1 Maka 12
12
1Bwanyima Yonataani ku yaareebire yaatunga akaanya, yaatoorana abashaija, yaabatuma Rooma kuhamya n'okugaruraho omukago gwe nabo. 2Kandi amabaruha nk'ago akagatwekyera Abasiparuta n'endiijo myanya. 3Batyo baaza Rooma, baataaha omu Ishengyero, baagira bati: Yonataani omuhongyerezi omukuru hamwe n'eihanga ry'Abayudaaya, batutumire kugaruraho omukago gwabo gwa ira, n'okukwatanisa naimwe omu rugamba. 4Abarooma baabaha amabaruha g'okutwarira ab'obushoboorozi omu byanga byona, nibabashaba kubaha ab'okubashendekyereza, bakabahitsya buhooro omu nsi ya Buyudaaya.
5Mbwenu eki n'ekihandukururo ky'ebaruha, ei Yonataani yaahandiikiire Abasiparuta, ati: 6Nyowe Yonataani omuhongyerezi omukuru n'eishengyero ry'eihanga n'abahongyerezi n'Abayudaaya abandi boona, twabahandiikira imwe beene waitu Abasiparuta, nitubaramutsya. 7Omu bunaku obwahwaire Oniya omuhongyerezi omukuru bakamutwekyera ebaruha erikuruga ahari Dariyo owaabaire ari omugabe waanyu, naagamba ku muri beene waitu, nk'oku eki kihanduukururo ekikomeirwe aha kirikworeka.
8Oniya ogwo akaakiira n'ekitiinwa abaamutumirweho, yaatunga n'ebaruha eyaabaire erimu ebirikumanyisiza kimwe okukwatanisa kwabo omu by'orugamba n'omukago gwabo. 9N'ahabw'ekyo nobu turaabe tutarikwetenda ebyo bintu, okwiha obu twine ebitabo ebirikwera ebirikutugumya, 10kwonka twasiima kubatumaho kugaruraho obuzaare bwaitu n'omukago gwaitu naimwe, ngu tutakaaba abanyaihanga ahariimwe, ahabw'okuba okwiha obu mwatutwekyera egyo baruha yaanyu, hahingwireho omwanya muraingwa. 11N'ahabw'ekyo tutuura nitubaijuka haagira ekyabaho, omu magyenyi gaitu n'aha bindi biro bikuru, omu bitambo bi tutamba n'omu kushaba kwaitu, nk'oku kihikire kandi nk'oku kishemereire kwijuka abanyaruganda. 12Kandi ekitiinwa kyanyu nikitwesiimisa. 13Kwonka itwe eby'obusaasi bingi n'engamba bituturukire oku n'oku; abagabe abatwehinguririize batengire orugamba kuturwanisa. 14Imwe n'abandi abakwatanisa naitwe na banywani baitu titurenzire kubaganzya n'ezo ngamba; 15ahabw'okuba tugira obuhwezi oburuga omu iguru obutubangira, tukakira abazigu, bakahwa amaryo. 16Mbwenu twatoorana Numeniyo mutabani wa Antiyoko, na Antipateri mutabani wa Yasooni twabatuma Rooma kugaruraho omukago gwaitu gwa ira, n'okukwatanisa omu ngamba. 17Twabaragiira ku baija ahariimwe kubaramutsya n'okubareetera ebaruha egi erikuturugaho, ekwatiraine n'eby'okugaruraho obuzaare bwaitu. 18Nitubeeshengyereza, mutugarukyemu omuri ebyo. 19Eki n'ekihandukururo ky'ebaruha ei baatwekyeire Oniya:
20Nyowe Dariyo omugabe w'Abasiparuta, naakuhandiikira iwe Oniya omuhongyerezi omukuru, ninkuramutsya. 21Kireebirwe omu bihandiiko ebikwatiraine n'Abasiparuta n'Abayudaaya ku bari abanyaruganda, kandi ku bari ab'omuryango gwa Aburahamu. 22Mbwenu nk'oku ekyo twakimanya, nitushaba otuhandiikire 23nootumanyisa ku ente zaanyu n'ebi mutungire biri ebyaitu, kandi n'ebyaitu ku biri ebyanyu. N'ahabw'ekyo twaragiira ku entumwa zaitu zibibashoboororera zityo.
Ebya Yonataani omuri Koilesiriya
24Mbwenu Yonataani akahurira ku abakuru b'amahe ga Demetiriyo bagarukire n'eihe rihango eririkukira eryabandize, kumurwanisa. 25Nawe yaahurura naaruga Yerusalemu, yaaterateeranira nabo omu ishaza rya Hamati; ahabw'okuba tarabahaire kaanya kuteera ensi ye. 26Yaayohereza entatsi omu rusiisira rwabo. Ku zaagarukire, zaamugambira ku abazigu barikwetebeekanisa kuteera Abayudaaya nyekiro. 27Eizooba ku ryarengire, Yonataani yaaragiira abashaija be kutaita riisho, n'eby'okurwanisa byabo kubaguma haihi, ngu babone kuseesa ekiro beeteekateekyeire orugamba; yaataho n'emyanya y'abarinzi kwehinguririza orusiisira. 28Abazigu ku baahuriire ngu Yonataani n'abashaija be beeteekateekyeire orugamba, baatiina, baitwa obwoba, baahemba emiriro omu rusiisira rwabo, batyo baarurugamu. 29Kwonka Yonataani n'abashaija be ku baareebire emiriro neeyaka, tibaakimanya okuhitsya obu bwaseesire. 30Bwanyima Yonataani yaabaza omu kirari, kwonka tiyaabahika, ahabw'okuba bakaba baayambukire omugyera Eleureto. 31Yonataani nikwo kukiikama, akaza kurwanisa Abaharabu, abaabaire nibeetwa Abazabadeeyasi, akabasingura kandi akabanyaga. 32Atyo asheenya orusiisira, aza Damasiko, agyenda naaraba omuri eryo ishaza ryona.
