Liikë 10

Cisalu ci saambwali li mëkuumi bilaanzi byooli

1Kumanoofo, Fumu kube soolë saambwali li mëkuumi bilaanzi byooli bin'ka i naandi wusë bëfilë bwaali-bwaali fë ntwaalaandi mu mëvulë mooso i mu tweeku tooso munë kulëkwendë naveekë. 2Naandi wusë bëkaambë : « Cisalu cifunë beenë, kasi bisasi bi n'cyo mu cyaawu. Oboobo bondililaanu Fumu solë mo kubweelë kufilë bisasi mu solaandi. 3Mu nzilë! Miinu yalufilë buke mëmemë fë meeyi mikoomo. 4Lwe nacyaanu ko luboongo mu nkutwiinu, cipokuluku ve, mëpaapë ve. Nusikëmyaanu ko mu nzilë mu kubilë muutu. 5Bunë lun'kotë mu yosuku n'zo, tubaanu ntetë : “N'sikë we ba mu n'zo ayi.” 6Ningë ti munë n'zo beenë mungë n'sikë wuke mwaawu, n'sikë wum'ba mu naandi. Ningë ti boobo ko, n'sikwiinu we vutukënë yiinu. 7Kalilaanu munë n'zo be yooyi, lyaanu i nwaanu binë bëluvaanë, cibilë ti cisasi wufwenikini kutambulë lifutë lyaandi#10.7 Mat 10.10, 1 Ko 9.14; 1 Ti 5.18.. Luvyooci ko n'zo mu kwe koti n'zo yin'ka. 8Bunë beeno luke koti mu lyosuku livulë, i bisë lutambulë kwaawu ko, lyaanu binë bëluvaanë. 9Belusyaanu bibeedo bë livulë be lyoolyo, i kaambaanu basë livulë ti “Lwaangu lu Nzaambi lwabelëmë yiinu.” 10Akasi, mu lyosuku livulë beeno lun'kotë i bën'kaambu kulutambulë, yendaanu mu sinzilë i tubaanu ke bakë booso : 11“Beeso twakukumunë yivaandi n'kunkuumvu yi livulë liinu yinë yanamë mu maalu miitu#10.11 9.5; Mak 6.11.. Vandi, lwe zaabyaanu ti : Lwaangu lu Nzaambi lwabelëmë yiinu.” 12Miinu beeno yilë mu kukaambë : mu cilumbu ci Lufundusu basë Sodoomë#10.12 Ntn 19.24-28., bën'vyokililë kubakë lusifu luleengë yi basë livulë be lyooli. »

Mëvulë mëmaangë kuta maanë

(Mat 11.20-24)

13« Lusifu ke njeeyi, Kolëziinë! Lusifu ke njeeyi, Betesayiidë! Cibilë ti ningë, bimaaku bivangini ke beeno, bivangininë ku Tiilë i ku Sidoonë, nkanë yoonoobwe basë livulë be lyoolyo bëlëvwaatë sedë, kuyibukë libuufu i bëlëbalulë mëvaangë maawu#10.13 Mat 11.21.. 14Bwaawu, mu cilumbu ci Lufundusu, Tiilë i Sidoonë bën'tambulë lusifu luvyokili kuleengë yi lwiinu. 15Njeeyi Kapelënawuumë, wum'balë ti, njeeyi wuyinangukë tee ku yilwe? Moniko, njeeyi wum'byesëmë tee yi kunë buloongo bu baatu bëfwa#10.15 Ezy 14.13-15.. » 16Yeesu wusë be kaambooso bilaanzi byaandi : « Wunë wuluyuwulu, wukun'kuwulu mivaami i wunë wulunyacikë, wukun'nyacikë mivaami. Wunë wukun'nyacikë, wun'nyacikë yivaandi wunë wakun'filë. »

Luvutukulu lu lisaambwali li mëkuumi bilaanzi byooli

17Lisaambwali li mëkuumi bilaanzi byooli bisë vutukënë yi liyaanji lyooso i bisë tubë : « A Fumu, keti biluunzi bibi yivaandi batuyuwulu bunë beeso twabëvaani tutumu mu lizinë lyaaku. » 18Yeesu wusë bëvutulilë : « Miinu yilë monaangë Satënë kubwa lu yilu buka lusyeemu. 19Yuwaano : miinu yiluvaanë lutumu mu kulyatilë fë yilu sinyokë i bineengë#10.19 bineengë: bituutë bifwanëkënë yi mëkoonkë bike n'cyelë wukulë fë siitu bëke yi miinzi yin'tebilaangë yivaangaangë myangëlë, kaambofo podi kunatë ku lufwa. i yikubyesikilë luleendo looso lu mbeeni i cin'velë ve cim'podi kuluvaangë libi. 20Kasi lwe baanu ko mu nyeenzi cibilë ti biluunzi bibi byaluyuwulu, vandi lwe baanu mu nyeenzi cibilë ti mëzinë miinu mësonëmë kunë mëyilu. »

Yeesu weekë mu liyaanji

(Mat 11.25-27; 13.16-17)

21Mo mu ntaangu beenë, Yeesu wusë waalë liyaanji li Ciluunzi ci Saantu i wusë tubë : « Ata, njeeyi yin'dumisi, Fumu li yilu i yi n'toto, miinu nje yin'toondë cibilë wazabikini ke bibabanë mo wusweekë ke bëke yi bungelë i bangë mëlyeelë. Ngete, Ata, njeeyi boobo bwa wuzolisi buvanginini. »

