Liikë 9

Cisalu ci likuumi bë bwaali li bilaanzi

(Mat 10.5-15; Mak 6.7-13)

1Yeesu wutelë likuumi bë bwaali li bilaanzi i wusë bëvaanë lutumu yimunë luleendo lu kukulilë biluunzi bibi i kubelusi sincyeenzu. 2Kumanoofo, naandi kubëfilë mu kwe tenduli Lwaangu lu Nzaambi i mu kwe bëlusi bibeedo. 3Naandi wusë bëkaambë : « Luboonjyaanu cyosuku ciimë ko mu mweendo, luveengu ve, cipokuluku ve, limpa ve, luboongo ve i leembwaanu kuba kadi muutu binkutu byooli. 4Mooti bëbe lutambulë fosuku, kalilaanu mu n'zo be yooyi tee yi fanë beeno lum'botukaanu faawu. 5Mwakë mooso, fanë baatu bëmaangë kulutambulë, botukaanu livulë lyaawu, basikaanu kukumunaanu n'kunkuumvu mu maalu miinu#9.5 Mak 6.11. : lyaawu lim'ba lukumini mu baawu. » 6Bilaanzi bisë kweendë. Baawu bëyevyokilaangë mu maalë makë mooso, ke tendulaangë Mpolu Mboti i ke belusyaangë bibeedo mwakë mooso.

Linyoonji li Eloodë

(Mat 14.1-12; Mak 6.14-29)

7Kosuku, Eloodë, wunë wulë byaalë ku Ngalilee, wuyuwaangë kutubë makë mooso mëlëvyookaangë. Naandi wusye zaabë ko linë li kubalë mu mamoomë, cibilë, bën'viipë bëlëtubaangë : « Za-Batiisë wavulumukë mu nkoongë bëfwa! » 8Bën'ka bëtubë: « Mati Eli wunë wamonikë. » Bën'kooso bisë bëtubë: « Wumweekë mu mibici podi kuba wavulumukë mu nkoongë bëfwa. » 9Kasi Eloodë wusë tubë : « Miinu yivangisi kucyelë n'tu wu Za. Muutu mbici owo wunë yilë mu kuwu makë mooso omo? » Naandi wulëtoombaangë kumonë Yeesu.

Yeesu walikilë biveefi bi taanu bi bëbakëlë

(Mat 14.13-21; Mak 6.30-44; Za 6.1-14)

10Mimbunzi bisë vutukënë i bisë zabikini Yeesu maambu makë mooso manë baawu bëvaangë. Naandi wubënatë mbiinji yinë yikaambu baatu belë-belë ku lweeku lu livulë li Betesayiidë. 11Kasi baatu bisë zaabë lyaawu i bisë kun'laandë. Yeesu wusë bëkwaakë, wusë bëkaambë maambu më Lwaangu lu Nzaambi i wusë bëlusi banë bën'vwa n'ciinzë lubelukulu. 12Bwiisi busë toonë kwiilë. Mu lyalyooli, kuumi bilaanzi byooli bisë kweendë belë-belë fëke Yeesu i bisë kun'kaambë : « Vutulë baatu aba mu maalë i mu simpakë sibelëmë, bwiinji bëtoombë bikulya i fanë fë kunukinë, cibilë ci beeso tukeeli mu ntaandu ciyumi. » 13Kasi Yeesu wusë bëkaambë : « Bëvaanyaanu benuveekë bikulya! » Baawu bisë vutulë : « Beeso tuke tokë mëmpa më taanu i mbisi wali. Njeeyi wuzolë ti beeso tweendë twasuumbi bilya binë baatu booso aba be fwenikini kulya? » 14Licyelikë, lutaangu lu bëbakëlë lwabë kuunë kupodi kuba kwaasu ku biveefi bi taanu. Yeesu wusë kukaambë bilaanzi byaandi : « Bëkasyaanu mu mëkomo mëkumë-taanu më baatu. » 15Bilaanzi bisë kuvitikë i bisë kasi baatu bakë booso. 16Yeesu wusë kuboongë mëmpa më taanu i simbisi siwali. Naandi kusendulë meeso ku yilu i wusë toondë Nzaambi mu cibilë ci bilya beenë. Naandi wusë kubikabulë i kubivaanë ke bilaanzi byaandi, bwiinji bëkabilë baatu booso babë kuunë. 17Wosuku muutu wulya i kukutu. Fë mbusë, bisë twaalë kuumi mikutë wali bëwaasi bitini bi mëmpa bënoongë#9.17 2 Mt 4.42-44..

