1 Piɛ 4
4
Leńnéŋe we sẅé
1Pá’ Kristo la gyá ngɔ́’ ná mbab nnɛ́ la, pi gí pi gwɔ́ twó pi, ńtyé légyá ngɔ́’ pá’ yé, ńne ńzsé ngie yé Kristo gẅie à la gyá ngɔ́’ nà mbab nnɛ́, à la maga nò nò tepòŋ#4.1 À tsɔ̌ le jú’u yɔɔn «ńne ńzsé ngie yé Kristo gẅie à la gyá ngɔ́’ nà mbab nnɛ́, à la maga nò nò tepòŋ» áa ngie: «n ne ńzsé ngie nyìŋ Kristo gẅie à zẅiŋé légyá ngɔ́’ nà mbab nnɛ́ yé, à maga nà nò tepòŋ». . 2Pú’u la, pi gʉa nà melyɛ’ɛ́ lá’ mie pi nyě ńgẅiin ndùmo ssé tsetsá’, ńgÿo pɔ́ mmó gie Ssé ne ńkwoŋo, tà pi gÿo mmó gie mbùm nyìŋ zɔ tsóte yé á gÿo. 3Apàa á zɔ̌ɔn ńzá’a pá’ pi ka ne ńgÿo mmó gie pà tézsé Ssé ne ńkwoŋo. Pi kɔ̌ɔn fʉ̀’ʉ menò tà sá’a sǎ’, ńne ńgÿo kɔ̀ɔkɔ́ɔ gie mbùm gi tsóte gẅi légÿo, ḿbʉ́a melù’, ńcú’te ná linɔ́ɔn lépfɛ́ shúm, ńgÿo menò shʉ́, pi kɔ̌ɔn ńzɔ́gɔ pɔ́ lénú melù’, pi kɔ̌ɔn ńgu’te shúm ngie ee messé, á gwɔ́ mmó gie Ssé pǔ tè kwoŋ. 4Á piŋ ńgwɔ́ nà fʉ̀’ɔɔn pà tèzsé Ssé cʉ́’ʉ ńgyá gi ntí ḿmɔɔn mɔɔn, á nue pia pɔ̌ cʉ’ʉ́ ńteme kwò ńgiŋe légÿo menò mie pɔ́ gyo é gwɔ́ pɔ́ menò shʉ́ wɔ́. Pɔ́ lêen ńké ńcʉ́’ʉ ńzoon gẅi zoon. 5Tá’ pɔ́ ge gÿo tyé mvfò Ssé gẅie à tyě pá’ à ge zá’ ntsaŋ pʉ̀a metʉ̀ pâ mepfó ssé, építe ncwò wɔ́b nà ngÿǒ menò mɔ́b. 6Áa mmó gie á ka gÿo tá mé tsẅi nkʉ̀ mbòŋo mbɔɔ mbwo mepfó#4.6 ńgwɔ́ mé gíŋ ngie: Áa mmó gie á ka gÿo tá mé tsẅi nkʉ̀ mbòŋo mbɔɔ mbwo pʉ̀a pie ée fʉ̀’ɔɔn ńgwɔ́ mepfó. . Mé ka tsẅi tà mbɔɔ pá’ e Ssé ka ŋag mbùm yɔb, pá’ à ŋaga pʉ̀a metsèm, pɔ́ gẅiin lékwé. Pɔ́ ée fʉ̀’ɔɔn ńku’ pá’ ńgwɔ́ pɔ́ gwɔ́ ná zẅìge sɔ́b pâ Ssé ńnéŋe.
