1 Maka 3
3
1Obwo omutabani Yuda owaabaire naayetwa Makabeho, yaaba omukuru w'amahe omu mwanya gwe. 2Beene ishe boona na boona abaakwataniise na ishe baamuha emikono, baarwanirira Isiraeli n'okushemererwa.
3Yaaranganisa ekitiinwa ky'eihanga rye,
nk'ekikaaka kyona yaajwara ekyoma ky'okwekingiza aha kifuba;
yaayezirika eby'okurwanisa omu rugamba,
yaarwana engamba naarindisa engambo ze rurara ye.
4Omu bi yaakozire akaba ari nk'entare;
ari nk'ekishore ky'entare ekirikutsindira aha ki kyaita.
5Akacoocooza abagomi, yaababinga abakuratiire,
yaayotsya abaabaire nibaganzya eihanga rye.
6Abagomi ahabw'okumutiina baagarura ebigyere enyima,
enkozi z'ebibi zoona zaaburaburirwa,
ahabw'omukono gwe, okujuna kwasingura.
7Akagwisa kubi abagabe baingi,
kwonka yaananura Yakobo ahabw'ebi yaakozire;
okumwijuka kuhimbisibwe ebiro byona.
8Akagyendagyenda omu ndembo za Yuda,
yaacwekyereza abatatiina Ruhanga,
yaabamara omu nsi,
yaiha atyo ekiniga kya Ruhanga ahari Isiraeli.
9Okurangaanwa kwe kukahika aha mperu z'ensi;
yaataaruura abaabaire nibahwerekyerera.
Obusinguzi bwa Yuda obwabandize
10Kwonka Apoloniyo akahuruza Abanyamahanga n'eihe rihango eryarugire Samariya kurwanisa Isiraeli. 11Yuda ku yaakimanyire, yaahurura kubugabugana nawe, yaamukiza emikono, yaamwita. Baingi baahutaara, kandi baahwaho; abaatsigaireho baahunga. 12Bwanyima baakwata eminyago yaabo, na Yuda yaatwara rurara ya Apoloniyo, yaaguma naagyejunisa omu rugamba omu myaka y'amagara ge goona.
13Mbwenu Serooni omukuru w'eihe ry'Abasiriya ku yaahuriire Yuda ateeraine emigogo y'abantu, obariiremu n'ekigombe ky'abantu abeesigwa abaagumire nawe, bakaza nawe aha rugamba, 14yaagira ati: Naanye ka nyije nyetungire eiziina, mbe ow'ekitiinwa omu bugabe. Ati: Ka nyije ndwanise Yuda na bagyenzi be abarikugaya ebi omugabe aragiire. 15Rityo eihe ry'amaani ery'abatatiina Ruhanga ryagaruka ryainamuka hamwe nawe kumuha emikono, kuhoora enzigu abaana ba Isiraeli.
16Ku yaahikire aha kanyegyero ka Beetihooroni, Yuda yaashohora kubugabugana nawe aine omutwe gw'abantu bakye. 17Haza ku baareebire eryo ihe niriija kubugabugana nabo, baagira Yuda bati: Itwe abakye abarikwingana tuti nitubaasa tuta kurwanisa egyo nyanja y'abantu kandi ey'amaani, haza tugwire enshazi ahabw'okuba eri izooba titwine ki twariire? 18Yuda yaabagarukamu ati: Nikirahuka abaingi kukubwa abakye, ahabw'okuba omu maisho g'Ow'omu iguru, eky'okujuna abantu oine engabo nyingi nari nkye tikiine mutaano. 19Obusinguzi omu rugamba tibwema ha buhango bw'eihe, kureka amaani garuga aha W'omu iguru. 20Baija kuturwanisa baine amaryo maingi, n'okugomera eiteeka ngu batucwekyereze n'abakazi baitu n'abaana baitu kandi batunyagye. 21Kwonka itwe niturwana ahabw'amagara gaitu n'ahabw'amateeka gaitu. 22We wenka naija kubasiitagurira omu maisho gaitu; n'ahabw'ekyo mutabatiina.
