1 Piɛ 3
3
Ntí gie pʉ̀a Kristo gẅiin lélɔg ńnéŋe tsɛ̀ɛ lekyè mmɔ̌g sɔ́b
1Mbɔɔ pi gí pànzwě, pi sẅí’i mbùm gi ńnáa ssé mvfò melúm pí, à cʉa pú’u, ńgwɔ́ gie tsɔ́ pʉ̀a tsetsɛ̀ɛ pɔ́b ne ńdʉ’ʉ lézáb ntʉ́m nà shwóŋè Ssé, pɔ́ cʉ́me nzèm pi té gwɔ́ gie pi gɔ̌ɔn nò, éfó ná tsẅé gí. 2Mbà pɔ́ gyǎ kwò legìŋ gí gie *lɔ̌’ té mǒ wɔ́, á piŋ ńgẅiin mekù’. 3Pi pɔ́ɔn lékẅiŋ mbùm gi pɔ́ nzème pǐ, pá’ lenyɛte ḿbá’a twó gí, ńjÿɔ́g mekwáŋ mie mé lɔgɔ gɔ̂l ńnyɛ́te, ḿma’a menzsǒ mbòŋo. 4Á poŋ ngie à gí kẅìŋe nnɛ́ fó pɔ́ tsɛ̀ɛ ntʉ́m gẅí. Yɛ̌ áa kẅìŋe nnɛ́ gie á ge lá’a zɔ́gɔ ńnéŋe, à gwɔ́ lépʉ́le pʉlé té fa’ ntsaŋ. Áa mbwo Ssé ńgwɔ́ máamáa kẅìŋ. 5Yɛ̌ zɔɔ ńtí gie pánzwě pe fʉ̀’é mvfò pie pɔ́ lɔ́ɔn ḿbɔ́gɔ Ssé, ńnéŋe ne ńzẅí’te mmó gie Ssé la ka’, lɔ́ɔn ńkẅiŋe mbùm yɔ́b pú’u, ńne sẅí’i mbùm yɔ́b ńnáa ssé á mvfò melúm pɔ́b, 6pá’ Sara gẅie à lɔ̌ɔn ńjú’u ncwò ndǔm we Ábalam, ńtóŋo yé lê Ndè wé. Pi ee fʉ̀’ɔɔn pɛ́’ɛ ńgwɔ́ gie pi lɔɔn ńgÿo nò mbòŋo té pɔ́gɔ tsɔ́ mmó, mbà pi ge cʉ́’ púɔ pé pe pànzwě.
7Mbɔɔ pi gí mbàŋa pi gẅiin pànzwě pi mboŋó, ńkímte pá’ pànzwě gwɔ́ pɔ́ pʉ̀a nzɔbte zɔbté. Pi ná mekù’ mɔ́b, á nue e Ssé la pú ńcÿó gʉm gia pɔ̌ métsèm, ńgÿo pá’ pi ge lá’ gẅiin kwà’ le gwɔ́. Pi gÿo pú’u, ńne sẅíŋte Ssé, atsɔ́ mmó le gẅi táte.
Legyǎ ngɔ́’ ńké ńgÿo pɔ́ mmó gie Ssé kwoŋ
8Mèŋ n ge gwaa cʉ́me, é gɔɔn fʉ̀’ɔɔn mbwo mânyìŋ ntsèm ngie, pi gẅiin tà’ ncwò, nyìŋ gẅi gyá nò nyìŋ pá’ yé, ńgwɔ́ ngàŋa tsɔ́ɔn mezìŋe, ńgẅiin nkwòŋe mefɛ́ mefɛ́, ńná nnɛ́ ssé. 9Tà pi lɔgɔ nò tepòŋ ńtsɔ́’ɔ nò tepòŋ. Tà mé zoonte gẅi pi pʉŋe. Tà ńcʉ́’ pú’u, pi gɔɔn ngie e Ssé gwɔ́ nê ngàŋ, e Ssé la tsɔ́’ɔ gẅi pɔ́ pá’ à ge gwɔ́ né pi. 10Mé la zɔɔn ńŋwe’e tsɛ̀ɛ ŋwà’ne Ssé ngie:
Nyìŋ lɔɔn ńne ńkwoŋo léńnéŋe mboŋó,
ḿbiŋ ńgẅiin melyɛ̌’ lá’ mbòŋo,
á poŋ ngie ngàŋ sele lʉ́m yé tá ńgɔɔn nò, ḿbɔ́gɔ nò tepòŋ,
ḿbɔ́ɔn ncwò we, ḿbɔ́g cÿɔ̌ nò.
11Á poŋ ngie à lÿɔ́’ɔ nò tepòŋ, ńgÿo pɔ́ nò mbòŋo,
é fa’ mbʉ́lè, ńzsete nzèm yé.
12Á nue menÿɔ́g Cʉ̀apʉ̀a tyé nà pʉ̀a pie pɔ́ gÿo mmó gie áa ndʉŋ ndʉŋ mvfò yé.
