Liikë 4

Luseengulu lu Yeesu

(Mat 4.1-11; Mak 1.12-13)

1Ntaangu Yeesu wubotukë ku mwiilë wu Yulëdaanu, naandi wusë waalë Ciluunzi ci Saantu i Ciluunzi cisë kun'natë ku ntaandu ciyumi. 2Fë mbusë mëkumë-na më bilumbu Dyaabu wusë kun'seengë. Naandi wusye lya cyosuku ko mu bilumbu be biinë i bunë byavyooci, naandi wabë yi nzalë. 3Fë mbusë, dyaabu wusë n'kaambë : « Mooti nje Mwaanë Nzaambi, kaambë limanyi ali licitukë limpa. » 4Yeesu wusë kuvutulë : « Libuungu li Nzaambi lin'tubë : “Muutu kusë n'zingilë tokë mu limpa ko.#4.4 Det 8.3.” »

5Dyaabu wusë n'natë ku yilu moongo i wusë n'leesi twaangu tooso tu buloongo, 6i wusë tubë : « Miinu yikuvaanë lutumu looso i businë bu buloongo abu: byakë byooso obyo bëkum'paanë byaawu i miinu yim'podi kuvaanë byaawu ke wosuku muutu yizolisi. 7Ningë ti njeeyi wukun'fukëminë, biimë byakë byooso bim'ba byaaku. » 8Yeesu wusë n'vutulilë : « Libuungu li Nzaambi lin'tubë : “Njeeyi wun'kuundë Fumu Nzaambyaaku i naandi too wufwenikini kusalilë#4.8 Det 6.13..” »

9Fë mbusë, dyaabu wusë natë Yeesu ku livulë li Yelusaleemë. Naandi wusë n'tuulë ku yilu n'zo-Nzaambi i wusë tubë : « Mooti nje Mwaanë Nzaambi, we cidëmë fë n'toto, 10cibilë ti busonëmë : “Nzaambi wun'tumë siyaanzi syaandi mu kukukeelë.” 11Yivaandi: “Baawu bëkukwaakë mu myookwaawu, mu kumaangë kuulu kwaaku kukubë tuuntu fë limanyi#4.11 v10-11; Twi 91.11-12..” » 12Yeesu wusë n'vutulilë : « Busonëmë : “Bilii, keelë wulëseengë Fumu Nzaambyaaku#4.12 Det 6.16..” » 13Bunë kwamani kuseengë Yeesu mu sinteku syakë syooso, Dyaabu wusë kwakënë yaandi i wusë ke yendaangë mu kuciingë vyaasi yin'ka.

Yeesu watoonë cisalu cyaandi ku Ngalilee

(Mat 4.12-17; Mak 1.14-15)

14Yeesu wusë vutukënë ku Ngalilee, wuwaalë mu luleendo lu Ciluunzi ci Saantu. Saangwaandi yinyambë bwendi libweeti lyooso li Ngalilee. 15Naandi wulë ke loongaangë mu bizutununu i bakë booso biye vaangaangë lunyemu lwaandi.

Yeesu bën'nyakunu ku Nazaleetë

(Mat 13.53-58; Mak 6.1-6)

16Yeesu wusë kweendë ku livulë li Nazaleetë kunë naandi kuyonzukulë. Cilumbu ci saba, naandi wukotë mu cizutununu bunë buba ciipë cyaandi. Naandi wutelëmë mu kutaangë maambu më Nzaambi 17i bisë n'tambikë libuuku li Ezayi m'bici lyabë liziingëmë. Kwazibuli Libuuku, naandi wusë monë lweeku lo bësonikë :

18« Ciluunzi ci Fumu cike mu miinu,

cibilë naandi wakun'soolë mu kunatë Mpolu Mboti kuke biyeembi.

Naandi wakun'filë mu kutendulë lobukulu mu banë bëke mu buloko,

i naandi likabu li lumonunu ke simpofo,

mu kuvaanë lusyalulu ke banë babë mu civikë,

19mu kutendulë n'vu wo Fumu kun'lesilë muulaandi#4.19 Ezy 61.1-2. »

