2 Maka 9
9
1Ago magingo Antiyoko akaba yaarugire omu kajagararo k'omu nsi ya Buperisiya. 2Ku yaataahire omu rurembo orurikwetwa Perisepoli, yaateeraho kunyaga eby'omu maramizo n'okutegyeka orwo rurembo; abantu baahurura baine eby'okurwanisa kwejuna; baasingura Antiyoko n'engabo ze. Ekyarugiremu, Antiyoko abatuuzi baamwo baamubinga, yaarugayo naabwerabwera. 3Ku yaabaire akiri omuri Ekibataana, enkuru y'ebyabaire ahari Nikanoori n'aha mahe ga Timoteeho yaamuhika. 4Ekiniga kyayenda kumubarura, yaateekateeka kukubuukira Abayudaaya, kubahoora ahabw'akabi aku abaamubingire baamwitsize. Atyo aragiira omuvugi w'ekigaari kye kukivuga atagizire bu ayemereire, okuhitsya obu araaheze orwo rugyendo. Kwonka shi Ow'omu iguru yaaguma amusingiise orubanja, ahabw'okuba amaryo ge gakamurogotesa gati: Ku ndaahikyeyo, Yerusalemu ningihindura eiziikiro ry'Abayudaaya.
5Mukama oreeba byona, Ruhanga wa Isiraeli, nikwo kumurwaza endwara etarikukira kandi etarikwetegyerezibwa. Ku yaaherize ati kugamba ebyo bigambo, yaagira obusaasi omu mara obutarikutuuza, yaariibwa omunda. 6Haza ekyo kyamuhena gye, ahabw'okuba nawe akaba yaasaasize amara g'abandi, naagareetera ebibonaboneso bingi ebitakareebwaga. 7Kwonka ekyesooro kye taragizire bu akicwa n'akakye, kureka akeeyongyera kugira amaryo; ekiniga kye ky'okurwanisa Abayudaaya kyabuguma, yaaragiira ku beehuuta omuri orwo rugyendo. Ku baabaire bari aho, yaayoga omu kigaari kye kirikwiruka munonga, yaayetuura ahansi entuure mpango munonga, buri rugingo rw'omubiri gwe rwahendagurika. 8Ogwo muntu w'amaryo garengyesereize, owaabaire yaaruga kuteekateeka ngu naabaasa kuragiira ebingonzi by'enyanja n'okupima ahari minzaani enshozi ndaingwa, akeetuura ahansi, yaaheekwa aha katanda; boona baamureeberaho ku Ruhanga aine obushoboorozi. 9Omubiri gw'ogwo muntu otatiina Ruhanga gwabumbwa enyogori. Ku yaabaire naakiganya naashaasha, omubiri gwe gwajunda, ekinuuko kyagwo kyareetera ab'omu ihe boona kusheshemukwa. 10Ahabw'ekinuuko kye ekitarikubaasa kwemerwa, ogwo muntu waabaire yaaheza ati kugira ngu naabaasa kukora aha nyonyoozi z'omu iguru, haabura owaamwekorera. 11Mbwenu ku yaaherize kuhendeka omu mutima, yaatandika kuhwera kimwe amaryo n'okumanya bukuru ahabwa Ruhanga kumwasha, obusaasi bwa buri kaanya nibumubonabonesa munonga. 12Ku yaaremirwe kwemera ekinuuko kye, yaagamba naahamya ati: Kihikire okugomookyera Ruhanga, kandi tihariho muntu weena ofa, oshemereire kuteekateeka ngu naingana na Ruhanga.
