Luka 22

Məlmal hay ɗa gus dabari bər Yesu

(Matta 26:1-5, 14-16; Markus 14:1-2, 10-11; Zhaŋ 11:45-53)

1Sləŋa wumbri s'i dipeŋ gə ɗa slabəl bə i shehi makala, ɗa hawa i Paska saŋa hərzhaya. 2Məlmal hay ɗa slumə ɗaha hay atə Askwaf atə malum hay me gurɗay ɗa gwasək dabari səsɗila Yesu al akar‑a, aɗaba zləŋwaɗ vəɗtan ande a ɗaha hay.

3Mezlene Shetene tsəgənide a Yahuda de gə ɗa hawa al Iskariyut, wuran kini ba ɗu ɓile s'i ɗa kutə wuran jaŋwa brecaw saŋa. 4Yahuda ane ɗa laka a slaɗiŋa atə məlmal hay ɗa slumə ɗaha hay atə Askwaf ŋa məlmal hay ɗa tsəg s'adaw s'Askwaf, ala apə igə ka wuran ǎ giya a ɗəfɗitənde Yesu a alay de. 5Ɗa sahan ɗa higak awiba, ɗa sləkŋa a duvak tan de gəni à ɗá vərən shiŋgu. 6Yahuda ane təfkaŋade, takənmandar‑a a gus dabari ɗəfɗitənde Yesu a alay de, a sənɗiya ɗaha hay de ba.

Ɗa sluməkənka ɗəfka Paska a Yesu‑a

(Matta 26:17-25; Markus 14:12-21; Zhaŋ 13:21-30)

7Wumbri dipeŋ gə ɗa slabəl bə i shehi makala saŋa naya, bək slasləɗin taŋw a wayə gwaragwara hay Paska saŋa ga, 8Yesu slənika wutə Piyer atə Zhaŋ, wa: «Len slumɨnmənka iwumbri Paska, məle a pəɗiya.» 9Wutan ane ɗa mbutsəkənamiya, wa: «Kə gus ma like a sluməɗiya ede?» 10Zləmkənhətənaŋa, wa: «Abə à kwá lɨde a bərni de ga, à kwá le a zləŋɗidəŋa atə dagwa s'iŋgeɗe pekiya ahwam a gəra de. Kutɨna ɗaya kwene aba ala adaw de gə wuran ǎ lɨde saŋa. 11Jɨnna a ɗu s'adaw sahan kwene, ika: “Malum man, wa: ‘Mede kudak gə à má le a pə wumbri Paska atə ɗa kutəɗinaw ede?’” 12Wuran ǎ wanpəkwan kudak duwuna, adaw aŋade a adaw, away hay i sluməɗay kalkala ede. A kudak sahan de tsaw à kwá slumɨməna iwumbri sahan ede.» 13Wutan ane ba huɗay tan, ɗa laka nzəɗiya ba ka aŋa wuran dzəktəna sahan, ɗa slumika ɗəfka Paska ane ede.

Ɗəfka cuɗiɗɗina

(Matta 26:26-30; Markus 14:22-26; 1 Kurintu 11:23-25)

14Sərte slaka a pə s'away ga, wutə Yesu ɗa zakənaŋade a ɗəfka Paska ane atə ɗa slənɗay ene. 15Dzəktəna, wa: «Əŋ micika fuwa a pəɗika ɗəfka Paska saŋa atə ayikuna, ndala əŋ sa zlaɗa. 16Na əŋ dzakuna: Ənne ə̌ŋ pɨpan bə cine ɗəfka Paska saŋa, ha ala a sərte de gə abə mana ene ǎ nayede a gurɗay s'Askwaf de.» 17Wuran ane təfkakude kwap, sləkəɗkənka me a Askwaf‑a, wa: «Na tivɨnka, shena a duvak kwan de, 18aɗaba na əŋ dzakuna, i hwa ga, maga hwa ba bəkwa, ə̌ŋ sapan bə cine isaɗay gə ɗa dawa al inabuhi saŋa, ha abə gurɗay s'Askwaf naya.» 19Mezlene təvika dipeŋ, sləkəɗkənka me ene a Askwaf‑a, kəɗkənariya, ta vərəktəna, wa: «Aŋa zhek hwa ayuwa, ɗa vərəkkuna a zluɗilkwene. Gɨna ba kugwan a dzəmɗilnaw al ayina.» 20Adede a ɗəfka kini, gəka ba kugunhan, təfkakude kwap, wa: «Kwap saŋa ga, amana ɗuway, Askwaf nəŋka i munje hwa gə ǎ hadza arde ayikuna saŋa. 21Amá, na ɗu gə ǎ səməlnaw saŋa ma pe ɗəfka ba caca. 22Ba jire, Kine ɗu səlammərzheŋ ga, si ba ǎ mətsa apə aŋa ka Askwaf təfkəla saŋa. Amá ǎ za palase a ɗu gə wuran ǎ səmla sahan.» 23Mezlene wutan ane ɗa takənmandar‑a a mbutsəɗay a duvak tan de, a sənɗiyede a ɗu gə ǎ giya ahan sahan.

