Luk 2
2
1Omu biro ebyo Kaisaari-Augusto akashohoza ekiragiro, ngu abantu b'omu nsi yoona beehandiikise. 2Okwehandiikisa okwo okw'okubanza kukabaho obu Kwirinio yaabaire ari omutegyeki wa Siriya. 3Mpaho buri omwe yaaza omu rurembo rw'owaabo kuhandiikwa. 4Na Yosefu yaaruga omuri Nazareeti ey'omuri Galilaaya, yainamuka Buyudaaya, omu rurembo rwa Daudi orurikwetwa Beetelehemu, ahabw'okuba akaba ari ow'oruzaaro rwa Daudi kandi ow'omuryango gwe. 5Yaazayo kwehandiikisa na Mariya, ou yaabaire naagamba obugyenyi, aine enda. 6Ku baabaire bakiri okwo, obunaku bwe bw'okuzaara bwahika. 7Yaazaara omwana omwojo omujigaijo, yaamushembashemba omu twenda, yaamubyamya omu kaato k'ente ahabw'okuburirwa omwanya omu nju y'abagyenyi.
Eby'abariisa na baamaraika
8Omu nsi egyo hakaba hariyo abariisa, abaabaire baraara omu ishwa, barinzire entaama zaabo nibaihaihana. 9Maraika wa Nyakubaho akababonekyera, n'ekitiinwa kya Nyakubaho kyabaakira kibeehinguririize; baatiina munonga. 10Kwonka maraika yaabagira ati: Muhuumure! Manya naabaijanira enkuru nungi, eraareetere abantu boona okushemererwa kwingi. 11Eri izooba omujuni, niwe Kristo Mukama, yaabazaarirwa omu rurembo rwa Daudi. 12Eki nikyo kiraababeere akamanyiso: nimwija kushanga omwereere ashembashembirwe omu twenda abyami omu kaato k'ente. 13Ahonaaho hamwe na maraika ogwo hakabaho ekimbuuro kihango kya baamaraika, baahimbisa Ruhanga nibeeshongora bati:
14Ruhanga aheebwe ekitiinwa ahaiguru owa Herebe!
N'abantu abu asiima bagire obusingye omu nsi!
15Baamaraika, ku baaherize kubarugaho, baagaruka omu iguru; abariisa baagambirana bati: Ka tuze Beetelehemu, tureebe ekyo ekyabaho, eki Nyakubaho yaatumanyisa. 16Batyo baayehuuta, baahika ahi Mariya na Yosefu baabaire bari, baashanga omwereere abyami omu kaato k'ente. 17Ku baamureebire, baagaruka baabaruura ebi baagambirwa ahariwe, 18kandi boona abaakihuriire baatangaarira ebi abo bariisa baabagambira. 19Kwonka Mariya akagumya ebyo bigambo aha mutima naabiteekateekaho munonga. 20Mpaho abariisa baagarukayo nibaha Ruhanga ekitiinwa, kandi nibamuhimbisa ahabwa byona ebi bahuriire n'ebi bareebire, ahabw'okuba buzimazima bikaba nk'oku babigambiirwe.
Okusharwa n'okuhongwa kwa Yesu omuri Nyaruju
21Ekiro kya munaana ku kyahikire, obunaku bw'omwana kusharwa bwahika, baamweta eiziina Yesu, eri maraika yaamwetsire atakabakirwe.
22Obunaku bwabo bw'okwezibwa ku bwahikire, nk'oku kyaragiirwe omu iteeka rya Musa, baamwinamura Yerusalemu kumuhongyera Nyakubaho, 23nibakuratira ekyahandiikirwe omu iteeka rya Nyakubaho, ekirikugira kiti: Buri kiigura-nda kyona ekishaija n'eky'okuhongyerwa Nyakubaho; 24kandi n'okuhayo ekiraatambwe, amaiba abiri nari obwana bw'enkombe bubiri, nk'oku kirikuragiirwa omu iteeka rya Nyakubaho.