Pyeelë watendulë ti Yeesu na kliistu

(Mat 16.13-19; Mak 8.27-29)

18Cilumbu cin'viipë, Yeesu wulësambilë ku mpeengë i bilaanzi byaandi babë yaandi. Naandi wusë bëyufulë : « Nkoongë oyo baawu mbi bëlë mu kutubë mu miinwe? » 19Baawu bisë n'vutulilë : « Bëmesë bën'tubë ti njeeyi Za-Batiisë, bën'ka, njeeyi Eli, bën'kooso, njeeyi wumweekë mu mibici mu ntaangu ntamë, wavulumukë. » 20Yeesu wusë bëkufulooso: « Vandi beeno, miinu nani yikeeli? » Pyeelë kun'vutulilë : « Mati njeeyi Kliistu li Nzaambi. »

Yeesu watendulë lufwa lwaandi i luvulumuku lwaandi

(Mat 16.20-28; Mak 8.30—9.1)

21Yeesu wusë bëkandiminë yi nkasu bëleembu kulibulilë lukuungu ke wosuku muutu. 22Naandi wusë kubweelooso kutubë : « Bëfwenikini, Mwaanë muutu kumonë mëncyeenji mëndoongë, kunyaciku ke mëkakëtë, ke singangë-Nzaambi i ke miloonji n'kaakë bëkum'bumë. Naandi bëkun'voondë i fë cilumbu cin'tatu, wun'vulumukë. »

23Fë mbusë, wusë kukaambë bakë booso : « Ningë muutu wun'zolë kun'daandë, wuleembu kufyaatë mu naveekë, kwe nati kuluuswaandi kadë cilumbu i wukun'daandë. 24Licyelikë, wunë wuzolë kuvuuci luziingu lwaandi, wulunyambikini. Kasi wunë wun'nyambikini lwaandi mu cibilë cyaami, wuluvuuci. 25N'ciinzë mbicye ke muutu mu kubakë businë bu buloongo n'viipë, ningë ti naveekë walubungisi, kaambofo wulë mu kulunyambikini? 26Ningë ti, muutu wum'monë sonyi mu cibilë cyaami miinu i mu cibilë ci mëbuungu maami, Mwaanë Muutu yivaandi wum'ba yi sonyi mu naandi, bunë naandi wun'kwisilë mu bumpumu bwaandi i bumpumu bu Tataandi i siyaanzi syaandi si saantu. 27Licyelikë beeno yin'kaambë: bën'ka bëkeeli afa bisë yifwiilë ko, kukaambu baawu kumonë ntetë Lwaangu lu Nzaambi. »

Lucitukulu lu Yeesu

(Mat 17.1-8; Mak 9.2-8)