Wiya ǎ za məlmal pitta ayimənde?

24Ɗa slənɗay ane ɗa lide a jaka de kakaŋŋa a sənɗiyede a məlmal pitta ayitənde. 25Yesu dzəktəna, wa: «Bay hay jiba hay s'iŋgeɗe ga, ɗa mbazləl nzəɗa tan apə ɗagaditan‑a. Ɗa gə wutə i hakuma aŋade a ɗa sahan kini ɗa gus ɗa hatan i “ɗa sələmna.” 26Amá i kwan ga, kugunhan ba. Ɗu gə məlmal pitta ayikunde ga, á gɨlika ŋa ene ka ɗu kutewuna. Ɗu gə gure ɗaha hay kini, á gɨlika ŋa ene ka ɗu sləra tan. 27A wutə ɗu gə de ipəɗay ne a nzəɗiya apə mazaɗay‑a atə ɗu sləra ene mà, wiya məlmal ayitənde? Ba ɗu gə ipəɗay ne a nzəɗiya apə mazaɗay‑a saŋa bə təku? Amá ənne ayikunde səgan saŋa ga, ba ka ənne ɗu sləra kwan. 28Kwene ga, kwa ɗa gə kwa ŋgəɗak ba atə ayuwa a zlaɗa hay hwa de. 29Ba ka aŋa Paba vərku gurɗay ene ayuwa saŋa ga, ənne kini əŋ vərkuna ayikuna, 30gəni à má piya away, à má sawa amazhekde atə ayikuna a gurɗay hwa de. À kwá zhezhide a kurshi hay bay tsəre de a nda sheriya jiba hay s'Israyila jaŋwa brecaw.»

Wutə Yesu atə Simuŋ Piyer

(Matta 26:31-35; Markus 14:27-31; Zhaŋ 13:36-38)

31Ɗuduwuna, wa: «Simuŋ, Simuŋ, tá Shetene mbutsika ciba a gigicɗikwenakude ba ka aŋa ɗa fəviyede cinjeŋ a ahay‑a saŋa. 32Amá ənne əŋ gika maduwa ala apaka gəni ɗəfɗipuŋa aka á kaɗa ba. Sərte gə abə kə slumika ciba aka adəɓa ga, ɗəftənde nzəɗa ba duna a zhek de a wayə mamay.» 33Simuŋ zləmkənhənaŋa, wa: «Ɗuduwuna hwa, ənne əŋ slumika zhek a ləɗay atə ayika gha ala a daŋgay de, gha a kiɗɗilmene kini.» 34Yesu, wa: «Piyer na əŋ dzaaka, ba bəkwa saŋa, ndala aguzlak ǎ nzər taŋw, ike səlay məŋgan ikə dzawede ika kə sənnaw ba.»

Me pərtete shiŋgu atə mbalaw, ŋa katsakare

35Yesu dzəktəna adəɓa, wa: «A aŋəde əŋ slinikkwene ənna: Gha pərtete shiŋgu, gha mbalaw, gha kimak kini tivɨnde ba a alay de saŋa mà, niya he igə hətsəkkunaŋade?» Ɗa zləmkənhənaŋa, wa: «Niba.» 36Wuran ane, wa: «Amá səgan ga, ɗu gə abə pərtete shiŋgu ene niya, á tifde a alay de. Ɗu gə mbalaw ene niya kini, á tɨfka. Ɗu gə abə katsakare ene niba, gha ba ifətɗay ene kini á səmla, á səməlka. 37Əŋ dzakuna aŋa saŋa, aɗaba si igə wakita s'Askwaf dzaka ala apuwa saŋa gɨkiya. Me gə wa: “Ɗa ɗəfide a dagava ɗa hipe de#Ezayi 53:12” saŋa. Me gə ɗa dzaka ala apuwa sahan niya gɨke.» 38Wutan ane ɗa zləmkənhənaŋa, wa: «Ɗuduwuna, na katsakare hay ɗa niya ɗəma caw dəgiya.» Zləmkənhətənaŋa, wa: «Aŋa gə sləŋa tsaw.»

