Luk 23
23
1Mpaho boona abaabaire bateeraine, baimuka, baatwara Yesu omu maisho ga Pilaato. 2Baatandika kumutabaariza nibagira bati: Ogu muntu tukamushanga naagomesa eihanga ryaitu, naazibira abantu kuha Kaisaari omushoro, kandi naagira ngu niwe Kristo Omugabe. 3Pilaato nikwo kumubuuza ati: Weeza ori Omugabe w'Abayudaaya? Yesu amugarukamu ati: Waakigamba. 4Pilaato atyo agira abahongyerezi abakuru n'ebimbuuro by'abantu ati: Nyowe tindikureeba kirikusingisa ogu muntu orubanja. 5Kwonka bo bagumizamu nibagira bati: Naimukiiriza abantu n'ebi arikwegyesa omuri Buyudaaya yoona, ebyatandikiire Galilaaya, bikarugaho bikahika n'aha.
6Pilaato ku ahurira ekyo, abuuza ogwo muntu ku araabe ari Omunyagalilaaya. 7Kandi ku amanya ngu n'ow'omu kyanga ekirikutegyekwa Herode, amutwekyera Herode ogwo, owaabaire nawe ari Yerusalemu omu biro ebyo.
Yesu omu maisho ga Herode
8Herode ku yaareebire Yesu, yaashemererwa munonga, ahabw'okuba akaba aramuhuriireho, kandi amazire omwanya muraingwa naayetenga kumureeba. Ekindi, akaba aine amatsiko g'okumureeba naakora obumanyiso. 9Atyo yaamara omwanya naamubuuza bingi, kwonka we tiyaagira ki yaamugarukamu. 10Obwo abahongyerezi abakuru n'abahangu b'eiteeka bakaba beemereire aho, nibamutabaariza n'enkaakaatira. 11Mpaho Herode hamwe n'abaserukare be baamutwaza kubi nibamugaya kandi nibamushungisa. Herode amujweka bushuuti y'ekitiinwa, amugarurira Pilaato. 12Eryo izooba Herode na Pilaato baakundana, haza okwiha akare baabaire batuura nibangana.
Yesu okucwerwa orubanja rw'okufa
(Mat. 27:15-26; Mar. 15:6-15; Yoh. 18:39—19:16)
13Ekyo ku kyahwaire, Pilaato yaateerana hamwe abahongyerezi abakuru, n'abategyeki n'abandi bantu, 14yaabagira ati: Mwandeetera ogu mushaija ngu naagomesa abantu. Mbwenu naamutonganisiza omu maisho gaanyu, omu bi murikumutabaariza byona, naashanga hatarimu kirikumusingisa orubanja, 15nangwa nobu yaakuba Herode, ahabw'okuba yaamutugarurira. Nk'oku murikureeba, ogu muntu taine ki akozire ekishemereire kumwitisa. 16N'ahabw'ekyo naaza kumwasha, mmurekure. [ 17Manya ahari ekyo kiro kikuru akaba aragiirwa kubarekurira embohe emwe.]
18Reero boona baayombera hamwe bati: Ita ogu muntu! Oturekurire Baraba! 19Ogwo mushaija akaba atairwe omu kihome ahabw'okugomesa ab'omu rurembo n'okwita abantu. 20Pilaato ahabw'okwenda kurekura Yesu, yaagaruka yaagamba nabo; 21kwonka bo baayomba bati: Mubambe aha musharaba! Mubambe aha musharaba! 22Kandi yaagamba nabo obwa kashatu, ati: Ahanki? Ogu muntu akozire kibi ki? Nyowe tinaareeba rubanja orushemereire kumwitisa, n'ahabw'ekyo naaza kumwasha mmurekure. 23Kwonka bo baagumizamu nibayomba munonga, nibagyemesereza ngu abambwe aha musharaba; kandi orwari rwabo rwarugaho rwaremesa. 24Pilaato nikwo kucwa orubanja, naagira ngu eki baashaba kibe nikyo kyakorwa. 25Yaarekura ogwo muntu ou baashabire, owaabaire akomeirwe obugomi n'obwitsi, yaabaha Yesu kumukora nk'oku barikwenda.
Yesu okubambwa aha musharaba
(Mat. 27:32-44; Mar. 15:21-32; Yoh. 19:17-27)
26Ku baabaire nibatwara Yesu, baakwata omushaija orikwetwa Simooni owa Kureene, owaabaire naaruga omu kyaro, baamugyema kwekorera omusharaba amukuratiire.