28Bunë kwamani kutubë maambu be moomo, kwaasu ku lumiingu, Yeesu wusë boongë Pyeelë, Za i Zaakë i wusë kweendë yaawu ku yilu moongo mu kwe sambili. 29Bunë naandi kwabë mu kusambilë, ciinyi cyaandi cisë citukë i n'vwaatwaandi wusë manikë mpeembi yi kwaatë-yekë. 30Kuzimbukulabu, baatu bwaali bisë ba mu kutubënaangë yimunë Yeesu : babë Moyiizë i Eli. 31Banë bëlëmonikë fë meeyi bumpumu bu yilu. Baawu bëlëtubënaangë yimunë Yeesu mu nteku yinë kufitë vangilë cisalu cyaandi mu lufwiilulu lwaandi ku Yelusaleemë. 32Pyeelë i sindiku syaandi babë mu kuyidofë-tolo. Kasi ntaangu baawu bëkotukë, bëmonë bumpumu bu Yeesu i baatu bë bwaali banë babë yaandi#9.32 2 Py 1.16-18.. 33Ntaangu yo baatu aba bëbikilë Yeesu, Pyeelë wusë n'kaambë : « A N'loonji, liboti beenë tukalilë afa. Beeso tun'twilikë binzwananë bi tatu: cimweekë cyaaku, cimweekë ci Moyiizë, cimweekë ci Eli. » — Naandi wusye zaabaangë ko linë kulutubë. — 34Ntaangu kulëtubilaangë, livweeti lisë kumonikë i lisë bëzukë mu ciduundu cyaandi. Bilaanzi bisë kuba mu boomë bunë bamoni livweeti kubëzukë. 35Mbeembu yitendukë munë livweeti: « Naandyaawu na Mwanaami wunë miinu yasoolë. N'yuwulwaanu#9.35 Ezy 42.1; Lik 3.22.! » 36Ku mbusë kuwu mbeembu be yooyi, bilaanzi bisë kumonë Yeesu wo naveekë vikë-tikii. Bilaanzi bisë lingëmë i mu ntaangu beenë, baawu bësye be tubë lin'viipë ko ke wosuku muutu mu manë bëmonë.

Yeesu wabelusi mwaanë wukwamusu ke ciluunzi cibi

(Mat 17.14-18; Mak 9.14-27)

37Mu cilumbu cilandëkënë, baawu bisë nengumukë limoongo i nkoongë yinenë yi baatu yisë kudyengënë Yeesu. 38Muutu mweekë wusë kutoonë kulosukë munë nkoongë : « A N'loonji, njeeyi yim'bondilë, lakë ntalwaaku mu mwanaami wumweekë vwiili! 39Ciluunzi cibi kun'siimbaangë i kun'vangisyaangë kulosukë, cyaawu kun'nyikunaangë mu mëngolo mooso i kun'vangisyaangë kubaasi lifusë mu munu. Cyaawu kun'nyokulaangë i mpasi cyaawu kubotukë mu naandi. 40Miinu yisë loombë bilaanzi byaaku mu kukulë ciluunzi be cyooci, kasi baawu bësye podi kuve. » 41Yeesu wusë bëtun'dilë : « A baatu bëbi yi bëkaambu ciminu, tee ntaangu mbici miinu yifwenikini kukalë yiinwee? Miinu yifwenikini kuciimbë moonyi tee ntaangu mbicye? Twaalë mwanaaku afa. » 42Bunë mwaanë wusë belëmë yi Yeesu, ciluunzi cibi cisë n'lumbikë fë n'toto i cisë n'nyikunë yi mëngolo mooso. Kasi Yeesu wusë baminë ciluunzi cibi i wusë belusi mwaanë i wusë n'vutulë ke tataandi. 43Bakë booso bisë kusiminë kubookë mu luleendo lunenë lu Nzaambi.

Yeesu wakë be tendulë lufwa lwaandi.

(Mat 17.22-23; Mak 9.30-32)

Bo wun'viipë wulë tulumukaangë mu makë mooso manë Yeesu wuluvaangë, naandi wusë kukaambë bilaanzi byaandi : 44« Lwe siimbaanu buboti manë yilë mu kulukaambë bubwayi : Mwaanë Muutu wun'vakulu mu myooko baatu. » 45Kasi bilaanzi bisye zikulë kuwu ko libuungu be lyooli : suundu libuungu lisë ba liswaamë mu baawu bwiinji bëleembu kuzikulë, i boomë bwabë yaawu mu kuyufulë Yeesu mu maambu omo.

Nani mwiinji bukuluutu?

