Liikë 11

Yeesu i n'saambu

(Mat 6.9-13; 7.7-11)

1Cilumbu cimweekë Yeesu wulë sambilaangë fë mwa mbiinji. Bunë kwamani, wumweekë mu bilaanzi byaandi wusë n'kaambë : « A Fumu, tuleesi buni bukusambilë bo Za kusinë bilaanzi byaandi. » 2Yeesu wusë bëkaambë : « Mooti lwake n'sambilë, kutubaangë :

“Ata!

Lizinë lyaaku lye ba saantu.

Lwaangu lwaaku lwiisë,

3Tuvaanë buyifanwabu limpa liitu li cyosuku cilumbu!

4Tulenvukilë mësumu miitu,

cibilë tun'lenvukilaangë banë bëtuvaangaangë simbi

tulekuli ko mu lusengulu.” »

5Yeesu wusë be bëkaambë : « Mooti lyaliili: nani mu nkoongiinu, wuke yi ndiku wuken'zakënë ku bwaalë bwaandi fë katyaasi ku bwiilu yikun'kaambë : “A mwa, ndefisi mëmpa më tatu. 6Cibilë ndikwaami mweekë wafuminë mu mweendo wakusundilë ke miinu i yikeeli ko yi cyosuku ciimë cikun'vaanë.” 7Mooti ndiku be yooyi wukun'vutulilë ku kati ku n'zo: “Mbiici n'sikë! Twayikangilë livitu mu sabi, Miinu i baanë baami tweekë fë ciikë. Miinu yisë be podi ko kube telëmë mu kukuvaanë mëmpa.” 8Cyelikë, yilusisiminë, mooti naandi kusë n'telëmë ko mu bundiku bwiinji wun'vaanë, naandi wun'telëmë kwaandi mu kun'vaanë byosuku kun'vwa n'ciinzë cibilë wayaandi ke mu kutatëminë kukaambu sonyi. 9Miinu yilukaambë : loombaanu i lun'tambulë. Toombaanu i lum'bakë. Dodumunaanu i bëluzibulilë. 10Cibilë, wosuku wun'loombë, wun'tambulë. Wunë wun'toombë wum'bakë i bën'zimbulilë livitu ke awu wun'dodumunë. 11Taatë mbici mu nkoongiinu, wum'podi kuvaanë mwanaandi nyokë wunë wukun'loombë mbisi#11.11 Mat 7.9.? 12Kaambofo, mooti wun'loombisi lyaci, naandi kun'tambikë cineengë#11.12 10.19.? 13Oboobo, mooti beeno ludiifë n'timë luzabisi kuvaanë baanë biinu biimë biboti. Kwisilë buni, Tatiinu wuke ku yilu wun'kaambu kuvaanë Ciluunzi ci Saantu ke banë bëkun'loombë! »

Yeesu wavutulilë mbeembu mu lyaambu bën'fwitikilë

(Mat 12.22-30; Mak 3.22-27)

14Cilumbu cimweekë, Yeesu wulë kumbisi ciluunzi cibi cilë vangisyaangë libakëlë lin'viipë kuba bubabë. Bunë ciluunzi cibi cyabasikë, libakëlë lisë ba mu kutubë. Munë nkoongë, baatu bisë kubwa libobo. 15Kasi, bën'viipë bisë tubë : « Mati mu lutumu lu Belëzebuulë#11.15 Mat 10.25., n'kuluutu biluunzi bibi, mwaawu kulë mu kukulilë biluunzi bibi. » 16Bën'ka, mu kun'sokë libuungu, baawu bisë n'loombë ciliimbu ci kwaatë-yekë cin'leesi ti naandi wufuminë ke Nzaambi. 17Kasi Yeesu wulëzaabaangë simbalulu syaawu. Naandi wusë bëkaambë : « Losuku Lwaangu lunë lukabësënë yi lwaveekë lun'cyamukë, sinzo sim'bulumukë sin'ka fë yilu sinzo simesë. 18Mooti Satënë wulë mu kuyinwanisi naveekë yi naveekë, lwaangu lwaandi kuzingilë bunye? Abu lun'tubë ti, miinu yin'kulilë biluunzi bibi mu lutumu lo lulë mu kum'paanë Belëzebuulë. 19Ningë ti miinu yibëkulilaangë mu nteku be yiiyi, nani wun'vaanë ke baatu biinu lutumu lukubëkulile? Baatu biinu baveekë bën'leesyaangë ti beeno luziimbu. 20Licyelikë yilukaambë, kanuku mu luleendo lu Nzaambi#11.20 Lub 8.15. mwaawu miinu yin'kulilaangë biluunzi bibi, bwaawu Lwaangu lu Nzaambi lwakutuukë tee ke beeno. »