23Ku yaaherize kugamba ebyo, yaasyokayo, yaateera Serooni n'eihe rye, baasiitagurirwa omu maisho ge. 24Baababinga babakuratiire, nibarundukira aha kashuumo ka Beetihorooni, baabahitsya omu ruhita; abantu magana munaana omuribo baagwaho, abaatsigaireho baahungira omu nsi y'Abafilisitiya. 25Yuda na beene ishe baatandika kutiinwa, obwoba bwaita Abanyamahanga boona ababeehinguriize. 26Okurangaanwa kwe kwahika aha mugabe, n'Abanyamahanga baatebya eby'engamba za Yuda.
Antiyoko okweteekateeka kuteera Buperisiya na Buyudaaya
27Omugabe Antiyoko ku yaahuriire ebi baamugambiire, yaagira ekiniga kingi munonga, yaatuma kuhuruza amahe goona ag'omu bugabe bwe, gaaba eihe ry'amaani munonga. 28Yaigura amabiikiro ge, yaaha ab'amahe ge ebihembo byabo by'omwaka, kandi yaabaragiira kuguma beeteekateekyeire kyona ekyakubaho. 29Bwanyima yaareeba esente zaatuuba munonga omu ibiikiro, n'emishoro erikuruga omu byanga yaaba mikye ahabw'obugomi n'okujagarara ebi we wenka yaareetsire omu nsi, ahabw'okwihaho amateeka agaabaire gariho okwiha omu biro bya ira. 30Yaatiina ngu obundi takaatunga mpiiha nk'ezi yaabaire aine bwabiso ahabw'okukoresa emirimo ye n'ahabw'ebiconco ebi yaabaire agabira eryo okukira abandi bagabe abaamubandiize. 31Ku yaashobeirwe munonga, yaacwamu kuza Buperisiya kushorooza emishoro omu byanga byayo, ngu abone kukanyisa empiiha.
Lusiya okutsigara ari omurinzi w'obugabe
32Eby'obugabe, okwiha aha mugyera Eufuraati okuta aha mwatano gwa Misiri, yaabitsigira Lusiya omwinginya ow'omu ruganda rw'abagabe. 33Kandi Lusiya akaba ari ow'okureeberera Antiyoko mutabani w'ogwo mugabe, okuhitsya obu omugabe arigaruka. 34Reero yaacwaho kimwe kya kabiri ky'amahe ge hamwe n'enjojo yaabiha Lusiya, haza yaamuhabura byona ebi arikwenda ngu bikorwe. Kandi ahabw'abatuuzi ba Buyudaaya na Yerusalemu, 35Lusiya akaba ari ow'okwohereza eihe ry'okubarwanisa kubamaraho, n'okucwekyereza amaani ga Isiraeli n'ag'abaatsigaire Yerusalemu, ngu batakaijukwa obundi omuri ogwo mwanya; 36kandi n'okuta abanyamahanga omu nsi yaabo yoona, n'okubabaganisiza egyo nsi. 37Omugabe we yaatwara kimwe kya kabiri ky'engabo ze ekyatsigaireho, yaaruga omu rurembo rwe orukuru Antiyokiya, omu mwaka gwa igana na makumi ana na mushanju. Yaayambuka omugyera Eufuraati, yaaraba omu byanga bya ruguru.
Gorigiya na Nikanoori okwebembera eihe ry'Abasiriya
38Lusiya akatoorana Putolemaayo mwene Dorimeene na Nikanoori na Gorigiya, abashaija enkwata-ngabo ab'omuri banywani b'omugabe. 39Yaaboohereza hamwe n'abarwani obukumi buna abarikugyendesa ebigyere, n'ab'ahambaraasi enkumi mushanju, kuza omu nsi ya Yuda kugicwekyereza, nk'oku omugabe yaaragiire. 40Batyo baarugayo n'eihe ryabo ryona. Ku baahikireyo, baasiisira haihi na Emausi omu ruhita. 41Abashuubuzi b'omuri ekyo kyanga ku baahuriire ebi barikubagambaho, baatwara efeeza n'ezaabu nyingi munonga n'empingu, baaza omu rusiisira kwetungirayo Abaisiraeli b'okuba abahuuku. N'amahe agaarugire Siriya n'omu nsi y'Abafilisitiya gaateerana nabo.
