Liikë 23

Yeesu fë ntwaalë Pilaatë

(Mat 27.1-2,11-14; Mak 15.1-5; Za 18.28-38)

1Baatu bakë booso bisë telëmë i bisë natë Yeesu fë ntwaalë Pilaatë. 2Faawu, baawu bisë ba mu kun'fuundë mu ke tubaangë: « Beeso twake zakënë muutu awu wulë mu kunyambëkënë baatu biitu. Naandi wulë mu kubëkaambë bëleembu kufutë mpaku n'tinu Sezaalë i naveekë ke tubaangë ti naandi wuli Kliistu n'tinu. » 3Pilaatë wusë kufulë Yeesu : « Njeeyi n'tinu Sizwiifë? » Yeesu wusë n'vutulilë : « Njeeyi walitubë#23.3 Mat 27.11.. » 4Mu bwaawu, Pilaatë wusë kaambë bëkuluutu bë singangë-Nzaambi i mu nkoongë : « Miinu yisë m'monë ko lyaambu lyo muutu awu wufwenikini kubakilë lutabu. » 5Kasi baawu bisë kutubooso yimunë mëngolo mooso : « Naandi wulë mu kusindikilë mboongo baatu mu mbungë-ntwaali mu sinunwaandi. Naandi wutoninë ku Ngalilee, mu kuvyokilë ku livulë lyooso li Zudee, i ci buyifanwabu, naandi wakwisë tee afa. »

Yeesu fë ntwaalë Eloodë

6Bunë Pilaatë kwayuwu bikumë obyo, naandi wusë kufulë: « Muutu be woowo musë Ngalilee? » 7Bunë kwayuwu ti Yeesu wabë wufuminë ku libweeti lilë tumi Eloodë, naandi wusë filë Yeesu kuke Eloodë, cibilë naandi wabë ku Yelusaleemë mu bilumbu be binë binaani. 8Eloodë wusë ba beenë mu nyeenzi, bunë kwamoni Yeesu. Oboobo, naandi wusë kuwu saangwaandi i yoonoobo wulëtiisyaangë kum'monë#23.8 9.9.. Naandi wabë civuufu mu kum'monë kun'vaangë ciliimbu ci kwaatë-yekë. 9Eloodë wusë kufulë Yeesu mpaapë byuufu, kasi Yeesu sye n'vutulilë mbeembu ko. 10Bëkuluutu bë singangë-Nzaambi i miloonji n'kaakë babë kuunë. Baawu bëlëfuundë Yeesu yi butuutë booso. 11Eloodë i mësodaadi maandi bisë n'dyeengë i bisë m'baayi. Baawu bisë n'vwiikë cinkutu ciboti, i bisë n'vutulë ke Pilaatë. 12Eloodë i Pilaatë babë si Beeni. Kasi mu cilumbu be ciinë bisë ba sindiku.

Yeesu ban'tabë lufwa

(Mat 27.15-26; Mak 15.6-15; Za 18.39—19.16)

13Pilaatë wukutikë bëkuluutu bë singangë-Nzaambi, sifumu si Sizwiifë, i baatu bakë booso. 14Naandi wusë bëkaambë : « Beeno lwakun'natinë muutu awu mu kutubë ti naandi wulë mu kunyambëkini nkoongë baatu. Mu lyaawu, miinu yan'kufulë fë ntwaaliinu i miinu sye monë ko lyosuku libi mu linë beeno lulë mu kun'fundilë. 15Eloodë yivaandi wusye monë ko lyaambu libi li kun'tabulilë lufwa, cibilë naandi wun'vutulë ke beeso. Oboobo, muutu awu wusye vaangë lyaambu libi ko mu linë li kun'vangisi kufwa. 16Mu lyalyooli, miinu yake n'vaanë kun'vangisi kubulu sikoti i miinu yikum'biikë. » 17Mu kadi n'saangu Paakë, Pilaatë wulëbëyobulilë muutu mweekë mu buloko#23.17 Mat 27.15; Mak 15.6.. 18Kasi baatu bakë booso bisë losukë fë cimweekë : « Voondë muutu owo! Tuyobulili Balabaasë. » 19– Bëtuulë Balabaasë mu buloko cibilë ci mbungë-ntwaali yivangininë ku livulë i fanë muutu wufwa. – 20Bunë Pilaatë kulë tiisi kobulë Yeesu, naandi wusë be bëkaambooso. 21Kasi nkoongë yooso yisë n'losukë: « M'baandë fë kuluusu, m'baandë fë kuluusu! » 22Pilaatë wusë be bëkufulooso fë vyaasi yin'tatu: « Lyaambu mbici libi naandi kwavaangë? Miinu yisye monë ko mu naandi sintoondo si kun'tabulilë lufwa. Oboobo, miinu yake n'vangisi kubulu sikoti i miinu yikum'biikë. » 23Kasi baawu bisë landilooso kulosukë ti, bëbaandë Yeesu fë kuluusu. Baawu bisë luungë mu biloolë byaawu. 24Pilaatë wusë boongë lukanyu mu kuvaangë linë bëlëtoombë. 25Naandi wusë bëbasilë muutu wunë bëlëtoombë, wunë bëtuulë mu buloko mu mbungë-ntwaali i fanë muutu wufwa, i kubelëkulilë Yeesu bwiinji bëvaangë manë bëzolisi.

