Jâg 2

Pʉ̀a metsèm gwɔ́ pɔ́ tà’a mmó mvfò Ssé

1Mefɛ́ pɔ́ɔn tà pi ne ńzába ntʉ́m ná Cʉ̀apʉ̀a Yěsô Kristo wege gẅie à gẅiin máamáa legú’, ńgíŋe ńgẅiin tyɛ̀’te tsetsɛ̀ɛ pi. 2Pege gɔɔn ngie pʉ̀a mépʉ́a kǔ tsɛ̀ɛ *ndá cú’tè gí, tà’ nyìŋ jÿɔ́gɔ kwáŋ gẅie à cÿɔ́g nkáb, ḿma’ menzsǒ nkáb. Wetsɔ̌ ma’ yé pɔ́ metsyàg nzsǒ. 3Pi tÿɔ́g menÿɔ́g ná nyìŋ gẅie à ma’ menzsǒ nkáb, nyìŋ gẅi gɔɔn né ye ngie à jʉ’ʉ melÿò yɔɔn, mbà! Tóo ńnéŋe jʉ’ɔɔn, ḿbiŋ ńgɔɔn nê fÿɔg ngie gyá jʉ’ ńtyé wó, ńké tè pú’u wɔ́ ɔ̀ tó ńtém ntsẅɛ̀’ jù ssé, á ngʉ̀ŋe mmó gie n tÿɔ́g mekwò mɔ́ɔn mǒ lɔɔn. 4Pi lɔɔn ńgÿo pú’u, pi lě ńdɔgɔ ńgẅiin tyɛ̀’te tsetsɛ̀ɛ pi wɔ́? Pi lě ńdɔgɔ pɔ́ nkwaŋá tepòŋ ńdíe pʉ̀a éfa’a pì wɔ́?

5Mefɛ́ pɔ́ɔn pe ntʉ̀ nzẅìŋ, pi jú’ mboŋó, e Ssé la tsɔ́’ pʉ̀a pie mé tóŋo tsɛ̀ɛ njÿó lê mefÿɔg, ńdɔg ńgÿo pàzáb ntʉ́m ná yé tɛ’, pɔ́ gẅiin yɔ́b jʉ’ tsɛ̀ɛ nò lefùɔ sie à la ka’a mbwo pʉ̀a pie é kwoŋo yé. 6Tá ńgʉa ná pi, mbà pi kéen ńcʉŋ nzẅìŋ mefÿɔg. Tá megàŋa mmó zɔ̌ téen sẅɛ́ɛ gẅi wɔ́ le? Pɔ́ zɔ̌ téen ńgwá ńdɔgɔ gẅi ńgiŋe mendá tsǎŋ wɔ́ le? 7Pɔ́ zɔ̌ téen shwóŋó tepòŋ ná Yěsô Kristo gẅie Ssé la ná lezíŋ sé né pi wɔ́ le?

8Á cʉ́’ gie pi gÿo pú’u, mbà pi giŋé ná pá’ *lepʉ̌ se lÿò ná nò *lefùɔ Ssé gɔɔn, é gɔɔn ngie: «Kwoŋo fɛ́ gù nyìŋ mesoŋ pá’ ɔ̀ kwoŋo twó mbùm jú». Pi lɔgɔ pú’u, ńgÿo mboŋó. 9Tá pi ké ńgẅiin tyɛ̀’te tsetsɛ̀ɛ pi, mbà pi gÿǒ nò tepòŋ. *Lepʉ̌ Ssé gwoon gẅi mélà’ mie pi fʉ̌a *lepʉ̌. 10Nyìŋ lɔɔn ńzɔɔn ńkú’te mbʉ̌ Ssé, ńgʉa mǒ fʉa pɔ́ ndà’ tà’, mbà à pǔ fʉa pɔ́ mbʉ̌ ntsèm. 11Pú’u, nue e Ssé gẅie à la gɔɔn ngie: «Tè gÿo gÿɛ́», à la gíŋe ńgɔɔn ngie: «Tè zẅé nyìŋ». Tá ńgwɔ́ gie ɔ̀ lɔɔn tè gÿɛ́ gÿo, ḿbiŋ ńzẅé nyìŋ, mbà ɔ̀ fʉ̌a *lepʉ̌ sé fʉa. 12Pi gwaa ne gɔɔn nò, ńne ńgÿo pá’ pʉ̀a pie mé ge lá’ lɔg *lepʉ̌ sie é gÿo mé cʉ́’ʉ pà ndù nnɛ́ e lɔg ŋaga wɔ́b. 13E Ssé ge lá’ ne tsɔ́’te mentsaŋ, á le tsɔ́ɔn mezìŋe tè tsɔ̌ɔn mezìŋe pʉ̀a wɔ́, tá ńgwɔ́ gie nyìŋ la tsɔ́ɔn mezìŋe, mbà á ge lá’ lɔg pú’u, e Ssé le yé ŋag.

