1 Maka 9
9
1Demetiriyo ku yaahuriire ngu Nikanoori n'eihe rye bagwire omu rugamba, yaayohereza Bakide na Alikimo Buyudaaya omurundi gwa kabiri hamwe n'engabo ze ezirwanira aha rubaju rwa buryo. 2Baaha omuhanda ogurikuza Giligaali, baasiisira ahashungaine na Mesalooti omuri Aribeela, baagikwata, baita n'abantu baingi.
3Omu kwezi kw'okubanza okw'omwaka gwa igana na makumi ataano n'ebiri, baasiisira aharikureebana na Yerusalemu. 4Batyo baaruga aho, baaza Bereya baine abaserukare obukumi bubiri abarikugyendesa ebigyere, n'enkumi ibiri z'ab'ahambaraasi.
5Yuda nawe yaasiisira omuri Elasa, aine abashaija entoore enkumi ishatu. 6Ku baareebire ekyo kimbuuro kihango ky'amahe g'abazigu, baatiina munonga; baingi baanyombororoka, baaruga omuri orwo rusiisira, okuhitsya obu haatsigiremu abantu batarikweshumba magana munaana.
7Yuda ku yaareebire eihe rye ryanyombororoka, n'orugamba ruri haihi kutandika, omutima gwahahaara, ahabw'okuba akaba atakiine mwanya gw'okubateeranira hamwe. 8Yaagwa enshazi, kwonka yaagira abaatsigaireho ati: Ka twimukye turwanise abazigu baitu, obundi tukaababaasa. 9Kwonka bo baateeraho kumucwa entegye nibagira bati: Titurikubabaasa. Haakiri hati tujune amagara gaitu, reero tugarukye na beene waitu tubarwanise, ahabw'okuba itwe turi bakye munonga. 10Kwonka Yuda yaabagira ati: Nikikabure itwe okukora ekintu nk'ekyo kubahunga. Obunaku bwaitu ku buraabe bwahika, ka tufeere beene waitu nk'emanzi, tutakaahemura eiziina ryaitu. 11Mpaho eihe rya Bakide ryashohora niriruga omu rusiisira, ryatenga orugamba. Ab'ahambaraasi baabaganisibwamu ebicweka bibiri: ab'enjungu n'ab'amata hamwe n'abarwani abakuru baayebembera eryo ihe. 12Bakide akaba ari omu b'aha rubaju rwa buryo. Abarwani abarikugyendesa ebigyere abatengire orugamba, emigogo y'ab'ahambaraasi ebari aha mbaju zombi, baahuruutukayo nibateera enzamba; n'abashaija ba Yuda nabo baatera ezaabo. 13Ensi yaatengyeetsibwa orwari rw'ago mahe, orugamba rwaiha omu kasheeshe rwahitsya omu mwabazyo.
14Yuda ku yaareebire Bakide n'eihe rye ery'amaani biri aha rubaju rwa buryo, abashaija be boona amamanzi baagyenda nawe; 15baita ab'aha rubaju rwa buryo, baababinga, baabahitsya aha Rushozi Azooto. 16Ab'aha rubaju rwa bumosho ku baareebire ab'aha rubaju rwa buryo baitwa, baakubuuka, baagyenda Yuda n'abashaija be omu ntegye. 17Orugamba rwashaarira, baingi omu b'aha mbaju zombi baahutaazibwa kandi baagwaho. 18Yuda nawe yaagwaho n'abaatsigaireho baahunga. 19Bwanyima Yonataani na Simooni baihaho Yuda mwene ishebo, baamuziika omu kituuro kya baishenkuru ahari Modeyini. 20Baamucurira, n'Abaisiraeli boona baamucurira munonga. Bakacurira ebiro bingi nibagira bati:
21Ebishi omujuni wa Isiraeli ow'amaani agwire!
22Mbwenu ebindi ebi Yuda yaakozire n'engamba ze n'eby'obumanzi bwe n'ekitiinwa kye, tibirahandiikirwe, ahabw'okuba bikaba biri bingi munonga.
