Luk 22
22
1Obugyenyi bw'Emigaati Etatumbisiibwe, oburikwetwa Okuhingurwaho, bukaba buri haihi kuhika. 2Obwo abahongyerezi abakuru n'abahangu b'eiteeka bakaba nibasherura oburyo oku baraite Yesu, ahabw'okuba bakaba nibatiina abantu.
Yuda okureebya Yesu
(Mat. 26:14-16; Mar. 14:10-11)
3Mbwenu obwo Sitaane yaataaha omuri Yuda orikwetwa owa Kariota, omwe ahari ikumi na babiri. 4Yaaza aha bakuru b'abahongyerezi n'ab'abarinzi ba Nyaruju, kucuma nabo enaama oku araamubahe. 5Baashemererwa, baaragaana nawe kumuha empiiha; 6nawe yaikiriza. Okwiha obwo yaasherura oburyo obu araamubaheeremu, ebimbuuro by'abantu bitariho.
Yesu okweteguurira Obugyenyi bw'Okuhingurwaho
(Mat. 26:17-25; Mar. 14:12-21; Yoh. 13:21-30)
7Ekiro ky'Obugyenyi bw'Emigaati Etatumbisiibwe, ekyabaire kitambirwaho omwana gw'entaama ogw'Okuhingurwaho ku kyahikire, 8Yesu yaatuma Petero na Yohaana ati: Nimwirooko mututeguurire ahi turaariire Obugyenyi bw'Okuhingurwaho. 9Baamubuuza bati: Mbwenu shi, nooyenda ngu tubutebeekanisize hi? 10Yaabagira ati: Reeba, ku muraabe nimutaaha omu rurembo, nimwija kubugana omushaija oyekoreire enyungu y'amaizi. 11Mumukurate omu nju ei araataahemu, kandi mugambire mukama w'enju muti: Omwegyesa yaatukutumaho ati: Ekishengye eki ndaariiremu Obugyenyi bw'Okuhingurwaho hamwe n'abatendekwa bangye kirahi? 12Ogwo mushaija naija kubooreka ekishengye kihango eky'omuri kaanyinaabiri, ekirimu byona ebirikwetengwa. Okwo mube niyo mwateguura. 13Batyo baagyenda, baashanga byona biri nk'oku yaabibagambira; baatebeekanisizayo eby'Obugyenyi bw'Okuhingurwaho.
Yesu okugaburira abatendekwa ekyokurya ky'akaragwa
(Mat. 26:26-30; Mar. 14:22-26; 1 Kor. 11:23-25)
14Eshaaha ku yaahikire, Yesu yaaza aha meeza hamwe n'abatendekwa be. 15Yaabagira ati: Ntuura niinyetenga munonga kurya naimwe Obugyenyi bw'Okuhingurwaho obu, ntakabonabonesiibwe. 16Manya nimbagambira ku ntarigaruka kuburya, okuhitsya obu burihikiirizibwa omu bukama bwa Ruhanga. 17Atyo yaakwata ekikopo, yaasiima, yaagira ati: Nimutoore, munyweho mwena. 18Manya nimbagambira nti: Okwiha hati tindinywa bundi ha kirugire omu mizaabibu, okuhitsya obu obukama bwa Ruhanga buriija. 19Atyo yaakwata omugaati, yaasiima, yaagucwamu, yaagubaha naagamba ati: Ogu n'omubiri gwangye [oguraaheebweyo ahabwanyu. Mugume mukore muti kuunyijukiraho. 20Ku baaherize kurya, yaakwata atyo n'ekikopo, yaagamba ati: Ekikopo eki niyo ndagaano nsya ey'eshagama yangye, eraasheeshwe ahabwanyu.]
Yesu okugamba oraamureebye
21Kwonka reeba, omukono gw'orikundeebya guri hamwe n'ogwangye aha meeza. 22Manya Omwana w'omuntu naaza kuba nk'oku kyamuteekateekyeirwe, kwonka ogwo muntu orikumureebya aryakareeba! 23Baatandika kubuuzana bonka, ngu n'oha omuribo owaakukikora.
