Luka 21

Sadake wudəge hərmana

(Markus 12:41-44)

1Yesu pakakude aray, tsək ɗa gelipe niya ɗa ɗəf sadake hay tan ala a iɗəf sadake de, a adaw s'Askwaf de. 2Tsək wudəge hərmana s'iŋgeɗe talage, wuran kini hətskəlde mili hay ene caw ede. 3Mezlene, wa: «Na əŋ dzakuna ba jire, wudəge hərmana gə na wuran talage saŋa, hadzide iyene ndəmika i ɗaha hay ba cecena. 4Aɗaba wutan ba cecena saŋa, almane tan duna, ɗa naya a hətsɗide ba kutew kutew‑a ɗaya. Amá hər saŋa ga, talage tsa, amá hadzide igə a alay ene de, igə bərəl ŋa ene ba cecena.»

Adaw s'Askwaf saŋa ǎ gənakude

(Matta 24:1-2; Markus 13:1-2)

5Ɗa s'iŋgeɗe niya ɗa jeke ala apə adaw s'Askwaf‑a gəni kuwan hay ene həslka ene awiba, ɗa ceɗika awiba al ihay gə ɗa məmi sadake hay ene saŋa. Amá Yesu, wa: 6«Hənɗay gem hay s'iŋgeɗe niya à ɗá nay ga, igə na kwa ceciya saŋa, ǎ gənakude ba cecena, ba kuwan ɓile apə miya ene kuwan‑a kini ǎ miya ba.»

Zlaɗa hay gə à ɗá nay

(Matta 24:3-14; Markus 13:3-13)

7Ɗa mbutsəkənamiya a Yesu‑a, wa: «Malum, ahan sahan mà, ǎ ge a i gəna de? Alama gəna ǎ mbazləla ihay sahan, gəni sləŋa naya saŋa?» 8Zləmkənhətənaŋa, wa: «Kwene ga, ɗifɨn sləmay apə ŋa kwan‑a gəni ɗá shuzhɨlkwena ba. Aɗaba ɗaha hay duna à ɗá nay i sləmay hwa. Gha wiya tan kini ǎ dzawa, wa: “Ba s'ənne aŋa ənne Kristu, sərte kini sləŋa slaka.” Amá kwene kutɨntan ba aride. 9Abə kwa sənay a labara huma hay atə kakəɗɗay hu hay gərgərgəra ga, kwene gezleken ba aride, aɗaba si ihay sahan à ɗá lede te, amá gə ciɗa kəɗɗay s'away hay apə ahan‑a ba.»

10Ɗəfkənhətənaŋade adəɓa, wa: «Jiba s'iŋgeɗe ǎ kaɗənaŋade a jiba s'iŋgeɗe i huma. Larde s'iŋgeɗe ǎ kaɗənaŋade a larde s'iŋgeɗe i huma. 11Dadəɗay higay hay gə ǎ ndimka nzəɗa saŋa à ɗá jejiŋa. May hay atə wabaa hay kini à ɗá za a hu hay de gəgəra. Ihay gə ǎ vərən zləŋwaɗ a ɗaha atə alama hay dəbələmməna à ɗá mbazla apə askwaf‑a. 12Amá kwene ga, ba ndala ihay sahan à ɗá ge saŋa, à ɗá bəburɨkwene, à ɗá gɨkun palase, à ɗá mɨmɨkwene ala a sheriya de a adaw guɓaɗay hay de, à ɗá nenekwene a daŋgay de. À ɗá mɨmɨkwene ala adə bay hay atə ala a ma guverner hay de, aɗaba sləmay hwa. 13Ihay sahan à ɗá vərkun ciba a gəɗika siyade tsəre apuwa. 14Ɗifɨnde a ŋa kwan de gəni à kwá dzama bə ŋa s'igə à kwá dzawa a sləɗɗil ŋa kwan al ayina. 15Aɗaba ba s'ənne i ŋasaray hwa aŋa ə̌ŋ vərkun me dzaɗay atə həŋkale, gəni ɗa dawa kwan ba cecena ɗá jukka bə vərɗikun jawapa atə a gəɗikun jaka. 16Ba pəbe hay kwan atə məme hay kwan, wayə məme hay kwan, atə yaha hay kwan, ŋa yaga hay kwan kini à ɗá hickunde a alay de a ɗa s'iŋgeɗe, à ɗá kəɗəltəna ɗa s'iŋgeɗe ayikunde. 17Ɗaha hay ba cecena à ɗá nzəslkuna aray, aɗaba sləmay hwa. 18Amá ga, ba humbats ŋa kwan ɓile kini ǎ səzariya ba. 19Abə kwa tavaka ba dəkdəka ga, à kwá nje shifa hay kwan.»

