Yohana 18

Yëësu araghootwa

(Mataayo 26:47-56; Maariko 14:43-50; Ruuka 22:47-53)

1Hano Yëësu yaamarrë okosaasaama, akatanora na abheegha abhaaye, akaghya humbu iya ribhate irya Kiduröni, hano ibhusitaani iya Ëmëzëituuni yaarë, akasoha-mo na abheegha abhaaye.

2Mbe, Yuuda ono yaanyëërëëyë Yëësu inikö, yaamanyirë ahasë hayö, ko bhoora Yëësu n-hare kaaru yaaghyanga hayö na abheegha abhaaye. 3Mbe, Yuuda akatangata rikomo irya abhasirikare abha Ikiruumi, hamwë na abhasirikare abha risengerro bhano bhaatömirwë na bhanene abha abhasëngëri hamwë na Abhafarisaayo. Bhakaghya mu-bhusitaani muyö, bhaghötërrëëyë setara bheena imyenge na ibhyöghë.

4Yëësu yaamanyirë ghonswe igho ghano ghaaitengʼerwanga ukumunyoora. Ku bhuyö akeemoka akabhöörya abhantö bhayö bhaaishirë igha, “Kana, nawë mukutuna?” 5Bhakamohonshora igha, “Toratuna Yëësu uwa Nazarëëti.” Yëësu akabhahonshora igha, “Nö-öni.”

Yuuda oora yaanyëërëëyë Yëësu inikö, yaarenga aimërëëyë hamwë na abhasirikare bhayö. 6Mbe, hano Yëësu yaabhatëëbhëri igha, “Nö-öni,” abhantö bhayö bhakakyora nyuma, bhakaghwa hansë. 7Yëësu akabhabhöörya ghwiki igha, “Kana, nawë mukutuna?” Bhakamohonshora igha, “Toratuna Yëësu uwa Nazarëëti.” 8Yëësu akabhatëëbhya igha, “Mmarrë okobhatëëbhya igha nö-öni. Nyoore nö-öni mukutuna, mutighe bhano bhaghende hano bhakutuna ukughya.” 9Yëësu yaaghambirë igho, okore ghahekerane amangʼana ghano yaaghambirë ekembere igha, “Abhantö bhano waangʼaana, naabhanaghyanga bhuuya, taaho kora ömwë ono yaasira ko bhano waangʼaana.”#18:9 Maaha mo-ketabho ikya Yohana 17:12.

10Mbe, Simööni Peetero akasomora umushonge ughwaye, akagheesha omoghorwa uwa omonene uwa abhasëngëri, akamobhotora ökötwë ukwa bhoryo. Omoghorwa uyö yaabherekerwanga igha Maarikusi. 11Kasi Yëësu akakaania Peetero igha, “Peetero, kyörya umushonge ughwaho mu-kishööghö ikyagho. Kasi, notamanyirë igha ni-igha nnyoore inyanko kya bhono Taata yaasëëmya igha nginyoore?”#18:11 Kasi, notamanyirë igha ni-igha nnyoore inyanko kya bhono Taata yaasëëmya igha nginyoore? Mu-Kiyunaani ni-igha, Ntakaasha kunywera ekekombe keno Taata yaangʼaana okore nnywe?

Bharahira Yëësu ko-Anaasi

(Mataayo 26:57-58; Maariko 14:53-54; Ruuka 22:54)

12Mbe, omonene uwa abhasirikare abha Ikiruumi na abhasirikare abhaaye, hamwë na abhasirikare abha risengerro irya Abhayahudi, bhakaghoota Yëësu, bhakamobhoha. 13Mbe, bhakamuhira kanga ko-Anaasi, subhyara uwaabho Kayafa. Kayafa uyö, we yaarë omonene uwa abhasëngëri ko-mooka ghuyö. 14Kayafa uyö we oora yaaraghërrëëyi abhatangati abha Abhayahudi ekembere igha, nyakara ömöntö ömwë akwe, ko okoghera iya abhantö bhonswe igho.#18:14 Maaha mo-ketabho ikya Yohana 11:50.

