1 Maka 11
11
1Bwanyima omugabe wa Misiri akahuruza amahe garikwingana nk'omusheenyi gw'aha nyanja, hamwe n'emeeri nyingi, yaateeraho kucwa amengye g'okukubuura engoma ya Alekisandero, kugiteerana n'eye. 2Atyo yaimutsya kuza Siriya naagamba ebigambo by'obusingye. Ab'omu ndembo baamwigurira amarembo, baamutangirira, nk'oku omugabe Alekisandero yaabaire abaragiire, ahabw'okuba akaba ari ishezaara Alekisandero. 3Kwonka Putolemaayo ku yaataahire omu ndembo, buri rurembo yaarutamu eihe ry'okururinda.
4Ku yaahikire Azooto, baamworeka endaaro ya Dagoni eyaayokiibwe, na Azooto n'emyanya ehereraine nayo eyaacwekyereziibwe, n'emitumbi erambiriraine aho, n'endiijo mitumbi esiriire ey'abantu abu Yonataani yaayokyeize omu rugamba, ahabw'okuba bakaba bagitungikiriraine ebirundo aha muhanda gu yaareetsirwemu. 5Kandi baagambira ogwo mugabe ebi Yonataani yaakozire, ngu babone kumuteera ekishembere kibi, kwonka omugabe yaahunama. 6Yonataani yaatangiririra Yoopa ogwo mugabe n'ekitiinwa kingi, baaramukanisa, baaraarayo. 7Bwanyima Yonataani yaagyenda nawe, yaamuhitsya aha mugyera gurikwetwa Eleutero; atyo yaagaruka Yerusalemu.
8Omugabe Putolemaayo yaakubuura endembo z'aha myegyeego y'enyanja, okuhika Seleukiya aha rubaju rw'enyanja, yaaguma naaconya enaama mbi z'okurwanisa Alekisandero. 9Kandi yaatuma entumwa ahari Demetiriyo omugabe naamugira ati: Ija tukore kumwe endagaano, haza nkuhingire muhara wangye muka Alekisandero, kandi otegyekye obugabe bwa sho. 10Manya niinyefuuza ekyamumpingiize muhara wangye, mbwenu reeba, abaire naayenda kuunyita. 11Akateera Alekisandero ekishembere kibi, ahabw'okwetenga obugabe bwe. 12Atyo yaamwaka omuhara, yaamuha Demetiriyo. Yaataana na Alekisandero, obuzigu bwabo bwareebwa butunu.
13Bwanyima Putolemaayo yaataaha omuri Antiyokiya, yaajwara ekirunga ky'obugabe bwa Asiya. Atyo yaajwara ebirunga bibiri omu mutwe, ekya Misiri n'ekya Asiya. 14Obwo Omugabe Alekisandero akaba ari omuri Kilikiya, ahabw'okuba abantu b'ekyo kyanga bakaba bagomire. 15Alekisandero ku yaakihuriire, yaija kumurwanisa. Putolemaayo nawe yaarugayo, yaabugabugana nawe n'eihe ry'amaani, yaamubinga. 16Alekisandero yaahungira Buharabu kukirirayo, Omugabe Putolemaayo yaaheebwa ekitiinwa ky'obusinguzi. 17Kandi Omuharabu Zabudiyeli yaatemaho Alekisandero omutwe, yaagutwekyera Putolemaayo. 18Kwonka ku haahingwireho ebiro bishatu, Omugabe Putolemaayo yaafa, n'engabo ze ezaabaire ziri omu bigo ebirindirwamu zaitwa abatuuzi baamwo. 19Demetiriyo yaaba omugabe omu mwaka gwa igana na makumi mukaaga na mushanju.#11:19 Nigwo mwaka gwa 145 Kristo atakazairwe.