Zlaɗa duwuna gə ǎ nje ɗa Zheruzalem

(Matta 24:15-21; Markus 13:14-19)

20«Abə kwa tsək sluji hay dikicca ɗa zləŋkənariya a Zheruzalem‑a ga, shinɨnede gəni sləŋa təŋɗay ene naya. 21A ahan de zlə ga, ɗa gə wutə a higay Zhude de ɗá ɗəvar ala apə ŋa kuwan hay‑a, ɗa gə wutə a Zheruzalem kini, ɗá hú ala apə dəɓa hu‑a, ɗa gə wutə a wayə hu hay de kini, ɗá le bə cine ala a hu saŋa de. 22Aɗaba hənɗay hay sahan ǎ za hənɗay hay gə Askwaf ǎ mbəla aghwam apəna, gəni ba cecena me hay gə niya i hətsɗay a wakita ene de saŋa á giya#Ezayi 63:4; Daniyel 9:24-27; Husiya 9:7. 23Ǎ za palase dəgiya a hər hay gə à ɗá za i tənday atə a ɗa gə à ɗá za i waghay apə alay‑a a hənɗay hay sahan de! Aɗaba ǎ za zlaɗa duwuna a ɗa higay sahan, Askwaf ǎ hadzəlpətan bembec daɗay ene. 24À ɗá kəɗla ɗa s'iŋgeɗe tan i katsakare, ɗa s'iŋgeɗe gə à ɗá burɨtəna, à ɗá tsəmtan ala a jiba hay de ba cecena. Ɗa gə ɗa səna ba a Askwaf sahan, à ɗá ŋgəraslede Zheruzalem i səlay, ha abə sərte gə ɗa ŋgəɗəktəna saŋa kəɗaka.»

Nəɗay Kine ɗu səlammərzheŋ

(Matta 24:29-31; Markus 13:24-27)

25«Alama hay s'iŋgeɗe à ɗá mbazla a apas de, apə kiyəhka ka atə apə mbərzla hay‑a. Apə higay‑a kini, jiba ɗaha hay ba cecena à ɗá gazlaka, zləŋwaɗ ǎ kəɗəltəna ande a yəmɗay s'ahwam heye atə paɗuŋɗay hay ene. 26Ihay gə wutə i nzəɗa apə askwaf‑a saŋa à ɗá gigicakude ba ŋarŋara, ɗaha hay duna bembec ǎ slasləɗtənde a ma zləŋwaɗ de, à ɗá kəɗa aɗaba dzəmŋa s'igə ǎ nay ala aŋade a duniya ba cecena saŋa. 27Mezlene à ɗá caka Kine ɗu səlammərzheŋ nikike apə kumba ka i nzəɗa atə duna tsəre gə caw ene niba saŋa#Daniyel 7:13. 28Abə ihay sahan à ɗá tamandar‑a a gəɗay ga, kwene slebɨnakude, penakude ŋa, aɗaba sləŋa sərte gə à kwá zluwa apəna saŋa naya.»

Araja i bikwa

(Matta 24:32-35; Markus 13:28-31)

29Yesu dzəktəna araja saŋa, wa: «Cɨnpəna aba apə bikwa ka atə apə məman shishka hay s'iŋgeɗe ka ba cecena. 30Ba kwene kini abə kwa tsaka ɗa ɗaka ga, kwa səna gəni sləŋa mudar naya. 31Aŋa kini ba kugwan, abə kwa tsaka ihay sahan ɗa gɨke ga, shinɨnede gəni sləŋa gurɗay s'Askwaf naya. 32Na əŋ dzakuna ba jire, ɗa zamane bəkwa saŋa ɗa kiɗkiya bə cecena, si babə ihay sahan gagaka ba cecena. 33Wutə askwaf atə higay à ɗá shuzhiya, amá me hwa gə səsɗay ene niba aride.»

Ɗifɨn sləmay apə ŋa kwan‑a

34«Ɗifɨn sləmay apə ŋa kwan‑a, gəni həŋkale kwan á mbəza ba, a shiŋwilə bə pəɗiya atə saɗiya ha lede a aray‑a, atə kum s'iduniya saŋa. I bəga, hənɗay gem sahan ǎ naya a njiɗikwene ba kirisha ka ba gimndeɗ. 35Aɗaba ahan sahan ǎ nanitənaŋade a ɗa gə wutə apə higay‑a ba cecena. 36Aɗaba sahan, njɨna bə han, gɨn maduwa gha a i gəna de kini, ta à kwá nje nzəɗa a sləɗɗinamiya a ihay‑a gə à ɗá nay sahan atə a tavaɗaya apə miya a Kine ɗu səlammərzheŋ‑a.»

37Lapas ga, cugɨlhətan away a ɗaha hay a adaw s'Askwaf de, amá luvaɗ gə le a hənɗay apə ŋa kuwan‑a gə ɗa hawa i kuwan s'Aniranira saŋa. 38Wərra al aguzlak ga, ɗaha hay ba cecena ɗa like ala a adaw s'Askwaf de a tsukw me gə wuran dzatəna saŋa.

Currently Selected:

Luka 21: mlr

Highlight

Copy