Peetero araikaana Yëësu

(Mataayo 26:58, 26:69-70; Maariko 14:54, 14:66-68; Ruuka 22:55-57)

15Enkaagha eno abhantö bhayö bhaahiranga Yëësu, Simööni Peetero na umwegha uwöndë, bhakasoorana Yëësu. Umwegha uwöndë uyö, yaamanyekaini kö-mösëngëri omonene uyö, ku bhuyö akasoha hamwë na Yëësu mo-bhogho ubhwa inyumba iya omonene uwa abhasëngëri. 16Kasi Peetero akemerra kebhara mu-kihiita. Mbe, umwegha uwöndë uyö yaamanyekaini ko omonene uwa abhasëngëri, akarishoka kebhara, akashumaasha na umwisëkë ono yaarendanga mu-kihiita hayö, akaikërërrya Peetero asohe.

17Mbe, umwisëkë ömörëndi uwa mu-kihiita uyö, akabhöörya Peetero igha, “Kana, na uwe wonswe tö-ömwë uwa abheegha abha ömöntö uyö örë?” Peetero akamohonshora igha, “A a, tëndëngë murikyabho hë.”

18Ko bhoora embeho yaare-ho, abhaghorwa na abhasirikare abha risengerro bhayö, bhakahuuta omorro, bhakabha bharoota. Peetero wonswe hamwë yaaimërëëyë nabho, aroota omorro ughwa amakara.

Ömösëngëri arabhöörërrya Yëësu

(Mataayo 26:59-66; Maariko 14:55-64; Ruuka 22:66-71)

19Mbe, hano amangʼana ghayö ghaakorekananga, omonene uwa abhasëngëri uyö, akabhöörya Yëësu amangʼana agha abheegha abhaaye, na amëëghyö aghaaye. 20Yëësu akamohonshora igha, “Enkaagha yonswe igho naaghambanga ko-bhantö bhonswe igho harabhurabhu igho, nëëghyanga abhantö mu-sinyumba isya esango iya Abhayahudi, na mo-bhogho ubhwa risengerro mono Abhayahudi bhonswe igho bhakwikomanërya, tenakëëghëri amëëghyö aghaane bhubhise hë. 21Bhoono n-kwakë ökömböörya? Uwe bhöörya abhantö bhano bhaaighwa keno naabhatëëbhëri, bhayö mbo bhamanyirë ghano nëëghyanga.” 22Hano Yëësu yaaghambirë igho, umusirikare ono yaarenga aimërëëyë haangʼë nawe, akamotema rikööfi, akamöbhöörya igha, “Ni-igho okohonshora omonene uwa abhasëngëri?” 23Yëësu akamohonshora igha, “Nyoore m-boghogho ngambirë, ntëëbhya obhoghogho bhuyö ngambirë. Kasi nyoore m-buuya ngambirë, ntëëbhya keno këghërrë öntëmirë?” 24Mbe, Anaasi akaraghërrya igha, Yëësu ahirwe ko-Kayafa omonene uwa abhasëngëri, abhöhirwë ighoigho.

Peetero araikaana ghwiki Yëësu

(Mataayo 26:71-75; Maariko 14:69-72; Ruuka 22:58-62)

25Mbe, hano Simööni Peetero yaarenga aimërëëyë aroota omorro, abhantö nyabhorebhe bhakamöbhöörya igha, “Kasi, na uwe tö-ömwë uwa abheegha abha ömöntö uyö?” Peetero akabhahonshora igha, “A a, tö-öni hë.” 26Ömwë uwa abhaghorwa abha omonene uwa abhasëngëri ono yaarë umuhiiri uwa ömöntö oora Peetero yaabhötööyë ökötwë, akamöbhöörya igha, “Tenaarënkörööshë mu-bhusitaani haara hamwë na Yëësu?” 27Peetero akaikaana ghwiki igha, “Tö-öni hë.” Këmwë igho, sekaraghora.

