Yohana 19

Yëësu arabhotorrwa ikiina igha ahanekwe ko-mosarabha

(Mataayo 27:15-31; Maariko 15:6-20; Ruuka 23:13-25)

1Mbe, Piraato akaraghërrya abhasirikare abhaaye igha, bhagheghe Yëësu bhamoteme na imishariti. 2Abhasirikare bhakaringa ikirighi ikya amahwa, bhakatoorra Yëësu ko-motwe. Kora bhakamötöörya engansho iya ekekama iya erangë këësërö. 3Bhakabha bharaghya ku-Yëësu, bharamökëërya igha, “Waraayë omokama uwa Abhayahudi!” Bhakabha bharamotema amakööfi. 4Ghwiki Piraato akarishoka kebhara, akabhatëëbhya igha, “Motamaaha, tigha ndeete ömöntö uyö kebhara hano kö-bhëënyu, okore momanye igha, öni tëndööshë obhosarya bhwobhwonswe bhoora kö-möntö uyö hë.” 5Mbe, bhakarishökya Yëësu kebhara, eno atöörëëywë ko-motwe ikirighi ikya amahwa, na engansho iya erangë këësërö. Mbe, Piraato akabhatëëbhya igha, “Ömöntö uwëënyu n-goono.”

6Hano abhanene abha abhasëngëri na abhasirikare abhaabho bhaarööshë Yëësu, bhakashaghana bharaghamba igha, “Mohaneke ko-mosarabha, mohaneke ko-mosarabha!” Piraato akabhahonshora igha, “Momogheghe bhëënyu abheene, moghende momohaneke ko-mosarabha, ko bhoora öni tëmörööshë igha aana obhosarya hë.” 7Abhayahudi bhakamohonshora igha, “Bhëëtö ntoona amaraghërryö, na ko okorengʼaana na amaraghërryö ghayö, ni-igha aitwe, ko bhoora akwikora igha m-Moona uwa Waryobha.”#19:7 Maaha mo-ketabho ikya Amangʼana agha Abharaawi 24:16.

8Hano Piraato yaaighuurë amangʼana ghayö, akoobhoha bhököngʼu. 9Piraato akasoha ghwiki mu-ghunyumba ghuyö, akabhöörya Yëësu igha, “Kana uwe n-hasë kë urwërëëyë?” Kasi Yëësu teyamöhönshööyë ngʼana hë. 10Mbe, Piraato akamöbhöörya igha, “N-kwakë otakonhoshora? Kasi, tomanyirë igha neena obhotoro ubhwa okokotashora, kora na ubhwa okokohaneka ko-mosarabha?” 11Yëësu akamohonshora igha, “Uwe tokaabhaayë na obhotoro bhobhonswe igho ko amangʼana aghaane, singa Waryobha ataakohaana ukurwa ighörö iyö. Ku bhuyö ömöntö ono antöörrë mo-mabhoko aghaaho, naana ëkëbhë ekenene bhököngʼu kokera ikyaho.”

12Mbe, hano Piraato yaaighuurë amangʼana ghayö, akashaashya ukutuna enshera iya okotashora Yëësu, kasi Abhayahudi bhakakora ikituri bhököngʼu bharaghamba igha, “Hano oraatashore ömöntö ono, omanye igha törëngë omosaani uwa Kaisaari hë. Ko bhoora ömöntö ono akwikora igha m-mokama, n-Kaisaari akunyeera senkaani.” 13Mbe, hano Piraato yaaighuurë amangʼana ghayö, akarishökya Yëësu kebhara, akaghya akaikara ku-kitumbë ikya okobhotorra ibhiina. Ahasë hayö, habherekerwanga igha Öbhööri ubhwa Ritare. Ko-keghambo ikya Ikiëbhuraania ni-igha Ghabhata. 14Okanyoora enkaagha ihikirë saa isansabha isya omobhasö. Urusikö ruyö, nu-urwa ökösëëmya inyangi iya Epasaka rwaarë.

Piraato akatëëbhya Abhayahudi bhayö igha, “Momaahe omokama uwëënyu!” 15Mbe, bhakashaghana bharaghamba igha, “Muruusi-ho! Mohaneke ko-mosarabha!” Piraato akabhabhöörya igha, “Kana, nkutuna mörë nhaneke omokama uwëënyu ko-mosarabha?” Abhanene abha abhasëngëri bhakamohonshora igha, “Bhëëtö tetoona omokama uwöndë hë, kasi n-Kaisaari umwene!” 16Mbe, Piraato akabhahaana Yëësu okore ahanekwe ko-mosarabha.