Oku Demetiriyo na Yonataani baakwataniise
20Omu biro ebyo Yonataani akarundaana abantu b'omuri Buyudaaya kuteera ekigo eky'omuri Yerusalemu ekirindirwamu eby'okurwanisa; yaataho ebyoma bingi by'orugamba kukirwanisa. 21Abantu ebihaze, abaabaire nibanga eihanga ryabo, baaza aha mugabe, baamuregyera ku Yonataani arikugota ekyo kigo. 22Ku yaahuriire ekyo, yaagira ekiniga, kandi ku yaakihuriire ati, yaarugayo, yaaza Putolemaayo. Yaahandiikira Yonataani kutongyera kugota ekyo kigo, kureka okumushanga Putolemaayo, ahonaaho nk'oku kirikubaasika, bakahanuura. 23Yonataani ku yaakihuriire, yaaragiira ku bagumizamu okwo kugota; kandi yaatoorana bamwe aha bakuru b'omu ihanga rya Isiraeli na bamwe aha bahongyerezi, haza yaayenaga omu kabi, 24ahabw'okuba akaza Putolemaayo ow'omugabe, amutwariire efeeza n'ezaabu n'eby'okujwara n'ebindi biconco bingi munonga, yaamwekundisa. 25Nobu abantu bamwe ebihaze ab'eihanga rye baagumire nibamwetomboitera, 26kwonka omugabe akamutwaza nk'oku abaamubandiize baamutwarize; yaamutunguura omu maisho ga bagyenzi be boona. 27Akamuhamya omu buhongyerezi obukuru n'omu bindi bitiinwa bingi ebi yaatungire kare, yaaragiira ku atwazibwa nk'omwe ahari bagyenzi be abakuru. 28Bwanyima Yonataani yaashaba ogwo mugabe kusaasira omushoro Buyudaaya n'ebyanga bishatu ebya Samariya, kandi yaamuraganisa ebicweka by'efeeza obusiriira bushatu. 29Omugabe yaikiriza, yaahandiikira Yonataani ebaruha ekwatiraine n'ebyo bintu. Mbwenu ebi nibyo byabaire bigirimu:
30Nyowe Omugabe Demetiriyo naakuhandiikira, iwe Yonataani mwene tata n'eihanga ry'Abayudaaya, nimbaramutsya. 31Eki n'ekihandukururo ky'ebaruha ei twahandiikiire Lasiteene, orikuzaaranwa naitwe aha bikwatiraine naimwe. Mbwenu naiwe twakikutwekyera, ngu omanye eki kirikugamba. 32Nyowe Omugabe Demetiriyo naakuhandiikira iwe Lasiteene tata, ninkuramutsya. 33Eihanga ry'Abayudaaya, banywani baitu kandi abarikuhitsya ebi barikuragiirwa kutukorera, twacwamu kubakorera ebirungi ahabw'omutima gwabo murungi ogu barikutworeka. 34Twahamya ensi ya Buyudaaya n'ebyanga bishatu: Afayirema na Luda na Ratamini ku biba ebyabo; ebyahereeruka hamwe n'ekyanga kyona ekirikwatana nabyo, bikacuubwa ahari Samariya, byayongyerwa ahari Buyudaaya. Ahabw'abantu boona abatamba ebitambo omuri Yerusalemu, twabiihaho emishoro y'obugabe, ei ira omugabe yaabaire abiihaho buri mwaka, neeruga omu bihingirwe n'omu bijuma by'emiti.
35Okwiha hati, ebindi ebirikwihurwa, ebibaire biri ebyaitu ebya kimwe kya ikumi, n'emishoro ebaire eri eyaitu, n'ebiihiro by'omwonyo, n'emishoro y'obugabe ebaire eri eyaitu byona ebyo twabigisaasira. 36Kandi tihariho na kimwe omuri ebyo ebi twabaha ekiriihwaho, okwiha hati okuhitsya ryari na ryari. 37Mbwenu nu, taho omutima kuhanduukuurura ekihandiiko eki, okihe Yonataani, akite omu mwanya ogurikureebwa, aha rushozi orurikwera.