Abhatangati abha Abhayahudi bharahira Yëësu ku-Piraato

(Mataayo 27:1-2; Maariko 15:1-5; Ruuka 23:1-5)

28Mbe, hano bhwaakëëyë nyinkyo shiri, abhatangati abha Abhayahudi bhakaghegha Yëësu ukurwa wa Kayafa, bhakaghya nawe mu-ghunyumba ughwa öbhötöngi ubhwa Ikiruumi. Kasi bho tebhaasöhirë-mo hë,#18:28 Tebhaasöhirë-mo hë. Okorengʼaana na seteemo isya Abhayahudi, oraanyoore Umuyahudi asöhirë mu-nyumba iya ömöntö ono atarëngë Umuyahudi yaanyankuhanga, ku bhuyö tebhakaarëëyë ibhyakorya ibhya Epasaka hë. okore bhatakainyakuhya, bhakerwe okorya ibhyakorya ibhya Epasaka. 29Mbe, Piraato omotangati uwa Ikiruumi, akarishoka kebhara akaghya hayö bhaarë, akabhabhöörya igha, “Kana, m-bushöngëri kë bhono moonabho kö-möntö ono?” 30Bhakamohonshora igha, “Singa ömöntö ono atasarri engʼana, tetokaamörëëtirë ku-uwe hë.” 31Piraato akabhatëëbhya igha, “Momogheghe bhëënyu abheene, moghende momobhotorre ikiina bhëënyu abheene, ko okorengʼaana na amaraghërryö aghëënyu.” Kasi Abhayahudi bhakamohonshora igha, “Bhëëtö tetoona ubhwera ubhwa okobhotorra ikiina ömöntö wowonswe igho igha aitwe.” 32Ghayö ngaabhaayë igho, okore ghahekerane amangʼana ghano Yëësu yaaghambirë, ukwörökya bhono akaakuurë.#18:32 Maaha mo-ketabho ikya Yohana 12:32.

Piraato arabhöörërrya Yëësu

33Mbe, Piraato akasoha ghwiki mu-ghunyumba ghuyö, akaraghërrya igha bhareete Yëësu. Akamöbhöörya igha, “Uwe no-mokama uwa Abhayahudi örë?” 34Yëësu akamohonshora igha, “Engʼana iyö ömbörri, ni-iya amaitegherro aghaaho, kasi m-bantö bhandë bhakötëëbhëri igho?” 35Piraato akamohonshora igha, “Öni m-Muyahudi ndë? Abhantö abha ikyaro ikyënyu na abhanene abha abhasëngëri, mbo bhakörëëtirë ku-öni hano. Kana, ne-ngʼana kë osarri?” 36Yëësu akamohonshora igha, “Obhokama ubhwane te-bhwa ko-kebhara kono hë. Singa m-mbwa ko-kebhara kono bhwarë, abheegha abhaane mbakaanyitanëëyë, okore ntakaaghootwa na abhatangati abha Abhayahudi. Kasi obhokama ubhwane, te-bhwa ko-kebhara kono hë.”

37Mbe, Piraato akamöbhöörya igha, “Nkwo okoghamba igha uwe m-mokama örë?” Yëësu akamohonshora igha, “M-maheene oghamarrë igha, öni m-mokama ndë. Öni naasha nkeebhorwa ko-kebhara kono, ko okoghera iya engʼana ëmwë igha, nëëghi abhantö obhoheene. Ömöntö wowonswe igho uwa heene, uyö nkoghoota arë amangʼana aghaane.” 38Piraato akamöbhöörya igha, “Obhoheene n-këntö kë?”

Hano Piraato yaamarrë ököbhöörya engʼana iyö, akarishoka ghwiki kebhara, akatëëbhya abhatangati abha Abhayahudi igha, “Öni tenkomaaha obhosarya bhobhonswe igho kö-möntö ono hë. 39Kasi eeho eteemo iya okobhatashorra omobhohe ömwë enkaagha iya inyangi iya Epasaka, bhoono nkutuna mörë mbatashorre omokama uwa Abhayahudi uyö?” 40Mbe, abhantö bhakashaghana bharaghamba igha, “A a! Otakaamotashora, kasi ototashorre Bharaabha.” Bharaabha uyö m-mogharanshöri yaarë uwa eserekaare iya Ikiruumi.

Currently Selected:

Yohana 18: ssc

Highlight

Copy