Yeesu wabaandu fë kuluusu

(Mat 27.32-44; Mak 15.21-32; Za 19.17-27)

26Bunë mësodaadi bëlënatë Yeesu, baawu bisë dyengënë Simu, musë livulë li Sileenë, wunë wufuminë ku sisolë. Baawu bisë tuulë kuluusu yi Yeesu fë mëvangëti maandi bwiinji kuyinatë fë ciikë ci Yeesu. 27Nkoongë nenë yi baatu yisë ke n'laandaangë, boobo, bëcyeetu bëlëlilaangë i bisë ba mu miluunji mu cibilë cyaandi. 28Yeesu wusë balukë kuke baawu, i wusë tubë : « A bëcyeetu bë Yelusaleemë, biikaanu kulilë mu cibilë cyaami! Kasi lilaanu mu cibilë ciinu benuveekë yi mu cibilë ci baanë biinu. 29Cibilë ti ntaangu yabelëmë yinë bën'tubë : “Nyeenzi mu banë bën'kaambu kubutë, banë bëbuunu vyaasi kubutë i banë bëbuunu vyaasi kwemikë!” 30Oboobo, baatu bën'kaambë myoongo : “Lwe bwiilyaanu fë yilwiitu!” Bi moongo-moongo : “Tusweecyaanu#23.30 Ose 10.8.!” 31Kasi, ningë boobo bësiilë mu n'ti wumbisu, buni bëm'beelë mu n'ti wuyumë? »

32Bisë twaalë yivaandi bivadë-mbi byooli mu kubëvoondë fë cimweekë yimunë Yeesu. 33Ntaangu baawu bisë ke tuukë fë mbiinji bën'telaangë « Lidokusu li N'tu », mësodaadi bisë mbaandë Yeesu i bivadë-mbi#23.33 Ezy 53.12. bi byooli fë sikuluusu, wumweekë ku mëbakëlë maandi i wumesë ku mëcyeetu maandi. 34Yeesu wusë tubë : « Ata, bëlen'vukilë, cibilë bësye zaabë ko manë bëlë mu kuvaangë. » Mësodaadi bisë kabënë baveekë yi baveekë n'vwaatwaandi mu kubulë njekë#23.34 Twi 22.19.. 35Mboongu baatu yabë faanë i yilë talaangë. Sifumu si Sizwiifë bëlë sefaangë#23.35 Twi 22.8-9. i bisë tubë : « Naandi wuvuuci baatu bën'ka. Kwe yivuuci naveekë, ningë naandi wulë Kliistu, wunë Nzaambi kusoolë! » 36Mësodaadi yivaandi bisë kun'sefë. Baawu bisë kwesënë fëke naandi, bisë n'natinë mëlafu më nkakutu#23.36 Twi 69.22. 37i bisë tubë : « Ningë ti njeeyi wuli n'tinu Sizwiifë, we yivuucyoobo njeveekë! » 38Fë yilu kuluusu yi Yeesu, bëtuulë libayi bësonikë : « Awuuwu: N'tinu Sizwiifë. »