Metuŋó mé ne ńzẅí’te pá’ pɔ́ sẅíŋte yé.
Tá’ Cʉ̀apʉ̀a kě ńtém pɔ́ nzèm pʉ̀a pie pɔ́ gÿo nò tepòŋ.
13Pi lɔɔn ńnéŋe twó ńgÿo pɔ́ nò mbòŋo, mbà wɔ́ ge gÿo nò tepòŋ ná pi? 14Pi ke fó lyɛ̌’ ńgwɔ gyá ngɔ́’, á gwɔ́ nue pi ne ńgÿo mmó gie áa ndʉŋ ndʉŋ mvfò Ssé, mbà pi ee pà shÿó mbòŋo. Tà pi mɔ́ɔn tà ḿbɔ́g pʉ̀a mesoŋ. Tà ntʉ́m nyìŋ gẅi mɔ́ɔn tà ḿvɛ. 15Tá ńcʉ́’ pú’u, pi gwɔ́ tsɛ̀ɛ ntʉ́m gẅí, ńne ńnáa pɔ́ mekù’ Kristo ngie yé zɔɔ Ndè gẅi. Pi gwɔ́ fʉ̀’ ntsèm ńtyé pɔ́ pá’ nyìŋ zɛ́te gẅi ngie mélà’a kɔ́ pi tÿɔ́g nkwaŋá gẅi ná Kristo wɔ́, pi kyɛ́’te shwóŋó ngàŋ. 16Pi cʉ́’ʉ léshwóŋó yé ńdɔg pɔ́ ndɔ́ɔn ndɔ́ɔn, ńdɔg mekù’. Á poŋ ngie tà mbùm gi gwɔ gwɔ́ ńne ńcúɔ gẅi ná tsɔ́ mmó, tá à cʉa pú’u, ńgwɔ́ gie pʉ̀a lɔɔn ńne ńtÿɔ́gɔ sóon twó pi, éfó ná pá’ pɔ́ ne ńzoonte leńnéŋe gẅi we pʉ̀a Kristo, gẅie à gwɔ́ pɔ́ mbòŋ, eshʉ́ kúu wɔ́b. 17Mvfò aa nyìŋ légwɔ gyá ngɔ́’ ńne ńgÿo pɔ́ nò mbòŋo pá’ Ssé lɔɔn ńkwoŋ ngie à gwɔ́ pú’u, ńcʉa pá’ ńgwɔ́ nyìŋ gwaa gyá ngɔ́’ ńne ńgÿo nò tepòŋ. 18Kristo la zɔɔn ńgyá yé ngɔ́’ tà ńkwé lélɔg ńzyɛ́b menò tepòŋ pʉ̀a mesoŋ, ńké ńkwé ndà’ tà’ legʉ̀a, á ku’. Yé tè fʉa kwé ńtí ngàŋ mefʉa, pú’u, lélɔgɔ gẅi ńtóo mvfò Ssé. Mé la zẅé mbab nnɛ́ ye, tá Zẅìge Ndʉalʉ̌a gÿo á gíŋe ńgwɔ́ wó. 19A Zẅìge Ndʉalʉ̌a ŋwɛ́ gÿo á gʉa lá’ mepfó é shwóŋó nò Ssé mbwo mezẅige pʉ̀a mesoŋ mie é laa ndá tsǎŋ. 20Mɛ̌ mezẅige gwɔ́ me pʉ̀a pie é la tʉʉ twó mbwo Ssé á fʉ̀’ gie Nóa la ne ńnyɛte kanú’, e Ssé ne ńdɔgɔ kwɔ́gɔ nnɛ́ ńzẅí’te pʉ̀a zẅí’te. Tá’ pʉ̀a lefɔ̌ɔn ndà’ zɔ̌ gÿo ńkúu tsɛ̀ɛ kanú’ tà ńtsẅɛ́ ntse. 21Wɛ̌ ntse é laa liŋé kẅe ntse gie á gÿo pi tsẅɛ́ɛ fʉ̀’ɔɔn lɔɔn. Mé téen ńdɔgɔ sɔgɔ pɔ́ ncÿǒ nà mbùm nnɛ́ wɔ́. Á gwɔ́ pɔ́ lélɔg ńdúɔ mbwo Ssé ngie à sɔg mentʉ́m mégè, é le gíŋe ńŋaga wégè wɔ́. Akẅe ntse lɔgɔ pú’u, ńgÿo pi tsẅɛ́ɛ, ńzẅɛ́’ɛ pá’ Yěsô Kristo la zíme nà legwé. 22À la kwɔ́’ né tÿǒ lepwó, ńnéŋe nà gwǒŋo pwó Ssé ye tʉ̀. Àa fʉ̀’ɔɔn ńne sá’a *mecÿɔ́’ Ssé ntsèm, ńne sá’a kɔ̀ɔkɔ́ɔ gie á sá’a njÿó, ésá’a metʉ̀ ntsèm mie ée tÿǒ.
Currently Selected:
1 Piɛ 3: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.