Amahe ga Yonataani okujuna Demetiriyo II
38Omugabe Demetiriyo ku yaareebire ensi emucureereire, kandi hatariho abarikumurwanisa, yaaragiira amahe ge goona kutaaha, buri omwe kugaruka owe, kureka amahe g'endugamahanga, agu yaabaire aihire omu birwa by'omu mahanga. Ekyo kyareetera amahe goona agaakoreire baishenkuru kumwanga. 39Mbwenu Turiifo, akare owaabaire ari omwe aha baabaire nibakwatsa Alekisandero, ku yaareebire amahe goona nigeetomboitera Demetiriyo, yaaza ahari Imaliku Omuharabu, owaabaire naayorora Antiyoko omwana omuto owa Alekisandero, 40yaamwehanangiriza munonga ku amuha Antiyoko akaba omugabe omu mwanya gwa ishe. Kandi yaagambira Imaliku ebi Demetiriyo yaakozire, yaamumanyisa n'oku amahe ga Demetiriyo garikwanga Demetiriyo ogwo; yaamarayo ebiro bingi.
41Mbwenu Yonataani yaatuma aha Mugabe Demetiriyo, naamushaba ku aiha omuri Yerusalemu amahe garikurinda, n'agandi mahe ag'omu bigo; ahabw'okuba gakaguma nigarwanisa Isiraeli. 42Demetiriyo yaatuma ahari Yonataani ati: Iwe n'eihanga ryawe tindikwija kubakorera ebyo byonka, kureka niinyija kukuha ekitiinwa kingi hamwe n'eihanga ryawe, naaba ntungire akaanya.
43Mbwenu nu, noija kukora gye, ku orantwekyere abantu b'okumpa emikono, ahabw'okuba amahe gangye goona gagomire. 44Atyo Yonataani amutwekyera Antiyokiya abashaija enkumi ishatu enkwata-ngabo. Ku baahikire aha mugabe, omugabe yaashemererwa munonga ahabw'okwija kwabo.
45Bwanyima ab'omu rurembo baaruteeraniramu baahika abantu akasiriira kamwe n'obukumi bubiri, baayenda kwita omugabe, 46kwonka yaahungira omu kikaari kye. Reero ab'omu rurembo baaza omu mihanda yaarwo rugyendwa, baatandika kurwana. 47Omugabe nikwo kweta Abayudaaya kumuha emikono, bakateeranira ah'ari bwanyima bakajanjaara orurembo, eryo izooba bakaita abantu baingi nk'akasiriira kamwe. 48Baayotsya orwo rurembo, kandi eryo izooba baanyaga ebintu bingi, n'omugabe baamukiza. 49Ab'omu rurembo ku baareebire Abayudaaya baakubuurira kimwe orurembo nk'oku barikwenda, baahwa eishaija, baatakira omugabe nibamweshengyereza bati: 50Tuhe obusingye, ozibire Abayudaaya kuturwanisa n'orurembo rwaitu. 51Batyo baahuumuza ahansi eby'okurwanisa byabo, baakora eby'okureeta obusingye. Abayudaaya baatunga ekitiinwa aha mugabe n'aha bantu boona ab'omu bugabe bwe, baagaruka Yerusalemu n'eminyago mingi.
52Omugabe Demetiriyo yaasingama atyo aha kitebe kye ky'obugabe, ensi yaamucureerera. 53Kwonka tiyaahitsya ebi yaabaire araganiise; yaaba ondi ahari Yonataani, tiyaamuzimuurira ebi yaamukoreire, kureka yaamuhata munonga.