25Mbwenu obwo omuri Yerusalemu hakaba harimu omushaija orikwetwa Simeoni, omuntu ohikiriire kandi orikukunda Ruhanga. Akaba atuura ategyereize obunaku obu Isiraeli erihuumurizibwamu, kandi na Mutima Orikwera amuriho. 26Mutima Orikwera akaba amushuuruuriire, ngu tarifa atakareebire Kristo wa Mukama. 27Akaija omuri Yerusalemu amurikiirwe Mutima ogwo; kandi abazaire ku baareetsiremu omwana Yesu kumukorera nk'oku eiteeka ririkuragiira, 28yaamwakiira, yaamukiikira omu mikono, yaahimbisa Ruhanga naagira ati:
29Nyakubaho wangye, mbwenu waaza kureka omuheereza waawe
agyende n'obusingye nk'oku waaraganiise.
30Ahabw'okuba naayereebera okujuna kwawe,
31oku waateekateekire kureebwa amahanga goona,
32kuba omushana gw'okumurikira Abanyamahanga,
n'okuba ekitiinwa ky'abantu baawe Abaisiraeli.
33Ishe na nyina w'omwana ku baabaire nibatangaarira ebyabaire nibimugambwaho, 34Simeoni yaabaha omugisha, yaagira Mariya nyina ati:
Omwana ogu akateebwaho,
ngu baingi omuri Isiraeli bagwe,
kandi baingi baimukye.
Akateebwaho kuba akamanyiso aku batariikiriza,
35ngu ebiteekateeko by'abaingi bibone kushuuruuka;
kandi naiwe rurara eryakucumita omutima.
36Reero hakaba hariho omurangikazi Ana, muhara wa Fanueli, ow'omu ruganda rwa Asheri, owaabaire akaikwire munonga. Ebiro bye eby'obuhangare ku byahwaire, 37yaamara emyaka mushanju ashweirwe, atakabaire mufaakazi. Mbwenu obwo akaba ahikize emyaka makumi munaana n'ena y'obukuru, kandi akaba ataruga muri Nyaruju, naahereza Ruhanga nyomushana na nyekiro, ataireho okwesiibyakwo n'okushaba. 38Ku yaizire omuri ako kaanya, yaatandika kuhimbisa Ruhanga; eby'ogwo mwana yaabigambira boona abaabaire batuura bategyereize okucungurwa kwa Yerusalemu.
Oku Yesu yaakuriire Nazareeti
39Ku baaherize kukora byona nk'oku eiteeka rya Nyakubaho ryabaire riragiira, baagaruka Galilaaya omu rurembo rw'owaabo orwa Nazareeti. 40Okwiha obwo omwana yaakura, yaagira amaani n'obwengye bwingi, naasiimwa Ruhanga.
Yesu okushangwa omuri Nyaruju
41Buri mwaka abazaire ba Yesu bakaba baza Yerusalemu aha Bugyenyi bw'okwijuka Okuhingurwaho. 42Ku yaahikize emyaka ikumi n'ebiri, bainamuka kuza ahari obwo bugyenyi nk'obutoosha. 43Ku baabaire nibagaruka owaabo nibaruga aha bugyenyi, ogwo mwana Yesu yaatsigara Yerusalemu abazaire be batakimanyire. 44Baateekateeka ngu, shana ari omu kimbuuro ky'abandi bagyenzi. Ku baaherize kugyenda eizooba ryona, baaza kumusherura omu banyabuzaare n'omu bamanyi. 45Ku baaremirwe kumubona, baakuba, baagaruka Yerusalemu nibamusherura hoonahoona.
46Ku haahingwireho ebiro bishatu, baamushanga omuri Nyaruju ashutami ahagati y'abeegyesa abakuru, abategire okutu kandi naababuuza. 47Boona abaamuhuriire baatangaarira obwengye bwe n'oku arikubagarukamu. 48Abazaire be ku baamureebire, baatangaara. Nyina yaamugira ati: Mwana wangye, otutuzire ki? Reeba oku sho naanye tufiire kubi nitukusherura. 49Nawe abagarukamu ati: Mubaire nimunsherurira ki? Timurikumanya ku nshemereire kwehenengyera ebya Tata? 50Kwonka bo tibaashoboorokyerwa makuru g'eki yaagamba.
51Atyo yaashuuma nabo, baaza Nazareeti, yaaguma naabahurira. Nyina yaagumya ebyo byona aha mutima. 52Na Yesu yaayeyongyera kukura omu bwengye n'omu mubiri, naasiimwa Ruhanga n'abantu.
Okurangirira kwa Yohaana Omubatizi
(Mat. 3:1-12; Mar. 1:1-8; Yoh. 1:19-28)
Currently Selected:
Luk 2: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