27Ekimbuuro kihango ky'abantu kyamukuratira, hamwe n'abakazi baingi abaabaire nibamucurira nibeemaamaata. 28Yesu nikwo kubahindukira akabagira ati: Imwe bahara ba Yerusalemu 'mwe, murekye kuncurira, kureka mwecurire kandi mucurire n'abaana baanyu. 29Manya obunaku buryahika, obu abantu barigiriramu bati: Ka n'ab'omugisha abakazi engumba, n'ab'enda zitakazaarahoga, n'ab'amabeera gatakontsyaga! 30Obwo nibwo barigambira enshozi bati: Mutugwere! N'ebibungo bati: Mutushwekye! 31Mbwenu ku baraabe nibagira bati omuti omubisi, ogwomire guryashura ki? 32Kandi hakaba hariho abandi babiri enkozi z'ebibi, abaatwairwe na Yesu kwitwa. 33Ku baahikire omu mwanya ogurikwetwa Empanga y'Omutwe, baamubambira aho aha musharaba hamwe n'enkozi z'ebibi ibiri, omwe aha rubaju rwe rwa buryo n'ondi aha rwa bumosho. 34Yesu yaagira ati: Taata, obasaasire; tibarikumanya ki barikukora. Bwanyima baabagana ebijwaro bye nibabiteerera enteenyu.
Yesu okuteererwa enaku aha musharaba
35Abantu bakaguma aho nibamushamaarira. Abategyeki bo baamuteerera enaku nibagira bati: Ka yaajunire abandi, mbwenu naayejune ku araabe ari Kristo entoore ya Ruhanga! 36Abaserukare ku baahikire haihi, nibaza kumuha viino y'encenku, nabo baamushungisa, 37nibagira bati: Ku oraabe ori Omugabe w'Abayudaaya, yejune! 38Kandi ahaiguru ye hakaba hariho ekihandiiko ekirikugira kiti: OGU NIWE MUGABE W'ABAYUDAAYA.
Omwambuzi owaasaasiirwe
39Omwe aha nkozi z'ebibi abaabaire bahanikirwe aho, yaamuseetera naagira ati: Tiiwe Kristo? Yejune, naitwe otujune! 40Kwonka mugyenzi we tahwama, amuteisa ati: Torikutiina Ruhanga n'akakye? Manya waacwerwa orubanja rw'okufa nkawe. 41Nangwa itwe kitushemereire, ahabw'okuba tutuzirwe ebi twakozire. Kwonka ogu taine kibi ki akozire. 42Atyo agira ati: Yesu, ku oraahikye omu bukama bwawe, onyijukye. 43Onu amugarukamu ati: Buzimazima ninkuhamiza, eri izooba noija kuba hamwe naanye omu mwanya gw'obunanukye.
Okufa kwa Yesu
(Mat. 27:45-46; Mar. 15:33-41; Yoh. 19:28-30)
44Eshaaha ya mukaaga ku yaabaire eri haihi kuhika, ensi yoona yaashwekwa omwirima, eizooba ryabura kwaka okuhitsya aha shaaha ya mwenda. 45Omukingo gwa Nyaruju gwatemukamu emitanda ebiri. 46Yesu yaagamba n'eiraka rihango ati: Taata, amagara gangye naagata omu mikono yaawe! Ku yaaherize kugamba ekyo, gwahwamu. 47Omukuru w'abaserukare igana, ku yaareebire ekyabaho, yaahimbisa Ruhanga naagira ati: Buzimazima ogu muntu abaire ari ohikiriire! 48N'abantu boona abaabaire bateeraniire aho kuroreera, ku baareebire ekyabaho, baagaruka owaabo nibeemaamaata. 49Banywani be boona hamwe n'abakazi abaarugire nawe Galilaaya bamushendekyereize, bakaguma beemereire hangahari nibareeba byona ebyabaho.
Okuziikwa kwa Yesu
(Mat. 27:57-61; Mar. 15:42-47; Yoh. 19:38-42)
50Reero hakaba hariho omuntu orikwetwa Yosefu, omuhanuuzi rugambwa, omuntu murungi kandi ohikiriire, 51otaraikirizaine nabo omu bi baahanwire n'omu bi baakozire. Akaba arugire Arimataaya, ekirorero ky'Abayudaaya, kandi atwire ategyereize obukama bwa Ruhanga. 52Ogwo mushaija yaaza owa Pilaato, yaamushaba omutumbi gwa Yesu. 53Atyo yaaguhanura, yaaguzinga omu mwenda gwa kitaani, yaaguta omu kituuro ekyabaire kishorogotoroirwe omu ibaare, kandi ekitakaziikwamuga muntu. 54Rikaba riri izooba ry'Okweteguura kandi Sabato eri haihi kuhika.
55Omu bunaku obwo abakazi abaabaire barugire Galilaaya na Yesu, bakaguma nibagyenda Yosefu enyima. Baayetegyereza ekituuro n'oku omutumbi gwateebwamu. 56Bwanyima baagarukayo, baatebeekanisa eby'emigaju n'obutahe.
Ahari Sabato baahuumura nk'oku kyabaire nikiragiirwa.
Okuzooka kwa Yesu
(Mat. 28:1-10; Mar. 16:1-8; Yoh. 20:1-10)
Currently Selected:
Luk 23: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
