Kut 7
7
1Bwanyima Ruhanga akagambira Noa ati: Taaha omu meeri, iwe n'ab'eka yaawe; ahabw'okuba ndeebire oku ori ohikiriire omu maisho gangye omu b'obusingye obu. 2Taahamu n'enyamaishwa mushanju mushanju ezitarikuzira, enshaija n'enkazi yaayo; n'enyamaishwa ibiri ibiri ezirikuzira, enshaija n'enkazi yaayo. 3Kandi hoona n'ebirikugurukira omu kaabunga, mushanju mushanju, ekishaija n'ekikazi, kurinda enganda zaabyo omu nsi yoona zihuriire. 4Manya omu biro mushanju niinyija kugwisa enjura omu nsi, emare ebiro makumi ana neegwa nyomushana na nyekiro; buri kintu kyona ekihuriire eki naahangire nkicwekyereze omu nsi. 5Mpaho Noa yaakora byona ebi Nyakubaho yaamuragiire.
6Obu omwegyemure gw'amaizi gwaija omu nsi, Noa akaba ahikize emyaka y'obukuru magana mukaaga. 7Reero Noa n'abatabani baataaha omu meeri kuhunga amaizi g'omwegyemure. 8Aha nyamaishwa ezitarikuzira n'ezirikuzira, n'aha birikuguruka n'ebirikugyendesa enda aha itaka, 9bibiri bibiri, ekishaija n'ekikazi, byataaha omu meeri na Noa, nk'oku Ruhanga yaamuragiire. 10Ebiro mushanju ku byahingwire, amaizi g'omwegyemure gaafukunkukira ensi.
Omwegyemure okucwekyereza ebintu byona
11Omu mwaka gwa Noa gw'obukuru ogwa magana mukaaga omu kwezi kwa kabiri, aha kiro kya ikumi na mushanju eky'okwo kwezi, ahari eryo izooba, enshuro z'okuzimu zoona zikahimintuka n'emicungiro y'omu iguru yaiguka. 12Enjura yaamara ebiro makumi ana neegwa omu nsi nyomushana na nyekiro.
13Ahari eryo izooba, Noa n'omukazi we n'abatabani bonshatu Sheemu na Haamu na Yafeeti n'abakazi baabo baataaha omu meeri; 14bo na buri nyamaishwa, nk'oruganda rwayo oku ruri, n'amatungo goona nk'enganda zaago oku ziri, na buri kyona ekigyendesa enda aha itaka nk'oruganda rwakyo oku ruri, na buri nyonyi nk'omuringo gwayo oku guri. 15Bityo byataaha omu meeri na Noa, bibiri bibiri, byona ebiine omubiri ogurimu omwitsyo gw'amagara. 16Kandi ebyataahiremu bikaba biri ekishaija n'ekikazi byona ebiine omubiri. Byataahamu nk'oku Ruhanga yaamuragiire, reero Nyakubaho yaamukingiraniramu.
17Omwegyemure gukamara ahansi ebiro makumi ana; amaizi gaakanya, gaimutsya emeeri, yaimuka yaaza eruguru y'eitaka. 18Amaizi ku gaakanyire munonga ahansi, gaashandaara, emeeri yaagazeereeraho. 19Ago maizi gakashandaara munonga aha nsi, gaamira enshozi zoona ez'ahansi y'eiguru. 20Okumanya ku gaashandaire eruguru y'enshozi, gakazimira, zaaguma okuzimu yaago, mikono ikumi n'etaano. 21Byona ebiine omubiri, ebyabaire nibigyendera ahansi, ebirikugurukisa amapapa, amatungo, enyamaishwa, n'ebihangirwe byona ebirikwekurura ahansi, na buri muntu weena. 22Ibara kintu, ekyabaire kiri ahansi ahataine maizi, ekyabaire kiine amagara ekirikwitsya, kyafa. 23Ruhanga yaacwekyereza atyo ekintu kyona ekiine amagara, ekyabaire kiri ahansi: abantu n'enyamaishwa n'ebirikugyendesa enda n'ebirikugurukisa amapapa omu kaabunga; byamarirwaho kimwe omu nsi. Noa wenka yaaba niwe yaatsigaraho, n'abaabaire bari hamwe nawe omu meeri. 24Reero amaizi gaashandaara omu nsi kumara ebiro igana na makumi ataano.
Okwoma kw'omwegyemure
Currently Selected:
Kut 7: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
