Malëkë 4

Sasafë yi cimwamunë singeenzë

(Mat 13.1-9; Lik 8.4-8)

1Yeesu wusë be ba mu kuloongë mu ndaambu liyaangë li Ngalilee. Nkoongë yinenë kwiisë kun'zukë, tee yi faanë naandi wusye be podi ko kukalë yaawu, bwaawu kuye kandiminë mu bwaatu bwabë mu masi i wusë kalë. Baatu babë fë n'toto, bëbelëmë yi masi. 2Yeesu wulëbëloongaangë mpaapë maambu mu sisasafë i wulëbëkaambaangë mu nsinunwaandi : 3« Yuwaano, cilumbu cin'viipë, cimwamunë singeenzë wubasikë mu kwe mwamunë singeenzë. 4Abu kulëmwamunaangë singeenzë, mwa mpooko kubwiilë mu ndaambu nzilë i sinuni kwiisë i kusidoodë. 5Mpooko wun'ka yivaandi kubwiilë fë yilu n'toto wabë mëmanyi fanë fabë mwa n'toto. Singeenzë kulengë menë cibilë n'toto wusye ba wudoongë ko. 6Bunë muunyi wabasikë, mimeni kulelukë i kuumë mu lukaambu lu singaanzi. 7Mpooko wum'mesë kubwiilë fë meeyi misumbi i misumbi kukulë i yaawu kufyetëkini mimenyi. Mu cibilë ocyo, mimenyi yisye be vaanë mëkuundi ko. 8Kasi singeenzë sin'ka kubwiilë mu n'toto mbosi i syaawu kukulë i kuvaanë mëkuundi. Mimenyi ayi kubutë mëkumë-tatu, mimenyi yimesë kuvaanë mëkumë-samunu, kaambofo nkamë. » 9Yeesu kutubë : « Yuwaano buboti, wosuku wuke yi n'tu, matu mëke yaandi! »

Cibilë-mbici Yeesu wutubilaangë mu sisasafë?

(Mat 13.10-17; Lik 8.9-10)

10Bunë kwabë ku mpeengë, bo bëlëbangaangë yaandi yimunë likuumi bëbwaali li bilaanzi bisë n'yufulë : « Buni bukelili suundu sisasafë? » 11I naandi wubëkaambë: « Ke beeno liviindë liveewu mu Lwaangu lu Nzaambi i ke bënaani bëke ku ngaandë bëkun'yuwulwaangë mu sisasafë, 12i bwa boobo :

“Baawu kupodi kumonë, kasi bisë n'viisi kumonë ko,

baawu kupodi kuwu, kasi bisë n'zikulë kuwu ko,

mu kumaangë baawu kuvilukë i Nzaambi kubëvaanë lobukulu lu mësumu#4.12 Ezy 6.9-10.!” »

Yeesu wake bëzimuninë suundu sasafë yi cimwamunë singeenzë

(Mat 13.18-23; Lik 8.11-15)

13Naandi wusë bëkaambë : « Beeno lusye zikulë kuwu sasafë ayi kwe? Buni lum'podi kuzabilë suundu sisasafë syakë syooso? 14Cimwamunë wum'wamunë libuungu li Nzaambi. 15Singeenzë sin'ka kubwiilë mu ndaambu nzilë. Ndaambu nzilë dedë mweekë ti baatu bo batambulë libuungu li Nzaambi, akasi Satënë wakwiisë walitumunë. 16Singeenzë sin'kooso kubwiilë fë yilu n'toto mëmanyi. N'toto mëmanyi dedë mweekë baatu bo bakuwu libuungu li Nzaambi i baawu kusundilë kulitambulë mu liyaanji, 17vandi kasi baawu bësye biikë ko libuungu li Nzaambi mu kumenë mu baawu. Lufyaatu lwaawu lu mwa ntaangu. Bunë bën'kwisilë mënyoni kaambofo simpasi, mu cibilë ci libuungu li Nzaambi, baawu kulengë lekulë ciminu. 18Singeenzë sin'ka syabwiilë fë meeyi misumbi. N'toto wuke misumbi fwiifu si baatu bo bakuwu libuungu li Nzaambi, 19akasi tusweenu tu biimë bi buloongo abu, bimvwemvu bi businë, lilaangu li miciinzë yin'ka kubyesikë libuungu li Nzaambi. Mu boobo, libuungu li Nzaambi kube podi ve kuvaanë mëkuundi. 20Akasi singeenzë sin'ka yivaandi bëmwamunë mu n'toto mbosi. N'toto mbosi fwiifu si baatu obo bakuwu libuungu li Nzaambi, kulitambulë i kuvaanë mëkuundi. Awu kuvaanë mëkumë-tatu, awuuwu, mëkumë-samunu i awu yivaandi nkamë. »

