Jâg 3

Ncwò lɔɔn ńgwɔ́ é cʉŋte leńnéŋe

1Mefɛ́ pɔ́ɔn, tà pi metsèm tsɔ́ɔn légwɔ́ pàzí’i pʉ̀a mmó, pi ne ńzsé mboŋó ngie, peg pie peg zí’i pʉ̀a mmó, ntí gie mé ge lá’ lɔg ŋaga wég, e ge lá’ tʉ cʉa ye petsɔ́ pʉ̀a. 2Pege pǔ fʉate menò ntí ntí pɔ́ tè vʉ’ʉ nyìŋ. Nyìŋ lɔɔn ńgwɔ́ nyìŋ gẅie à laa tóo ńgɔɔn nò é fʉa wɔ́, mbà aa nyìŋ té *lɔ̌’, ńku’u légwoonte mbùm ye ntsèm. 3Pi líe melÿóon tá ńgyá, pege ńnéŋe kwáŋ ncwò pɔ́b lélɔg ńgÿo ngie pɔ́ jú’ ncwò wégè. Pege lêen ńké ńdɔgɔ wɔ́b ńgʉa jʉ’ gie pege ne ńkwoŋo. 4Pi líe mbɔɔ setíma tá ńgyá, á fáŋ pɔ́ lêkɔ́ wɔ́, fefa gẅie à tsó yé tʉ pɔ́ lêkɔ́ wɔ́, mbà stiya gie nyìŋ gẅie à ne shwoŋo lɔgɔ shwoŋo yé ńnáa ná jʉ’ gie à ne ńkwoŋo gwɔ̌ pɔ́ múɔ méntsẅilé. 5Á gíŋe ńgwɔ́ pɔ́ ndʉŋ ndʉŋ pá’ lʉ́me nyìŋ, áa nà mekèm mbùm mé ńgwɔ́ pɔ́ múɔ métsẅilé, tá ńgwɔ́ á ŋá’te tɛ’.

Pi giŋé ńne ńzsé pá’ múɔ mésesà’ mmɔ̌g lɔɔn ńgwɔ́ á tuɔ máamáa mbím.

6Alʉ́m gíŋe ńgwɔ́ yé pɔ́ mmɔ̌g, ńgwɔ́ jʉ’ gie menò tepòŋ fó wó. Alʉ́m áa nà mekèm mbùm nyìŋ, ńgwɔ́ kèm gie á néŋ ncÿǒ nà mbùm nnɛ́ ntsèm. Á gʉa lepÿé mmɔ̌g, ḿbí mmɔ̌g, ńtó ńdɔg ńtuɔ léneŋe we nyìŋ pɔ́ ntsèm. 7Nyìŋ mesoŋ ku’u lékúe menɔ̀ɔn tsẅɛ mentí mentí, ńku’u lékúe meshʉ́ŋ, ńku’u lékúe menɔ̀ɔn mie é shwoŋo lepfòm sɔ́b pɔ́ ssé, lékúe messó. 8Tá ńgʉa nà lʉ́m, mbà tsɔ̌ nyìŋ tè ku’u lékúe wɔ́. Á tág jʉ’ té zẅite. Á gẅiin sesiŋ gie á kúu ná nyìŋ ńzẅé yé zẅé. 9Pege lɔg pɔ́ lʉ́m ńdɔg ńgu’te Cʉ̀apʉ̀a Tá wege, ńgíŋe ńdɔg pɔ́ yɛ̌ ńnéŋ ndòon twó pʉ̀a mesoŋ pie Ssé la pwóon ńgÿo pɔ́ sẅé yé. 10Mbʉ́lè mbɔɔ ndòon pǔ ńkẅɛɛ pɔ́ tsɛ̀ɛ tà’ ncwò wémɔ’ɔ́. Mefɛ́ pɔ́ɔn, á kɔ’ɔ́ tè poŋ ngie à gwɔ́ pú’u wɔ́. 11À lɔɔn ńgwɔ́ tsɔ́ lesa’á ntse le ne fóo nà jʉ’ ńnáa ntse nǔ, ńgíŋe fó pɔ́ jʉ’ó ńnáa ntse gẅie é ne ńdẅe wɔ́. 12Mefɛ́ pɔ́ɔn tà à lɔɔn ńgwɔ́ mé kába zoon ná tÿǒ mbÿě? Ńké ńkáb lepfò ná tÿǒ zoon? Áa ndʉŋ ndʉŋ pá’ lesa’á ntse gẅie é ne ńnáa ntse gẅie é gẅiin ngwáŋ, ńgwɔ́ é le ná ntse nnǔ wɔ́.

Azse nò gie á fóo tÿǒ lepwó

13Nyìŋ lɔɔn ńgwɔ́ tsetsɛ̀ɛ pi, ńne ńkwaŋa ngie à gẅiin zse nò, ḿbiŋ ńgẅiin legyè, á lɔgɔ tsẅé mbòŋo yé ńnyɛ, ńgíŋ ńdɔg mefà’ mie é nyɛɛ ngie aa nyìŋ mbʉ́le pʉlé ńgwɔ́ nzsè nò, ńnyɛ. 14Tá ńké ńgwɔ́ gie pi lɔɔn ńgẅiin kègɔ́’ gẅie à léen ńgá’ mbɔɔ lʉŋte nnɛ́ tsɛ̀ɛ ntʉ́m pi, tà pi gíŋ ńŋá’te ngie pi ee pàzsé nò, tà pi lɔg cÿɔ̌ nò, ḿbyága nò nénʉ́. 15Yɛ̌ ntí zse nò tě fóo tÿǒ lepwó wɔ́. Á gwɔ́ pɔ́ ye ndùmo ssé tsetsá’ yɔɔn, ńgwɔ́ pɔ́ ye pʉ̀a mesoŋ, éfóo mbwo *messé tepòŋ. 16Alʉŋte nnɛ́ mbɔɔ kègɔ́’ vɔg tà ńgwɔ́ jʉ’, atág mbɔɔ mefà’ tepòŋ mentí mentí gwɔ́ wó. 17Tá nyìŋ gẅie à gẅiin zse nò gie á fóo tÿǒ lepwó, à zɔɔn ḿvɔg ńgwɔ́ nyìŋ gẅie tsɔ́ *lɔ̌’ té nà ngÿǒ menò mé wɔ́, ḿbɔ́ɔnte ńgiŋe pɔ́ lê mbʉ́lè, ḿbɔ́ɔnte ńgwɔ́ nyìŋ mbʉ́le pʉlé, ńgÿo nò á ku’ ku’, ńzsé létsɔ́ɔn mezìŋe tɛ’, éfa’ mefà’ mbòŋo pɔ́ pú’u. À tè tyɛ̀’te gÿo, ńké tè nkwòŋ menÿɔ́g wɔ́. 18Pʉ̀a pie pɔ́ lɔgɔ pɔ́ mbʉ́lè ńnéŋe tsetsɛ̀ɛ pʉ̀a mesoŋ, pɔ́ ne ḿbye mmó lê mbʉ́lè. Mentɔ̌ɔn mie pɔ́ káb á gwɔ́ léńnéŋe pá’ Ssé ne ńkwoŋo.

Currently Selected:

Jâg 3: NGBM

Highlight

Copy