Liikë 7

Yeesu wabelusi ciseelu cin'kuluutu-mësodaadi

(Mat 8.5-13)

1Bunë Yeesu kwamani kukaambë makë mooso omo ke mboongu baatu yilën'kuwaangë, Yeesu wusë kweendë ku livulë li Kapelënawuumë. 2N'kuluutu-mësodaadi wu Loomë wabë i cisasi kulëzolaangë beenë. Cisasi beenë cyabë ncyeenzu, fë mëvaambu më lufwa. 3Kwayuwu ndumu Yeesu, na kun'filë mwa m'pooku mëkakëtë më Sizwiifë, mu kum'bondililë kwiisë mu kubelusi cisasi cyaandi. 4Mëkakëtë kutuukë fëke Yeesu i bisë lengë m'bondililë yiveko mu bikumë abi : « Muutu awu, wufwenikini kutambulë lusalusu lwaaku. 5Naandi wuzolisi mboongwiitu i naandi na wutuungë cizutununu ciitu mu mëkanë maandi. » 6Yeesu wusë kweendë yaawu, i fo kwabelëmi yi n'zo, n'kuluutu-mësodaadi kufilë sindiku syaandi mu kwe n'kaambë : « A N'loonji, biikë kwaandi kuyivaangë simpasi. Miinu yisye fwanëkënë ko ti njeeyi mu kukotë ku n'zwaami. 7Mati mu lyaawu, miinu yakaambu kwisilë miveekë fanë fëke njeeyi. Kasi tubë cikumë cimweekë bwiinji cisasi cyaami ci belukë. 8Miveekë, yike mu lutumu lu bëkuluutu baami, i miinu yike yi mësodaadi mu tutumu twaami. Ningë yibe kaambë wun'viipë : “Yendë!” Naandi wun'kwendë. Ningë yibe kaambë ke wun'ka : “Yisë!” Naandi wun'kwisë. Mooti yibe kaambë cisasi cyaami : “Vaangë ali”, naandi wulivaangë. » 9Yeesu kwayuwu bikumë obyo, liyaanji kun'kotilë mu cibilë cin'kuluutu-mësodaadi. Naandi wusë balukë i kukaambë nkoongë yilë ke n'laandaangë : « Miinu yilukaambë : yibuunu vyaasi kumonë muutu ke ciminu ci mpilë oyo, moniko keti ku Islayeelë. » 10Bo bëtumë bisë vutukënë ku n'zo n'kuluutu-mësodaadi i bisë kutakënë cisasi mu buvinyi.

Yeesu wavulumunë mwaanë wu n'fwiili

11Cilumbu cilandëkënë, Yeesu wusë kweendë ku livulë bëteelë Nayiinë. Bilaanzi byaandi yimunë nkoongë yinenë yi baatu bëbuundë yaandi nzilë. 12Kwabelëmi fë nkotulu li livulë be lyoolyo, naandi kudyengënë vuumbi bëlënataangë ku bizyaami : naandi wabë mwaanë viingu wu n'fwiili. Nkoongë yinenë yi livulë yabë yimunë naandi. 13Fumu abu kwam'moni, cyuundë kun'kotilë mu cibilë cyaandi i wusë n'kaambë : « Leembu kulilë! » 14Naandi wusë belëmë i kusiimbë kasu. Banë bëlënatë kasu bisë sikëmë. Yeesu wusë tubë : « A cilesi bakëlë, miinu nje yin'kaambë, manë n'telë! » 15Foofo, cibayë kulengë telëmë i kubulë mbeembu. Yeesu kun'tambikë ke mamaandi. 16Bakë booso bisë ba yi boomë, i bisë tubë : « Mpumu ke Fumu Nzaambi, m'bici wunenë wamonikë fë meeyiitu! » Yivaandi : « Nzaambi wisisi mu kuzudi mboongwaandi! » 17Libuungu olyo lisë nyambë bwendi Zudee#7.17 6.17. i mëvulë mooso mëbelëmë mu manë Yeesu kuvaangë.

