1 Maka 6
6
1Omugabe Antiyoko ku yaabaire naaraba omu mashaza ga ruguru, yaahurira oku orurembo Elimaayi orw'omuri Buperisiya rurikurangaanwa ahabw'obutungi bwarwo bw'efeeza n'ezaabu. 2Endaaro yaamwo ekaba erimu eby'obutungi bingi, erimu engabo z'ezaabu n'ebyoma by'okwekingiza aha kifuba n'eby'okurwanisa, ebyatsigirweho Alekisandero mwene Filipo omugabe wa Makedoniya, owaabandize kutegyeka Abaguriiki. 3Atyo yaija yaateeraho kukwata orwo rurembo n'okurunyaga; kwonka tiyaabaasa, ahabw'okuba enaama ye ekamanywa abaamwo, 4baamugungira nibamurwanisa; yaahunga, yaarugayo aine obujune bwingi kugaruka Babulooni.
5Bwanyima omuntu yaija yaamushanga Buperisiya, yaamugambira ku amahe agaagiire omu nsi ya Yuda gaasingwirwe; 6ku Lusiya yaabandize kuzayo aine eihe ry'amaani, kwonka ku yaakubire akahunga Abayudaaya; kandi ku Abayudaaya batungire amaani ahabw'eby'okurwanisa n'eby'okubaha emikono n'eminyago mingi ebi baanyagire amahe gu baacwekyereize. 7Kandi ku baasheenyagwire ekirikuzira eki yaabaire ayemereize aha itambiro omuri Yerusalemu, n'Omwanya Ogurikwera ku bagutaireho ebisiika biraingwa, bikagwehinguririza nka bwabiso, n'orurembo rwe Beetizuuri bakarugira batyo.
8Omugabe ku yaahuriire egyo nkuru yaagwa omu kahuruko, yaakwatwa orutetema rwingi. Yaaza omu kitanda kye, yaarwazibwa obujune, ahabw'okuba ebintu tibiramugyendeire nk'oku yaabaire ateekateekire. 9Yaamara ebiro bingi abyami aine enaku nyingi; yaahika n'aha kumanya ku yaaza kufa. 10Atyo yaayeta bagyenzi be boona, yaabagira ati: Oturo tumburiire, omutima gwangye gwijwire amaganya. 11Naayegira nti: Ebishi ndeebire enaku! Kandi ka mmizirwe omwegyemure! Haza obu naabaire nintegyeka, nkaba ndi ow'embabazi kandi ninkundwa. 12Kwonka mbwenu niinyijuka ebibi bi naakozire omuri Yerusalemu, obu naanyaga ebintu byamwo eby'efeeza n'eby'ezaabu, nkaragiira ku bacwekyereza abatwire omuri Yuda nimbatura busha. 13Nimmanya ku ekyo nikyo kindeeteire ebihikiirizi bingwereire. Mbwenu reeba, enaku zaaza kuunyitira omuri eri ihanga ritari ryangye!
14Atyo atuma ku beeta Filipo, omwe ahari bagyenzi be, amuhindura omutegyeki w'obugabe bwe bwona, 15amuha ekirunga kye ky'obugabe na bushuuti ye n'empeta ye ey'akamanyiso, ngu abone kworora Antiyoko omutabani, okuhitsya obu ariba omugabe. 16Ogwo mugabe Antiyoko afa atyo, omu mwaka gwa igana na makumi ana na mwenda. 17Lusiya ku yaahuriire ngu omugabe afiire, yaayemeka Antiyoko mutabani w'ogwo mugabe. Lusiya niwe yaabaire amworoire ari omwana, akamukubya eiziina Eupatoori.