Maduwa Yesu a kuwan s'Aniranira de

(Matta 26:36-46; Markus 14:32-42)

39Yesu ane nayede, ba huɗay ene ala kuwan s'Aniranira de, ba ka aŋa gigiya saŋa, ɗa kutə wuran kini ɗa kutəka. 40Ɗa laka akənahan ga, dzəktəna, wa: «Gɨn maduwa gəni Shetene á ɗeɗimkwena ba.» 41Mezlene kəzəkpətəna, slɨkiya dzəfɗil kuwan ɗaha sələkka ga, hadzika galəmnzay agide a gə maduwa, wa: 42«Paba hwa, abə kə zləha ga, vecilpuwa zlaɗa saŋa. Amá ga, á giya ba apə micɗiya hwa‑a, á giya aba apə iyaka ka.» 43Mezlene malika mbazlilhan zhek ada askwaf‑a, ɗəfkənde nzəɗa a zhek de. 44Yesu ane a ma s'aŋa de dzəmŋa ndəmika nzəɗa ene ga, gək maduwa adəɓa abi nzəɗa, ha mapəɗak gə apəna mbəɗika ba ka munje, nduɗike nak‑naka ala agide. 45Adede a maduwa sahan, slabayakude, naya nzə ɗa kutə wuran ane ɗa nzika han, aɗaba dzəmŋa ndəmika nzəɗa tan. 46Dzəktəna, wa: «Amnaya kwa nje han? Slebɨnakude! Gɨn maduwa gəni Shetene á ɗeɗimkwena ba.»

Ɗa bər Yesu

(Matta 26:47-56; Markus 14:43-50; Zhaŋ 18:3-11)

47Zlama ba me sahan kini Yesu kəɗkəlede bə ga, abaga ɗaha hay ɗa dziŋede. Ɗu gə ɗa hawa i Yahuda, ɗu ɓile a ɗaha jaŋwa brecaw de saŋa, zinpətəna a miya. Kəzəkpan Yesu a ləɗay a təkulɗiya. 48Amá Yesu, wa: «Yahuda, kə nike a ɗəfɗitənde Kine ɗu səlammərzheŋ a alay de a ɗaha hay i təkulɗiya zlə ba?» 49A aŋəde ɗa gə wutə arde a Yesu ane ɗa tsaka igə ǎ ge saŋa ga, ɗa mbutsəkənamiya, wa: «Ɗuduwuna, ma tsatsəsltənakude təku i katsakare hay man saŋa?» 50Ciɗa ɗu ɓile tan nzərika ɗu sləra s'i məlmal ɗa slumə ɗaha hay atə Askwaf pitta, ŋgəɗkənpəna sləmay s'alay ɗəfka. 51Amá Yesu, wa: «Gɨna bə cine, sləŋa mezlene!» Ɗəfkənpan alay a sləmay dagwa sahan, mbərkənka. 52Adede a ahan Yesu ane dzəktəna a məlmal hay ɗa slumə ɗaha hay atə Askwaf atə məlmal hay ɗa tsəg s'adaw s'Askwaf, ŋa məlmal hay hu gə ɗa naya a bərɗiya saŋa, wa: «Amnaya kwa tsəmipaw katsakare hay atə kujek hay ka ənne abra saŋa? 53Kəla mandaɗay ənne aba a ma kwan de a adaw s'Askwaf de, kwa bərkənaw ba. Amá səgan ga, sərte kwan ayikuna, sərte gə wurek mbazləl hakuma ene apəna saŋa.»

