1 Maka 7
7
1Omu mwaka gwa igana na makumi ataano na gumwe, Demetiriyo mwene Seleuko, akaimutsya orugyendo naaruga Rooma, ari omu meeri n'abantu bakye, yaahika omu rurembo oruri aha mwegyeego gw'enyanja, yaatandika kuba omugabe. 2Ku yaabaire naataaha ati omu kikaari kya baishenkuru, eihe ryakwata Antiyoko na Lusiya kubamureetera. 3Kwonka ku yaakimanyire yaagira ati: Abo bantu mutabampitsya nkabareeba! 4Eihe nikwo kubaita, Demetiriyo akaza aha kitebe ky'obugabe.
5Bwanyima Abaisiraeli abatarikukuratira by'eiteeka kandi abatarikutiina Ruhanga bakaija ahu ari beebembeirwe Alikimo, owaabaire naitanira kuba omuhongyerezi omukuru. 6Reero baatabaariza abantu ahari ogwo mugabe bati: Yuda na beene ishe baitsire bagyenzi baawe boona, kandi naitwe baatubinga omu nsi yaitu. 7Mbwenu yohereza omuntu ou orikwesiga, agyende, areebe byona ebicwekyereire, ebi Yuda atufeereize n'ebi afeereize ensi yaawe, Nyakusinga, haza afubire abo bantu hamwe n'abarikubaha emikono boona. 8Mpaho omugabe atoorana Bakide, omwe ahari banywani be, owaabaire ari omutegyeki mukuru w'ekyanga kya seeri y'omugyera, omushaija rugambwa omu bugabe kandi omwesigwa aha mugabe. 9Amwohereza hamwe na Alikimo otarikutiina Ruhanga, ou yaahindwire omuhongyerezi omukuru, akamuragiira kuhoora enzigu Abaisiraeli. 10Batyo baagyenda, baahika omu nsi ya Yuda baine eihe rihango, yaatuma entumwa ahari Yuda na beene ishe, naabatumaho ebigambo by'obusingye, kwonka shi eby'obugobya. 11Banu ebigambo byabo tibaabyetaho, ahabw'okuba bakareeba baizire n'eihe rihango.
12Reero bamwe omu bahandiiki baagyenda kumwe omu maisho ga Alikimo na Bakide kubashaba kubakorera eby'obwinganisa. 13Abahasidaayo omu Baisiraeli nibo baabandize kubashaba obusingye. 14Ahabw'okuba bakagira bati: Omuhongyerezi w'omu ruganda rwa Arooni niwe aizire n'eihe, n'ahabw'ekyo tarikwija kutukora kubi. 15Ogwo muhongyerezi yaabagambira ebigambo by'obusingye yaabarahira ati: Imwe titurikwija kubakora kubi, nobu baakuba bagyenzi baanyu. 16Nabo baamwesiga, kwonka we yaabakwatamu abantu makumi mukaaga, yaabaita eryo izooba, nk'oku ekyahandiikirwe kirikugira kiti:
17Bakanaganaga emitumbi y'abarikwera baawe,
baasheesha eshagama yaabo omuri Yerusalemu,
baabura kiziika.
18Reero abantu boona baitwa obwoba kandi baabatiina nibagira bati: Tibaine mazima na bwinganisa, ahabw'okuba baahenda endagaano kandi baarya endahiro ei baarahira.
19Mpaho Bakide yaafuruka Yerusalemu, yaazingura Beetizayiti. Reero yaatuma, baakwata baingi omu baamuhungiireho n'abandi bantu, baabaita, baabanaga omu kiina kihango. 20Bwanyima yaataho Alikimo kutegyeka egyo nsi, yaamutsigira eihe ry'okumuhwera; atyo Bakide yaagaruka ow'omugabe. 21Alikimo akaitanira munonga obuhongyerezi obukuru, 22n'abaabaire nibaganzya abantu baabo baagwera orubaju rwe. Baakubuura ensi ya Yuda, baakora akabi kahango omuri Isiraeli. 23Yuda akareeba ebibi ebi Alikimo n'abu yaabaire aine baakoreire omu Baisiraeli nibikira ebi Abanyamahanga baakozire 24Nikwo kuza omu byanga ebyehinguririize Buyudaaya, akahoora enzigu abaabaire bahungire, akazibira n'ab'omu rurembo kuza omu byaro. 25Alikimo nawe ku yaareebire Yuda n'abu yaabaire aine beeyongyeire amaani, kandi yaamanya ku atarikubaasa kubaza omu kaso, yaagarukayo aha mugabe, yaabatabaariza emanja z'okukora eby'obwinazi.