(Mat 18.1-5; Mak 9.33-37)

46Foofë, bilaanzi bisë ba mu kufindënë simpakë baveekë i baveekë mu kuzaabë nani wabë mwiinji bukuluutu mu baawu. 47Yeesu abu kwazaabi manë mëlëvyookë, wusë boongë cimwamwanë, kum'belëmisi fëke naandi. 48Wusë bëkaambë : « Muutu wunë wun'tambulë cimwamwanë aci mu luzolë lwaandi mu miinu, miinu kun'tambulë. Wosuku wukun'tambulë, naandi wun'tambulë yivaandi wo wukun'filë. Cibilë wunë wuvyokilili bulesi mu nkoongiinu beeno booso, mati naandi na mwiinji bukuluutu. »

Wunë wun'kaambu kululeendë ke yiinu

(Mak 9.38-40)

49Za wusë bulë mbeembu: « A N'loonji, beeso twamonë muutu n'viipë wuke yobulaangë mu lizinë lyaaku baatu bëvwaatu ke biluunzi bibi, akasi beeso twan'fuungë cibilë naandi wukeeli yiitu nkoongë mweekë ko. » 50Yeesu wusë n'vutulilë : « Lun'fuunjyaanu ko, cibilë wunë be kaambu kululeendë, wuke yiinu. »

Basë Samali bëmaangë mu kwaakë Yeesu

51Abu bilumbu byabelëmi binë Yeesu kufwenikini kunangukë ku yilu, naandi wutiisi yi nkasu mu kweendë ku Yelusaleemë. 52Naandi wusë kufilë bipayi fë ntwaalaandi. Baawu bisë kweendë i bisë kotë ku bwaalë bumweekë bu Samali mu kubelikilë byakë byooso bin'talë lwisulu lwaandi. 53Kasi basë bwaalë bisë maangë kun'tambulë, cibilë naandi wulëkwendë ku Yelusaleemë. 54Bunë bilaanzi Zaakë i Za bisë zaabë lyaliili, baawu bisë tubë : « A Fumu, njeeyi wulizolisi ti, beeso tutumë mbaasu yikulukë ku yilu i yikubëlakisi#9.54 2 Mt 1.10-12.? »

55Yeesu wusë balukë lweeku lwaawu i wusë bëseembë#9.55 Bisonë bimesi bin'tubë: beeno nusye zaabë ko ciluunzi mbici cilë mu kulutumë. Cibilë Mwaanë muutu sye kwiisë ko mu kunyambëkënë luziingu lu baatu, kasi mu kubëvuuci. Lik 19.10. . 56Baawu bisë kweendë bwaalë bun'ka.

Banë babë yi tesu yikulaandë Yeesu

(Mat 8.19-22)

57Ntaangu bëlë ke yendilaangë mu nzilë, wun'viipë kukaambë Yeesu : « Miinu njeeyi yilaandë fosuku fanë wun'kwendë. » 58Yeesu kun'vutulilë : « Mibaku bëke yi mëbulu, sinuni si yilu bëke yi maanzi, kasi Mwaanë muutu wukeeli ko yi faamë fë kunukinë i kunungunë n'tu. »

59Yeesu wusë kukaambë muutu wun'ka : « N'daandi. » Kasi libakëlë wusë tubë : « A Fumu, m'biicyoobo ye tekë ziikë Tataami. » 60Kasi Yeesu wun'vutulilë : « Biikë sinvuumbi bëziikë sinvuumbi syaawu, kasi njeeyi, yendë we kutendulë Lwaangu lu Nzaambi. »

61Wun'kooso kun'kaambë : « Miinu sya yikulaandë a Fumu, kasi m'biici ye kukaninë libaambë lyaami. » 62Yeesu wusë n'kaambë : « Wosuku wum'ba mu kuvatë i wun'talë ku mbusë, naandyoowo wukeeli n'ciinzë ko ku Lwaangu lu Nzaambi. »

Currently Selected:

Liikë 9: NTVIL

Highlight

Copy