33Simooni nawe arugayo, agyenda naaraba omu nsi, ahika Asikalooni n'omu bigo ebihereraine nayo. Akiikama aza Yoopa, agikwata kitaraariire; 34ahabw'okuba akahurira ngu beeteekateekire kurekurira ekigo abu Demetiriyo yaabaire ayohereize. Atyo atayo abaserukare b'okugirinda.
Okwombeka ebigo n'ebisiika bya Yerusalemu
35Yonataani ku yaagarukire, yaateerana abakuru omu ihanga, yaahanuura nabo kwombeka ebigo omuri Buyudaaya, 36kureisya ebisiika bya Yerusalemu, n'okwombeka ekisiika kiraingwa ahagati y'ekigo ky'abaserukare n'orurembo, kukitaanisa n'orurembo ngu kigume hangahari, abaserukare baamwo batakaagira eki baagura nari eki baatunda. 37Batyo baayeteerana kwombeka orwo rurembo; ahabw'okuba ekicweka ky'ekisiika ky'omu ruhanga orurikugaruka burugwa-izooba kikaba kigwire; kandi yaahunduuza ekicweka ekirikwetwa Kafanata, 38Simooni nawe yaayombeka Adida omuri Shefeela, yaakigumya, yaakitaho amarembo n'eby'okugakingisa.
Yonataani okugwa omu mikono y'abazigu
39Bwanyima Turiifo akateeraho okukwata engoma ya Asiya, kujwara ekirunga n'okubangira Omugabe Antiyoko omukono kumurwanisa. 40Kwonka yaatiina ngu Yonataani takaamwikiriza kukikora, kureka akaamurwanisa. Atyo yaaguma naasherura oburyo bw'okumukwata n'okumwita; nikwo kwimutsya orugyendo, akaza Beetishaani. 41Yonataani nawe yaahurura kubugabugana nawe, aine abantu obukumi buna enkwata-ngabo, yaahika Beetishaani. 42Turiifo ku yaareebire yaija n'eihe rihango, yaatiina kumurwanisa. 43Yaamwakiira n'ekitiinwa, yaamworeka bagyenzi be naamubasiimira, yaamuha emitoijo kandi yaaragiira bagyenzi be n'engabo ze kumuhurira nk'oku we baakumuhuriire. 44Bwanyima yaagira Yonataani ati: Aba bantu boona noobaruhiza ki tutari ha rugamba? 45Hati baragiire bataahe, kureka oyetooranire abashaija bakye kuguma naiwe, haza oije tuze kumwe Putolemaayo. Niinyija kurukurekurira hamwe n'ebindi bigo n'engabo ezaatsigaraho n'abakuru b'emirimo boona, reero nyowe nyegarukireyo omuka. Manya ekyo nikyo kindeetsire aha.
46Yonataani yaamwesiga yaakora nk'oku yaamugambira; yaayohereza engabo ze, zaagarukayo omu nsi ya Yuda. 47Yaayetsigariza abashaija enkumi ishatu; enkumi ibiri aharibo yaabatsiga Galilaaya, reero orukumi rwagyenda nawe. 48Kwonka Yonataani ku yaataahire omuri Putolemaayo, abaamwo baakinga amarembo baamukwata, n'abaataahiremu nawe boona baabaitsa rurara.
49Bwanyima Turiifo yaayohereza engabo n'ab'ahambaraasi Galilaaya n'omu ruhita nyamuhango kucwekyereza abaserukare ba Yonataani boona. 50Kwonka bo ku baamanyire ngu Yonataani akwatsirwe, yaitwa hamwe n'engabo ze, baagumyana, baaguma nibagyenda kumwe beekwaitse beeteekateekyeire orugamba. 51Abaabaire bababingire ku baareebire ngu nibaija kwerwanaho, baagarukayo. 52Boona baahika omu nsi ya Yuda buhooro, baacurira Yonataani na bagyenzi be, kandi baatiina munonga; na Isiraeli yoona yaacura. 53Amahanga goona agabeehinguririize gaateeraho kubacwekyereza, ahabw'okuba gakagira gati: Tibaine mwebembezi nobu yaakuba omuhwezi. Mbwenu murekye tubarwanise, batarigira obu baijukwa obundi.
Simooni okuba omuhongyerezi omukuru
Currently Selected:
1 Maka 12: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.