Yëësu arahanekwa ko-mosarabha

(Mataayo 27:32-44; Maariko 15:21-32; Ruuka 23:26-43)

Mbe, abhasirikare bhakaghegha Yëësu, bhakaghya nawe. 17Yëësu yaarenga aghëghirë omosarabha ughwaye hano bhaaghendanga, akaghya ahasë hano bhakobherekera ku-Kiëbhuraania igha, Ghorighoota, ensonga yaamo ni-igha, ëkëhöörë ikya ömöntö. 18Abhantö abhandë bhabhërë, bhonswe bhaahanëkirwë ko-mesarabha, ömwë orobhareka urwa bhoryo urwa Yëësu, na uwöndë orobhareka urwa bhömösi, Yëësu akabha ghatë yaabho.

19Piraato yaarenga araghërrëëyi igha, amangʼana ghaandekwe igha, ono n-yëësu uwa nazarëëti, omokama uwa abhayahudi ghatoorwe ighörö ko-mosarabha ughwa Yëësu. 20Amaandeko ghayö, ngaandëkirwë ku-Kiëbhuraania, Ekeratiini na Ikiyunaani. Amaandeko ghaasömirwë na Abhayahudi abhaaru, ko bhoora ahasë hayö bhaahanëkëëyë Yëësu ko-mosarabha, haangʼë haarë na umughi ughwa Yërusarëëmu.

21Mbe, abhanene abha abhasëngëri na Abhayahudi, bhakatëëbhya Piraato igha, “Otakaandeka igha, ‘M-mokama uwa Abhayahudi,’ kasi wandeke igha, ‘Ömöntö ono yaaghambirë igha m-mokama uwa Abhayahudi.’ ” 22Piraato akabhahonshora igha, “Öni mmarrë ukwandeka.”

23Hano abhasirikare bhaamarrë okohaneka Yëësu ko-mosarabha, bhakaghegha singibho isyaye, bhakasitwena sekabha amabhoho ane. Kera umusirikare akaghegha ikitweno ikyaye. Ghwiki, bhakaghegha engansho iyaaye, eno etaarë na urutumo kora örömwë, yaarökirwë eghootaini ukurwa kighörö. 24Mbe, bhakateebhania igha, “Tetokaatandora engansho eno, kasi tokore ekekoobhwe, tomaahe igha, ni-iya wë eraabhe.” Ghayö ngaaikörrë igho, okore ghahekerane ghano ghaandëkirwë mo-Maandeko Amahörëëru igha, “Bhaatwenaini singibho isyane, bhakakorra engansho iyaane ekekoobhwe.”#19:24 Maaha mo-ketabho ikya Zabhuri 22:18. Ni-igho abhasirikare bhayö bhaakörrë.

25Mbe, bhaare-ho abhakari abhandë abhane bhano bhaarenga bhaimërëëyë haangʼë na omosarabha ughwa Yëësu. Abhakari bhayö, m-baabho nyakuwaabho Yëësu, maamoke uwaabho Yëësu, Maryamu mokaa Kireopa, na Maryamu uwa Maghidara. 26Mbe, hano Yëësu yaarööshë nyakuwaabho, na umwegha oora yaahanshirë bhököngʼu aimërëëyë haangʼë na nyakuwaabho, akaghamba igha, “Nyakörö, maaha uyö we mura uwaaho.” 27Ghwiki akatëëbhya umwegha oora igha, “Maaha uyö we nyakuwëënyu.” Mbe, ukurwa enkaagha iyö, umwegha uyö akaghegha nyakuwaabho Yëësu, akaghya ukwikara nawe ka waaye.

Yëësu arakwa

(Mataayo 27:45-56; Maariko 15:33-41; Ruuka 23:44-49)

28Mbe, okanyoora Yëësu amarrë okomanya igha amangʼana ghonswe igho, bhoono ghahööyë, ku bhuyö akaghamba igha, “Ndaighwa inyonta.”#19:28 Maaha mo-ketabho ikya Zabhuri 69:21. Yaaghambirë igho okore ghahekerane ghano ghaandëkirwë mo-Maandeko Amahörëëru. 29Ahasë hayö kyaare-ho ëkëntö keno bhaaishööyi-mo idivai ëndörö kai. Mbe, bhakaghegha righaasu, bhakarishabhya mu-divai iyö, bhakaghashëkya ku-risagharya irya umuhisopo, bhakainyökya, bhakahërrya Yëësu mu-munywa. 30Hano Yëësu yaawonshiri idivai iyö igho, akaghamba igha, “Ghahööyë!” Mbe, akahiinya omotwe ughwaye, akakwa.

