1 Maka 15
15
1Antiyoko mutabani w'omugabe Demetiriyo ku yaabaire ari omu birwa by'aha nyanja, yaahandiika ebaruha, yaagitwekyera Simooni omuhongyerezi omukuru kandi omwebembezi w'Abayudaaya n'eihanga ryona. 2Ebi nibyo byabaire bigirimu: Nyowe Omugabe Antiyoko, naakuhandiikira iwe Simooni omuhongyerezi omukuru kandi omwebembezi w'Abayudaaya hamwe n'eihanga ryabo, nimbaramutsya. 3Abantu b'akabi bakubwire obugabe bwa baatatenkuriitwe, mbwenu niinyenda kwitanira obwo bugabe ngu mbugarureho nk'oku bwabaire buri bwabiso. Hati ntungire eihe ry'abarwani abaguririirwe, kandi nteekateekire emeeri z'okurwanisa. 4Niinyenda kwambuka kuhika omuri egyo nsi, mbone kugumizamu kurwanisa abaacwekyereize ensi yaitu, bakahwerekyereza endembo nyingi omu bugabe bwangye. 5Mbwenu nu niinyongyera kukuhamiza ku emishoro yoona ei abagabe abambandiize baakusaasiire erikwija kuguma ekusaasiirwe, kandi n'okutagaruka kukwenza ebindi ebi baakwihireho. 6Ninkwikiriza kweheeshera empiiha z'okukoresa omu ihanga ryawe. 7Kandi niinyikiriza Yerusalemu n'Omwanya Ogurikwera ku byetegyeka. Eby'okurwanisa byona ebi waatebeekaniise n'ebigo bi waayombekire ebi oine bigume biri ebyawe. 8Eibanja ryona eri oine omu ibiikiro ry'empiiha z'obugabe n'agandi mabanja agaribaho gaakwihwaho okwiha hati okuhitsya ebiro byona. 9Ku turaabe twakubwire obugabe bwaitu, nitwija kukuha ekitiinwa kihango, tukihe n'eihanga ryawe na Nyaruju, haza ekyo kitiinwa kirangaanwe omu nsi yoona.
10Omu mwaka gwa igana na makumi mushanju n'ena, Antiyoko ogwo akahurura, yaateera ensi ya baishenkuru. Amahe goona gaamushagatira, haza Turiifo yaatsigara na bakye. 11Antiyoko yaagyenda amubingire, yaamuhitsya Doori ey'aha rubaju rw'enyanja; 12onu yaamanya enaku ku zaamwehundirira n'engabo ze ku zaamuhungaho. 13Antiyoko atyo asiisira aharikureebana na Doori, aine abarwani akasiriira kamwe n'obukumi bubiri, n'ab'ahambaraasi enkumi munaana. 14Agota orwo rurembo, n'emeeri ziija omu rugamba nizireetwa ogw'enyanja; amigisiriza munonga orwo rurembo embaju zombi, naareetwa ogw'eitaka n'ogw'enyanja, atarikwikiriza muntu weena kururugamu nari kurutaahamu.
Ebaruha ei Abarooma baahandiikiire Abayudaaya
15Bwanyima Numeniyo na bagyenzi be bakaija nibaruga Rooma baine amabaruha gaahandiikiirwe abagabe n'ezindi nsi. Ebi nibyo byabaire bigarimu: 16Nyowe Lukiyo omutegyeki mukuru w'Abarooma, naakuhandiikira iwe Omugabe Putolemaayo, ninkuramutsya. 17Abaatumirwe Abayudaaya batwizireho bari banywani baitu, kandi abarikukwatanisa naitwe omu by'orugamba, kugaruraho omukago gwaitu n'okukwatanisa kwaitu ebya ira, batumirwe Simooni omuhongyerezi omukuru hamwe n'eihanga ry'Abayudaaya, 18baatureetera engabo ya zaabu y'oburemeezi bwa shilingi nk'akasiriira kamwe. 19N'ahabw'ekyo tucwiremu kuhandiikira abagabe n'abategyeki b'ezindi nsi, barekye kubakora kubi, nari kubarwanisa n'endembo zaabo n'ensi yaabo, nainga okukwatanisa n'abarikubarwanisa; 20twaikiriza n'okwakiira engabo yaabo. 21N'ahabw'ekyo ku haraabe hariho abantu b'akabi, abakuhungiireho nibaruga omu nsi y'owaabo, obagarurire Simooni omuhongyerezi omukuru, abafubire nk'oku eiteeka ryabo riri.