Bipayi bi Za-Batiisë

(Mat 11.2-19)

18Bilaanzi bi Za-Batiisë bisë n'zabikini, maambu mooso manë mëlëvyookë. Za wutelë bilaanzi byooli mu kati kwaawu baawu, 19i wusë bëfilë kuke Fumu bwiinji bën'yufulë : « Buni, njeeyi nje muutu wufwenikini kwiisë#7.19 Mat 11.3., kaambofo beeso tufwenikini kuciingë muutu wun'ka? » 20Bunë batuuci ke Yeesu, baawu bisë n'kaambë : « Za-Batiisë watufilë mu kukuyufulë : “Buni Njeeyi nje Kliistu wufwenikini kwiisë, kaambofo beeso tufwenikini kuciingë muutu n'ka?” » 21Mo mu ntaangu beenë, Yeesu kubelusi mpaapë baatu mu sincyeenzu syaawu, naandi wusë bëvuuci mu biluunzi bibi i naandi wusë zibulë meeso më mpaapë simpofo. 22Fë mbusë, naandi wusë kaambë bipayi bi Za-Batiisë : « Lwe yendyaanu mu ke zabikini Za maambu manë beeno lwamonë i mo lwakuwu: simpofo silë mu kumonë, baatu bëtolëkënë maalu bëlë mu kulyaatë, bangë bwaasi bëlë mu kubelukë, bidukë-matu bëlë mu kuwu, baatu bëfwa bëlë mu kuvulumukë i biyeembi bëlë mu kuwu Mpolu Mboti#7.22 Ezy 35.5-6; 61.1.. 23Nyeenzi ke wunë wun'kaambu kuvubikë ciminu cyaandi mu miinu! »

24Bunë bipayi bi Za biyeendë, Yeesu wutoonë kutubilë mu cibilë ci Za ke nkoongë i kutubë : « Mbici luye monë ku ntaandu ciyumi? Liveeso lilë pukumukë mu mpeemwe? Monikoo. 25Mu lyalyooli, beeno mbici lusë ke monë? Muutu wuvwaatë milelë yi miingu? Monikoo, cibilë ti, banë bën'vwaataangë milelë yi bukaalu, bën'kalilaangë mu sinzo si mitinu. 26Kasi mbici beeno lusë ke monë? M'bicye? Cyelikë, miinu beeno yin'kaambë, i wunë wuvyokilili mwiinji m'bici. 27Cibilë, busonëmë mu Za :

“Tala, miinu yin'filë cipayi cyaami fë ntwaalaaku,

bwiinji wukubelikilë nzilë#7.27 Mal 3.1..” »

28« Yeesu wusë be bweelë kutubë, beeno yilë mu kukaambë, mu kati kwiinu muutu ve wubutu wuvyokililë bunenë yi Za. Mu kumonë, wunë wukeeli mwiinji bucyeeci ku Lwaangu lu Nzaambi, naandyoowo wuvyokilili bukuluutu yi naandi. 29Baatu bakë booso i binoongë mpaku bisë n'kuwulu. Baawu bisë zaabë ti Nzaambi muutu wusulëmë i baawu bëtambulë lubatizyaalu ke Za. 30Kasi Sifalisyaanu i miloonji n'kaakë bësye vitikë ko maambu manë Nzaambi kulëtiisyaangë mu baawu i baawu bisë maangë ti Za wubëbatizyaalë. »

31Yeesu wutubooso : « Ke nani, miinu yim'podi kufwiici mboongu baatu yi ntaangu ayi? Baawu fwiifu yi nanye? 32Baawu fwiifu si banë bëkalë fë mëvaambu më nzilë, fë ciyalëlë, bëke losukulaangë bayaawu : “Beeso tulusikilë mpyeepi, akasi beeno lusye cinë ko. Beeso tuluyolilë twiimbu tu cyuundë, akasi beeno lusye lilë ko!” 33Licyelikë, Za‐Batiisë wuyisë. Naandi wusye lyangaangë limpa ko i wusye nwaangaangë viinyi ko i beeno lusë tubë ti : “Naandi wuvwaatu ke ciluunzi cibi!” 34Mwaanë muutu wakwiisë, naandi wulë mu kulya i wulë mu kunwa. Beeno lun'tubë : “Talaanu, muutu owo wuke balaangë tokë kulya i ke nwangaangë viinyi, ndiku binoongë mpaku i bisumuci!” 35Kasi, bungelë bu Nzaambi bëm'monikaangë mu n'sulumunu ke baatu bakë booso bacikunë bwaawu. »

