Yohana 20

Ukuryoka ukwa Yëësu

(Mataayo 28:1-8; Maariko 16:1-8; Ruuka 24:1-12)

1Hano urusikö urwa Jumapiri rwahikirë, Maryamu uwa Maghidara yaamutirë nyinkyo shiri, akaghya mo-mbeehera iya Yëësu. Akanyoora reghena reera rihingirrwë ukurwa ku-munywa ughwa embeehera. 2Mbe, akakenya akaghya ku-Simööni Peetero na ku-mwegha uwöndë ono Yëësu yaahanshirë. Akabhatëëbhya igha, “Abhantö bharuusiri mo-mbeehera ikihundughu ikya Omonene uwëëtö, kora tetomanyirë hasë bhakihirrë hë!”

3Peetero bhaana umwegha uwöndë uyö, bhakatanora, bhakaghya ko-mbeehera. 4Bhonswe igho bhabhërë mbaakenyanga, kasi umwegha uwöndë uyö, yaakënyirë bhököngʼu akatigha Peetero, akatangata ukuhika mo-mbeehera haara. 5Akaihiinya, akasyömërrya mo-mbeehera, akamaaha esanda iya Yëësu, kasi tiyaasöhirë mo-mbeehera hë.

6Mbe, hano Simööni Peetero yaahikirë, akasoha mo-mbeehera, akamaaha esanda iya Yëësu ërëngë hayö. 7Kasi ingibho eno bhaabhöhirë Yëësu ko-motwe, tiyabhanga hamwë na esanda eera hë, iyeene yaarenga iringirwëringirwë, ëtöörrwë hagharë. 8Mbe, umwegha uwöndë uyö yaatangatirë ukuhika hayö, wonswe akasoha mo-mbeehera. Akamaaha, akakumya ghano yaatëëbhiibhwi. 9Tuwanyöörrë bharamanyërrya bhono Amaandeko Amahörëëru ghakoghamba igha, ni-igha Yëësu aryoke ukurwa mo-bhaku. 10Mbe, abheegha bhayö bhakakyora ka.

Yëësu arabhooshokera Maryamu uwa Maghidara

(Mataayo 28:9-10; Maariko 16:9-11)

11Kasi Maryamu uwa Maghidara akatighara kebhara iya mbeehera hayö, aimërëëyë arakuura. Enkaagha eno yaakuuranga, akaihiinya, akasyömërrya mo-mbeehera. 12Akamaaha-mo abhamaraika bhabhërë, bhano bhatöörrë singibho sendabhu, bhaikaayë, uwöndë ntaramotwe ya haara ikihundughu ikya Yëësu kyaarë, na uwöndë haara amaghörö agha ikihundughu ikya Yëësu ghaabhatirë. 13Abhamaraika bhayö bhakamöbhöörya igha, “Nyakörö, n-kë obhaayë orakuura?” Akabhahonshora igha, “Abhantö bhaghëghirë ikihundughu ikya Omonene uwaane, kora temanyirë ahasë bhakihirrë hë.” 14Hano Maryamu uwa Maghidara uyö yaamarrë koghamba amangʼana ghayö, akaisyörya, akamaaha Yëësu aimërëëyë hayö, kasi Maryamu tiyaamanyirë igha n-Yëësu hë.

15Yëësu akamöbhöörya igha, “Nyakörö, n-kë obhaayë orakuura? N-nawë ukutuna?” Maryamu yaakanyanga igha, ömöntö uyö, nö-mököri uwa emeremo uwa mu-bhusitaani muyö, ku bhuyö akamohonshora igha, “Omonene, nyoore nu-uwe öghëghirë ikihundughu ikya Omonene uwaane, otantëëbhya hano ukihirrë, öni nendaakiruusi-ho.” 16Yëësu akamobherekera iriina iryaye igha, “Uwe Maryamu!” Maryamu akaisyörya, akamaaha Yëësu, akaghamba ku-Kiëbhuraania igha, “Rabhöni!” Ensonga iyaamo ni-igha, umwëghya. 17Yëësu akamötëëbhya igha, “Tigha, otakangoota. Tendariina ukughya ighörö iyö ko-Taata hë. Keno nkökötëëbhya ni-igha, kaghi ötëëbhi abhahiiri abhaane#20:17 Abhahiiri abhaane. Ensonga iyaamo ni-igha, abheegha abhaane. igha, ‘Ndaghya mu-ryobha ko-Taata, ono arëngë Suwëënyu na bhëënyu bhonswe, ku-Waryobha uwaane na bhëënyu bhonswe n-Waryobha uwëënyu.’” 18Mbe, Maryamu uwa Maghidara, akaherra abheegha abha Yëësu amangʼana igha, “Ndööshë Omonene!” Kora akabhatëëbhya ghonswe igho ghano Yëësu yaamoraghërrëëyi.