Lezǎb ntʉ́m nà Ssé ḿbiŋ fa’ mefà’

14Mefɛ́ pɔ́ɔn, nyìŋ lɔɔn ngie à zǎb ntʉ́m wé nà Ssé, à tè fa’ méfà’ ńdɔg ńnyɛ wɔ́, mbà á ge kẅéte nà kɔ́? Tà ńgwɔ́ yɛ̌ ntí lezáb ntʉ́m nà Ssé é gÿo nyìŋ tsẅɛ́? 15Pege gɔɔn ngie tsɔ́ fɛ́ wege we mbàŋa mbɔɔ we manzwě, pɔ́ té nzsǒ ma’, ḿbiŋ ńne ńzága mmó gie pɔ́ ge pfɛ́ɛ nà lyɛ’ɛ́ lá’, 16atsɔ̌ nyìŋ ná pi piŋ ńgɔɔn né pɔ́b ngie: Pi lo nê kwò gí ye mbòŋo. Mbùm gí lumte. Pi pfɛ́ ńzẅɛ́, ńgɔɔn pú’u, ńké tê náa tsɔ́ mmó gie á ge kẅéte wɔ́b gwɔ́, mbà wɛ̌ légɔɔn ge kẅéte nà kɔ́? 17Á gíŋe ńgwɔ́ pɔ́ ndʉŋ ndʉŋ pú’u, ná nyìŋ gẅie à ne ngie à záb ntʉ́m wé nà Ssé, pá’ mé lɔɔn tè ne ńgyá mefà’ mé wɔ́, mbà wɛ̌ lézáb ntʉ́m nà Ssé aa sẅɛ̀ɛ.

18Ndyɛ̌’ ńgwɔ́ nyìŋ gɔɔn ngie: Aye tsɔ̌ nyìŋ gwɔ́ pɔ́ lézáb ntʉ́m wé nà Ssé, aye wetsɔ̌ gwɔ́ pɔ́ léfa’ mefà’. Mbà mèŋ n ge gɔɔn yɔ́ɔn mbwo yé ngie: Nyɛɛ wɔ̀ɔn pá’ à lɔɔn ńgwɔ́ ɔ̀ záb ntʉ́m nà Ssé té ne fa’a mefà’, mèŋ n dɔg mefà’ mɔ́ɔn ńnyɛɛ gú ngie n záb ntʉ́m nà Ssé. 19Ɔ̀ ne ńzẅíŋe ngie e Ssé, ee yémɔ’ɔ́, oon áa mbòŋ, *messé tepòŋ gíŋe ńne ńzẅíŋe yɔ́b pɔ́ pú’u, tá ḿbiŋe ńne ḿvɛɛ. 20Agʉ̀gʉ̀ yɔ́ɔn, ɔ̀ kwoŋo kɔ́? Mèŋ n ge nyɛɛ gú ngie lezǎb ntʉ́m nà Ssé gẅie à tè mefà’ gẅiin áa sẅɛ̀ɛ. 21E Ssé la gwaa gɔɔn ngie tá wege Ábalam aa ndʉŋ ndʉŋ mvfò yé, né ngie á cʉa pɔ́ nà mefà’ mé? Á la tè cʉa pɔ́ ná pá’ à lɔgɔ́ míŋ we Esâg ńnuŋe pwɔ́’ á jʉ’ gie mé nuŋe pwɔ́’ wó wɔ́ le? 22Ɔ̀ lɔgɔ ńgyá ngie we lezáb ntʉ́m nà Ssé pâ mefà’ mé la púte ńgiŋe kwò. Á la fó nà mefà’ mé we lezáb ntʉ́m nà Ssé gwɔ́ wó tà ńku’. 23Anò gie mé la ŋwe’e ńtí yé fó pú’u, ḿbumte, mé la ŋwe’e ngie: Ábalam la záb ntʉ́m wé nà Ssé, e Ssé fó mǒ, ńcʉ́’ ńdíe yé á gwɔ́ mvfò ye, ńgwɔ́ pɔ́ ndʉŋ ndʉŋ, á tóŋo yé lê shǔ we. 24Pi lɔgɔ ńgyá ngie á cʉa pɔ́ nà mefà’ mie nyìŋ ne fa’a, tá Ssé gɔɔn ngie ngàŋ aa ndʉŋ ndʉŋ mvfò yé, tà é té gwɔ́ pɔ́ ndà’ pá’ ngàŋ zǎb ntʉ́m wé nà Ssé wɔ.

25Á la gíŋe ńgwɔ́ pɔ́ pú’u, ná Raab, káa tÿó manzwě, e Ssé la gwɔ gɔɔn ngie aa ndʉŋ ndʉŋ mvfò yé, ńcʉa pɔ́ nà mefà’ mé. Pá’ à la náa jʉ’ʉ lelyěen mbwo pʉ̀a Israel pie mé la túm, ḿbiŋ ńnyɛɛ wɔ́b nzsè gie pɔ́ ge pfó mǒ é gʉa. 26Ndʉŋ ndʉŋ pá’ Zẅìge lɔɔn tè ná mbùm nnɛ́ wɔ́, mbà e kwě la, lezǎb ntʉ́n nà Ssé, á lezáb gẅie mé té ne ńgyá mefà’ wɔ́, mbà wɛ̌ aa sẅɛ̀ɛ.

Currently Selected:

Jâg 2: NGBM

Highlight

Copy