Za 11

Lufwa lu Lazaalë

1Libakëlë bëlëteelaangë Lazaalë wabë ncyeenzu. Naandi wulëkalaangë ku Betani, ku bwaalë bulë zingilaangë Maali i mwanaandi nguli Malëtë#11.1 Lik 10.38-39. Lazaalë lyabë lizinë li mpaapë baatu mu ntaangu Yeesu. Eleyazaalë (Nzaambi wun'zudi). Betani: Mak 11.1.. 2— Maali wabë n'cyeetu wunë wudukulë yaafë mu maalu më Fumu i wufyoonë maawu mu mileenjyaandi, mwanaandi bakëlë Lazaalë wabë ncyeenzu#11.2 12.3.. — 3Banë baandi bëcyeetu bë bwaali bëfilë muutu mu ke kaambë Yeesu : « A Fumu, ndikwaaku ncyeenzu. » 4Yeesu abu kwayuwu lyalyooli, naandi wusë tubë : « Ncyeenzu yi Lazaalë yisë kun'natë ku lufwa ko. Yaawu yifwenikini kuleesi lutumu lu bumpumu bu Nzaambi i mu kuleesi yivaandi bumpumu bu Mwaanë Nzaambi. »

5Yeesu wulëzolaangë Malëtë, i mwanaandi nguli Maali yimunë Lazaalë. 6Kosuku, buni kwe zaabi ti Lazaalë ncyeenzu, naandi wuvyosyooso bilumbu byooli fo kwabë. 7Naandi wusë kaambë bilaanzi byaandi: « Tuvutukaanu ku Zudee. » 8Bilaanzi bisë n'vutulilë : « A N'loonji, buyifanu abu, kwa kunë kunaani kwa bëlëtoombë kukuvoondë mu mëmaani, i njeeyi wun'toombooso kuvutukë kwaawu? » 9Yeesu wusë bëkaambë : « Mu cilumbu mu keeli kuumi zoolë wali bwaawu kwe? Ningë muutu bëlyaatë yi muunyi, naandi kupodi ve kube kubë tuuntu cibilë wulë mu kumonë cyeseesë ci buloongo be buubu. 10Kasi, mooti muutu be lyaatë yi bwiilu, wun'kubë tuuntu cibilë cyeseesë voo mu naandi. » 11Abu kwamani kutubë mamoomë, Yeesu wusë bëtubooso: « Ndikwiitu, Lazaalë tolo kwanuukë, kasi miinu fwenikini kweendë mu kun'kotulë. » 12Bilaanzi byaandi bisë n'vutulilë : « A Fumu, naandi ningë wunuukë, naandi wun'vuukë. » 13Mu lyaawu, Yeesu wutubilë mu lufwa lu Lazaalë, kasi bilaanzi bëlëbalaangë ti naandi wulëtubilaangë mu cibilë ci tolo. 14Yeesu wusë bëkaambooso cyelikë ti : « Lazaalë wafwa. 15Miinu mu liyaanji yikeeli cibilë beeno lusye ba kwaawu kuve bwiinji beeno lun'ta maanë mu miinu. Kasi ndokwaanu ke naandi. » 16Bwaawu, Toma – bën'teelë ti Cibasë – wusë kaambë bilaanzi bimesi : « Ndokwaanu beeso yiviitu, mu kufwa yimunë naandi! »

Yeesu luvulumuku i luziingu

17Yeesu abu kwatuuci, naandi wuyuwu ti Lazaalë ke mu libuumbë fë bilumbu bi na. 18Livulë li Betani libelëmë yi Yelusaleemë, fë mitakë tatu. 19Mpaapë Sizwiifë siyisë ke Malëtë i Maali mu kubëboondë mu cibilë ci lufwa lu mwaanaawu bakëlë. 20Bunë Malëtë kwe yuwu ti Yeesu wulëkwisë, naandi wusë kweendë mu kun'dyengënë, kasi Maali wabë wusyaalë ku n'zo. 21Malëtë wusë kaambë Yeesu : « A Fumu, ningë ti njeeyi wabë faafë, nkanë mwanaamë bakëlë wusye fwa ko. 22Kasi miinu yizabisi ti buyifanwabu Nzaambi wukuvaanë byosuku njeeyi wukun'loombë. » 23Yeesu wun'kaambë : « Mwanaaku bakëlë wun'vulumukë mu lufwa. » 24Malëtë wusë n'vutulilë : « Miinu yizabisi ti naandi wun'vulumukë mu lufwa mu cilumbu ci siitu#11.24 Dan 12.2.. » 25Yeesu wusë n'kaambë : « Miinu luvulumuku i luziingu. Wunë wun'teelë maanë mu miinu, naandi wun'ziingë keti ku lufwa, 26i wunë wun'ziingë i wun'ta maanë mu miinu, naandi kusë n'fwa ko. Njeeyi wun'ta maanë mu maawu? » – 27« Cibeeni, a Fumu, miinu yata maanë ti njeeyi Kliistu, Mwaanë Nzaambi, wunë wun'kwisë mu buloongo. »