Yonataani okuhamibwa Antiyoko omu buhongyerezi
54Ebyo ku byahwaire, Turiifo yaagaruka aine omutsigazi Antiyoko, owaatandikire kutegyeka, akajwara ekirunga ky'obugabe. 55Amahe gu Demetiriyo yaabaire aragiire kutaaha, gaateeranira ahu ari, gaarwanisa Demetiriyo; yaasingurwa, yaahunga. 56Turiifo yaanyaga enjojo, yaakubuura Antiyokiya. 57Obwo ogwo mutsigazi Antiyoko yaahandiikira Yonataani, naamugira ati: Naakuhamya omu buhongyerezi obukuru, naakuha obushoboorozi bw'okutegyeka ebyanga ebina, kandi naakuhindura omwe ahari banywani b'omugabe. 58Yaamutwekyera eshuhaani ya zaabu n'eby'okukoresa aha meeza; yaamwikiriza kunywera aha bikopo bya zaabu, kujwara ebijwaro bya bujwa n'ekikwatsi ky'ezaabu. 59Na mukuru we Simooni yaamuhindura omutegyeki omukuru, okwiha aha rushozi orurikwetwa Obutembero bwa Tuuro okuta omu myatano ya Misiri.
60Bwanyima Yonataani akaimutsya orugyendo, yaaza seeri y'omugyera n'omu ndembo, amahe ga Siriya goona gaamuteeraniraho kukwatanisa nawe. Ku yaahikire Asikalooni, abantu b'omuri orwo rurembo baamubugana, baamuha ekitiinwa. 61Ku yaarugire okwo, yaaza Gaaza, kwonka abantu b'omuri Gaaza baamukingira aheeru. Atyo yaagigota, yaayotsya ebirorero ebigiherereire, yaabinyaga. 62Bwanyima ab'omuri Gaaza baayeshengyereza Yonataani, yaakora nabo eby'okureeta obusingye, yaakwata batabani b'abategyeki baabo, yaaboohereza Yerusalemu bari omukwato, yaaraba omuri egyo nsi, yaahika Damasiko.
Simooni okukubuura Beetizuuri
63Bwanyima Yonataani akahurira ku abakungu ba Demetiriyo baizire Kadeshi omuri Galilaaya n'eihe rihango, kumwiha aha bukuru. 64Yaaza kubabugana, ensi yaagitsigamu mukuru we Simooni. 65Simooni yaasiisira aharikureebana na Beetizuuri, yaagirwanisiza ebiro bingi, kandi yaagigota. 66Baamushaba ku abaikiriza eby'okureetaho obusingye, nawe yaakora atyo; yaababingamu, yaakubuura orurembo, yaarutaho abaserukare b'okururinda.
67Yonataani n'eihe rye bakasiisira aha nyanja ya Genesareeti: kare omu kasheeshe baagyenda, baahika omu ruhita rwa Hazori. 68Ahonaaho eihe ry'abanyamahanga ryamubugana omuri orwo ruhita. Bakaba baataire omu nshozi ab'okumugwera, kwonka bo baabugabugana nawe akaso omu kandi. 69Reero abaabaire bagweraire, baasyoka omu myanya yaabo, baayeturaaniza omu rugamba. 70Abashaija boona abu Yonataani yaabaire aine baahunga, tihaagira n'omwe owaatsigaraho, kureka Matatiya mwene Abusalomu na Yuda mwene Kalifi, abakuru b'amahe. 71Yonataani yaataagura ebi ajwaire, yaayeshuka eiju omu mutwe, yaashaba Ruhanga. 72Bwanyima yaagaruka aha rugamba kurwanisa abazigu, yaabasingura, baahunga. 73Abashaija be abaabaire nibahunga ku baakireebire, baamugarukira, baakwatanisa nawe omu kubabinga; baabahitsya Kadeshi aha rusiisira rwabo, nabo baaba niho baasiisira. 74Eryo izooba haagwaho abanyamahanga baingi nk'enkumi ishatu; na Yonataani yaagarukayo Yerusalemu.
Omukago gwa Yonataani n'Abasiparuta
Currently Selected:
1 Maka 11: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.