22« Tataami wum'paanë biimë byakë byooso. Muutu ve wuzabisi nani Mwaanë kukeeli ningë kanuku wo Taatë, i muutu ve wuzabisi nani Taatë kukeeli ningë kanuku wo Mwaanë i banë bo Mwaanë wuzolisi kubangulilë. »

23Tee Yeesu wusë balukë kuke bilaanzi byaandi, i wusë bëkaambë ku mpeengë: « Nyeenziinu beeno mu kumonë mo lulë mu kumonë! 24Cibilë, yilukaambë miiti, mpaapë mibici i mpaapë mitinu bën'vwa n'ciinzë kumonë ama lulë mu kumonë i bësye mëmonë ko i kuwu ama lun'kuwu, akasi bësye mëyuwu ko#10.24 1 Py 1.10-12.. »

Sasafë yi muutu wumboti wu Samali

25Mu lyaawu, n'loonji n'kaakë wun'viipë wusë bulë mbeembu. Mu kun'seengë Yeesu, naandi wun'loombë : « A N'loonji, mbici yifwenikini kuvaangë mu kubakë luziingu lu sakë yi sakë? » 26Yeesu wusë n'kaambë : « Mbici bësonikë mu N'kaakiitu? Njeeyi mbi wulë mu kutaange? » 27Naandi wusë vutulë : « “Njeeyi wufwenikini kuzolë Fumu Nzaambyaaku, yi n'timaaku wooso, yi mbalyaaku yooso, yi mëngolo makë mooso, yi mu mëlyeelë maaku mooso.” Yivaandi : “Njeeyi wufwenikini yivaandi kuzolë mbaasyaaku bo buke njeveekë#10.27 Det 6.5; Lev 19.18..” » 28Yeesu wusë n'kaambë : « Njeeyi wavutulilë buboti. Vangilë obo i njeeyi wun'ziingë#10.28 Lev 18.5.. » 29Akasi n'loonji n'kaakë wulëtoombaangë nduunji mu cyuufu cyaandi. Naandi wusë kufulë Yeesu : « Mbaasyaami nanye? » 30Yeesu wusë n'vutulilë : « Muutu wufuminë lu Yelusaleemë mu kuvyookë ku livulë li Yeliko. Naandi kubwa mu nkoongë bilyaani, baawu bisë n'vokënë n'vwaatwaandi, kun'tuutë-nkubë i ke yendaangë, kun'lumbilë fë mëvaambu mu lufwa. 31Faanë, fabë ngangë-Nzaambi wulëvyokilë mo nzilë beenë, abu kwamoni wo bëbulë, naandi kuvyokilë ku lweeku lum'mesë lu nzilë i wusë ke yendaangë kwaandi. 32Mpilë mweekë, Leviitë n'viipë yivaandi wuyituukë mbiinji beenë, abu kwam'moni, navaandi wusë vyookë kwaandi. 33Kasi musë Samali, wabë mu mweendo faawu, kutuukë belë-belë yi wo bëlwaasi. Bunë kwam'moni, cyuundë cinenë cisë n'kotili. 34Naandi wusë m'belëmë, kudukulë zeetë i viinyi#10.34 zeetë i viinyi: byabë dedë mweekë biloongo bëlëbukilaangë baatu. Ezy 1.6. mu simbumë syaandi i wusë kun'ziingë biteendë mu simbeenzë. Kwamani, naandi wusë kun'kandikë fë yilu cibulu cyaandi i wusë n'natë ku n'zo beeni, fa foofë bisë kun'tambikë ke fumu n'zo bwiinji kum'bukë. 35Cilumbu cilandëkënë, naandi kuvaanë binkongulu byooli bi mboongo ke fumu n'zo beeni i wusë n'kaambë : “We buci buboti muutu awu. Bunë miinu yin'vyokilë afa, yikufutë miveekë mu byo wun'vaangë mu naandi bin'tetëmooso fë yilu.” »

36Yeesu wusë bëtubë: « Mu baatu bë tatu obo, nani wabë mbaasi yi wo bëbulë ke bilyaani? » 37N'loonji n'kaakë kucikunë naati: « Wo wavaangë bwalëkisi mu naandi. » Yeesu wusë kun'kaambë : « Yeendë, i vangilë bo bumweekë. »

Yeesu ku bwaalë bu Malëtë i Maali

38Abu Yeesu wulë ke yendaangë i bilaanzi byaandi, mu nzilë, naandi wusë kotë ku bwaalë bu n'cyeetu bën'telaangë Malëtë, wun'tambulë ku n'zwaandi. 39Naandi wuba yi mwaanë nguli wu n'cyeetu bëlëtelaangë Maali. Na Maali be woowo naandi wabë wukalë fë kumë li Fumu, Fumu wulë kuwaangë manë kulëloongaangë#10.39 Za 11.1-3.. 40Malëtë wabë yi mpaapë bisalu bi kulaambë. Naandi kwiisë i wusë tubë : « A Fumu, lisë kuvaangë lusweenu kwe mwaanaami nguli kum'biikë miveekë mu kusalë? We n'kaambi bwiinji wukum'paanë myooko. » 41Fumu wusë kun'vutulilë : « A Malëtë, a Malëtë, wulë mu kuyivaangë mpaapë tusweenu i mpaapë simpasi mu lilaangu li biimë. 42Kasi ciimë cimweekë vwiili cike n'ciinzë. Maali wasoolë cikuuku ciboti, cinë muutu ve wum'podi kubotulë cyaawu. »

Currently Selected:

Liikë 10: NTVIL

Highlight

Copy