21« Mooti muutu wuwaalë n'viingu wun'luundë n'zwaandi, businë bwaandi booso buke mu luswamunu lumboti. 22Kasi mooti muutu wukun'vyokilili mëngolo wakun'yisilë i kun'lungilë mpakë, naandi wukun'vokënë binwanunu kube siilaangë lufyaatu, i naandi wun'kabulë byakë byooso binë kwaboongë. »

23« Wunë wukeeli yi miinu ko mbeenyaami. Wunë wun'kaambu kun'zudi mu lubundunu wun'nyambëkënë. »

Luvutukunu lu ciluunzi cibi

(Mat 12.43-45)

24« Mooti ciluunzi cibi cyabasikë mu muutu, cyaawu kutaabë bwendi simbiinji siyumë, kutoombë faamë kufwenikini kuvundilë. Abu kun'kaambu kubakë fanë fë kukalilë, naandi yekë kutubë : “Miinu yake n'vutukënë mu n'zwaami yo yibiikë.” 25Naandi wun'vutukënë i kuyizakënë ba yikombulë i bayilulikë. 26Mu lyalyooli naandi wun'kwendë ke boongë saambwali lyooso lin'ka li biluunzi bivyokilili naandi bubaalu. Baawu kuvutukënë mu n'zo i kukalë mwaawu. Fa foofë, simpasi si muutu be woowo kulutilooso yi sinë syabë yaandi ntetë. »

Nyeenzi yi cyelikë

27Fo Yeesu kulëtubilë katyoobo, n'cyeetu mweekë mu nkoongë wusë bulë mbeembu i kutubë : « Nyeenzyaandi oyo, n'cyeetu wukunatë mu cibutulu cyaandi i wukuyemikë! » 28Kasi Yeesu wusë kuvutulë : « Nyeenzi yiveko ke aba bën'kuwu libuungu li Nzaambi i bëlisalilë! »

Lulombulu lu ciliimbu ci kwaatë-yekë

(Mat 12.38-42)

29Bunë mboongo baatu yiyikukumë fëke Yeesu, naandi wusë tubë : « Baatu bë bubwayi aci, baatu bëbi. Baawu bën'toombë ciliimbu ci kwaatë-yekë, kasi ciliimbu ve cibëveewu kanuku cyo ci Zonaasë. 30Cibilë, bo bumweekë Zonaasë wabë ciliimbu mu basë Niniivë#11.30 Zonaasë (v.29 i 30) : Za 3.3-5. Niniivë: Mat 12.41., bo bwaawu Mwaanë Muutu wum'beelë yivaandi ciliimbu mu mboongo yi bubwayi. 31Mu cilumbu ci Lufundusu, N'kamë-lwaangu#11.31 N'kamë-lwaangu, N'tinu wu n'cyeetu wu Waandë wun'telëmë fë ntwaalë baatu bu bubwayi, i wubëfundisi, cibilë naandi wufuminë ku mëbweeti më cinaanu më n'toto mu kuwu, mëbuungu mëwaalë bungelë bu Salomoonë. Afaafa, wukeeli muutu wuvyokilë Salomoonë ko. 32Mu cilumbu ci Lufundusu, basë Niniivë bën'telëmë fë ntwaalë baatu bë bubwayi i bëbëfuundë, cibilë basë Niniivë bëm'balulë mëvaangë maawu bunë bayuwu ndongulu Zonaasë#11.32 Zon 3.5,8,10.. Kasi, afa fëke muutu wuvyokili Zonaasë! »

Cyeseesë ci nyitu

(Mat 5.15; 6.22-23)

33« Muutu ve wun'tatikë mwiindë mu kuwusweekë kaambofo mu kuwutuulë kusi cipaanë#11.33 Mat 5.15; Mak 4.21., tilyooko kuwutuulë fë yilu cicyetukulu bwiinji banë bën'kotë bëmonë cyeseesë. 34Meeso maaku mëke mwiindë wu nyitwaaku: ningë ti meeso maaku mëke mëboti, nyitwaaku yooso yike mu cyeseesë. Kasi ningë ti meeso maaku mëfwa, oboobo nyitwaaku yike mu citoombi. 35Bwaawu, keelë cyeseesë cike mu njeeyi cileembu kuba citoombi. 36Mooti nyitwaaku yooso yike mu cyeseesë, cinamë ve cim'ba mu citoombi, yakë yooso yim'ba yin'waalë cyeseesë, dedë mweekë mwiindë wuvaanë n'nyani mu cyeseesë cyaandi. »