42Yuda na beene ishe bakareeba ebintu nibyeyongyera kuba kubi, n'amahe nigasiisira omu nsi yaabo. Kandi baamanya ebi omugabe aragiire kukora aha bantu, kubacwekyerereza kimwe. 43Kwonka baagambirana bati: Ka tuhoorere abantu baitu abaacwekyereziibwe; turwanirire eihanga ryaitu n'Omwanya Ogurikwera. 44Mpaho ekimbuuro ky'abantu kyayeteerana kweteekateekyera orugamba n'okushaba Ruhanga, nibamweshengyereza kubagirira embabazi n'esaasi.
45Yerusalemu obwo ekaba etakituurwamu bantu,
eri nk'eihamba, hatariho baana baayo abarikugiijamu nari okugirugamu,
Omwanya Ogurikwera guribatiriirwe,
enduga-mahanga zitwire omu kigo ky'okwerindiramu,
kandi riri eicumbi ry'Abanyamahanga,
Abaayakobo batakiine kushemererwa,
emikuri n'enanga bitakiteerwa.
Abayudaaya okuteeranira Mizipa
46Abayudaaya bakateerana, baaza Mizipa ahashungaine na Yerusalemu, ahabw'okuba ira Abaisiraeli bakaba bagira omwanya gw'okushabiramu omuri Mizipa. 47Eryo izooba baayesiibyakwo, baajwara ebiguniya, baayeshuka eiju omu mutwe, baataagura ebi bajwaire. 48Baashuuruura ekitabo ky'eiteeka, kwebuuzamu ebi Abanyamahanga beebuuza aha bishushani by'emandwa zaabo. 49Kandi baareeta ebijwaro by'obuhongyerezi n'emiganuro y'ebijuma n'emitoijo ya kimwe kya ikumi, baamurika Abanaziri abaabaire baherize ebiro byabo; 50baahoogyera Ow'omu iguru n'eiraka rihango, bati:
Ebi tubigire tuta, kandi tubite hi?
51Omwanya gwawe Ogurikwera guribatiriirwe,
gwahagazibwa, n'abahongyerezi
baawe nibacura ahabw'okuhemurwa.
52Mbwenu reeba, Abanyamahanga beeteeraine
kuturwanisa n'okutucwekyereza;
naiwe noomanya enaama ei batucumiire kuturwanisa.
53Mbwenu itwe nitwija kubaasa tuta
kubaza omu kazo, otatuhaire mikono?
54Mpaho baateera enzamba kandi baayogoora munonga. 55Ebyo ku byahwaire, Yuda yaataho abeebembezi b'eihanga ab'okureeberera abantu enkumi, amagana, amakumi ataano n'amakumi. 56Kandi yaagambira abaabaire nibombeka amaju, nari abari haihi kushwerana, nainga abarikubyara emizaabibu, nari abagwire enshazi, ku buri omwe agarukayo omuka ye, nk'oku eiteeka ririkuragiira. 57Rityo eihe ryahurura, ryasiisira aha bukiizi-bwa-buryo obwa Emausi.
58Reero Yuda yaabagira ati: Mwezirikye, mube emanzi, mweteekateekye kare omu kasheeshe kurwanisa Abanyamahanga abeeteeraine kuturwanisa n'okutucwekyereza hamwe n'Omwanya gwaitu Ogurikwera. 59Haakiri itwe okugwa aha rugamba, okukira okureeba eihanga ryaitu n'Omwanya Ogurikwera nibihikwaho ebihikiirizi. 60Kwonka nk'oku Ow'omu iguru araasiime, nikwo araagire.
Orugamba rwa Emausi
Currently Selected:
1 Maka 3: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.