Liikë 21

Likabu lyakwindulë n'fwiili ciyeembi

(Mak 12.41-44)

1Yeesu bunë kwavumbuli ntalu i wusë monë bisinë bëlëtuulaangë mëkabu maawu mu sinkonunu si mëkabu mu n'zo-Nzaambi. 2Na wusë monë yivaandi n'fwiili wu n'cyeetu wu ciyeembi, wulutuulë mwa binkongulu byooli bi mboongo#21.2 Mak 12.42.. 3Na Yeesu kutubë : « Licyelikë yilukaambë, ciyeembi ci n'fwiili aci na mwiinji kuvaanë likabu livyokili bakë booso. 4Cibilë, bakë booso bisë vaanë mëkabu më mboongo mëkambusu n'ciinzë, kasi n'fwiili mu buyeembi bwaandi, wakwindulë byakë byooso kubakë mu kuvwiilë moonyi. »

Yeesu wazabikini luvongumunu lu n'zo-Nzaambi

(Mat 24.1-2; Mak 13.1-2)

5Mwa nkoongë baatu bëlëtubilaangë mu cibilë ci n'zo-Nzaambi i bisë tubë : yaawu yabë yimboti yilumanikë i mëmanyi maandi mëboti i biimë bëkwindulë mu Nzaambi. Kasi Yeesu wusë tubë : 6« Bilumbu bin'kwiisë, kusë yin'syaalë ko limanyi lin'tetëmë fë yilu lin'ka. Makë mooso mëm'bulumukë. »

Mënyonyi i simpekaadu

(Mat 24.3-14; Mak 13.3-13)

7Baawu bisë n'yufulë : « A Fumu, ntaangu mbici mamoomo mën'kwisilë? Mu ciliimbu mbici tun'zabilë mamoomo mëvangininë? » 8Yeesu wusë vutulë : « Keelaanu lulëpuutu. Cibilë mpaapë baatu bën'kwisilë mu lizinë lyaami i bën'tubë ti : Miinu yilë Kliistu, i ntaangu yakutuukë, kasi lubëlaandyaanu ko. 9Bunë beeno lun'kuwu mëvitë i mbungë-ntwaali, lumonyaanu boomë ko. Mamoomo mëfwenikini kutekë kwiisë, kasi lisë m'ba buyifanu ko lumanunu lu buloongo. » 10Oboobo, naandi wusë bëkaambë : « Mëloongo mën'nwanisi mëloongo mën'ka i lwaangu lun'zudikini lwaangu lun'ka. 11Fëm'ba tututumuku tu kwaatë-yekë tu n'toto i mu mbiinji yivyakënë, bivuungë i bibuyi. Fëm'ba yivaandi binganzikë bi kwaatë-yekë i biliimbu binenë bin'fuminë ku yilu. 12Kasi ntetë makë mooso omo kuvangënë, bëlubwiilë, bëlunyokulu, bëluvakulë mu bizutununu mu kulufundisi i bëlutuulë mu buloko. Bëlunatë fë ntwaalë mitinu i fë ntwaalë mikwa-lwaangu mu cibilë cyaami. 13Mamoomë mëm'ba bumbaanji mu beeno mu cibilë cyaami. 14Keelaanu kuba mu lusweenu mu manë lufwenikini kutubë mu kunwaninë cikaangë. 15Minuveekë, yiluvaanë bikumë i bungelë bun'vangisi ti yosuku mbeeniinu kupodi ve kutunzukënë kaambofo kufindënë yaawu mpakë. 16Beeno lun'vakulu ke mëtaatë miinu i si mamë siinu, baanë yiinu bë nguli bë bëbakëlë, mëbaambë miinu i sindiku siinu. Bën'vangisi kutabë lufwa mpaapë mu nkoongiinu. 17Bakë booso bëluleendë mu cibilë cyaami. 18Kasi n'leenji ve wumweekë wum'botukë mu n'twiinu. 19Tatëminaanu buboti : mu bwaawu beeno lun'vucilë tuziingu twiinu. »

Yeesu wazabikini luvongumunu lu Yelusaleemë

(Mat 24.15-21; Mak 13.14-19)

