Liikë 5

Yeesu watelë bilaanzi bin'tetë

(Mat 4.18-22; Mak 1.16-20)

1Cilumbu cin'viipë, Yeesu wabë mu ndaambu liyaangë li Ngenezaleetë#5.1 liyaangë li Ngenezaleetë: kaambofo liyaangë li Ngalilee. Mak 6.53. i nkoongë yilengë m'belëmë mu kuwu libuungu li Nzaambi. 2Naandi wumonë myaatu wali mu ndaambu liyaangë : bivubë-toongo bëyiseesë i bëlësukulaangë mitaambwaawu. 3Yeesu wukandëmë mu bwaatu bumweekë, bwabë bu Simu i wusë n'loombë bwiinji kuyakënë fwaati yi liloondo. Abu kwakali, naandi wusë ba mu kuloongë nkoongë baatu.

4Bunë kwamani kutubë, na wusë kaambë Simu : « Kwesinë beenë cinaanu fanë fëke liwiingë li masi, boobo, njeeyi i bayaaku, lulakaanu mitaambwiinu mu kuvubë, njeeyi i sindiku syaaku. » 5Simu wusë n'vutulilë : « A N'loonji, beeso twamonë simpasi bwiilu bwakë booso i cin'velë kubakë ve. Akasi mu libuungu lyaaku, yake n'lakë mitaambu. » 6Abu balaci mitaambu, baawu kubakë civweetu cinenë ci litoongo, mitaambwaawu tiilyoko nkanë yake m'bënzikë#5.6 Za 21.6.. 7Baawu bisë telë sindiku syaawu syabë mu bwaatu bumesë mu kubëzudi. Abu bayisi, baawu bisë waasi myaatu wali, kukambwaangë fwaati mu kusiindë. 8Kwamonyoobo, Simu li Pyeelë wusë kufukumë fë nduunzi Yeesu i wusë tubë : « A Fumu, yakënë fëke miinu, cibilë miinu n'sumuci! » 9Simu, bo bumweekë bakë booso babë yaandi, bëba yi boomë, mu cibilë ti civweetu ci litoongo bëvubë baawu. 10Lisë ba bo bumweekë mu sindiku syaandi, Zaakë i Za, baanë bë Zebedee. Kasi Yeesu wusë kaambë Simu : « Wubaci boomë ko. Ku ntwaalë yikwisë, wum'ba civubë baatu. » 11Foofë, baawu bisë natë myaatwaawu fë ntaandu i bisë vubikë byakë byooso mu kulaandë Yeesu.

Yeesu wabelusi mungë bwaasi

(Mat 8.1-4; Mak 1.40-45)

12Yeesu bunë kwaba ku livulë limweekë, libakëlë lin'viipë lyabë yi bwaasi wuyim'belëmë. Bunë kwamoni Yeesu, naandi wusë fukumë fë ntwaalaandi, mbuunzu fë n'toto i wusë m'bondililë mu bikumë abi : « A Fumu, ningë njeeyi wulizolisi, njeeyi kupodi kun'lyomisi. » 13Yeesu wusë n'taambë kooko, kun'siimbë i kutubë : « Miinu yilizolisi, we lyoomi! » Mo mu ntaangu beenë, bwaasi kusundilë kum'botukë. 14Yeesu wusë n'kaambë : « Keelë wulëkaambë lyaambu ali ke wosuku muutu. Kasi yeendë we leesi nyitwaaku kuke ngangë-Nzaambi i kwindulë civakuli cinë Moyiizë kuloombë, mu kuleesi ke bakë booso ti njeeyi wabelukë#5.14 Lev 14.2-32.. » 15Mu bwaawu, saangu yi Yeesu yilutilooso kunyambë. Sinkoongë si baatu sisë dukënë mu kun'kuwu i mu kutambulë lubelukulu mu sincyeenzu syaawu. 16Kasi Yeesu wusë volikë mu ntaandu ciyumi kunë kulësambilë.

Yeesu wabelusi cikatë

(Mat 9.1-8; Mak 2.1-12)