13Bwanyima ogwo muntu orikunugirwa kimwe yaahiga ahari Mukama owaabaire atakimugirira mbabazi, naagira ati: 14Orurembo orurikwera oru naaba nindahukiiriza kusheenya n'okuruhindura eiziikiro, mbwenu naaruranga ku rwaba orw'obugabe, 15n'Abayudaaya abu naabaire ningira ngu tibashemereire kuziikwa, kureka okutambikirwa enyamaishwa hamwe n'abaana baabo, enyonyi zikabarya, mbwenu boona naabainganisa n'Abanyantiyokiya, 16n'Omwanya Ogurikwera ogu naabaire bwabiso nnyagire, hati naaza kuguhundisa ebintu birungi munonga ebitoizirwe, ngarureho ebikopo ebirikwera kandi nkizeho. Reero empiiha ezishohozibwa ahabw'ebitambo ninzibatungira, ninziiha aha zi ntunga. 17Ahari ebyo byona niinyija kutaho n'okuhinduka Omuyudaaya, ntaayaayire emyanya yoona ei batwiremu, nindangirira ku Ruhanga aine obushoboorozi.
Ebaruha ei Antiyoko yaahandiikiire Abayudaaya
18Mbwenu Antiyoko obusaasi bwe ku bwayangire kutuuza, Ruhanga yaaherize kumusingisa orubanja, yaayehwa amatsiko, yaahandiikira Abayudaaya ebaruha naayehohoora ati:
19Nyowe Antiyoko omugabe waanyu kandi omukuru w'amahe, imwe Abayudaaya abakundwa abatwire egi naabahandiikira nimbendeza amagara marungi n'obugogyeere. 20Ninshemererwa, imwe n'abaana baanyu ku muraabe muri gye, n'ebyanyu biri nk'oku murikwenda. Nk'oku nyine amatsiko aha w'Omu iguru, nobu ndaabe ndembire, 21nimbaijuka mbainiire rukundo ahabw'okunteekateekaho gye n'okuunyendeza ebirungi. Ku naabaire ningarukayo ninduga omu kyanga kya Perisiya, naarwara endwara endembize, naateekateeka ku kishemereire kuta omutima aha bugwagye bw'abantu boona. 22Oku ndi tikurikundeetera kwehwa matsiko, ahabw'okuba niinyesiga ngu egi ndwara niinyija kugikira. 23Kwonka nyetegyereize ku tata yaabaire aza kuhurura omu nsi z'omu bibungo, akaba atsiga yaataho omuhunguzi; 24ngu ku haakugira eky'ahonaaho ekyabaho, nari enkuru mbi, abantu b'omu bugabe bareka kurabanamu, ahabw'okushangwa nibamanya ou atsigiire obukama. 25Kandi hoona nimmanya abanyiginya b'aha myatano n'abaherereire obugabe bwangye ku batuura nibasherura obwiho, bategyereize ekiraabeho. N'ahabw'ekyo nkataho mutabani wangye Antiyoko kuba omugabe. Niwe kaingi ou mbaire nintsigira ninza juba omu mashaza aga ruguru, kandi nimmusiimira baingi munonga omuriimwe. Na mbwenu naamutwekyera ekihandukururo ky'ebaruha egi. 26N'ahabw'ekyo nimbeehanangiriza kandi nimbeeshengyereza ku muguma nimwijuka ebirungi ebi twakoreire abantu boona na buri omwe, ibara muntu omuriimwe kuguma aine omutima murungi ahariinye n'ahari mutabani wangye; 27ahabw'okuba nimpamya ku arikwija kukuratira emitegyekyere yangye, akabatwaza gye n'embabazi.
28Ogwo mwitsi kandi omurogotsi ku yaaherize kugira obusaasi bwingi nk'oku yaasaasize abandi, yaafeera omu bibungo omu nsi etari ye, agwerairwe akagwe katakareebwaga. 29Bwanyima Filipo, omwe aha bagaragwa be, yaatwara omutumbi gwe omuka, kwonka ahabw'okutiina mwene Antiyoko, yaaza Misiri yaayehongyera Putolemaayo Filomeetoro.
Okweza Nyaruju ya Ruhanga
Currently Selected:
2 Maka 9: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.