1 Maka 8
8
1Omu bunaku obwo Yuda akahurira okurangaanwa kw'Abarooma, ku bari ab'amaani munonga kandi ku baine emitwarize mirungi aha barikukwatanisa nabo, bakanywana n'abaabaire nibabaijaho, 2ahabw'okumanya ngu n'abamaani munonga omu by'engamba. Abantu bakamugambira eby'engamba zaabo n'eby'obumanzi ebi baabaire nibakora kukubuura Abagauli, oku baabasingwire bakabagyemesereza kuha omushoro, 3kandi n'ebi baakozire omu nsi ya Sipaniya, ngu babone kutegyeka ebiihiro by'efeeza n'eby'ezaabu; 4n'oku baategyekire egyo nsi yoona ahabw'okugira omutima gumaririire kandi ogutarikwehinya, nobu ogwo mwanya gwabaire guri hare nabo; n'oku baaremeise abagabe abaizire kubarwanisa nibaruga oku n'oku, okuhitysa obu baabasiitagwire, bakabagwisiza akagwe kahango; abaatsigaireho bakaguma nibabaha omushoro buri mwaka; 5oku baasiitaguriire omu rugamba Filipo na Periseho omugabe wa Makedoniya bakasingura n'abandi abaimukire kubarwanisa. 6Kandi hoona bakasingura Antiyoko omukuru, omugabe wa Asiya, owaahurwire kubarwanisa aine enjojo igana na makumi abiri, n'ab'ahambaraasi n'ab'ebigaari n'eihe rihango munonga; baamusingurira kimwe; 7baamutwara ahuriire, kandi bakaragiira ku we n'abariza aha ngoma yaarugaho baguma nibaha omushoro muhango, n'okubakwatiriza abantu bari enkwatwa, n'okubarekurira gamwe aha mashaza gaabo amarungi munonga, 8niyo nsi ya Buhindi na Meediya na Ludiya. Ezo nsi baazimwaka baaziha omugabe Eumene. 9Abaguriiki bakacuma enaama y'okwija kubacwekyereza, 10kwonka bo baagimanya, baayohereza omukuru w'amahe kubarwanisa, yaabateera. Baingi omuribo baahutaazibwa, baagwaho; Abarooma baatwara abakazi n'abaana baabo bari enkwatwa kandi baabahindura abahuuku n'okuhitsya eri izooba. 11Obundi bugabe bwingi obwatsigaireho n'ebirwa n'ezindi nsi nyingi ezaabagomeire, bakabicwekyereza; abaamwo baabahindura abahuuku. 12Haza banywani baabo n'abarikubeesiga baaguma nibakundana nabo. Bakagomoora abagabe aba haihi n'aba hare, n'abandi baingi abaahuriire okurangaanwa kwabo, baabatiina.
13Abu benda kuhwera n'okubahindura abagabe babahindura abagabe, n'abu benda kwiha aha bugabe babubaihaho. Nikyo baagiriire obushoboorozi bwingi munonga. 14Haza omuri ebyo byona, tihariho n'omwe omuribo oreejwekire ekirunga ky'obugabe, nari kwejweka emyenda ya bujwa, kworeka ku arikwetunguura; 15kwonka bakeeteeraho eishengyero eri buri izooba abanyaishengyero magana ashatu na makumi abiri bahanuuriramu, kaingi nibahakana oku baraategyekye gye abantu. 16Buri mwaka bataho omuntu omwe kubategyeka n'okureeberera ensi yaabo yoona, haza ogwo omuntu omwe niwe bahurira, hatariho ihari nari okwangirana omuribo.
Abayudaaya n'Abarooma okukora endagaano
17Yuda nikwo kutoorana Eupoolemo mwene Yohaana, mwene Akosi, na Yasooni mwene Eliyazaari, akabatuma Rooma kunywanayo omukago n'okukorerayo endagaano y'okukwatanisa, 18n'okwekiza obuhuuku; ahabw'okuba bakareeba obutegyeki bw'Abaguriiki nibuhindurira kimwe Isiraeli abahuuku. 19Batyo baaza Rooma, orugyendo ruraingwa munonga, baataaha omu Ishengyero, baagamba bati: 20Yuda orikwetwa Makabeho, na beene ishe hamwe n'Abayudaaya, babatutumireho kukora naimwe endagaano y'okukwatanisa n'okugirirana obusingye, ngu tubarirwe omu bakwataniise naimwe kandi banywani baanyu. 21Ekyo kiteekateeko kikabagwisa gye. 22Kandi eki n'ekihanduukururo ky'ebaruha ei baahandiikire aha bishate by'omuringa kubagarukamu, bakabyohereza Yerusalemu kuguma nibibaijutsya eby'obusingye n'eby'okukwatanisa, nibagira bati:
23Byona nibikagyendere gye Abarooma n'eihanga ry'Abayudaaya, aha nyanja n'aha itaka ebiro byona; zaarurara n'abazigu nibikabagume hare. 24Orugamba ku ruribandiza Rooma nari omu ihanga ryona ery'abakwataniise n'Abarooma omu matware gaabo goona, 25eihanga ry'Abayudaaya riryabaha emikono n'omutima gumwe, nk'oku kiriba nikyetengwa. 26Kandi abazigu baabo, Abayudaaya bataribaha ebyokurya, eby'okurwanisa, empiiha nari emeeri, nobu kwakuba okubibatungira; nikwo Rooma yaakihamya. Haza ebyo ebi baaragiirwa baryabikuratira, bataine ki barikugarurirwa. 27Omuringo nigwo gumwe orugamba ku ruribandiza aha ihanga ry'Abayudaaya, Abarooma nabo baryabaha emikono n'omutima gumwe, nk'oku kiriba nikyetengwa. 28Kandi abakwataniise n'abazigu baabo batariheebwa ebyokurya, eby'okurwanisa, empiiha nari emeeri; nikwo Rooma yaakihamya. Haza ebyo ebi baaragiirwa baryabikuratira, babikore bataine bugobya. 29Ebyo nibyo Abarooma baakoreraho endagaano n'Abayudaaya. 30Ebyo ku biriheza kukorwa, ab'embaju zombi baryaikirizana kwongyeraho nari kucwaho ekintu kyona; haza ekyo baryakikora nk'oku barireeba. Kandi kyona ekiryongyerwaho nari ekiricuubwaho kiryaba kihamire.
31Reero aha bikwatiraine n'ebi Omugabe Demetiriyo arikubashaagiza, twamuhandiikira tuti: Ahabw'enki Abayudaaya banywani baitu abu tukwatanisa nabo, obeekoreize omugamba gurikuremeera? 32Mbwenu ku baraagarukye kutushaba kubaha emikono kukurwanisa, nitwija kurwanirira ebi barikufa, tukurwanisize aha nyanja n'aha itaka.
Orugamba rwa Bereya n'okufa kwa Yuda Makabeho
Currently Selected:
1 Maka 8: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.