Okurwanira obukuru
24Abatendekwa ba Yesu bakaimukwamu ezindi mpaka ezirikugira ngu n'oha omuribo ohikire kuba mukuru. 25Mpaho yaabagira ati: omu Banyamahanga abagabe baabo nibo babategyeka; kandi n'ababagiraho obushoboorozi beetwa enkora-birungi; 26Kwonka imwe mutariba mutyo; kureka omukuru omuriimwe abe nk'orikukira obuto; orikwebembera abe nk'orikuheereza. 27Mbwenu shi omukuru n'oha, n'oshutami aha meeza nari n'orikuheereza. T'ogwo ari ha meeza? Kwonka nyowe mbarimu nk'omuheereza. 28Niimwe bantu abatarampemukireho mu bi naagyeziibwe. 29Mbwenu naabaha obukama nk'oku Tata yaabumpaire. 30Muryariira aha meeza yangye kandi munywereho, omu bukama bwangye, kandi muryashutama aha bitebe by'obugabe, mucwere enganda za Isiraeli eikumi na ibiri orubanja.
Yesu okugambira Petero oku araamwogye
(Mat. 26:31-35; Mar. 14:27-31; Yoh. 13:36-38)
31Simooni, Simooni, omanye ku imwe, Sitaane aikiriziibwe kubashungura nk'engano; 32kwonka, Iwe Simooni, nkushabiire, okwikiriza kwawe kurekye kutentebuka; kandi ku oriheza kwegarukamu, naiwe ohamye bagyenzi baawe. 33Onu amugarukamu ati: Mukama wangye, nyeteekateekire kugyenda naiwe omu kihome n'okufa naiwe. 34Yesu amugarukamu ati: Petero, ninkugambira nti: Eri izooba enkoko terikwija kugamba otakeehakaine kashatu ku otarikummanya.
Obunaku bw'akabi
35Yesu ababuuza ati: Ku naaboohereize mutaine mufuko na furebe na nkaito, mwine eki mwakyenire? Baamugarukamu bati: Ngaaha! 36Nawe yaabagira ati: Hati oraabe aine omufuko, agugyendane; oraabe aine efurebe, nawe agire atyo; oraabe ataine rurara, atunde omunagiro gwe, agigure. 37Mbwenu nimbagambira ku ekyahandiikirwe ekirikugira ngu: Akaikiriza kubarirwa hamwe n'enkozi z'ebibi, kiri eky'okuhikiiririzibwa omuriinye. Manya ebyangambirweho biri haihi kuhikiirira. 38Baamugira bati: Mukama waitu, reeba aha hariho zaarurara ibiri. Yaabagira ati: Ebyo ka bihwere aho!
Yesu okugirira obujune omuri Getesemaane
(Mat. 26:36-46; Mar. 14:32-42)
39Atyo Yesu yaimutsya, yaaza aha Rushozi rw'Emioliva nk'oku yaabaire agira, abatendekwa be bamukuratiire. 40Ku baahikireyo, yaabagira ati: Mushabe, mutakaayohibwa. 41Mpaho abatsigaho, aza hangahari nk'ahi eibaare rigarukira rirekyeirwe. Atsimba amaju, ashaba ati: 42Taata, ku oraabe nookisiima, onyiheho eki kikopo! Kwonka ti nkaanye oku ndikwenda, kureka eki orikwenda kibe nikyo kyakorwa. 43Bwanyima maraika amubonekyera naaruga omu iguru kumugumya. 44Omuri obwo busaasi burengyesereize, Yesu ayeshengyereza n'amaani ge goona; etuutu erugaho emuragara neeshusha amatondo mahango g'eshagama. 45Ku yaimukireho yaaheza kushaba, yaaza kureeba abatendekwa be, yaashanga bagwejegyeire ahabw'obujune. 46Yaabagira ati: Ahabw'enki mugwejegyeire? Nimwimukye, mushabe, mutakaagwa omu kwohibwa.