20« Bunë lum'monë Yelusaleemë kuzuku ke nkoongë mësodaadi, oboobo bwa lun'zabilë ti yaawu yabelëmë kuvongumukë. 21Mu lyaawu, banë bëm'ba ku Zudee bëfwenikini kutiinë mu myoongo. Banë bëm'ba fë meeyi Yelusaleemë bëbasikë i bo bëm'ba mu sisolë bëleembu kukotë ku livulë. 22Cibilë fëm'ba bilumbu bi lufundusu, fanë fëvangininë makë mooso bunë mësonëminë#21.22 Ose 9.7.. 23A mënyonyee, mu bilumbu be binë binanaani, mu bëcyeetu bëm'ba mu bweembë i bo bëm'ba mu kwemikë! Cibilë cyuundë cinenë cim'ba mu si i likaanzi li Nzaambi lim'monikë mu mboongu be yooyi. 24Baawu bën'fwiilë mu cisabë, bëbënatë mu buvikë mu nkoongë mëloongo makë mooso i banë bëkaambu kuta maanë bën'lyatilë Yelusaleemë, tee ntaangu yo bëbëvaanë yim'maninë. »

Nyisulu yi Mwaanë muutu

(Mat 24.29-31; Mak 13.24-27)

25« Biliimbu bim'monikë mu muunyi, mu ngoondi i mu simbotë#21.25 Ezy 13.10; Ezk 32.7; Zow 3.3-4. . Fë mbatë n'toto, mëloongo mëm'ba mu kwaatë-bamë, bëm'ba mu kunyoongë buni bukusiilë mu biyoko bi m'bu i bi mëyo. 26Baatu bën'fwa mu boomë mu ke balaangë mu manë mën'vangënë fë butoto, cibilë luleendo lu mëyilu lun'tutumukë. 27Foofo, bëm'monë Mwaanë muutu kwisilë fë meeyi livweeti, yimunë mpaapë luleendo i bumpumu#21.27 Dan 7.13.. 28Ntaangu makë mooso omo mën'toninë kuvangënë, lwe telëmaanu i vumbulaanu mboku, cibilë luvukulu lwiinu lwakë bëlë. »

Nsinunu yi n'ngeengë

(Mat 24.32-35; Mak 13.28-31)

29Yeesu wusë bëkaambë sasafë ayi, « Talaanu n'ngengë i miti yooso yin'ka : 30Bunë lumonë mëkayë matoonë kumenë, beeno lun'zaabë ti ntaangu minokë yabelëmë. 31Mpilë mweekë, bunë lum'monë maambu be moomo kuvangënë, lwe zaabyaanu ti Lwaangu lu Nzaambi lwakë bëlë. 32Licyelikë, miinu yilukaambë : baatu bëlë mu kuziingë sintaangu asi bë kusë yifwiilë ko ntetë mamoomë kuvangënë. 33Li yilu i n'toto bin'vyookë, akasi mëbuungu maami misë n'vyookë ko. »

N'ciinzë wukuzungululë

34« Lwe kebaanu! Nubicyaanu ko mitimiinu kukalilë mu civikë ci misaangu yi kukolë mëlafu, i mu tusweenu tu luziingu be luulu i cilumbu ci Lufundusu kulëzimbukulë, 35dedë mweekë n'taambu. Cibilë cyaawu cim'bwiilë baatu bakë booso bëke fë moongu butoto. 36Zungululaanu i sambilaanu mu ntaangu syooso. Oboobo beeno lum'bakë mëngolo mu kuciindë mu makë mooso mëlëmëkwiisë i beeno kupodi kutelëmë fë nduunzi Mwaanë muutu. »

37Fë bwiisi-bucya, Yeesu wulëloongaangë mu n'zo-Nzaambi. Kasi yi mësikë, naandi wulëvyosilaangë bwiilu ku yilu cimongo-mongo bën'teelë limoongo li miti Oliivë. 38I baatu bakë booso bilëkwisaangë ku n'zo-Nzaambi mu menë-ngwaali mu kun'yuwu.

Currently Selected:

Liikë 21: NTVIL

Highlight

Copy