Yeesu wakë n'fuundë Sifalisyaanu i miloonji n'kaakë

(Mat 23.1-36; Mak 12.38-40)

37Bunë Yeesu kwamani kutubë, Falisyaanu mweekë wusë n'telë mu kwambulë ku bwaalë bwaandi. Yeesu wusë kotë i wusë sungëmë fë meesë. 38Falisyaanu wusë tulumukë bunë kwamoni ti Yeesu wusye sukulë ntetë myooko ko mu kwambulë. 39Fumu wusë, n'kaambë : « Tala buni beeno lukelili, beeno Sifalisyaanu : beeno lun'cyeesyaangë Li ngaandë li mbuungu i li lubuci, kasi likati, beeno luwaalë bideenzë bi bwiifi i mpaapë bubaalu. 40Beeno biyimbu lukeeli! Nzaambi wuvaangë Li ngaandë, naandi sye vaangë yivaandi likati kwe? 41Vaanaanu obyo bike mu simbuungu i tubuci ke biyeembi, i makë mooso mëm'ba mëlyoomë mu beeno. »

42« Lusifu lwiinu olo, beeno Sifalisyaanu! Cibilë lun'vanaangë cikuuku cimweekë ci kuumi mu bikunë biinu, dedë mweekë mëvuvumbë i lantëna, yimunë yivaandi simpilë syakë syooso si mimpoku#11.42 Lev 27.30; Det 14.22., kasi lusë n'lengilë moonyi ko nduunji i luzolo mu Nzaambi. Nkanë maambu be moomo maawu lufwenikini kusalilë i kuzimbëkënë ve mën'ka. »

43« Lusifu lwiinu olo, beeno Sifalisyaanu! Cibilë beeno kuzolë biikë bi ntwaalë mu bizutununu i beeno kuzolë ke bilwaangë sibweekë si luciinzu fë ciyalëlë. 44Lusifu mu beeno! Cibilë beeno luke dedë mweekë mëbuumbë bën'kaambu kumonë i fo baatu bën'lyatilaangë i kuzaabë ve. »

45N'loonji n'kaakë wumweekë wusë n'kaambë : « A Fumu, njeeyi bo wuke mu kutubilë kati obo, mati beeso wulë mu kufiingë! » 46Yeesu wusë n'vutulilë : « Lusifu lwiinu yivaandi miloonji n'kaakë! Beeno lun'tukisyaangë baatu mifunë yike beenë simpasi mu kunatë, i beeno lusë n'nikunaangë kuve keti luzalë mu kubëzudi mu kunatë bifunaawu. 47Lusifu mu beeno! Beeno lun'tuungaangë mëbuumbë mëboti më mibici, mibici yo sinkaakë siinu bëvoondë! 48Bwaawu, beeno lun'leesi ti lwavitikë mëvaangë më sinkaakë siinu, cibilë baawu bëvoondë mibici, i beeno, lulë mu kutuungë mëbuumbë maawu. 49Mu lyaawu Nzaambi, mu bungelë bwaandi wusë tubë : “Miinu mba yibëfilë mibici yimunë mimbunzi. Baawu bën'voondë bën'viipë fë meeyi yaawu i bën'nyokulë bën'ka.” » 50Mu lyalyooli, baatu bë bubwayi, bën'cikunë mëseembu mu mibici bëvoondë kutoonë fanë fëvangininë buloongo. 51Kutatikilë fë lufwa lu Abeelë tee lu Zakaali, awu bëvoondë fë meeyi civakululu#11.51 Ntn 4.8; 2 Lu 24.20-22. i n'zo-Nzaambi. Cyelikë miinu yilusisiminë, baatu bë bubwayi bën'cikunë mëseembu më tufwa be tooto!

52« Lusifu mu beeno, miloonji n'kaakë! Beeno lwam'boongë sabi yiluvaanë likanë li kuzibulë livitu yi luzaabu: benuveekë lusë n'kotë ko i beeno lun'kakini kukotë bo bëke yi n'ciinzë mu kukotë. »

53Bunë Yeesu kwabasikë munë n'zo beenë, miloonji n'kaakë i Sifalisyaanu bisë ba mu likaanzi linenë i bisë n'kufulë mpaapë byuufu bi mpilë ku mpilë yaandi. 54Baawu bëlën'sokaangë mu byuufu mu kum'bakë sintoondo sikun'fwikilë maambu mëbi mu mëbuungu maandi.

Currently Selected:

Liikë 11: NTVIL

Highlight

Copy