Yonataani okuza omu bigyere bya Yuda
23Yuda ku yaahezire kufa, abatarikukuratira iteeka baimuka omu bicweka byona ebya Isiraeli, enkozi z'ebibi zoona zaareebeka. 24Omuri ebyo biro haabaho enjara mpango munonga, ensi hamwe n'abantu baayo byakubuukira orubaju rw'abazigu. 25Bakide yaatoorana abatatiina Ruhanga, yaabategyekyesa egyo nsi. 26Baasherura kandi baacaaka banywani ba Yuda, baabareetera Bakide, nawe yaabahoora, yaabashungisa. 27Haabaho enaku nyingi omuri Isiraeli ezitakabahoga, okwiha abarangi baaba kurekyera aho kubaijamu. 28Bwanyima bagyenzi ba Yuda baateerana, baagira Yonataani bati:
29Mukuru waawe Yuda yaaba kufa, tihakabairebo ori nkawe kuturwanisiza abazigu baitu na Bakide, n'okugira eki yaakora aha b'eihanga ryaitu abarikutwanga. 30Mbwenu hati eri izooba twakutoorana kuba omwebembezi waitu, kuturwanisiza abazigu baitu omu mwanya gwe. 31Okwiha obwo Yonataani aikiriza kuba omwebembezi, aza omu mwanya gwa Yuda mukuru we.
Yonataani Okwitira Abayamburi Medeba
32Bakide ku yaakimanyire, yaateeraho kumwita. 33Kwonka Yonataani na Simooni mukuru we n'abu yaabaire aine boona, baakihurira, baahungira omu ihamba rya Tehoka, baasiisira Asifari aha rubaju rw'ekiyanja. 34Ekyo Bakide akakimanya aha izooba rya Sabato, reero we n'eihe rye ryona baayambuka Yorudaani.
35Yonataani nikwo kutuma Yohaana mwene ishe, kwebembera ekimbuuro ky'abaakwataniise nawe kushaba Abanabataayo banywani be kumwikiriza kubabiitsya esika nyingi ei baabaire baine. 36Kwonka Abayamburi abaarugire Medeba baija, baakwata Yohaana n'ebi yaabaire aine byona, baabitwara.
37Ekyo ku kyahwaire, Yonataani na Simooni mukuru we bakabagambira ku Abayamburi baine obugyenyi buhango bw'okuhingira, kandi ku barikutwara omugore, muhara w'omwe aha bakungu bakuru aba Kanaani, nibamwiha Nadabati n'enshagarizi nyingi. 38Batyo baijuka eshagama ya mukuru waabo Yohaana, bainamuka baayeshereka omu rushozi. 39Ku bainamwire amaisho nibaranzya, baareeba abantu baingi bakurataine nibateera akaari, baine esika nyingi, na kishwera yaija na bagyenzi be na beene ishe kubabugana, baine engarabi n'ebirikujumeeza amaraka n'eby'okurwanisa bingi.
40Banu nikwo kuhuruutuka ei baabaire beesherekire, bakatandika kubaita. Baingi omuribo bakahutaara bakafa, n'abaatsigaireho bakahungira omu rushozi; banu bakanyaga ebintu byabo byona; 41obwo bugyenyi bw'okushwera bukahinduka okucura, n'amaraka g'abeeshongozi gakaba ag'okuboroogyera omu rufu. 42Ku baaherize kuhoorera kimwe enzigu y'eshagama ya mukuru waabo, baagarukayo omu bisharara bya Yorudaani.
Orugamba rwa Yonataani na Bakide
43Bakide ku yaakihuriire, yaija aha myegyeego ya Yorudaani aha izooba rya Sabato n'eihe rihango. 44Yonataani yaagira abu yaabaire aine ati: Mbwenu ka twimukye twerwaneho, ahabw'okuba eri izooba tikiri nk'oku kibaire kiri omu biro ebihwaire. 45Kandi mureebe! Orugamba ruturi omu maisho n'enyima; amaizi ga Yorudaani n'ebisharara n'ekishaka bituturukire oku n'oku; titwine buhindukiro. 46Mbwenu muhoogyere Ow'omu iguru, mubone kwoga omu mikono y'abazigu baitu. 47Rutyo orugamba rutandika, Yonataani abanga omukono kuteera Bakide, kwonka onu agarura ekibunu enyima, amweshumba. 48Bwanyima Yonataani n'abu yaabaire aine beeroha omuri Yorudaani, baziha, bambuka seeri, kwonka abazigu tibambuka Yorudaani kubateera. 49Eryo izooba hagwaho abantu nka rukumi ab'engabo za Bakide.
