Jâg 4

Lekwòŋ njÿó aa lepʉa Ssé

1Mencwò mencwò aa pé’e fóo nzɔ̌ tsetsɛ̀ɛ pi? Melà’ fóo nzɔ̌ tsetsɛ̀ɛ pi? Né ngie é fóo ná gi ntí letsɔ̌ɔn shúm gie ee tsɛ̀ɛ ntʉ́m gẅi ńtsóte gẅí. 2Pi tsɔ́ɔn shúm tɛ’ tá’ ńké tè ku’u légẅiin wɔ́, ńdeen ńké ńcʉ́’ ńtyé pɔ́ lézẅé nyìŋ. Pi gyá mmó ńtÿɔ́g ntʉ́m gẅi mǒ, tá tsɔ́ légẅiin à tè wó wɔ́. Pi gebe tsetsɛ̀ɛ ńgwɔ́ mencwò mencwò, ńtág melà’. Pi tě ńgẅiin mmó gie pi ne ńkwoŋo wɔ́, á nue pi tè lúɔ mbwo Ssé wɔ́. 3!Pi zɔɔn ńdúɔ, e Ssé tè ná, mbà áa, mélà’mie pi tè zsé lélúɔ wɔ́. Pi zɔ̌ɔn ńdúɔ pɔ́ lélɔg ńgʉa ńgÿo mmó gie á ne ḿboŋo pɔ́ gẅí. 4Pii pàlaŋ nzèm pʉ́a. Pi tè ne ńzsé ngie nyìŋ gẅie aa shǔ shúm njÿó, cʉ̌’ ńgwɔ́ pɔ́ ngàŋ mbù Ssé wɔ́ ka? Nyìŋ gẅie à kwoŋ shúm njÿó cʉ̌’ ńgwɔ́ pɔ́ ngàŋ mbù Ssé. 5Pi kwǎŋ ngie ŋwà’ne Ssé gɔɔn ngie: E Ssé pǔ tè zẅíŋ ngie pege nyé tsɔ̌ nyìŋ á jÿó jʉ’ Zẅìge gie à la ńnéŋe ná pege wɔ#4.5 ńgwɔ́ mé gíŋ ngie: «Zẅìge gie e Ssé la ńnéŋe ná pege, á té zẅíŋ ngie pege kwoŋo yé, ńgíŋ ńkwoŋo tsɔ̌ nyìŋ wɔ́», ńké tè pú’u wɔ́ mé gɔɔn ngie: «E Ssé zɛté ngie ntʉ́m gẅie à la ná né pege, e zébe pɔ́ ndà’ ná Yěsô». pé’e, ḿmeen, meen ńgɔɔn keen? 6Tá, e Ssé kě ńne ńcÿó gʉm yégè, apòŋo ntʉ́m yé nzèm pege fáŋ ńcʉa kɔ̀ɔkɔ́ɔ. Ŋwà’ne Ssé zɔɔn ńgɔɔn ngie: E Ssé lʉ’ pàŋá’te nnɛ́ lʉ’, ńké ńdɔgɔ pòŋo ntʉ́m ńdíe pʉ̀a pie é sẅí’i mbùm yɔb ńnáa ssé.

7Pú’u la, pi ne ńnuŋe ssé mvfò Ssé, ńne ńdʉ’ʉ Sátà, à fó lejʉ́ŋ pi ńkÿo. 8Pi sẅɛ’te nnɛ́ nê lejʉ́ŋ Ssé, à sẅɛ’te yé nnɛ́ nê lejʉ́ŋ pi. Pi megàŋ mefʉa, pi sɔg mbwó mí, pà nkwòŋ menÿɔ́g, pi kẅile ncÿǒ tsɛ̀ɛ mentʉ́m mí. 9Pi zsé ngie pi ee megàŋ ngɔ́’, ńdúŋ legwé ńdʉa. Á ne ńzɛ́te ngie gẅi légẅe sele ńcʉ́’ʉ lélʉa, agẅi lekág sele ńcʉ́’ʉ lémÿɔg. 10Pi sẅí’i mbùm gí ńnáa ssé mvfò Cʉ̀apʉ̀a, à pʉ’ʉ gẅí.

Tà nyìŋ ŋaga fɛ́ we

11Mefɛ́ pɔ́ɔn, tà zẅɛ́te gwɔ́ tsetsɛ̀ɛ pi. Nyìŋ lɔɔn ńzẅɛ́te ná fɛ́ we, kà ńtú pɔ́ *lɔ̌’ yé wɔ́, mbà à zẅɛ́te pɔ́ nà *lepʉ̌, ḿbiŋe ńtúu pɔ́ *lɔ̌’#4.11 Me líe Matio 7.1 ná nò létúu lɔ̌’. lepʉ̌. Nyìŋ lɔɔn ńké ńtúu lɔ̌’ɔ lepʉ̌, mbà à tè gíŋe ńgwɔ́ nyìŋ gẅie à kú’te lepʉ̌ wɔ́, à cʉ’ʉ́ ńtúu lɔ̌’ɔ lepʉ̌ tú. 12E Ssé gíle yé zɔ zába *lepʉ̌, ḿbiŋe ńzá’a ntsaŋ pʉ̀a, yé gíle yé zɔ ku’u légÿo nyìŋ tsẅɛ́ kà légÿo á kwé wɔ́. Ɔ̀ kwǎŋ jú ngie ɔ́ɔ wɔ̌ tà ńtúu *lɔ̌’ fɛ́ gù?

Tà nyìŋ ŋá’te nnɛ́

13Pi zẅí’te ńjú’. Pi pie pi ne ńka’a ngie: «Peg ge lɔg lyɛ̌’ɔɔn kà jǔɔ wɔ́, é gʉa tsɛ̀ɛ tÿǒsoŋ ye kikyè, é ńnéŋe wó tà’ ngù’ é táŋ sɔ̌ɔn é gẅiin nkáb». 14Pi tè zsé pá’ lyɛ’ɛ́ lá’ jǔɔ ge gwɔ́ pú’u, mbwo pi wɔ́, !pi zsé ngie pi ee pá’ zẅɛ̌ lekʉŋ gie á kẅɛ, ńtóo léńnéŋe é syeen. 15Pi ke’e gɔɔn pɔ́ ngie, Cʉ̀apʉ̀a lɔɔn ńzẅíŋ, mbà peg ge gwɔ́ ntentʉ́, é gÿo yɔɔn, é gÿo gi. 16Tá pi tsẅiŋ pɔ́ kékʉ́b gẅi, ńgɔɔnte pɔ́ menò mie pi ge gÿo gÿo. Yɛ̌ ntí leŋá’te e tè poŋ. 17Pú’u la, nyìŋ gẅie à zsé légÿo nò gie áa mbòŋ, ḿbiŋ ńké tè gÿo, à lɔgɔ ńgÿo nò tepòŋ, ńdɔgɔ ńgwe ntsaŋ.

Currently Selected:

Jâg 4: NGBM

Highlight

Copy