17Cilumbu cin'viipë, Yeesu wulëloongaangë. Sifalisyaanu i miloonji n'kaakë bëba faanë. Baawu bëfuminë mu maalë mooso më Ngalilee i më Zudee i ku lweeku lu Yelusaleemë. Luleendo lu Fumu lwabë yimunë Yeesu i lwaawu lun'vangisi kubelusi bibeedo. 18Baatu bisë natë kuunë cikatë fë kwaalë. Baawu bëlëtoombaangë buni bu kukosilë cibeedo ku kati ku n'zo i kun'tuulë fë ntwaalë yi Yeesu. 19Akasi baawu bësye bakë ko faamë fë kukosilë cikatë cibilë ti nkoongë baatu. Mu lyalyooli, baawu bisë makë ku yilu n'zo i baawu bisë tobulë mwaanzë i bisë n'kululë yimunë nkwaalaandi fë ciyalëlë fë ntwaalë yi Yeesu. 20Bunë Yeesu kwamonë ciminu cyaawu, naandi wusë kaambë cibeedo : « A ndikwaami, njeeyi wabakë lobukulu lu mësumu maaku. » 21Miloonji n'kaakë i Sifalisyaanu bisë tubë : « Nani kukeeli muutu be wuuwu? Wun'safulë Nzaambi? Nani wum'podi kukobulilë mësumu? Kanuku wo Nzaambi vwiili#5.21 Lev 24.16. Twi 103.3; Ezy 43.25.! » 22Yeesu wusë kuzaabë simbalulu syaawu i wusë tubë : « Kwisilë bunye beeno mu kuba simbalulu osyo? 23Mbi bivyokili kuleengë, mu kutubë : “Njeeyi wabakë lobukulu lu mësumu”, voo mu kutubë : “Telëmë, lyaatë”? 24Kasi miinu yin'tiisi, beeno kulizaabë : Mwaanë Muutu wuke yi lutumu fë moongo butoto lu kukobulilë mësumu. » Mu lyalyooli, naandi wusë kaambë cikatë : « Nje yin'kaambë, telëmë, boongë nkwaalaaku i we vutukënë ku bwaalë bwaaku! » 25Mëlengë-lengë, muutu beenë wusë kutelëmë fë meeso më baatu booso. Naandi wusë boongë nkwaalaandi fanë kwabë kunukinë i wusë vutukënë ku n'zwaandi, yi ke dumisyaangë Nzaambi. 26Bakë booso bisë bwa libobo i bisë dumisi Nzaambi. Baawu bisë waalë yi boomë i bisë ke tubaangë : « Beeso twamonë bubwayi maambu mëtudë. »

Yeesu watelë Levi

(Mat 9.9-13; Mak 2.13-17)

27Ku mbusë mamoomo, Yeesu wubasikë i wumonë cinoongë mpaku, mu lizinë li Levi, wabë wukalë fo bën'futilaangë mpaku. Wusë n'kaambë : « Ndaandi. » 28Levi wusë telëmë, kubiikë byakë byooso i wusë n'laandë. 29Tee Levi, wusë vaangë cikaanvu ci kulya ku n'zwaandi. Mpaapë binoongë mpaku i baatu bën'ka babë yaawu fë meesë. 30Sifalisyaanu i miloonji n'kaakë babë yaawu cinguuku bëye bëdyeengaangë i bisë kufulë ke bilaanzi bi Yeesu : « Cibilë-mbici beeno lwakwambulilë i lwanwiinë yimunë binoongë mpaku i bisumuci#5.30 v. 29-30 i 15.1-2.? » 31Yeesu wusë vutulë : « Baatu bëke buvinyi bëkeeli ko n'ciinzë mu muutu wububukë, kasi bibeedo ba bëke n'ciinzë mu naandi. 32Miinu yisye kwisilë kuve mu kutelë bo bëyituunvi buzitu, kasi bisumuci bwiinji baawu bëvilukë. »

Liloonji li Yeesu mu linë lin'talë n'sweelë

(Mat 9.14-17; Mak 2.18-22)

33Sifalisyaanu bëkaambë Yeesu : « Bilaanzi bi Za, mpilë mweekë yi bo biitu, bën'kaangë n'sweelë ntaangu syooso i bën'kalilaangë mu n'saambu. Akasi bilaanzi byaaku, baawu kulya i kunwa. » 34Yeesu wusë bëvutulilë : « Beeno lum'podi kuvangisi bo batelu ku cikaanvu ci mëkweelë, kukaangë n'sweelë i kuba ti na n'nuni wuke yaawu fë cimweekë? 35Akasi bilumbu bin'kwiisë binë n'nuni wubëbotukilë, mu bilumbu be binë binaani, baawu bën'kaangë n'sweelë. »

36Yeesu wusë be bëteelë sasafë ayi : « Muutu ve wum'beenzë citeendë mu cinkutu cimoonë mu kuloondë cinkutu cikulu. Ningë muutu be siilë katiboobo, cinkutu cimoonë kubenzukë i citeendë ci cinkutu cimoonë kusiimbë ve mu cinkutu cikulu. 37Boobo, muutu ve yivaandi wun'sekulë mëlafu mëmoonë mu bidoyi bikulu, cinaanu ve mëlafu mëmoonë kuvangisi kwanzikë bidoyi i mëlafu kutyamukë i bidoyi kubulikë. 38Moniko, mëlafu mëmoonë, mëfwenikini kuba mu bidoyi bimoonë. 39Muutu ve wun'saafë kunwa mëlafu mëmoonë bunë kwamani kunwa mëkulu. Bën'tubë baati “Mëlafu mëkulu miinji lutwiingu.” »

Currently Selected:

Liikë 5: NTVIL

Highlight

Copy