Za 8

1Yeesu wuyendë ku moongo miti Oliivë#8.1 Mak 11.1.. 2Cilumbu cilandëkënë, yimenë-ngwaali, naandi wusë vutukënë ku n'zo-Nzaambi, i baatu bakë booso bisë belëmë fëke naandi. Naandi wukalë fësi i wusë ba mu kubëloongë. 3Miloonji n'kaakë i Sifalisyaanu bën'twalilë n'cyeetu bëbwiilë wulëvalaangë yimunë libakëlë. Baawu bën'tuulë fë meeyi baatu, 4baawu bëkaambë Yeesu : « A N'loonji, beeso twasiimbë n'cyeetu awu fanë kulëvalilë. 5Moyiizë wutuvaanë n'swa mu n'kaakë mu kuvoondë bëcyeetu be mpilë oyo mu mëmanyi#8.5 Lev 20.10; Det 22.22-24., kasi njeeyi mbi wun'tubë? »

6Baawu bëtubilë boobo mu kun'seengë i mu kum'bakë libooti li kun'fundisi. Kasi Yeesu wusondëmë i wusë sonikë mu luzalë fë n'toto. 7Abu baawu bëlën'kacikaangë kutubë, Yeesu wukuvumbulë ntalu i wusë tubë : « Mooti fë meeyi yiinu fëkeeli muutu wubuunu vyaasi kuvaangë lisumu, naandi kwe deelë n'tetë kun'laakë limanyi. » 8Naandi kubësondëmooso i wusë be sonikë fë n'toto. 9Bunë bayuwu mamoomo, wumweekë-wumweekë ke volikaangë, ntetë bëkuluutu, Yeesu wusyaalë naveekë yimunë n'cyeetu wabë fë ntwaalaandi. 10Yeesu wuvumbulë ntalu i wusë n'kufulë : « Baawu kuni bakwendë? Muutu ve wakutabe? » 11N'cyeetu wun'vutulë : « Muutu ve, a Fumu », keti Yeesu wun'kaambë : « Miinu yisë kutabë ko, yeendë kwaaku, yabili, vyaasi yin'ka kube sumukë ve. »

Yeesu cyeseesë ci buloongo

12Yeesu wusë be bëkaambë : « Miinu cyeseesë ci buloongo#8.12 Ezy 49.6; Mat 5.14; Za 9.5.. Wosuku muutu wukun'daandë, naandi wum'bakë cyeseesë ci luziingu i kusë be lyatooso ko ku citoombi. » 13Sifalisyaanu bisë n'kaambë : « Njeeyi wulë mu kuyitubilë cimbaanji. Cimbaanji cyaaku cikeeli ko cicyelikë. » 14Yeesu wusë bëvutulilë : « Keti miinu yilë tubë cimbaanji mu miveekë, cimbaanji cyaami cicyelikë, cibilë miinu yibe zaabë kuni yifuminë i kuni yilë mu kweendë. 15Beeno lun'fuundisyaangë mu cimuutu, kasi miinu yisë n'fundisi muutu kuve. 16Miinu buni yin'fundisi, lufundusu lwaami lucyelikë, cibilë yikeeli miveekë kuve, kasi Taatë wo wukun'filë ke yaami. 17Bësonikë mu n'kaakiinu ti ningë baatu bwaali bën'vaanë cimbaanji cyo cimweekë, cimbaanji cyaawu cicyelikë#8.17 Det 19.15; Det 17.6; Lut 35.30.. 18Miinu yilë mu kuvaanë cimbaanji mu miveekë, i Taatë wo wukun'filë ke mu kun'tubilë yivaandi cimbaanji. » 19Kasi Sifalisyaanu bën'yufulë : « Kuni kuke Tataakwe? » Yeesu wusë vutulë : « Beeno lusye kun'zaabë ko, miinu i Tataami. Ningë lube kun'zaabë, lun'zaabë yivaandi Tataami. »

20Yeesu wutubë mëbuungu be moomo, fanë kululongilaangë mu n'zo-Nzaambi, fanë fabë bikonunu bi mboongo. Muutu ve wun'kaangë, cibilë ntaangwaandi yabë yibuunu kufwaanë.