Nikanoori okuteera Buyudaaya
26Bwanyima omugabe akatuma Nikanoori, omwe aha bategyeki be abakuru, owaabaire naayanga Abaisiraeli, bamutamiire kimwe, yaamuragiira kuhwerekyereza abo bantu. 27Mpaho Nikanoori yaija Yerusalemu n'eihe rihango, yaatuma ahari Yuda na beene ishe n'obugobya ebigambo by'okureeta obusingye, ati: 28Ka harekye kubaho endwano ahagati yangye naimwe, niinyija kwija n'abantu bakye, ndeebane naiwe omu busingye. 29Atyo yaija Buyudaaya, baaramukanisa n'obusingye. Kwonka abo bazigu bakaba beeteekateekire kukwata Yuda. 30Yuda yaamanya ku Nikanoori amwiziire n'obugoya, atyo yaamutiina, tiyaagaruka kubugabugana nawe. 31Nikanoori ku yaamanyire ngu enaama ye emanyirwe, yaahurura kubugabugana na Yuda omu rugamba, haihi na Kafarisalaama. 32Abantu nka magana ataano ab'omu ihe rya Nikanoori baagwayo; abaatsigaireho baahungira omu rurembo rwa Daudi.
Nikanoori okuhayira Nyaruju kugyotsya
33Ebyo ku byahwaire Nikanoori yaaza omu Rushozi Siyooni. Bamwe aha bahongyerezi baaruga omu Mwanya Ogurikwera, baija n'abakuru bamwe ab'omu ihanga kumutangirira n'okumworeka ekitambo ky'okucwetsya, ekyabaire kihairweyo ahabw'omugabe. 34Kwonka we yaabeeraatira, yaabashekyerera, yaabashiishagura, yaagambisa amaryo, 35kandi yaarahira n'ekiniga ati: Yuda n'ab'eihe rye ku muraabe mutabandekuriire hati, ku ndaagarukye buhooro niinyija kwotsya egi nju; atyo ashohora n'ekiniga kingi. 36Bwanyima abahongyerezi bataahamu, beemerera omu maisho g'eitambiro n'aga Nyaruju, barira nibagira bati:
37Niiwe waatooraine enju egi kukwetererwa
n'okubeera abantu baawe enju
y'okushabiramu n'okweshengyererezamu.
38Mbwenu hoora ogu mushaija n'eihe rye,
baitwe rurara; ijuka okurogota kwabo, batagumaho.
Nikanoori okugwa Adasa omu rugamba
39Nikanoori ku yaarugire omuri Yerusalemu, yaateera ensiisira omuri Beetihorooni, eihe ry'Abasiriya ryateerana nawe. 40Yuda nawe yaateera orusiisira omuri Adasa, aine abantu enkumi ishatu. Bwanyima Yuda yaashaba naagira ati: 41Entumwa z'omugabe ku zaarogotsire, maraika waawe akahuruutukayo, yaita Abasiriya akasiriira kamwe n'obukumi munaana n'enkumi itaano. 42N'eri izooba siitagurira eri ihe omu maisho gaitu; abaraatsigareho bamanye ku Nikanoori arogotsire aha Mwanya gwawe Ogurikwera, haza omucwere orubanja nk'oku okutahikiirira kwe kuri. 43Amahe gatyo gaabugabuganira omu rugamba aha kiro kya ikumi na bishatu eky'okwezi kwa Adaari. Eihe rya Nikanoori ryasiitagurwa; we wenka yaaba niwe yaabanza kugwa omu rugamba. 44Ab'eihe rye ku baareebire Nikanoori yaafa, baanaga ahansi eby'okurwanisa, baahunga. 45Abayudaaya baabasinga eizooba ryona, baabaiha Adasa, baabahitsya Gazara, kandi baaguma nibateera enzamba z'okuhuruza bababingire. 46Abantu baahuruutuka omu byaro bya Buyudaaya ebiherereireho, baatanga abo bazigu omu maisho, baababinga nibabagarura ei abababingire bari; boona baitwa rurara; tihahonokaho n'omwe. 47Bwanyima Abayudaaya baanyaga eminyago n'emicwijuro, na Nikanoori baamutemaho omutwe n'omukono gwe gwa buryo ogu yaabangire n'amaryo; baabireeta, baabyanika aheeru ya Yerusalemu. 48Abantu baayesiima munonga, baakuza eryo izooba, ryaba eizooba ry'amashemererwa maingi. 49Kandi baataho ekiragiro kirikugira ngu eryo izooba rigume niriijukwa buri mwaka aha kiro kya ikumi na bishatu ekya Adaari. 50Ensi ya Yuda yaagira eihoreere okumara ebiro bikye.
Eby'okurangaanwa kw'Abarooma
Currently Selected:
1 Maka 7: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.