39Wumweekë mu bivadë-mbi bi byooli bëbaandë fë kuluusu wusë fiingë Yeesu : « Njeeyi kwe Kliistu? We yivuucyoobo njeveekë, yimunë beeso yivaandi! » 40Kasi wayaandi wusë kun'seembë i wusë kun'kaambë : « Njeeyi wukeeli yi sisu mu Nzaambi kwe, njeeyi wuke mu lufundusu bo buke naandi? 41Mëseembu miitu mëbëfwaanë, cibilë ti beeso twatambulë mëseembu mu mëvaangë miitu mëbi. Kasi naandi wusye vaangë lyosuku libi ko. » 42Mu lyalyooli, naandi wusë be tubë : « A Yeesu, ntebukilë moonyi ntaangu wun'kwisilë ku lwaangu lwaaku. » 43Yeesu wusë vutulë : « Licyelikë, yilë mu kukukaambë : bubwayi njeeyi wum'ba yaami ku paladi. »

Lufwa lu Yeesu

(Mat 27.45-56; Mak 15.33-41; Za 19.28-30)

44-45Yabë fë ntaangu-mbatë bunë muunyi wuleembu kulesikë: citoombi cisë batë si yakë yooso, i cisë ziingë tee fë zoolë yi n'tatu yi m'bukulu-bwiisi. N'lelë wabë mu kati ku n'zo-Nzaambi#23.44-45 Lub 26.31-33. , wusë bën'zikë fë meeyi. 46Yeesu wusë losukë mu mbeembu nkamu: « Ata, miinu yalekulë ciluunzi cyaami mu myookwaaku. »#23.46 Twi 31.6. Bunë kwamani kutubë obo, naandi wusë fwa. 47N'kuluutu-mësodaadi më Loomë bunë kwamoni manë mëvangënë. Naandi wudumisi Nzaambi i kutubë : « Licyelikë, muutu awu wusulëmë! » 48Nkoongë yooso yiyisë kuunë, yisë monë maambu manë mëvangënë. Fë mbusë bisë vutukë mu sinzo syaawu i bisë ke bulaangë fë n'timë yi cyuundë. 49Sindiku syooso si Yeesu, i bëcyeetu bëlë ke n'vekisyaangë kutoonë ku Ngalilee, babë bëtelëmë fë mwa n'takë#23.49 Twi 38.12. mu kumonë maambu buni mëlëvyokilë.

Nyitu Yeesu bëtuulë mu buumbë

(Mat 27.57-61; Mak 15.42-47; Za 19.38-42)

50-51Wabë libakëlë nkuumbu Zozeefë. Naandi wabë musë Alimaatë#23.50-51 Mat 27.57., livulë li Sizwiifë, i naandi wabë muutu wumboti i wusulëmë, i wabë civuufu mu yin'sulu lu Lwaangu lu Nzaambi. Naandi wabë mu cinzonzi ci Sizwiifë, kasi wusye vitikë kuve mpangulu yinë bayaandi bëzitikë kuvaangë. 52Naandi wusë ke monë Pilaatë i wusë n'loombë nyitu Yeesu. 53Naandi wusë kululë nyitu fë kuluusu, wusë ziingë yaawu mu lilasolë li liinë i wusë yituulë mu buumbë linë bësikë mu limanyi li ngooto, libuumbë linë lyabë vyaasi kutuulë vuumbi mwaawu. 54Cyabë cilumbu ci cin'taanu i n'saangu wu saba wusë belëmë. 55Bëcyeetu bëlë ke laandaangë Yeesu kutatikilë ku Ngalilee bisë kweendë yi Zozeefë. Baawu bisë monë libuumbë i bisë monë buni bëtuulë nyitu Yeesu. 56Fë mbusë, baawu bisë vutukë ku livulë i bisë belikë mëfutë i siyaafi mu cibilë ci nyitu Yeesu. Mu cilumbu ci saba, baawu bisë vuundë, bunë bun'lombilë n'kaakë#23.56 mëfutë i yaafë: Mak 14.8. Bunë n'kaakë wulëloombilë: Lub 20.10; Det 5.14. .

Currently Selected:

Liikë 23: NTVIL

Highlight

Copy