Yeesu ku n'zo Simu Falisyaanu

36Falisyaanu mweekë wutelë Yeesu ku n'zwaandi mu kwambulë. Yeesu wuyendë ke libakëlë beenë i wusë sungëmë fë meesë. 37Mu kati ku livulë beenë, mwabë n'cyeetu wabë yi lusuungu lubi. Bunë naandi kwayuwu ti Yeesu wulë mu kwambulë ku n'zo yi Falisyaanu, naandi wusë twaalë cibulikë ci alëbaatë#7.37 limanyi li m'beembi like bukaalu, bën'vangilaangë bipoopo. ciwaalë yaafë. 38Naandi kukalë ku mbusë Yeesu, fë maalu maandi. Naandi wulëlilaangë i mësweelë maandi mëlëbosyaangë maalu më Yeesu. I naandi wusë kufyoonë maawu mu mileenjyaandi, kufifë maalu maandi i kumëdukililë yaafë. 39Bunë Falisyaanu wutelë Yeesu wusë monë katyoobo, naandi wusë tubë ku cimbeenzë cyaandi ci n'timë : « Ningë muutu awu wabë cyelikë m'bici, nkanë naandi wubakulë ti n'cyeetu wulë mu kun'siimbë owo n'sumuci kukeeli. » 40Mu lyalyooli, Yeesu wusë buulë-mbeembu i wusë kaambë Falisyaanu: « Simu, miinu yike yi lyaambu li kukukaambë. » Simu wusë vutulë : « We tubë kwaaku, a N'loonji. » 41Yeesu wusë tubë : « Baatu bwaali bëyidefë simboongo ke cidefisi-mboongo. Wumweekë wudefë nkamë-taanu li binkongulu bi mboongo i wun'ka mëkumë-taanu më binkongulu. 42Abu baawu bësye ba yi mëkanë ko më kun'futë, naandi wusë leembu kubëfutisi babë bwaali n'kanu. Mu babë bwaali, nani wuvyokisi kun'zole? » 43Simu wusë n'vutulilë : « Miinu yim'balë ti muutu wo naandi kwasiilë liboti mu lilaangu li mboongo. » Yeesu wusë n'kaambë : « Njeeyi waluungë. »

44Fë mbusë, Yeesu wusë balukë kuke n'cyeetu beenë, i wusë kaambë Simu : « Njeeyi wamonë n'cyeetu awee? Miinu yibe kukotë ku n'zwaaku i njeeyi sye kum'paanë kuve masi më kusukulë maalu#7.44 nteku yi kukwaakë baatu. Ntn 18.4; 19.2.. Kasi naandi wasukulë maalu maami mu mësweelë maandi i wafyoonë maawu mu mileenjyaandi. 45Njeeyi wusye kun'tambulë ko mu kun'fifë. Kasi naandi wusye biikë ko kufifë maalu maami kutoninë ntaangu yo yiyikotilë. 46Njeeyi wusye kun'dukulilë mëfutë ko ku n'tu#7.46 Twi 23.5.. Kasi naandi wakun'dukulilë yaafë mu maalu. 47Mati mu bwaawu, miinu yikukaambë : luzolo lunenë lunë kwaleesi naandi lun'sisiminë ti mpaapë mësumu maandi makobukë. Kasi wunë bën'lenvukilë fwaati, wun'leesi luzolo lucyeeci. » 48Yeesu wusë kaambë n'cyeetu beenë : « Njeeyi wabakë lobukulu lu mësumu maaku. » 49Banë babë yaandi fë meesë bisë tubënë baveekë yi baveekë : « Muutu awu, nani kukeeli wun'kobulilë keti mësumu? » 50Kasi Yeesu wusë kaambë n'cyeetu : « Ciminu cyaaku cyakuvuuci. We yendi mu n'sikë. »

Currently Selected:

Liikë 7: NTVIL

Highlight

Copy