« Beeno kupodi ve kweendë ko yin'kwendë. »

21Yeesu wusë be bëkaambë : « Miinu yakun'kwendë, beeno lukun'toombë, kasi lun'fwa mu mësumu miinu. Beeno kupodi ve kweendë ko yin'kwendë. » 22Abu bëyuwu mamoomë, Sizwiifë bëlëkufusënaangë : « Naandi syawuyivoondë, cibilë naandi watubë ti : “Beeno kupodi ve kweendë ko yin'kwendë”? » 23Yeesu wusë bëvutulilë : « Beeno baatu bëke fësi, kasi miinu yifuminë ku yilu. Beeno baatu bë buloongo be buubu, kasi miinu yisë muutu bu buloongo be buubu ko. 24Mu bwaawu, miinu yalukambilë ti beeno lun'fwiilë mu mësumu miinu. Mooti beeno lusye ta lyaanë ti “miinu wuuwu”#8.24 Lub 3.14-15.. » 25Baawu bën'yufulë : « Njeeyi nani wukeelye? » Yeesu wusë bëvutulilë : « Miinu mati, muutu wo yilukaambë kutatikilë fanë ntonunu. 26Miinu yike mpaapë maambu mu kulukaambë i mu kulufundisi mu manë mu lutalë. Kasi yilë mu kutendulë mu buloongo manë yisinu ke wo wukun'filë i naandi wun'tubaangë cyelikë. »

27Sizwiifë bësye bakulë kuve ti Yeesu wulëtubilaangë mu Taatë. 28Yeesu wusë bëkaambooso : « Bunë lun'zanjikë Mwaanë Muutu#8.28 3.14. faawu lun'zabilë ti “Miinu, mi woowo”. Beeno lun'zaabë ti miinu yisë n'vangaangë lin'viipë ko mu miveekë. Kasi yin'tubaangë manë Taatë wukun'sinë. 29Wo wukun'filë ke yaami, naandi wusë kum'biikaangë miveekë kuve, cibilë miinu yin'vaangaangë tokë manë naandi kun'tiisi. » 30Bunë Yeesu kwe tubi mamoomo, mpaapë baatu bëta maanë mu naandi.

Baatu bësyalulu i bëdoongo

31Yeesu wusë kaambë Sizwiifë sinë sita maanë mu naandi: « Ningë beeno lube sulëmë mu mëbuungu maami, cyelikë beeno bilaanzi byaami. 32Boobo, beeno lun'zaabë cyelikë i cyelikë cilukobulë. » 33Baawu bisë n'vutulilë : « Beeso sindaandu si Abalaamë#8.33 Mat 3.9; Lik 3.8., tubuunu vyaasi kuba bëdoongo. A njeeyi buni wum'podi kutubilë ti “tun'kobukë”? » 34Yeesu wusë bëvutulilë : « Licyelikë, licyelikë yilukaambë : wosuku muutu wun'sumukë, n'dongo lisumu kukeeli. 35N'dongo wukeeli wun'viipë fë likaandë ko, kasi mwaanë na wun'kalilë ci mëkulu fë likaandë lyaandi. 36Mooti Mwaanë be lukobulë, beeno cyelikë lun'kobukë. 37Miinu yizabisi ti beeno sindaandu si Abalaamë. Kasi beeno lun'toombë kum'poondë, cibilë lulë mu kumaangë mëbuungu maami. 38Miinu, yilë mu kulukaambë maambu mo yimonë ke Tataami, kasi beeno lulë mu kuvaangë manë tatiinu wulukaambë. » 39Baawu bisë n'vutulilë : « Tatiitu mati, Abalaamë. » Yeesu wusë bëtubooso : « Cyelikë, ningë beeno sindaandu si Abalaamë, nkanë lulë mu kuvaangë bunë naandi kulëvangilaangë#8.39 Ningë beeno luyabë: ningë beeno lukeeli... Ebë 11.8-9.. 40Miinu yilukaambë cyelikë cyo Nzaambi wukun'kaambë, kasi beeno lun'toombë kum'poondë. Abalaamë sye siilë boobo ko. 41Beeno lulë mu kuvaangë dedë mweekë tatiinu. » Kasi Sizwiifë bisë vutulilë : « Beeso tukeeli ko baanë bë ndaayi, kasi beeso Tatiitu wumweekë vwiili, Nzaambi. » 42Yeesu wusë bëkaambë : « Licyelikë, mooti Nzaambi wabë Tatiinu, nkanë beeno lukun'zolë, cibilë miinu yifuminë kuke Nzaambi i miinu yike afa mu cibilë cyaandi. Miinu yisye kwisilë mu miveekë ko, kasi naandi na wukun'filë. 43Mu mbici lun'kaambu kuwulu manë yilë mu kulukaambë? Cibilë beeno lukeeli ko yi likanë li kuwulu mëbuungu maami. 44Beeno mati tatiinu dyaabu i lun'toombë kuvaangë manë tatiinu kuzolisi. Naandi wabë n'voondi baatu fanë ntonunu. Naandi wusye zingilë ko mu bucyelikë, cibilë mu naandi cyelikë voo. Naandi wukeeli yi cyelikë ko, mungë lupuutu i taatë lupuutu. 45Kasi miinu yin'tubaangë cyelikë bwaawu beeno lun'kaambu kun'teelë lyaanë. 46Nani mu beeno wum'podi kutubë ti miinu yasumukë? I mooti miinu yin'tubë cyelikë, buni beeno lun'kaambu kun'teelë lyaanë? 47Muutu Nzaambi wun'kuwaangë mëbuungu më Nzaambi. Kasi beeno lusë baanë bë Nzaambi ko, bwaawu lun'kaambu kun'yuwulwaangë. »