Bakide okwombeka ebigo n'okufa kwa Alikimo
50Bakide akagaruka Yerusalemu, yaayombeka endembo zigumire omuri Buyudaaya: ekigo omuri Yeriko na Emausi na Beetihorooni na Beeteeli na Timunaati na Faratoni na Tefooni; yaabitaho ebisiika biraingwa n'amarembo n'emiteehimbwa. 51Yaabitamu abaserukare abarinzi b'okuganzya Isiraeli. 52N'orurembo rwa Beetizuuri na Gazara yaazombekamu ebigo bigumire n'eky'okubiikamu eby'okurwanisa, kandi yaabitamu amahe n'ebitara by'ebyokurya. 53Yaakwata batabani b'abantu bakuru b'omuri egyo nsi, baaba ekwatwa nibarindirwa Yerusalemu omu kigo ekirikubiikwamu eby'okurwanisa.
54Omu mwaka gwa igana na makumi ataano n'eshatu, omu kwezi kwa kabiri, Alikimo yaaragiira kusheenya ekisiika ky'ekibuga ky'omunda eky'Omwanya Ogurikwera, atyo yaacwekyereza omurimo gw'abarangi! 55Kwonka Alikimo ogwo ku yaabaire atandikire kukisheenyaho, yaabaruka omutsi gw'omu mutwe, omurimo gwe gwayemerera, yaigara akanwa, yaakookoota, tiyaabaasa kugamba bundi nari okugira eki yaaragiira aha by'eka ye. 56Alikimo ogwo yaafa atyo omuri ago magingo aine obusaasi bwingi. 57Bakide ku yaareebire Alikimo yaafa, yaagarukayo ow'omugabe, ensi ya Yuda yaamara emyaka ebiri ehuumwire.
Okugotwa kwa Beetibaasi
58Reero abagomi boona bakacuma enaama, baagira bati: Reeba, Yonataani n'abashaija be batebeekaine, kandi tibaine keekyengo. Mbwenu murekye tugarure Bakide, abakwate boona omu kiro kimwe. 59Baagyenda, baahanuura nawe. 60Nawe yaatandika kwija n'eihe rihango, kandi yaayohereza amabaruha bwesherekye ahari boona abarikukwatanisa nawe orugamba omuri Buyudaaya, naabaragiira kukwata Yonataani n'abashaija be; kwonka tibaabaasa kukikora, ahabw'okuba enaama yaabo ekamanywa. 61Haza abashaija ba Yonataani baakwata abashaija b'omuri egyo nsi nka makumi ataano, abaabaire bari abeebembezi omuri okwo kureebya, baabaita.
62Bwanyima Yonataani n'abashaija be na Simooni baaza omu rurembo Beetibaasi omu ihamba; yaayombeka ebicweka byarwo ebyabaire bisheenyirwe, baarugumya. 63Bakide ku yaakimanyire, yaahuruza amahe ge goona, yaatuma n'aha b'omuri Buyudaaya; 64yaija yaasiisira aharikureebana na Beetibaasi; yaarurwanisiza ebiro bingi, yaataho n'ebyoma by'okurwanisa omu rugamba.
65Yonataani yaatsiga Simooni mukuru we omuri orwo rurembo, yaaza omu byaro aine abashaija bakye bonka; 66yaateerera Odomera n'abarumuna na beene Fasirooni omu mahema gaabo. 67Reero yaahurura, yaaza aha rugamba n'amahe ge, kandi Simooni n'abashaija be baaruga omuri orwo rurembo, baayotsya ebyoma by'okurwanisa omu rugamba. 68Baarwana na Bakide, baamusingura, baamunyangaraza, ahabw'okuba enaama ye n'ehururu ye bikaba ebya busha. 69Nawe nikwo kugirira ekiniga kingi abo bagomi abaamuhabwire kwija omuri egyo nsi, akabaitamu abantu baingi. Bwanyima akamaramaza kurugayo kugaruka omu nsi ye.
70Yonataani ku yaakimanyire yaamutumaho abajwekyerwa kukora nawe eby'okureeta obusingye n'okurekura enkwatwa. 71Nawe yaikiriza, yaatwaza nk'oku onu yaagambire; yaataho n'okurahira Yonataani ku atarimukora kubi akihuriire. 72Yaamugarurira enkwatwa ezi yaabaire aihire bwabiso omu nsi ya Yuda; atyo yaakuba, yaagarukayo omu nsi ye, tiyaija bundi omu ihanga ryabo. 73Yonataani yaatuura omuri Mikima, yaatandika kuramura abantu n'okumariraho kimwe abatatiina Ruhanga omuri Isiraeli.
Alekisandero okuhindura Yonataani omuhongyerezi omukuru
Currently Selected:
1 Maka 9: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.