Wɔ̌wɔ́ɔ nyɛte ńkú’te pɔ́ fù’ gie Ssé ka lɔg ńcÿó gʉm yé
7Afʉ̀’ʉ nzsòte kɔ̀ɔkɔ́ɔ wɔ́, á ne ńku’u. Pá’ áa pú’u la, pi gwɔ́ pàzsé nò. Tà pi gwá’a lÿɔg, ńzsé ngie pi ge ku’u lésẅíŋte Ssé. 8Andùŋ mvfò mmó gie pi ge gÿo, aa gẅi légẅiin nkwòŋe tsetsɛ̀ɛ pi, mélà’mie nkwòŋe pyaga lelÿò menò tepòŋ. 9Pi kúe mefɛ́ pi tsetsɛ̀ɛ pi á tsɛ̀ɛ mendá mí té ne ńzẅɛ́te. 10Awɔ̌wɔ́ɔ lɔgɔ yé fù’ gie Ssé lɔ̌g ńcÿó gʉm yé, ńkẅéte mefɛ́ pé. Pi gwɔ́ pá’ megàŋa fà’ pe mbòŋo pie pɔ́ ne ńkú’te fù’ mentí mentí gie Ssé náa mbwo pɔ́b pá’ á ge kẅéte petsɔ́ pʉ̀a. 11Afù’ ye nyìŋ lɔɔn ńgwɔ́ légɔɔn nò Ssé, á gɔɔn pɔ́ gie á fóo mbwo Ssé. Aye nyìŋ gwɔ́ léfa’ mefà’ tsɛ̀ɛ cú’tè, á lɔg pɔ́ metʉ̀ mie Ssé náa mbwo yé ńdɔg fa’. Pi gÿo pá’ɔɔn ńzsé ngie mé ge cʉa ná Yěso Kristo, égu’te Ssé nà kɔ̀ɔkɔ́ɔ, yé gẅie metʉ̀ ntsèm, mbɔɔ lésá’ njÿó ée mbwo yé nà mengù’ nkɔ́ɔn nê nkɔ́ɔn. Amɛn
Legyá ngɔ́’ nà lezíŋ Kristo
12Meshǔ pɔ́ɔn pe tʉ̀ nzẅìŋ, pi ee tsɛ̀ɛ mmɔ̌g ńne ńgyá ngɔ́’. Tà pi gyá á kʉ’ʉ gẅí, á té tsɔ́ nò sẅé wɔ́. Mé ge fó mǒ e zsé mmó gie pi ee yɛ̌. 13Pi cʉ́’ ńkág kág á nue pi ne ńgyá gi ngɔ́’ pá’ kristo, à cʉa pú’u, pi gÿo ńgwɔ́ tà ńgyá legú’ we ńgíŋe ńgẅiin gí máamáa lekág. 14Mé lɔɔn ńzoon gẅi ńtí lezíŋ Kristo, mbà pi ee pà shÿó mbòŋo, á nue a Zẅìge legú’, á Zẅìge Ssé áa ná pi, 15ḿbɔ́ɔn nyìŋ gẅi légwaa gyá ngɔ́’ á gwɔ́ ngie à zẅě nyìŋ, ngie à jʉ̌, kà pɔ́ ngie à gÿǒ nò tepòŋ wɔ́, kà pɔ́ ngie à gyǎ nò nyìŋ ńkúu mǒ wɔ́. 16Tá ńgwɔ́ gie nyìŋ lɔɔn ńgwaa gyá ngɔ́’, á gwɔ́, mélà’mie aa nyìŋ Kristo, tà ngàŋ kú shʉ́. Tà ńcʉ́’ pú’u, á gu’te pɔ́ Ssé ńtí lezíŋ Kristo sie à gẅiin.
17Afʉ̀’ áa pá’ɔɔn, mbà á kú’ pá’ Ssé ge zá’ ntsaŋ pʉ̀a mesoŋ, à ge zye pɔ́ nà pʉ̀a pé. À lɔɔn ńzye ná pege, mbà á ge cʉ́’ʉ nzsoté é gwɔ́ lêkɔ́ ná pʉ̀a pie pɔ́ té kwoŋo lézẅíŋ nkʉ̀ mbòŋo we Ssé wɔ́? 18Mé la ŋwe’e tsɛ̀ɛ ŋwà’ne Ssé ngie:
À lɔɔn ńgwɔ́ gie pʉ̀a pie é gÿo mmó gie áa ndʉŋ ndʉŋ mvfò Ssé, ne ńgwɔ tsẅɛ́ɛ á tʉʉ tɛ’,
mbà á ge tó gwɔ́ nà pʉ̀a pie é té gÿo mmó gie e Ssé ne ńkwoŋo wɔ́, é pʉ̀a tepòŋ, é gwɔ́ lêkɔ́?
19Pú’u la, á poŋ ngie pʉ̀a pie pɔ́ gwaa ne gyá ngɔ́’, á gwɔ́, mélà’mie pɔ́ ne ńgÿo mmó gie e Ssé ne ńkwoŋo, pɔ́ cʉ́me yɔ́b nò ntsèm á mbwo mbù’ ngwòŋ gẅie, à ka’a mmó, ńgÿo ńná, ńcʉ́me pú’u, ńkẅi’i ńgÿo pɔ́ nò mbòŋo.
Currently Selected:
1 Piɛ 4: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.