Liikë 6:27-49
Liikë 6:27-49 NTVIL
« Kasi miinu beeno yin'kaambë, ke beeno lulë mu kun'yuwulu: zolaanu simbeenyi siinu, vaangaanu liboti ke banë bëluleendë. Sakumunaanu banë bëlusifë i sambilaanu mu banë bëlunyokulë. Ningë wun'viipë wukubulë fë litamë limweekë, n'tambikë litamë limesi. Ningë wun'viipë wukuboongë ciyuungë cyaaku, m'biikë kuboongë yivaandi cinkutu cyaaku. Vaanë ke wosuku wukuloombë cyosuku ciimë i mooti muutu wakuboongë ciimë cyo wubakisi, keelë wulun'vokënë cyaawu. Vangilaanu ke bën'ka bo bumweekë bunë lun'tombilë ti baawu bëvangilë mu beeno. Mooti beeno luzolisi vwiili banë bëluzolë, buni bëm'podi kulutondilee? Bisumuci yivaawu bën'zolaangë banë bëbëzolisi. Mooti lube vaangë liboti ke banë bëluvaangaangë simboti, buni bëm'podi kulutondile? Bisumuci yivaawu boobo bën'siilaangë. Ningë ti lube sombisi tokë ke banë yin'siilë civuufu ti baawu bëluvutulilë, buni bëm'podi kulutondilee? Bisumuci yivaawu bën'sombisyaangë ke bisumuci mu kubakë bo bumweekë. Tiilyoko, zolaanu simbeenyi siinu. Bëvaanjaanu simboti i sombisyaanu kukaambu kuciingë cyosuku cyo bëluvutulilë. Beeno lum'bakë ndobu yinenë beenë i lum'ba baanë bë Nzaambi yisalaangë yilu, cibilë naandi wuke yi n'timë wumboti mu bëkaambu luzaabu i mu bangë bubaalu. Baanu yi bwalëkisi bo buke Tatiinu wuwaalë bwalëkisi. » « Nufundisyaanu wosuku muutu ko i mu kumaangë Nzaambi kulufundisi. Keelaanu kutabë bayiinu mu kumaangë yivaandi Nzaambi kulutabë. Lenvukilaanu bayiinu, oboobo, Nzaambi wululenvukilë yivaandi. Vaanaanu bayiinu, oboobo, Nzaambi wuluvaanë yivaandi : bën'sekulilë mu bolusu yinenë yi cinkutu cyaaku cyeelu cin'funë ciboti, civweetu ciboti i bëcinyikunë i cin'vyokililë. Nzaambi wunzongilë mëkabu maandi mu beeno mu cyeelu cinë beeno lun'siilë mu kuzongilë bayiinu. » Yeesu wusë kubëkambilooso yivaandi mu bifwaani: « Mpofo, podi ve kunatë mpofo yaandi, boobo kwe? Ningë moniko, babë bwaalë kubwa mu libulu. Cilaanzi kupodi ve kuvyokilë n'loonjyaandi. Kasi cilaanzi cisinu buboti cim'ba dedë mweekë buke n'loonjyaandi. Kwisilë buni njeeyi kum'monë lukuunzë mu lyeesu li mwanaaku nguli, tiilyoko njeeyi wun'kaambu kumweenë likuunzi like mu lyeesu lyaakwe? Kaambofo, buni wum'podi njeeyi kukaambë mwanaaku nguli ti : “Biikë yikubotulë lukuunzë luke mu lyeesu lyaaku, tiilyoko, njeeyi wun'kaambu kumweenë likuunzi like mu lyeesu lyaakwe?” Njeeyi cimpilë-mpiipë, botulë cin'tetë likuunzi like mu lyeesu lyaaku, bosuku wum'botulë lukuunzë luke mu lyeesu li mwanaaku nguli. » « N'ti wumboti wusë m'butaangë ko mëkuundi mëbi, kaambofo n'ti wusekë mëkuundi mëboti. Mu lyaawu, wosuku n'ti bëkun'zabilaangë mu mëkuundi maandi kun'vaanaangë. Kusë bën'sangulaangë mëkuundi më n'ngengë mu miti siseendë ko i kaambofo mëkuundi më viinyi mu misumbi. Muutu wumboti wum'bakilaangë liboti mu liboti like mu n'timaandi. Muutu wum'bi wum'bakilë libi mu libi like mu n'timaandi. Cibilë, manë munwaandi kum'baasyaangë mëfuminaangë ku n'timaandi. » « Cibilë mbi beeno lukun'telilaangë “Fumu, Fumu” i beeno lusë n'vaangë ko manë miinu yilukaambë? Miinu yakululeesi nani wuke dedë mweekë wosuku wun'kwisë ke miinu, naandi wun'kuwu mëbuungu maami i wumësalilë : naandi fwiifu yi muutu wunë wulë mu kutuungë n'zo. Naandi kusikë lufuuyi lu doongë i kutulikë lubaandu fë yilu mëmanyi. Bunë ngami masi yin'kwisë, kuyifwaangë mu n'zo beenë, yaawu kupodi ve kuvongumukë, cibilë bëyituungë buboti. Kasi wunë wun'kuwu mëbuungu maami, i wun'kaambu kumësalilë, naandi fwiifu yi muutu wun'tuungë n'zwaandi fë n'toto, yikaambu lufuuyi luciindë. Bunë ngami masi yiyifwaangë mwaawu, n'zo kulengë kuvongumukë : i yaawu kutyamukë yakë yooso. »
Bible App
Bible App for Kids