Yuda okureebya Yesu
(Mat. 26:47-56; Mar. 14:43-50; Yoh. 18:3-11)
47Yesu ku yaabaire naakigamba haija ekimbuuro ky'abantu kyebembeirwe omushaija orikwetwa Yuda, omwe ahari ikumi na babiri; yaahika Yesu kumunywegyera. 48Yesu nikwo kumugira ati: Yuda, haza oza kunywegyera Omwana w'omuntu noomureebya! 49Abu Yesu yaabaire aine, ku baareebire byaba bityo, baamugira bati: Mukama waitu, tubatemese zaarurara? 50Omwe omuribo atyo atema omuheereza w'omuhongyerezi omukuru, amucwaho okutu kwa buryo. 51Yesu ku akireeba agira ati: Murekyere aho! Atyo akora aha kutu kw'ogwo mushaija, amukiza.
52Mpaho Yesu agambira abahongyerezi abakuru n'abakuru b'abaserukare abarinda Nyaruju, n'abandi bakuru omu ihanga abamuhururiire, ati: Beitu obu murikuunyizira na zaarurara n'ebikoni, ndi omwambuzi? 53Buri izooba obu naabaire ntuura naimwe omuri Nyaruju ka mwabaire mutakantahoga ngaro kunkwata. Kwonka hati obu nibwo bunaku bwangye, omwirima nigwo gurikutegyeka.
Petero okwoga Yesu
(Mat. 26:57-58, 69-75; Mar. 14:53-54, 66-72; Yoh. 18:12-18, 25-27)
54Mpaho bakwata Yesu, bamutwara, bamuhitsya ow'omuhongyerezi omukuru. Petero amukuratira amuri hareho. 55Ku baahembire omuriro ahagati y'ekibuga, baashutama bagwehinguriize, Petero nawe yaashutama nabo.
56Ku yaabaire ashutami aha muriro omuzaana yaamutsimba eriisho, yaagira ati: Ogwo nawe abaire ari hamwe nawe. 57Kwonka we yaayehakana ati: Mukazi 'we, nyowe tindikumumanya. 58Ku haahingwireho akaanya kakye, ondi muntu yaamureeba, yaagira ati: Naiwe ori ow'omuribo. Kwonka Petero yaagarukamu ati: Muntu 'we, nyowe tindi w'omuribo. 59Ku haahingwireho akaanya nk'ak'eshaaha emwe, n'ondiijo yaayomesereza naagira ati: Buzimazima ogu muntu yaaba ari hamwe nawe, ahabw'okuba n'Omunyagalilaaya. 60Kwonka Petero agira ati: Muntu 'we, eki orikugamba ka ntarikukimanya. Ahonaaho, ku aba naakigamba, enkoko egamba. 61Mukama ahinduka areeba Petero; na Petero nikwo kwijuka eki Mukama yaamugambira ati: Eri izooba enkoko terikwija kugamba otakaanyogire kashatu. 62Atyo ashohora, arira munonga.
Yesu okushungisibwa abaserukare
(Mat. 26:67-68; Mar. 14:65)
63Omu bunaku obwo abashaija abaabaire barinzire Yesu, baamushungisa, baataho n'okumuteera. 64Baamushemba aha maisho, baamubuuza bati: Ragura, owaakuteera n'oha? 65Baagumizamu batyo nibamujuma munonga.
Yesu omu ishengyero
(Mat. 26:59-66; Mar. 14:55-64; Yoh. 18:19-24)
66Ku bwaseesire, abakuru b'eihanga n'abahongyerezi abakuru hamwe n'abahangu b'eiteeka baateerana, baatwara Yesu omu ishengyero ryabo, baamubuuza bati: 67Ku oraabe niiwe Kristo, otugambire. Yaabagarukamu ati: Nobu ndaabagambire, timurikwija kuunyikiriza, 68kandi nobu naakubabuuza timukangarukamu. 69Kwonka okwiha hati Omwana w'omuntu naija kushutama aha rubaju rwa buryo orwa Ruhanga ow'obushoboorozi. 70Boona nikwo kumubuuza bati: Mbwenu nikwo kugira, ngu ori Omwana wa Ruhanga? Agarukamu ati: Nk'oku mwagamba nikwo ndi. 71Mpaho baagira bati: Mbwenu shi nitukyendera ki baamushinja? Ka twaheza kumwehuririra naakigamba!
Yesu okutwarwa omu maisho ga Pilaato
(Mat. 27:1-2, 11-14; Mar. 15:1-5; Yoh. 18:28-38)
Currently Selected:
Luk 22: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
