1 Maka 4
4
1Mbwenu Gorigiya akatwara abarwani enkumi itaano abarikugyendesa ebigyere, n'ab'ahambaraasi rukumi abatoorainwe; ogwo mutwe gw'abarwani gwashohora nyekiro 2kuteera orusiisira rw'Abayudaaya n'okubarwanisa kitaraariire, gwebembeirwe ab'omu kigo ky'okwerinda. 3Kwonka Yuda ku yaakihuriire, we n'abe enkwata-ngabo, baashohora kuteerera eihe ry'omugabe omuri Emausi; 4obwo omutwe gw'abarwani gutari mu rusiisira. 5Gorigiya ku yaataahire nyekiro omu rusiisira rw'Abayudaaya, yaashanga hataine orimu, nikwo kubasherura omu bibungo, ahabw'okuba akagira ati: Aba bantu baatuhunga.
6Ku bwabaire nibutaagurukana, Yuda yaareebwa ari omu ruhita n'abantu enkumi ishatu, kwonka bataine bijwaro by'okurwanisa na zaarurara ebi baakwenzire. 7Kandi baareeba orusiisira rw'Abanyamahanga ruri orw'amaani, rugumire, rwehinguririziibwe ab'ahamabaraasi abatendekirwe munonga omu by'orugamba. 8Kwonka Yuda yaagambira abashaija bu yaabaire aine, ati: Mutatiina obwingi bwabo, nari okugira obwoba baabateera. 9Mwijukye obu baatatenkuriitwe baarokoirwe aha Nyanja Erikutukura, obu Faraaho n'amahe ge baababinga babakuratiire. 10Mbwenu murekye tuhoogyere Ow'omu iguru, akaatugirira embabazi, aijuka endagaano ye na baatataitwe, haza eri izooba asiitagurira eri ihe omu maisho gaitu. 11Obwo nibwo Abanyamahanga boona baraamanye ku hariho ocungura Isiraeli, akagijuna.
12Abanyamahanga ku baanagireyo amaisho, baabareeba nibaija kubateera, 13nabo baahuruutuka omu rusiisira rwabo kubarwanisa. Reero abu Yuda yaabaire aine baateera enzamba, 14baatenga orugamba. Abanyamahanga baabingwa, baahungira omu ruhita; 15abaatsigaire enyima boona baabaitsa zaarurara. Baababinga, baabahitsya Gazara n'omu mpita za Idumaaya na Azooto na Yamuniya, baabaitamu abantu enkumi ishatu. 16Yuda n'ab'eihe rye baagarukira aho, tibaagumizamu kubabinga; 17kandi Yuda ogwo yaagambira abe ati: Mutagira omururu gw'okunyaga, ahabw'okuba orugamba rukituri omu maisho. 18Manya Gorigiya n'ab'eihe rye baturi haihi omu bibungo. Mbwenu mugungire abazigu baitu, mubarwanise, reero bwanyima mubone kwenyagira eminyago mutaine ki murikutiina.
19Yuda ku yaabaire naakiheza ati kugamba, baareeba ekicweka ky'ababisha kyareeterwa omu bibungo. 20Abo babisha bakareeba eihe ryabo ryaherize kubingwa, n'Abayudaaya nibootsya orusiisira, ahabw'okuba omwika gu baareebire gukabooreka ekyabaho. 21Ekyo ku baakimanyire, baatiina munonga, kandi ku baareebire eihe rya Yuda ritengire orugamba omu ruhita kurwana, 22boona baahungira omu nsi y'Abafilisitiya. 23Bwanyima Abaayuda baagarukayo kunyaga eby'omu rusiisira, baanyaga ezaabu nyingi n'efeeza n'emyenda y'erangi ya bururu n'eya bujwa n'ebintu bingi by'obutungi. 24Omu kugarukayo baagyenda nibeeshongora eby'okuhimbisa Ow'omu iguru, ahabw'okuba ni murungi kandi embabazi ze zigumaho ebiro byona. 25Eryo izooba okwo nikwo Isiraeli yaatungire okurokorwa kurikutangaaza.
Orugamba rwa Lusiya orw'okubanza
26Ab'omu Banyamahanga abaahonokireho bakagyenda baateekyerereza Lusiya byona ebyabaireho. 27Ku yaabihuriire, yaashoberwa, yaahahaara omutima, ahabw'okuba ebya Isiraeli bikaba okundi, tibyaba nk'oku yaabaire naateekateeka, kandi tibyaba nk'oku omugabe yaabaire aragiire. 28Omwaka ogwakuratsireho yaarundaana abarwani entoore obukumi mukaaga abarikugyendesa ebigyere, n'ab'ahambaraasi enkumi itaano kugomoora Abaisiraeli. 29Baija Idumaaya, baasiisira Beetizuuri. Yuda yaabugabugana nabo aine engabo akakumi kamwe.
30Ku yaareebire eryo ihe riri ery'amaani, yaashaba naagira ati: Ohimbisibwe iwe Omujuni wa Isiraeli, owaasiitagwire omurwani rugambwa owaatuteire, nookoresa omukono gw'omuheereza waawe Daudi, okahayo orusiisira rw'Abafilisitiya, okarurekurira Yonataani mwene Saulo, kandi okarurekurira owaabaire naahagatira eby'okurwanisa bye. 31Mbwenu eri ihe obe nikwo waarigota, nookoresa omukono gw'abantu baawe Abaisiraeli, haza bahemukye ahabw'amahe gaabo n'ahabw'ab'ahambaraasi zaabo. 32Bahindure baakikwaya; yazya obumanzi oburikubareetera eishaija, bateteme nibacwekyerera. 33Baitse rurara y'abakukunda, haza boona abamanya eiziina ryawe bakweshongorere eby'okukuhimbisa.