Yuda Makabeho okugota ekigo ky'omuri Yerusalemu
18Mbwenu abantu b'omu kigo ekyerindirwamu bakaguma bakubiire Isiraeli omu myanya eyehinguriiize Omwanya Ogurikwera. Baateeraho omu buryo bwona kubakora kubi, n'okuha Abanyamahanga amaani. 19N'ahabw'ekyo Yuda akamaramaza kubacwekyereza, yaahuruza abantu boona kubagota. 20Baateerana, baagota ekigo ekyerindirwamu, omu mwaka gwa igana na makumi ataano; yaataho eminaara y'okubagotesa, n'ebyoma by'okurwanisa orugamba. 21Kwonka bamwe omu baabaire bagotsirwe baatoroka, n'Abaisiraeli bamwe abatarikutiina Ruhanga baabazamu. 22Baahika omugabe, baamugira bati: Oryahitsya hi okutakora by'obwinganisa, okahoora beene waitu? 23Itwe tukeesiima kuheereza sho, kutwaza nk'oku yaagambire n'okukuratira ebiragiro bye. 24Nikyo ab'eihanga ryaitu bagoteire eki kigo kyerindirwamu, bakatubeera abazigu; kandi hoona batwitsiremu abantu baingi abarikwingana n'abu bakwatsire, baanyaga ebi tutungire. 25Tiitwe babangiire omukono twenka, bagubangiire n'ensi zoona ezi barikwatana nazo. 26Mbwenu reeba, eri izooba baateera orusiisira kurwanisa ekigo ky'omuri Yerusalemu ekyerindirwamu, kukikwata; bombekire ebigo by'okurinda Omwanya ogurikwera na Beetizuuri. 27Ku oraabe otarahukire kubazibira, nibaija kukora ebirikukiraho, haza nooba otakibaasa kubeemereza.
Ehururu ya Antiyoko V na Lusiya
28Ekyo omugabe ku yaakihuriire, yaagira ekiniga kingi. Yaateerana banywani be boona, abakuru b'amahe n'abakuru ab'ahambaraasi. 29Amahe g'empangisano nago gaija ahu ari, nigaruga omu bundi bugabe bwingi n'omu birwa by'omu nyanja. 30Omubaro gw'amahe ge gwaba abaserukare abarikugyendesa ebigyere akasiriira kamwe, ab'ahambaraasi obukumi bubiri, kandi n'enjojo makumi ashatu na ibiri ezimanyiriire orugamba. 31Baaraba omuri Idumaaya, baateera ensiisira ahari Beetizuuri, baagigota; baamara ebiro bingi nibarwana, baataho n'ebyoma by'orugamba; kwonka Abayudaaya baashohora baazootsya, baarwana mashaija.
32Bwanyima Yuda yaaruga omuri ekyo kigo, yaateera orusiisira Beetizekariya, aharikureebana n'orusiisira rw'omugabe. 33Kare omu kasheeshe omugabe yaimuka, yaatwara eihe rye yaariragiira kutoora omuhanda gurikuza Beetizekariya; engabo ze zaayeteekateekyera orugamba, zaateera enzamba. 34Zaayoreka enjojo eshande y'emizaabibu n'ey'enkyerere, ku ziimukiiriza kurwana orugamba. 35Ezo nyamaishwa baazibaganisiza emitwe y'abarwani, buri njojo yaagira abashaija rukumi, bajwaire ekooti z'ekyoma n'enkufiira z'omuringa aha mitwe yaabo, kandi buri nyamaishwa baagitaho abashaija magana ataano ab'ahambaraasi abatoorainwe. 36Ezo ngabo zikaza omu myanya yaazo bukiri kare, hoona ah'enyamaishwa yaabaire eri: ahi yaabaire eza hoona, zigyenda nayo zitagitsigireho. 37Aha mugongo gw'ezo njojo bakaba bakomeireho eminaara y'embaaho egumire kandi eshwekirwe, ekomeirwe ahari buri nyamaishwa n'enkoba z'omutaano; haza ahari buri emwe hariho abashaija bana abaine eby'okurwanisa, abaabaire nibagyemaho kurwana, eine n'omubingi waayo Omuhindi. 38Abandi ab'ahambaraasi bakateebwa ahari buri rubaju orw'embaju zombi ez'eihe kurabanisamu abazigu, haza obwo bo nibarindwa abatengire orugamba. 39Eizooba ku ryateire aha ngabo z'ezaabu n'ez'emiringa, enshozi zaamurinkanira hamwe n'ezo ngabo, zaayangashana nk'emuri zirikwaka. 40Mpaho ekicweka ky'eihe ry'omugabe kyayeshandiza aha bibungo biraingwa, n'ezindi ngabo zaaza omu ruhita, baagyenda omu maisho bahamire kandi batebeekanisiibwe gye.
