Luk 3
3
1Omu mwaka gwa ikumi n'etaano ogw'omu busingye bwa Tiberio-Kaisaari, Pontio Pilaato obu yaabaire ari omutegyeki wa Buyudaaya, Herode ari ow'eishaza rya Galilaaya, na Filipo mwene ishe ari ow'eishaza ry'ebyanga bya Ituraaya na Turakoniiti, Lusaniya ari ow'eishaza rya Abileene, 2kandi Anasi na Kayaafa bari abahongyerezi abakuru, ekigambo kya Ruhanga kikaizira Yohaana mwene Zekariya omu ihamba. 3Yaagyenda naaraba omu nsi yoona ehereeraine na Yorudaani, naarangirira abantu, ngu beegarukyemu, babatizibwe, babone kusaasirwa ebibi. 4Manya kikahandiikwa omu kitabo ky'ebyagambirwe omurangi Isaaya, ngu:
Hariho orikwamuriza omu ihamba, ati:
Mutebeekanisize Mukama omuhanda,
mugorore otuhanda twe.
5Ekyetwa oruhanga kiijuzibwe,
orushozi rwona n'ekibungo kyona bibandikwe,
emihanda ekiikami egororwe,
enguuto ezitaringaniire ziringaanizibwe
6haza abantu boona bareebe okujuna
kwa Ruhanga.
7Abantu baingi bakaija ahari Yohaana ngu ababatize; nawe nikwo kubagira ati: Imwe baana b'empiri 'mwe, n'oha obahabwire kuhunga ekiniga ekirikwenda kwija? 8Mbwenu, ku muraabe mwegarukiremu, nimukyorekyere omu mitwarize yaanyu, kandi murekye kweraata nimwegambaho muti: Niho twine Aburahamu tataitwe. Manya nimbagambira nti: Ruhanga amabaare aga naabaasa kugaihiramu Aburahamu abaijukuru. 9Nangwa na hati empango etairwe aha mizi y'emiti. N'ahabw'ekyo omuti gwona ogutarikwana bijuma birungi nigwija kutemwa, gunagwe omu muriro.
10Abantu nikwo kumubuuza bati: Mbwenu shi, tukore ki? 11Yaabagarukamu ati: Oraabe aine amakanzu abiri aheho otariine, n'oine ebyokurya atwaze atyo. 12Abashorooza b'omushoro abaizire kubatizibwa nabo baamugira bati: Mwegyesa, itwe tugire tuta? 13Yaabagambira ati: Mutarishorooza ebirikukira ebi mwaragiirwe. 14Abaserukare nabo baamubuuza bati: Mbwenu itwe nootugambaho ki? Tushemereire kutwaza tuta? Yaabagarukamu ati: Mutarinyaga abantu nimubabeiherera nari nimubatakisa, kureka mumarwe ebihembo byanyu.
15Abantu ku baabaire bategyereize n'ekihika nibateekateeka ahari Yohaana, ngu shana niwe Kristo, 16Yohaana yaabagambirira hamwe boona ati: Nyowe nimbabatiza n'amaizi, kwonka hariho ondi orikunkiza obushoboorozi orikwenda kwija, ou ntashemereire kukomoorora orukoba rw'enkaito ze. We aryababatiza na Mutima Orikwera kandi n'omuriro. 17Orugari rwe rw'okuheheeza rumuri omu ngaro; naija kweyerera embuga ye n'okuhunika engano ye omu kitara kye; reero ebishushunga abyotsye omu muriro ogutaraara.
18Hariho n'ebindi bingi ebi yaayehanangiriize abantu naabagambira amakuru marungi. 19Kwonka ow'eishaza Herode ou Yohaana yaabaire ateisize ahabwa Herodiya muka mwene ishe, n'ahabw'ebindi bicumuro ebi yaabaire akozire, 20ahari ebyo byona akongyeraho n'eky'okuta Yohaana ogwo mu kihome.
Okubatizibwa kwa Yesu
(Mat. 3:13-17; Mar. 1:9-11)
21Abantu boona ku baaherize kubatizibwa, Yesu nawe yaabatizibwa. Ku yaabaire naashaba, eiguru ryakinguuka, 22Mutima Orikwera yaamushuumaho naashusha nk'enkombe, kandi eiraka ryayema omu iguru nirigira riti: Niiwe Mwana wangye ou nkunda, kandi ou nshemerererwa munonga.
Enkuratana ya baishenkuru ba Yesu
(Mat. 1:1-17)
23Yesu akatandika obutumwa bwe aine emyaka nka makumi ashatu y'obukuru, kandi akaba naateekateekwaho kuba mwene Yosefu, Yosefu mwene Heeli, 24Heeli mwene Matati, Matati mwene Leevi, Leevi mwene Meleki, Meleki mwene Yanai, Yanai mwene Yosefu, 25Yosefu mwene Matatiya, Matatiya mwene Amosi, Amosi mwene Nahumu, Nahumu mwene Esili, Esili mwene Nagayi, 26Nagayi mwene Maati, Maati mwene Matatiya, Matatiya mwene Semei, Semei mwene Yoseki, Yoseki mwene Yooda, 27Yooda mwene Yoana, Yoana mwene Reesa, Reesa mwene Zerubabeeli, Zerubabeeli mwene Shealitieli, Shealitieli mwene Neeri, 28Neeri mwene Meleki, Meleki mwene Adi, Adi mwene Koosamu, Koosamu mwene Elimoodamu, Elimoodamu mwene Eri, 29Eri mwene Yoshua, Yoshua mwene Eliezeeri, Eliezeeri mwene Yorimu, Yorimu mwene Matati, Matati mwene Leevi, 30Leevi mwene Simeoni, Simeoni mwene Yuda, Yuda mwene Yosefu, Yosefu mwene Yonani, Yonani mwene Eliyakimu, 31Eliyakimu mwene Melea, Melea mwene Menaani, Menaani mwene Matata; Matata mwene Natani, Natani mwene Daudi, 32Daudi mwene Yese, Yese mwene Obedi, Obedi mwene Boazi, Boazi mwene Sala, Sala mwene Nahashooni, 33Nahashooni mwene Aminadabu, Aminadabu mwene Adimini, Adimini mwene Arini, Arini mwene Hezirooni, Hezirooni mwene Perezi, Perezi mwene Yuda, 34Yuda mwene Yakobo, Yakobo mwene Isaaka, Isaaka mwene Aburahamu, Aburahamu mwene Teera, Teera mwene Nahori 35Nahori mwene Serugi, Serugi mwene Reu, Reu mwene Pelegi, Pelegi mwene Eberi, Eberi mwene Sheela, 36Sheela mwene Kainaani, Kainaani mwene Arifakisaadi, Arifakisadi mwene Sheemu, Sheemu mwene Noa, Noa mwene Lameki, 37Lameki mwene Metusela, Metuseela mwene Enoka, Enoka mwene Kainaani, 38Kainaani mwene Enosi, Enosi mwene Seeti, Seeti mwene Adamu, na Adamu owa Ruhanga.
Okwohibwa kwa Yesu
(Mat. 4:1-11; Mar. 1:12-13)
Currently Selected:
Luk 3: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