Piyer wa əŋ səna ba a Yesu

(Matta 26:57-58, 69-75; Markus 14:53-54, 66-72; Zhaŋ 18:12-18, 25-27)

54Wutan ane ɗa bərika Yesu, ɗa ləkəla ba suwwa ala adə məlmal ɗa slumə ɗaha hay atə Askwaf pitta. Piyer kini kutəka zarra. 55Ɗa hənkakude akwa a ariya de adə məlmal ɗa slumə ɗaha hay atə Askwaf sahan, ɗaha hay ɗa zazəkənande ga, Piyer kini zakakade a duvak tan de. 56Kwatənaha s'iŋgeɗe tsaka i zaɗay ande a akwa, tsatsəka ba ndivva ala a aray de apə parakka tsəre s'akwa ka saŋa dzakəna, wa: «Dagwa saŋa kini ɗa zak ba caca atə ayina.» 57Amá Piyer təfkaŋade ba, dzakəna, wa: «Kay, ənne əŋ səna ba ənne a dagwa sahan, dile.» 58Mbasaka ba kutew adede ahan ga, dagwa s'iŋgeɗe kini tsaka adəɓa, dzakəna, wa: «Ike kini ba ike ɗu ɓile s'i ɗa sahan.» Piyer, wa: «Kay, ənne əŋ niba ayitənde, dagwa.» 59Slɨkiya saa ɓile adede ahan adəɓa ga, dagwa s'iŋgeɗe dzaka zlama adəɓa tavaka aba apə iyene ka, wa: «Aŋa fida niba ede, dagwa saŋa kini ɗa zak ba caca, aɗaba wuran kini ba humas ɗa Galile sahan.» 60Amá Piyer, wa: «Ənne əŋ səna bə dəgiya a igə ike kə dzawa saŋa, dagwa!» Zlama ba me sahan kini kəɗkəlede bə ga, aguzlak nzərika taŋw. 61Ɗuduwuna mbəɗkənande aray a Piyer ane, tsatsəka ba ndivva ga, Piyer dzamika me gə wuran dzakəna, wa: «Ba bəkwa bəkwa saŋa, ndala aguzlak ǎ nzər taŋw ga, ike ikə dzawede səlay məŋgan ika kə sənnaw bə» saŋa. 62Piyer ane huwakede ala amide, laka a yəmɗay aba al arishahwam tsərəɓ‑tsərəɓɓa.

Ɗa gɨl gege i Yesu, ghaya ɗa tawa

(Matta 26:67-68; Markus 14:65)

63Ɗa gə ɗa tsəgək Yesu saŋa, ɗa gəkəl gege, ghaya ɗa tawa. 64Ɗa nəŋkənka aray i kacakaca, ta ɗa mbucɨnamiya, wa: «Dzawede zlə ɗu gə tiken abə ike ɗu mbəɗɗitənande me s'Askwaf a ɗaha hay tsaw!» 65Niba me gə ɗa dzakənka ba a gəgənəhɗila.

Yesu a kəndəkiya de

(Matta 26:59-66; Markus 14:55-64; Zhaŋ 18:19-24)

66Ba wərra al aguzlak ga, məlmal hay Zhuwif hay atə məlmal hay ɗa slumə ɗaha hay atə Askwaf, ŋa malum hay me gurɗay, ɗa masləkŋa, ɗa miyede Yesu ala a kəndəkiya tan de. 67Wutan ane ɗa mbutsəkənamiya, wa: «Abə ba s'ike aŋa ike Kristu ga, dzaməna.» Zləmkənhətənaŋa, wa: «Gha əŋ dzəkkuna kini, à kwá ɗəfpənŋa ba. 68Gha əŋ mbutsəkkunamiya ba me kini, à kwá vərwa bə jawapa aride. 69Ǎ mbasa bə cine duna aŋa Kine ɗu səlammərzheŋ ǎ zakade a alay ɗəfka s'Askwaf de ɗu hakuma#Awar 110:1.» 70Mezlene wutan ane ba cecena tan ɗa hətskəlde a dzaɗiya, wa: «Kugwan gə ike Kine s'Askwaf təku?» Yesu zləmkənhətənaŋa, wa: «Ba kwene kini kwa dzakede abi me kwan, ba kugunhan.» 71Mezlene wutan ane, wa: «Aŋa ga, ma niba cine i wudar siyade hay s'iŋgeɗe, aɗaba na ma sənay abi sləmay man a me nde ayina.»

Currently Selected:

Luka 22: mlr

Highlight

Copy