Kut 6
6
1Abantu ku baatandikire kukanya omu nsi, baazaara abaishiki. 2Abaana ba Ruhanga baareeba bahara b'abantu bari barungi, haza baabashweramu abu baarigiire. 3Nyakubaho nikwo kugira ati: Mutima wangye oha amagara, tariguma mu muntu ebiro byona, ahabw'okuba aine omubiri ogufa. Ebiro by'amagara ge biryaba emyaka igana na makumi abiri. 4Omu biro ebyo, nangwa na bwanyima, omu nsi hakaba harimu abantu ebikaaka. Obwo nibwo abaana ba Ruhanga baashwera bahara b'abantu, bakabazaaraho abaana, abaabaire amamanzi omuri ebyo biro, bari abantu rugambwa.
5Nyakubaho akareeba obubi bw'omuntu buri bwingi omu nsi, na buri kiteekateeko kyona eky'omu mitima yaabo kiri kibi obutoosha. 6Nyakubaho atyo yaayefuuza eki yaahangiire omuntu omu nsi, haza kyamusaasa munonga omu mutima. 7Nyakubaho nikwo kugira ati: Ndyamariraho kimwe ahansi omuntu ou naahangire, abantu n'enyamaishwa, n'ebirikugyendesa enda, n'ebirikugurukira omu kaabunga; ahabw'okuba nyefuurize eki naabihangiire. 8Kwonka Noa we, Ruhanga yaamugirira embabazi.
9Oku nikwo Noa yaabaire ari n'oku yaazaire. Noa ogwo akaba ari omuntu ohikiriire, otaine kamogo omu b'omu biro bye. Akaguma aine emitwarize erikukwatanisa na Ruhanga. 10Kandi Noa akaba aine abatabani bashatu; Sheemu na Haamu na Yafeeti.
11Kwonka obwo ensi omu mireebere ya Ruhanga ekaba esiisikaire; eijwire eiraro. 12Ruhanga yaareeba egyo nsi, kandi buzimazima ekaba esiisikaire, ahabw'okuba abantu boona emitwarize yaabo omu nsi ekaba esiisikaire.
Noa okweteekateekyera omwegyemure
13Mpaho Ruhanga yaagira Noa ati: Mmaririire kumaraho byona ebiine omubiri, ahabw'okuba abantu bareeteire ensi yoona kwijura eiraro. Reeba niinyija kubicwekyereza mbimare omu nsi. 14N'ahabw'ekyo, oyekorere emeeri y'omuti gwa goferi, egyo meeri ogicwemu ebishengye, haza ogisiigye koroto omunda n'enyima. 15Oku nikwo oraagikore: oburaingwa bwayo bube mikono magana ashatu, obukiizi bwayo mikono makumi ataano, n'obwemi bwayo mikono makumi ashatu. 16Egyo meeri ogiteho orukanga, reero ahagati yaarwo n'ebisiika otsigyeho omwanya gw'oburaingwa bwa mukono gumwe; kandi ogikorere omuryango omu rubaju rwayo. Ogitemu ekisiika ky'ahansi n'ekya kaanyina abiri n'ekya kaanyina ashatu. 17Manya reeba, niinyija kureeta omwegyemure gw'amaizi omu nsi, kucwekyereza byona ebiine omubiri n'omwitsyo gw'amagara, mbimare omu nsi; kyona ekiri omu nsi kife. 18Kwonka iwe niinyija kukukorera endagaano ehamire, otaahe omuri egyo meeri, iwe na batabani baawe n'omukazi waawe na baka batabani baawe. 19Kandi ahari buri kintu kyona ekiine omubiri ekihuriire, otaasye omuri egyo meeri bibiri bibiri ebya buri ruganda kubirinda bikaguma naiwe bihuriire; haza bibe biri ekishaija n'ekikazi. 20Aha birikuguruka omu nganda zaabyo, n'enyamaishwa omu nganda zaazo, na byona ebirikugyendesa enda aha itaka omu nganda zaabyo bibiri bibiri ebya buri ruganda biije ah'ori, kubirinda bikaguma bihuriire. 21Kandi hoona oyetwarire buri muringo gw'ebyokurya ebiriibwa, obihunikye, bibe ebyokurya byanyu n'ebyazo. 22Mpaho Noa yaatwaza atyo, yaakora byona ebi Ruhanga yaamuragiire.
Ruhanga okuragiira Noa kutaaha omu meeri
Currently Selected:
Kut 6: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.