhayö bhakaghamba igha, “Hano Kiristo ariisha, narekora ebhemanyërryö ibhyaru ibhya amakono okokera bheno ömöntö ono yaakora?”

Abhasirikare bharatomwa okoghoota Yëësu

32Mbe, hano Abhafarisaayo bhaaighuurë rikomo irya abhantö rerashamerrana amangʼana ghayö, Abhafarisaayo bhayö hamwë na abhanene abha abhasëngëri bhakatoma abhasirikare abhaabho bhaghoote Yëësu. 33Ku bhuyö Yëësu akatëëbhya abhantö bhayö igha, “Nendaabhe na bhëënyu ku-ribhagha ike igho, hayö ho ndaamare nkyore ko-ono yaantoma. 34Murintuna, kasi timuriinnyoora hë. Kora ahasë hayö ndebha, bhëënyu temotore ukuhika-yo hë.” 35Amangʼana ghayö, ghaaghërrë abhatangati abha Abhayahudi bhakateebhania igha, “Ömöntö ono hai araaghi twange ukumunyoora? Kasi, nkutuna arë ukughya ko-Bhayahudi bhano bhaanyaraghana ukughya mu-bhyaro ibhyëndë, na ukwëghya abhantö bhano bhatarë Abhayahudi? 36Ensonga iya ghayö aghambirë në-ëëhë, igha, ‘Murintuna, kasi timuriinnyoora hë. Kora ahasë hayö ndebha, bhëënyu temotore ukuhika-yo hë’?”

Yëësu arashumaashera amangʼana agha Umwika Ömöhörëëru

37Urusikö urwa okomarërrya inyangi iyö, ndu-sikö oronene rwaabhanga. Mbe, Yëësu akemerra kö-bhööri ubhwa risengerro, akaghamba bhököngʼu igha, “Ömöntö ono araaighwe inyonta, aashe ku-öni, anywe amanshë. 38Amaandeko Amahörëëru gharaghamba igha, ömöntö ono akunkumya, naraabhe na ibhyoro ibhya amanshë agha öbhöhöru bheraghera mu-mwene.”#7:38 Maaha mo-ketabho ikya Isaaya 44:3, 55:1, 58:11. 39Yëësu yaaghambirë amangʼana ghayö ku ukushumaashera Umwika Ömöhörëëru, ono bharehaanwa abhantö bhonswe igho bhano bhakukumya Yëësu. Enkaagha iyö, waanyöörrë Waryobha ataraatoma Umwika uwaaye ko-obho, ko bhoora tuwaanyöörrë Waryobha arahaana Yëësu ubhuhika hë.

Abhantö bharanga okorengerrania ko okoghera iya Yëësu

40Hano abhantö abhandë mu-rikomo riyö bhaaighuurë amangʼana ghayö, bhakaghamba igha, “M-maheene, ömöntö ono nö-mörööti ono tokoghanya ukurwa ku-Waryobha.”#7:40 Maaha mo-ketabho ikya Eheetoko iya Etoraati 18:15-22. 41Abhantö abhandë bhakaghamba igha, “Ömöntö ono n-Kiristo.” Kasi abhandë bhakaghamba igha, “Ti-igho hë, Kiristo taatore ukurwera mo-mokowa ughwa Ghariraaya hë. 42Kasi, Amaandeko Amahörëëru teghakoghamba igha, Kiristo narirwera mu-rwebhoro urwa omokama Daudi?#7:42 Daudi. Maaha mo-faharaasa. Ghwiki igha m-Bëtërëhëëmu aryebhorrwa, mu-mughi ghono Daudi yaaibhörëëywë-mo?”#7:42 Maaha mo-ketabho ikya 2 Samwëri 7:12-16; Mika 5:2; Mataayo 2:5-6. 43Mbe abhantö bhakaanga korengerrania ko okoghera iya Yëësu. 44Abhandë bhakatuna igha bhamoghoote, kasi tiyaare-ho ömöntö ono yaamöghöötirë hë.

Abhatangati abha Abhayahudi tebhakukumya Yëësu hë

45Mbe, abhasirikare bhayö bhakakyora ko-bhanene abha abhasëngëri na Abhafarisaayo. Abhanene bhayö bhakabhabhöörya igha, “N-kwakë motaishirë hano na Yëësu?” 46Abhasirikare bhayö bhakahonshora igha, “Tetwakaighuurë ömöntö araghamba kya bhono Yëësu akoghamba.” 47Bhakabhabhöörya igha, “Kora na bhëënyu bhonswe mongʼainirwë na Yëësu? 48N-nawë mwaaighwa mo-bhatangati handë mo-Bhafarisaayo, ono akumukumya? 49Kasi rikomo irya abhantö bhano bhakumukumya, tebhamanyirë amaraghërryö agha Mosa, ku bhuyö bhaihiimwa na Waryobha.”

50Ho Nikodeemo, ömwë uwa abhatangati abha Abhafarisaayo ono ekembere hayö yaaghëëyë ku-Yëësu ubhutikö nyabhorebhe, akabhabhöörya bharikyaye igha, 51“Amaraghërryö aghëëtö gharaikërrya okobhotorra ömöntö ikiina, totaraamwitegherra na okomanya amangʼana ghano akörrë?” 52Bho bhakahonshora Nikodeemo igha, “Kasi, na uwe n-Gariraaya ukurwa? Kaghi witaahe bhuuya Amaandeko Amahörëëru, noraamanye igha, taaho ömörööti ono akurwera mo-mokowa ughwa Ghariraaya hë.”

Currently Selected:

Yohana 7: ssc

Highlight

Copy