Umusirikare arabheta Yëësu na ritimö

31Urusikö ruyö Yëësu yaakuurë, ndo-no rokotangatera urusikö urwa Obhotooro. Urusikö urwa Obhotooro ruyö, ko-Bhayahudi, ndo-nene rwaarë okokera isyëndë, na abhatangati abha Abhayahudi tebhatunanga ibhihundughu bhitighare ko-mesarabha urusikö urwa Obhotooro hë.#19:31a Urusikö urwa Obhotooro. Amaraghërryö agha Mosa teghakwikërrya okobheeka ömöntö urusikö urwa Obhotooro. Urusikö urwa Obhotooro rwaasimyanga enkaagha iya okoghwa ukwa iryobha urusikö urwa Ijumaa okohekera Jumamöösi hano ghwiki iryobha ryaaghwanga, hayö ho Obhotooro bhwaahwanga. Urusikö urwa Obhotooro ruyö, ndo-nene bhököngʼu rwaarë ko bhoora ndwaarë urusikö urwa inyangi iya Epasaka. Mbe, bhakaghya ku-Piraato, bhakamosabha igha abhasirikare bhaghende bhabhune amaghörö#19:31b Bhabhune amaghörö. Bhaakörrë igho okore bhakwe kamwë igho. abhantö bhayö bhahanëkirwë ko-mesarabha, na ibhihundughu bhiyö bhiruusibhwi ko-mesarabha. 32Mbe, abhasirikare bhakaghya ko-bhayö bhaahanëkirwë hamwë na Yëësu, bhakabhuna amaghörö uwa mbere na uwa kabhërë. 33Kasi hano bhahikirë ku-Yëësu, bhakanyoora amarrë ukukwa, tebhaamubhunirë amaghörö hë. 34Kasi umusirikare ömwë, akabheta Yëësu na ritimö mo-sembaru. Mbe, hayö na hayö igho, amaanyinga bheena amanshë bhekarwa. 35Amangʼana ghano ngaandekwa na ömöntö ono yaarööshë ghayö ghaikoranga. Ghano akoghamba no-bhoheene, kora umwene wonswe namanyirë igha, no-bhoheene akoghamba, okore na bhëënyu bhonswe mukumi. 36Ghayö ngaaikörrë, okore ghahekerane ghaara ghaandëkirwë mo-Maandeko Amahörëëru igha, “Tebhaabhunirë kora righuha iryaye hë.”#19:36 Maaha mo-ketabho ikya Zabhuri 34:20. 37Ghwiki Amaandeko Amahörëëru nkoghamba gharë igha, “Mbaremaaha ono bhaabhëtirë na ritimö.”#19:37 Maaha mo-ketabho ikya Zakaria 12:10.

Yëësu arabheekwa

(Mataayo 27:57-61; Maariko 15:42-47; Ruuka 23:50-56)

38Hano ghayö ghaahööyë, akaasha ömöntö ono yaabherekerwanga igha Yusufu, ono yaarwërëëyë Arimatea. Ömöntö uyö, m-mwegha uwa Yëësu Kiristo yaarë, kasi bhubhise, ko bhoora yoobhohanga abhatangati abha Abhayahudi. Mbe, ömöntö uyö akaasha ku-Piraato, akamosabha aikërri agheghe ikihundughu ikya Yëësu, aghi okobheeka. Piraato akaikërrya. Yusufu akaghya, akahëënia ikihundughu ikya Yëësu.

39Kora Nikodeemo ono yaaghëëyë ku-Yëësu enkaagha nyabhorebhe ubhutikö,#19:39 Maaha mo-ketabho ikya Yohana 3:2. akaasha-ho na amaghuta agha umwishooghaniö ughwa ikirumba ikiiya. Umwishooghaniö ghuyö, ngwaarë ughwa ekerengere ikya sikiiro merongo etatö. 40Mbe, bhakaghegha ikihundughu ikya Yëësu, bhakakerengerra mo-sanda iya eketani hamwë na amaghuta agha ikirumba ikiiya ghaara, kya bhoora seteemo isya Abhayahudi isya okobheeka abhantö syaarë. 41Ahasë hayö bhaahanëkëëyë Yëësu, yaare-ho ibhusitaani. Mu-bhusitaani muyö, yaare-mo embeehera eehya, eno waanyöörrë ataraabheekwa-mo ömöntö kora ömwë.#19:41 Seteemo isya Abhayahudi isya okobheeka abhantö, nsyaarë isya okotoora abhaku mo-masana na ukuribha-ho reghena mu-kihiita. Embeehera iya Yëësu mu-risana yaarë. 42Muyö mbe mo bhaabhëkirë Yëësu, ko bhoora urusikö urwa Obhotooro urwa Abhayahudi n-haangʼë rwaarë ruhike, na embeehera iyö n-haangʼë hayö yaarë.

Currently Selected:

Yohana 19: ssc

Highlight

Copy