Yëësu arabhooshokera abheegha abhaaye

(Mataayo 28:16-20; Maariko 16:14-18; Ruuka 24:36-49)

19Abheegha abha Yëësu bhaaikomaini hamwë mu-nyumba, omoghoroobha ughwa urusikö ruyöruyö. Bhakasiika-ho ebhesaku, ko bhoora bhoobhohanga abhatangati abha Abhayahudi. Mbe, mbaatöökëëyë Yëësu aimërëëyë ghatëghatë iyaabho, akabhatëëbhya igha, “Mobhe na omorembe bhamurë.” 20Mbe, hano yaamarrë okoghamba ghayö, akabhöörökya amabhoko aghaaye, na orobharu urwaye, abheegha abhaaye bhayö, bhakashomerwa igha, bharööshë Omonene uwaabho. 21Yëësu akabhakëërya ghwiki igha, “Mobhe na omorembe bhamurë. Kya bhono Taata Waryobha yaantoma, ni-ighoigho na öni wonswe nkobhatoma ko-kebhara kono.” 22Mbe, hano yaamarrë okoghamba ghayö, akabhahuuha, akabhatëëbhya igha, “Mogheghe Umwika Ömöhörëëru. 23Ömöntö wowonswe ono moraabhere ëbhëbhë ibhyaye, uyö nabhëëywë. Na ono moraange ukwabhera ëbhëbhë ibhyaye, uyö taabherwe hë.”

Yëësu arabhooshokera Toomasi

24Umwegha ömwë mo-bheegha ikömi na bhabhërë abha Yëësu, ono yaabherekerwanga igha Toomasi, handë igha “Ekesare,” tiyaarenga-ho hë, enkaagha eno Yëësu yaaishirë. 25Mbe, abheegha bharikyaye bhakamötëëbhya igha, “Bhëëtö törööshë Omonene.” Umwene akabhahonshora igha, “Öni hano ntarööshë amaköru agha ko-mabhoko aghaaye, na okotoora ikyara ikyane moora bhaatëmërrëëyë imishumaari, na okotoora okobhoko ukwane mo-sembaru haara, ntinkumi hë!”

26Hano sinsikö monaane syaahëtirë, okanyoora abheegha abha Yëësu bhaikomaini ghwiki mu-nyumba. Toomasi wonswe ho yaarë. Ebhesaku mbyaarenga bhisiikirwë, kamwë igho, bhakatookera Yëësu areemerra ghatëghatë iyaabho, akabhakëërya igha, “Mobhe na omorembe!” 27Mbe, hano akomara akatëëbhya Toomasi igha, “Reeta hano ikyara ikyaho, maaha amabhoko aghaane, oreete okobhoko ukwaho okotoore mo-sembaru isyane, okore ukumi, otakaaghëndërrya ukwanga kukumya.” 28Toomasi akamohonshora igha, “Omonene uwaane na Waryobha uwaane!” 29Yëësu akamohonshora igha, “Uwe ko bhono öndööshë bhoono ukumiri. Nyakara bhaara bhakukumya igho bhatandööshë.”

Ikibhuno ikya ukwandekwa ukwa eketabho keno

30Mbe, bheeho ebhemanyërryö ibhyëndë ibhyaru ibhya amakono bheno Yëësu yaakörrë, mbere iya abheegha abhaaye, bheno bhetaandëkirwë mo-ketabho keno. 31Kasi ebhemanyërryö bheno bhyaandëkirwë, mbyaandëkirwë okore mukumi igha, Yëësu we Kiristo, Omoona uwa Waryobha, na ukukumya kuyö, kobhahaane öbhöhöru ko okohetera ku iriina iryaye.

Currently Selected:

Yohana 20: ssc

Highlight

Copy