Sasafë yi mwiindë

(Lik 8.16-18)

21Yeesu wusë bëkaambë : « Muutu kupodi kutuulë mwiindë wutatëmë kusi cipaanë, kaambofo kusi ciikë? Mati, fë yilu cicyetukulu ci mwiindë#4.21 Mat 5.15; Lik 11.33.? 22Cyosuku ciswaamë, cyaawu cim'monikë fë ciyalëlë, mu lyaawu, cyosuku ci mësweeci, cin'zabëkënë. 23Wosuku wuke yi n'tu, matu mëke yaandi! » 24Yeesu wusë bëkaambë : « Kebaanu mu manë lun'kuwu! Mba bëluzongilë mu cizongulu cinë lun'zongililaangë i mu cibilë ciinu, bëlëbweelooso. 25Mu bwaawu, bën'vaanë ke awu wuke yi byaawu, kasi awu wukambusu, bëkum'botulë fwaati fëke yaandi. »

Sasafë yi lumenunu lu lungeenzë

26Yeesu kube tubë : « Lwaangu lu Nzaambi fwiifu si muutu wum'mwamunë singeenzë mu n'toto. 27Muutu owo wabë wunukë, kaambofo wutyemunë, bwiilu i muunyi, mimeni yilë mu kumenë i yilë mu kulaambë, naandi kuzaabë ve buni lyaliili lilë mu kuvangëninë. 28N'toto waveekë kudeeci, m'meni kukulë, citeekë kufulë, fë siitu mëkuundi mëkaambu kweelë kubutë. 29Mooti mëkuundi makweelë, ntaangu yikuvelilë yafwaani, mëlengë-lengë muutu kuboongë n'kwati, yakuvelë#4.29 Zow 4.13.. »

Sasafë yi lungeenzë lu mutalëdë

(Mat 13.31-32,34; Lik 13.18-19)

30Yeesu kube tubooso : « Mbici tum'podi kudedikini yi Lwaangu lu Nzaambi, kaambofo sasafë mbici yifwenikini? 31Lwaangu lu Nzaambi dedë mweekë lungeenzë lu mutalëdë. Ntaangu bëlukuninë mu n'toto, lwaawu kuvyokililë bucyeeci mu singeenzë syooso sike fë yilu butoto. 32Kasi, lumwe yikununu mu n'toto, lwaawu kumenë, kukulë, kuvyokililë kulaambë yi mimeni yooso yike mu wooto. Bitafi byaandi kukulë, kulaambë, i sinuni kupodi kuvundilë kusi n'vefwaandi. »

33Mu mpaapë sisasafë simpilë oyo mwaawu Yeesu kulëbëkambilaangë libuungu li Nzaambi, mu nyuwulu syaawu. 34Wusye tubënaangë yaawu ko, kukaambu kulaandë sisasafë. Akasi ku mpeengë, wulusisiminaangë makë mooso ke bilaanzi byaandi.

Yeesu wabutikë mpeemu-ngudi

(Mat 8.23-27; Lik 8.22-25)

35Mësikë mu cilumbu be ciina, Yeesu kukaambë bilaanzi byaandi : « Ndokwaanu ku samu-simu li liyaangë li masi. » 36Baawu, bunë bamani kukaninë nkoongë baatu, i bunë Yeesu kwabë mu bwaatu, bilaanzi bisë n'natë. Faanë, fabë yivaandi myaatu yin'ka. 37Kuzimbukulabu, mpeemu-ngudi yisë kupukë i mëyo më masi mu kotë mu bwaatu. Tee mu bwaawu, bwaatu kuwaalë masi. 38Kosuku, Yeesu wabë ku mbaandu, wulëlembikilë, n'tu fë mpetu. Bilaanzi kun'kotulë i bisë n'kaambë : « A N'loonji, lisë kuvaangë lusweenu kwe, abu twake n'nyambikinee? » 39Bunë kwakotukë, kutundilë mpeemu-ngudi i wusë kaambë liyaangë li masi: « Lingëmë! Kalë n'sikë! » Mpeemu-ngudi kusundilë kubutëmë i n'sikë wunenë wusë ba. 40Naandi kubëkaambë : « Beeno, mpilë mbi boomë obo? Beeno, ciminu voo? » 41Lutekutu lunenë lusë kubëkotilë. Baawu bisë ke bokëtaangë baveekë yi baveekë ti : « Awu muutu mbici bën'lenvukilë#4.41 Twi 65.8; 89.10; 107.23-32. yivaandi ke mpeemu-ngudi i mëyo më masi? »

Currently Selected:

Malëkë 4: NTVIL

Highlight

Copy