41Boona abaahuriire orwari rw'egyo migogo n'emitsindo yaayo hamwe n'okuhondana kw'eby'okurwanisa byayo, baatetema, ahabw'okuba eryo ihe rikaba riri rihango munonga kandi ery'amaani. 42Kwonka Yuda n'eihe rye tibaagarura kibunu nyima, baarwana orugamba, haagwaho abantu magana mukaaga ab'omu ihe ry'omugabe. 43Reero Eleyazaaari orikwetwa Avaraani, akareeba emwe ahari ezo nyamaishwa ejwaire eby'okurwanisa by'obugabe. Ekaba eri ndaingwa okukira ezindi, yaateekateeka ngu omugabe niyo ariho. 44N'ahabw'ekyo yaayehayo kujuna abantu be n'okwetungira eiziina eritaryeba. 45Atyo yairuka n'obumanzi, yaayenaga ahagati y'emishororongo y'abarwani kuhika egyo nyamaishwa. 46Egyo njojo yaagireetwa omunda, yaagicumita naagituruka ahansi, yaagiita; kwonka yaamugwera, yaamugwisaho. 47Abayudaaya ku baareebire eihe ry'omugabe riine amaani, engabo ze nizirwana ziine ekishinjo, baakuba, baahunga.
Abasiriya okukwata Beetizuuri n'okugota Siyooni
48Abaserukare b'eihe ry'omugabe bakainamuka Yerusalemu kurwanisa Abaayuda, omugabe yaateera ensiisira omuri Buyudaaya n'aha Rushozi Siyooni. 49Yaakora n'Ababeetizuuri endagaano y'obusingye, baaruga omu rurembo, ahabw'okuba bakaba bataine byokurya by'okubabaasisa kwemera okugotwa. Manya gukaba guri omwaka gw'ekyosi kya Sabato omuri egyo nsi. 50Omugabe atyo yaakwata Beetizuuri, yaatayo n'abarinzi b'okugirinda. 51Bwanyima yaateera ensiisira omu maisho g'Omwanya Ogurikwera okumara ebiro bingi. Yaataho eminaara y'okugotesa, n'ebyoma by'okutambika emiriro n'amabaare n'ebindi byoma by'okurasha emyambi n'eby'okurekyeza enjungu. 52Abayudaaya nabo baakora ebyoma by'orugamba ebiri nk'ebya bari, baamara ebiro bingi nibarwana. 53Kwonka bakaba bataine byokurya bi beebiikiire, ahabw'okuba gukaba guri omwaka gwa mushanju, kandi abaabaire basingiirwe Buyudaaya nibaruga omu Banyamahanga, bakaba baherizeho ebyokurya ebyabaire bitsigaire omu mabiikiro. 54Ni bakye abaabaire batsigirwe omu Mwanya Ogurikwera, ahabw'okuba abandi enjara ekabaremesa, baataataana, buri omwe yaaza owe.
Omugabe okuha Abayudaaya obusingye
55Bwanyima Lusiya akahurira ku Filipo, ou omugabe Antiyoko akihuriire yaataireho kworora omutabani Antiyoko kuba omugabe, 56agarukire naaruga Buperisiya na Bumeediya n'amahe agagiireyo n'omugabe, kandi ku arikwenda kuba niwe yaategyeka eihanga. 57Atyo aragiira ku barugayo ahonaaho, kandi agambira omugabe n'abakuru b'amahe n'abantu ati: Buri izooba nitwongyera kubura amaani, ahi turikwiha eby'okurya tibyakizooka, n'omwanya ogu turikurwanisa n'ogw'amaani, kandi eby'obugabe nibiturigitirira munonga. 58Mbwenu murekye turagaane endagaano n'aba bantu, tugire obusingye nabo hamwe n'eihanga ryabo ryona. 59Tubaikirize kukuratira eby'amateeka gaabo, nk'oku baabaire batwaza bwabiso, ahabw'okuba ku twagaihireho, kyabareetera ekiniga, baakora ebyo bintu byona. 60Ebi Lusiya yaagambire bikagwisa gye omugabe n'abakuru b'amahe, kandi yaatuma aha Bayudaaya naabashaba obusingye, nabo baakiikiriza. 61Omugabe n'abakuru b'amahe baabahamiza nibarahira; ekyo kyareetera Abayudaaya kuruga omu kigo. 62Kwonka omugabe ku yaataahire omu kigo ky'aha Rushozi Siyooni, yaareeba kigumire, yaarya endahiro ei yaarahiire, yaaragiira ku basheenya ebisiika byona ebirwehinguririize. 63Bwanyima yaarugayo juba, yaagaruka Babulooni. Yaashanga Filipo naategyeka orurembo, yaamurwanisa, yaarukwata.
Demetiriyo I okurya obugabe
Currently Selected:
1 Maka 6: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.