22Ogwo mutegyeki mukuru akahandiikira Omugabe Demetiriyo ebigambo bimwe nk'ebyo, yaabihandiikira na Atalo na Ariyaraate na Arusaake, 23n'ensi zoona na Saamusame n'Abasiparuta n'Abadeelo n'Abamundo, na Sikiyooni na Kariya na Samo na Panfuliya na Lukiya na Halikarinaaso na Roodesi na Faseli na Koosi na Siide na Arado na Goritina na Kuniido na Kupuro na Kureene. 24Kandi baatwekyera Simooni omuhongyerezi omukuru ekihandukururo ky'ebyo byona.
Antiyoko VII okuhinduka omuzigu wa Simooni
25Omugabe Antiyoko akagaruka yaagota Doori, yaaguma naaruhururiza amahe ge kururwanisa, kandi naakora ebyoma by'okurwanisa orugamba; yaakingirana Turiifo, yaamuzibira kushohora nari kutaahamu. 26Bwanyima Simooni akatwekyera Antiyoko abashaija enkwata-ngabo enkumi ibiri kumurwanirira, yaamutwekyera n'efeeza n'ezaabu n'ebintu bingi by'orugamba. 27Kwonka we yaayanga kubyakiira, yaita endagaano zi yaabaire akozire nawe bwabiso, yaataana nawe. 28Yaamutumaho Atenobiyo, omwe ahari banywani be, kugamba nawe ati: Nootegyeka Yoopa na Gazara n'ekigo ekirindirwamu eky'omuri Yerusalemu, kunu ziri endembo z'omu bugabe bwangye. 29Okacwekyereza ebyanga byazo, waashiisha munonga egyo nsi, waakubuura n'emyanya mingi y'omu bugabe bwangye. 30Mbwenu garura endembo ezi waakwatsire n'empiiha z'emishoro y'emyanya ei waakubwire, ey'aheeru y'emyatano ya Buyudaaya; 31nari shi obimpemu ebicweka by'efeeza obusiriira butaano; kandi ahabw'ebi waacwekyereize n'ahabw'empiiha z'emishoro y'ezo ndembo, ondihe ebindi bicweka by'efeeza obusiriira butano. Kitari ekyo nitwija kukuteera tukusingure.
32Atenobiyo munywani w'omugabe atyo ahika Yerusalemu. Ku areeba ekitiinwa kya Simooni n'eby'ezaabu n'eby'efeeza ebiri omu kishengye kye n'ekitiinwa kye kingi, atangaara. Amugambira ebi omugabe amutumireho. 33Simooni amugarukamu ati: Itwe titukatwaraga nsi y'abandi, nobu kwakuba okunyaga ebyabo, kureka ebi twahungwire n'ebya baatatenkuriitwe ebyabaire bitwairwe obundi abazigu baitu omu buryo butahikire. 34Mbwenu tuhiiriirwe, twagarukana ebi twahungwire ahari baatatenkuriitwe. 35Reero Yoopa na Gazara ezi orikushaba, zikaba nizireetera abantu n'ensi yaitu akabi kahango; mbwenu nu ahabwazo nitwija kuha ebicweka by'efeeza akasiriira kamwe. Atenobiyo taine ki yaamugarukiremu, 36kureka akagarukayo aha mugabe aine ekiniga kingi, yaamugambira ebi Simooni yaamugarukamu n'eby'ekitiinwa kye n'ebindi byona ebi yaareebire. Omugabe kashanga yaamucwa amaraka.
Kendebaayo okuganzya Buyudaaya
37Turiifo akatemba emeeri, yaahungira Orutoosiya. 38Omugabe yaahindura Kendebaayo omukuru w'amahe g'ensi z'aha myegyeego y'enyanja, yaamuha engabo z'abarikugyendesa ebigyere n'ez'ab'ahambaraasi. 39Yaamugambira kuteera orusiisira aharikureebana na Buyudaaya, kandi yaamuragiira kwombeka busya Kederooni kuhamya amarembo gaarwo n'okurwanisa abantu; haza omugabe we yaagyenda abingire Turiifo. 40Kendebaayo atyo ahika Yamuniya, atandika kurahura abantu, kuteera Buyudaaya, kutwara abantu bari enkwatwa n'okubaita. 41Yaayombeka Kederooni, yaatayo ab'ahambaraasi n'engabo, ngu babone kuguma nibahurura, nibateera ab'aha mihanda rugyendwa eya Buyudaaya, nk'oku omugabe yaamuragiire.
Batabani ba Simooni okusingura Kendebaayo
Currently Selected:
1 Maka 15: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.