34Bwanyima amahe gombi gaateerana butwe-bwa-ntaama; omu b'omu ihe rya Lusiya haagwamu abantu enkumi itaano, baafa nibarwana.
35Lusiya ku yaareebire amahe ge baagaraza, yaayetegyereza obumanzi obwateire Abaayuda omuhimbo, n'oku beeteekateekyeire yaaba kukira nari kufa mashaija, yaaruugayo, yaaza Antiyokiya, yaataahizayo omu ihe abarwani baguriirwe, kugaruka kuteera Buyudaaya n'eihe rihango eririkukiraho.
Okweza Nyaruju ya Ruhanga n'okugimuhongyera
36Obwo Yuda na beene ishe bakagira bati: Reeba, abazigu baitu bacwekyereziibwe, mbwenu ka twinamukye, tuze kweza Omwanya Ogurikwera n'okuguhonga. 37Ab'omu ihe boona nikwo kuteerana, bakainamuka bakaza aha Rushozi Siyooni. 38Bakareeba Omwanya Ogurikwera guri omushaka, eitambiro rihagaziibwe n'amarembo gookiibwe. Omu bibuga baashanga ebishaka bimezire, bishakambire nk'eby'orushaka nari nk'eby'aha rushozi. Kandi baareeba ebishengye by'abahongyerezi bisheenyagurikire. 39Batyo baataagura ebi bajwaire, baacura n'amaganya maingi, baayeshukyeera eiju. 40Baajuumara ahansi, reero ku baateire enzamba z'omugyenzo, baahoogyera Ow'omu iguru. 41Bwanyima Yuda yaaragiira abantu kurwanisa abari omu kigo ky'okwerindiramu, okuhitsya obu araaheze kweza Omwanya Ogurikwera.
42Yaatoorana abahongyerezi abataine kamogo, abarikukuratirira kimwe eiteeka, 43baayeza Omwanya Ogurikwera, baagwihamu amabaare agahagaziibwe, baagata omu mwanya ogw'eby'oburofa. 44Baahanuura eki baraakorere eitambiro ry'ebicwekize eryabaire rihagaziibwe. 45Baateekateeka ku rishemereire kusheenywa, ngu ritakaababeera ekijumo, ahabw'okuba Abanyamahanga bakaba baarihagaize. Batyo baasheenya eryo itambiro. 46Amabaare gaaryo baagarunda omu mwanya ogugashemereire aha kabungo ka Nyaruju, okuhitsya obu omurangi araije akabagambira oku baraagagire. 47Reero baareeta amabaare gatabaizire, nk'oku eiteeka ririkuragiira, baagombekyesa eitambiro erisya eririkushusha erikuru; 48kandi baayombeka busya Omwanya ogurikwera n'ebisiika by'omunda ya Nyaruju, baayeza ebibuga. 49Baakora ebintu bisya ebirikwera eby'okukoresa omuri Nyaruju, baagitamu ekikondo ky'eitabaaza n'eitambiro ry'okwotereraho obubaani, n'emeeza. 50Bwanyima baayoterera obubaani aha itambiro, baahemba etaara aha kikondo kyazo, zoona zaayakira omuri Nyaruju. 51Baata omugaati aha itambiro, baateera emikingo. Batyo baaheza omurimo gu baabaire beehaireyo kukora. 52Kare omu kasheeshe aha kiro kya makumi abiri na bitaano eky'okwezi kwa mwenda, nikwo kwezi kwa Kisileevu, omu mwaka gwa igana na makumi ana na munaana, 53bakaimuka baatamba ekitambo, nk'oku eiteeka ririkuragiira, aha itambiro risya ery'eby'okucwetsya, eri baayombekire. 54Baarihongyera Ruhanga nibeeshongora, nibateera enanga n'emikuri n'enshandaazo, omu bunaku bumwe n'aha izooba rimwe, ebi Abanyamahanga baabaire barihagariizeho. 55Abantu boona baajuumara baaramya kandi baahimbisa Ow'omu iguru, owaababaasiise kusingura. 56Baamara ebiro munaana nibakora emigyenzo y'okuhongyera Ruhanga eitambiro, batamba ebitambo by'okucwetsya bashemereirwe, baahonga n'ekitambo ky'okusiima Ruhanga ahabw'okubarokora. 57Omu maisho ga Nyaruju baahahundisa ebirunga by'ezaabu n'obugabo, baagaruraho amarembo n'ebishengye by'abahongyerezi baabitamu enyigi. 58Haabaho okushemererwa kuhango omu bantu, n'ekihemu ekyareetsirwe Abanyamahanga kyaihwaho.
59Bwanyima Yuda na beene ishe, ekigombe ky'Abaisiraeli boona, baahamya ku buri mwaka omu bunaku nk'obwo ebiro by'okuhonga eitambiro biguma nibiijukwa n'okushemererwa n'okunanuka okumara ebiro munaana, nibatandikira aha kiro kya makumi abiri na bitaano ky'okwezi kwa Kisileevu.
60Omuri obwo bunaku Orushozi Siyooni baarwombekaho ebigo biraingwa n'eminaara egumire okurwehinguririza, kuzibira Abanyamahanga kwija kubaribatiirira, nk'oku baabagizire bwabiso. 61Yuda yaatayo abaserukare b'okururinda, kandi yaayombeka Beetizuri ekigo, ngu abantu babone kugira ekigo kigumire ekirikureebana na Idumaaya.
Yuda okuteera Abaidumaaya n'Abaamooni
Currently Selected:
1 Maka 4: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.