20Oboobo, Yeesu wuziingë libuuku, i kulitambikë ke ciseelu i wusë kalë. Baatu bakë booso babë mu cizutununu bësitikë ntalwaawu mu naandi. 21Foofë, naandi wusë ba mu kubëkaambë : « Cibubwayi aci, maambu më Nzaambi lwakuwu ama mavangënë. » 22Bakë booso bëlëtubë cimbaanji mu Yeesu i bëbwa libobo mu mëbuungu mëboti manë kulë baasi. Baawu bëlëtubaangë : « Naandi kwe mwaanë Zozeefë? » 23Yeesu wusë bëvutulilë : « Mpakë ve! Mëlookë beeno syalukun'teelë nganë ayi : “A ngaangë, yibuuci njeveekë” mëlookë lukun'kaambë yivaandi ti : “Vaangë afa, mu livulë lyaaku, makë mooso bunë twakuwu, manë wuvangisi ku livulë li Kapelënawuumë.” » 24Naandi wusë be tubë : « Cyelikë yilukaambë, m'bici ve bën'tambulaangë buboti ku bwaalë bwaandi. 25Licyelikë yilukaambë, mpaapë bëfwiili bëyabë ku Islayeelë, mu ntaangu Eli, fanë liyilu liba likangëmë fë mivu tatu i singoondi samunu, i fanë cibuyi cinenë cisë batë si yooso#4.25 1 Mt 17.1.. 26Tiilyoko Nzaambi, wusye filë ko Eli ke wun'viipë mu nkoongaawu, kanuku ke n'fwiili wu musë Salëpeeta, mu libweeti li Sidoonë#4.26 1 Mt 17.8-16.. 27Faanë fabë yivaandi mpaapë bangë bwaasi mu Islayeelë, mu ntaangu Elizee m'bici. Akasi, wun'viipë too wubelukë, kanuku wo Namaanë musë Sili#4.27 2 Mt 5.1-14. . »

28Bakë booso, bëwaalë likaanzi mu cizutununu, abu bayuwu bikumë obyo. 29Bamani n'telë, baawu kusiimbë li kukulë Yeesu i kum'baasi ku ngaandë, kun'natë fë songë-songë cimongo-mongo kunë baawu bëtungilë livulë lyaawu li Nazaleetë, bwiinji bën'sindikilë kusi. 30Kasi naandi wuvyokilë fë meeyaawu i wusë ke yendaangë.

Muutu wukwamusu ke ciluunzi cibi

(Mak 1.21-28)

31Yeesu wuyendë ku Kapelënawuumë, ku livulë li Ngalilee, i naandi wululoongaangë bakë booso cilumbu ci saba. 32Baatu bëtulumukë mu sindoongulu syaandi, cibilë naandi wulëtubilaangë yimunë lutumu looso. 33Munë cizutununu, mwabë muutu wukwamusu ke ciluunzi cibi i wulë losukaangë mu mbeembu nkamu : 34« Ee ngete! Nje mbi wun'toombë mu beeso, Yeesu li Nazaleetë, nje wakwiisë mu kutunyambëkënye? Miinu yizabisi ti : njeeyi Saantu wo Nzaambi kufilë! » 35Yeesu wusë kubaminë ciluunzi cibi yin'kasu yooso i kun'kaambë : « Kalë swii i we basikë mu muutu owo. » Ciluunzi cibi cisë lumbikë muutu beenë fësi i cisë basikë mu naandi i kun'vaangë ve yosuku mpasi. 36Bakë booso kubwa libobo i ke tubësënaangë baveekë i baveekë : « Mpilë mbici libuungu olyoo? Muutu owo wun'tumi yi lutumu i luleendo biluunzi bibi i byaawu kubasikë! » 37Saangwaandi kunyambë bwendi libweeti lyooso.

Yeesu wabelusi mpaapë bibeedo

(Mat 8.14-17; Mak 1.29-34)

38Abu kwabasikë ku cizutununu, Yeesu kwe kotë ku n'zo Simu. Kosuku, n'kwekisi Simu wabë yi libaawu linenë. Baawu kubondililë Yeesu mu kuvaangë lin'viipë mu naandi. 39Naandi wubutëmë i wutundilë yin'kasu libaawu i libaawu lisë kum'biikë, naandyooso kusundilë kutelëmë i wusë kubësalilë.

40Fë mësindulu më ntaangu#4.40 Mak 1.32., babooso babë yi bibeedo bi mpilë yi mpilë yaandi bisë bëtwaalë kuke Yeesu. Naandi wutendikë myooko ke wumweekë-wumweekë mu baawu i wububelusi. 41Biluunzi bibi yivaawu bisë basikë mu mpaapë baatu bwendi ke losukaangë i ke tubaangë ti : « Njeeyi wuli Mwaanë Nzaambi. » Kasi naandi wulë ke bëtundilaangë i ke bëfuungaangë mu kutubë, cibilë baawu bëlëzaabaangë ti naandi Kliistu kukeeli.

Yeesu wulë mu kuloongë mu bizutununu

(Mak 1.35-39)

42Bunë bwiisi bwacya, Yeesu kubasikë, ke yendaangë ku mpeengë. Nkoongë baatu yiyen'cyeengaangë i yisë ke tuukë fanë kwabë. Baawu bën'vwa n'ciinzë mu kun'simbililë mu kumaangë naandi kubëbiikë. 43Akasi naandi wusë bëkaambë : « Miinu yifwenikini kutendulë ke bëmesë Mpolu Mboti yi Lwaangu lu Nzaambi, mu mëvulë mën'ka yivaandi, cibilë mu lyaawu Nzaambi wukun'filë. » 44Naandi wulë ke loongaangë mu bizutununu bi Zudee.

Currently Selected:

Liikë 4: NTVIL

Highlight

Copy