Yohana 21

Yëësu arabhooshokera abheegha abhaaye Ghariraaya

1Hano ghayö ghaahööyë, Yëësu ghwiki akabhooshokera abheegha abhaaye haangʼë na inyansha iya Tibhëëria, amangʼana ghayö, ni-igha ghaabhaayë. 2Bhano bhaarenga hamwë hayö, m-baabho Simööni Peetero, Toomasi ono yaabherekerwanga igha Ekesare, Natanaëri ono yaarwërëëyë Kana iya mo-mokowa ughwa Ghariraaya, na abhamura abhabhërë abha Zebhedaayo,#21:2 Abhamura abhabhërë abha Zebhedaayo. Amariina aghaabho bhaarë Yaakobho na Yohana. Maaha mo-ketabho ikya Mataayo 10:2. bheena abheegha abhandë bhabhërë. 3Simööni Peetero yaatëëbhëri bharikyaye igha, “Tigha ngende okotegha sinswë.” Abheene bhonswe bhakamohonshora igha, “Kora na bhëëtö bhonswe ntoraahinane na uwe.” Mbe bhakaghya, bhakariina mu-bhwato, kasi ubhutikö ubhughima ubhwa urusikö ruyö, tebhaanyöörrë këntö hë.

4Yëësu akahika ku-nyansha hayö nyinkyo shiri, akeemerra-ho, abheegha abhaaye tebhaamomanyërëëyi hë. 5Mbe, Yëësu akabhabhöörya igha, “Bhasaani abhaane, ndamanya timunyöörrë sinswë hë, kasi mmonasyo?” Bhakamohonshora igha, “A a.” 6Yëësu akabhatëëbhya igha, “Morekere omotegho orobhareka urwa bhoryo ubhwa ubhwato, moraaghööti sinswë.”

Mbe, bhakarekera omotegho orobhareka ruyö, bhakaghöötya sinswë, kora bhakakerwa okoserotera mu-bhwato, ko bhoora sinswë seno bhaaghöötëri, ni-nsharu bhököngʼu syaarë. 7Umwegha omoghonshe bhököngʼu ku-Yëësu, akatëëbhya Peetero igha, “Ono no-Monene uwëëtö!” Hano Simööni Peetero yaaighuurë igha no-Monene uwaabho, akaibhoha ingibho iyaaye, akairekera mu-nyansha. 8Abheegha abhandë bhakaasha mu-bhwato, ko bhoora n-haangʼë bhaarë na omorambo, n-kya amataamboka ighana imwë igho. Bhakaasha eno bhararuta omotegho ghuyö ghwaaishööyë sinswë.

9Mbe, hano bhaahikirë ko-morambo hayö, bhakanyoora-ho omorro ghökörrë enkara. Sinswë na omokaate bheeko. 10Yëësu akatëëbhya abheegha abhaaye igha, “Moreete hano sinswë nke igho seno möghöötëri.”

11Mbe Simööni Peetero akarwa mo-manshë araruta omotegho ghuushe ko-morambo. Omotegho ngwaarenga ghwishööyë-ko sinswë senene righana imwë na merongo etaano na isatö. Nokaanyoora sinswë ni-nsharu bhököngʼu syaare-ko, kasi omotegho teghwatandökirë hë.

12Yëësu akatëëbhya abheegha abhaaye igha, “Muushe munyoore ikimunta nkyo.” Taaho umwegha ono yaakarëhirë ököbhöörya Yëësu igha, “Nu-uwe wë?” ko bhoora mbaamanyirë igha, no-Monene uwaabho. 13Mbe, Yëësu akaasha akaghegha omokaate, akahaana abheegha abhaaye. Ghwiki akaghegha na inswë, akakora bhuyöbhuyö. 14Ruyö nu-urwa katatö rwaarë, urwa Yëësu okobhooshokera abheegha abhaaye, ukurwa roora Waryobha yaamuryökëri ukurwa mo-bhaku.

Yëësu arashumaasha na Peetero

15Mbe, hano bhaamarrë okorya, Yëësu akabhöörya Simööni Peetero igha, “Simööni, mumura uwa Yohana, nonhanshirë okokera bhono bhano bhanhanshirë?” Peetero akamohonshora igha, “Yëë, Omonene, kana uwe nomanyirë igha nenkohanshirë.” Yëësu akamötëëbhya igha, “Rëësya ebhemaanwa ibhya amangʼöndi aghaane.” 16Yëësu akabhöörya Peetero urwa kabhërë igha, “Simööni, mumura uwa Yohana, nonhanshirë?” Peetero akamohonshora igha, “Yëë, Omonene, kana uwe nomanyirë igha nenkohanshirë.” Yëësu akamötëëbhya igha, “Naghya amangʼöndi aghaane.” 17Akamöbhöörya ghwiki urwa katatö igha, “Simööni, mumura uwa Yohana, nonhanshirë?” Peetero akabhaabhayera ko bhoora yaamöbhöörri hare katatö igha, “Nonhanshirë?” Akamohonshora igha, “Omonene, kana uwe nomanyirë ghonswe igho. Nomanyirë igha nenkohanshirë.” Yëësu akamötëëbhya igha, “Rëësya amangʼöndi aghaane. 18No-bhoheene nkökötëëbhya igha, hano waarenga mumura, waaibhohanga singibho, ughya ahasë honswe hano ukutuna. Kasi hano oreghota, norerambeka amabhoko aghaaho, ömöntö uwöndë akwibhöhi singibho, akuhire hano otakutuna ukughya.” 19Yëësu yaaghambirë amangʼana ghayö, ukwörökya igha, ni-nkwa kë Peetero arikwa, eno ereghera Waryobha atöönibhwi. Mbe, hano Yëësu yaamarrë okoghamba ghayö, akatëëbhya Peetero igha, “Nsoorana.”

20Mbe, Peetero akaisyörya, akamaaha umwegha ono Yëësu yaahanshirë bhököngʼu, yaabharwanga nyuma. Umwegha uyö no-oora yaarenga aisëghëkirë ku-kikubha ikya Yëësu, enkaagha iya ibhyakorya ibhya omoghoroobha, kora akabhöörya Yëësu igha, “Omonene, n-nawë araakunyeere inikö?” 21Mbe, hano Peetero yaarööshë umwegha uyö, akabhöörya Yëësu igha, “Omonene, ono we?” 22Yëësu akamohonshora igha, “Hano ho oraanyoore nkutuna ndë igha abhe möhöru okohekera hano ndikyora, n-kë këkötönëri ko-ghayö? Uwe onsoorane.” 23Mbe, amangʼana ghayö ghakaromaana mo-bharikyaye igha, umwegha uyö tarikwa hë. Kasi Yëësu tiyaaghambirë igha tarikwa hë, kasi keno yaaghambirë ni-igha, “Nyoore nkutuna ndë igha abhe möhöru okohekera hano ndikyora, uwe n-kë këkötönëri?” 24Umwegha uyö, we akwemererra amangʼana ghano, kora we yaandeka amangʼana ghano. Kora na bhëëtö bhonswe ntomanyirë igha, no-bhoheene akwemererra.

Yëësu yaakörrë amangʼana aghandë amaaru

25Ghwiki ni-igha, ghaaho amangʼana aghandë amaaru ghano Yëësu yaakörrë. Hano amangʼana ghayö ghonswe igho ghakaandëkirwë, ndamanya igha, kora ekebhara kyonswe igho, tekekaaisirë okotoora-mo ebhetabho bheno bhekaandëkirwë.

Currently Selected:

Yohana 21: ssc

Highlight

Copy