Yeesu i Abalaamë

48Sizwiifë bisë vutulilë Yeesu : « Beeso tusye tubë cyelikë kwe faanë tutubilë ti njeeyi musë Samali i njeeyi wuvwaatu ke ciluunzi cibi? » 49Yeesu wusë bëvutulilë : « Miinu yisye vwaatu ko ke ciluunzi cibi. Kasi yilë mu kutuunvi Tataami i beeno lulë mu kumaangë kun'tuunvi. 50Miinu yisë n'toombë bumpumu bwaami miveekë ko, ke wun'viipë wutoombë bwaawu mu miinu i wun'fundisi. 51Licyelikë, licyelikë yilukaambë : muutu wo wun'cinzikë mëbuungu maami, naandi kusë n'fwa ko. »

52Mu lyaawu, Sizwiifë bisë tubë ti : « Beeso twazaabë vandi cyelikë, ti njeeyi wuvwaatu ke ciluunzi cibi! Abalaamë wufwa, mibici yivaandi bëfwa. Njeeyi wulë mu kutubë ti : “Wunë wun'vitikë mëbuungu maami wusë n'fwa ko.” 53Tatiitu Abalaamë wufwa, wum'balë ti njeeyi mwiinji bunenë yi naandi? Mibici yivaandi bëfwa. Njeeyi mbici wun'toombë kuleesi? » 54Yeesu wusë vutulë : « Mooti miinu yin'toombë kuyituunvi, bumpumu bwaami bukeeli yi nkaali ko. Wunë wukun'tuunvi, mati Tataami. Beeno lun'tubë mu cibilë cyaandi : “Naandi na Nzaambiitu.” 55Beeno lusye n'zaabë ko, kasi yin'zabisi. Ningë miinu yibe tubë ti yisye n'zaabë ko, yim'ba cibutë-maambu buke beeno. Kasi miinu yin'zabisi i yin'cinzikaangë mëbuungu maandi. 56Abalaamë tatiinu wabë mu nyeenzi, cibilë wulëciingaangë lwisulu lwaami, wumonë lwaawu i wusë ba mu liyaanji. » 57Sizwiifë bisë n'kaambë : « Njeeyi wubuunu kudukusi mëkumë-taanu më n'vu i wulë mu kutubë ti wumonë Abalaamë! » 58Yeesu wusë bëvutulilë : « Licyelikë, licyelikë yilukaambë : ntetë Abalaamë kubutu, “miinu yabë#8.58 1.1-3. ”. » 59Mu lyaawu olyo, baawu bisë noongë mëmanyi mu kun'laakë, kasi Yeesu wuswaamë i naandi wusë basikë mu n'zo-Nzaambi.

Currently Selected:

Za 8: NTVIL

Highlight

Copy