Yeesu walilë

28Mu mamoomë, Malëtë wusë ke yendaangë mu ke teli mwanaandi nguli Maali i wun'kaambë mu mbeembu selëlë: « N'loonji ke faafë i naandi wun'toombë wiisë. » 29Bunë Maali kwayuwu boobo, naandi wusë telëmë i wudumë-ntiinu fë ntwaalë Yeesu. 30Kosuku Yeesu wabë yibuunu kukotë ku bwaalë, kasi naandi wabë fanë Malëtë kun'dyengëninë. 31Bunë Sizwiifë babë yi Maali ku n'zo mu kum'boondë, bëm'moonë kutelëmë i kubasikë mu ntiinu, baawu bisë kun'laandë. Baawu bëlëbalaangë ti naandi wakwendë ku bizyaami mu kwe lili. 32Maali wusë ke tuukë fo fabë Yeesu, abu kwe m'moni, naandi wusë ke bwa fë maalu maandi, i wutubë : « A Fumu, njeeyi ti wabë faafa nkanë mwanaamë nguli sye fwa ko. » 33Yeesu abu kwamoni ti naandi wulëlilaangë, i banë bëyisë yaandi, naandi wusë ba mu cyuundë cinenë i wukaambu n'sikë. 34Naandi wubëyufulë: « Kuni beeno lwan'tuulë? » Baawu bisë n'vutulilë : « A Fumu, yisë, bwiinji wumonë. » 35Yeesu wulilë. 36Sizwiifë bëtubooso : « Monaanu buni naandi wulën'zolilaangë. » 37Kasi bën'viipë mu baawu bëtubë : « Naandi wo wabelusi meeso më mpofo#11.37 9.6., buni kun'kaambu kuvangilë lin'viipë bwiinji Lazaalë wuleembu kufwa? »

Lazaalë wavulumukë

38Yeesu, wabooso mu cyuundë cinenë, wuyendë ku bizyaami. Yaawu yabë mpwiiti bëfukë mu limanyi linenë#11.38 Ku Palestiinë mu ntaangu Yeesu, bizyaami bëlësikaangë mu bilwaasi mu mëmanyi më ngooto i bëlëkakaangë mu limanyi. Mat 27.60; Mak 15.46; Lik 24.2.. 39Yeesu wusë tubë : « Botulaanu limanyi. » Malëtë, mwaanë n'cyeetu wu wo wafwa, wusë tubë : « A Fumu, naandi wake m'basikë n'nuuku cibilë wufwilaangë yeekë bilumbu bi na. » 40Yeesu wusë n'vutulilë : « Miinu yisye kukaambë kwe? Ningë njeeyi bëta lyaanë wum'monë bumpumu bu Nzaambi. » 41Baawu bisë botulë limanyi, Yeesu wusë vum'bulë ntaalu i wusë tubë : « Ata, miinu yakutoondë, cibilë njeeyi wakun'yuwulu. 42Miinu yizabisi ti njeeyi wukun'yuwulwaangë ntaangu syakë syooso, kasi yin'tubilë obo mu cibilë ci baatu bo bakun'zukë, bwiinji baawu bëta maanë ti njeeyi wukun'filë. » 43Bo kwamani kutubë, naandi wusë kulosukë: « A Lazaalë, basikë oko! » 44Muutu wabë wufwa wusë basikë, maalu i myooko bikangëmë mu biteendë i ciinyi bëfuukë mu lilasoolë#11.44 20.6-7.. Yeesu wusë tubë : « N'kutulyaanu i m'bicyaanu kweendë. »

Fuundu basiilë mu Yeesu

(Mat 26.1-5; Mak 14.1-2; Lik 22.1-2)

45Mpaapë Sizwiifë, mu banë bëyisë ke Maali i bëmonë manë Yeesu kuvaangë, bisë ta maanë mu naandi. 46Kasi bëmesë mu baawu bëyetakënë Sifalisyaanu i bisë bëkaambë manë Yeesu kuvaangë. 47Bëkuluutu bë singangë-Nzaambi i Sifalisyaanu bisë kotë fuundu mu kuvaangë lukoongu yimunë mikwa-lwaangu i bisë tubë : « Buni twakun'silaanwe? Cibilë muutu owo wulë mu kuvaangë mpaapë bimaaku! 48Ningë beeso tube m'biikë kuvangilë obo, bakë booso bëkun'teelë maanë, faawoofo, mikwa-lwaangu yi Loomë bën'kwisë mu kutyamunë n'zo-Nzaambi i siyiitu! » 49Wumweekë mu baawu bën'teelë Kayiifë, awu wabë n'kuluutu singangë-Nzaambi mu n'vu be woowo, naandi wubëkaambë : « Beeno lusë m'bakulë lin'viipë kwe! 50Beeno lusye zaabë ko ti n'ciinzë mu beeno mu muutu mweekë kufwa mu cibilë ci baatu bakë booso i mu kuleembu kuvakulë si yakë yooswe? » 51Kosuku, yaaku ti mu naveekë kuve naandi wulëtubilaangë, kasi bunë naandi kwabë n'kuluutu singangë-Nzaambi mu n'vu be woowo, naandi wubikulë ti, Yeesu wun'fwiilë mu cibilë ci Sizwiifë, 52i yakë tokë mu si be yiiyi, kasi yivaandi mu kukucikë mu nyitu mweekë baanë bë Nzaambi booso bëtyamukë mu buloongo n'viipë.

53Kutoonë cilumbu be cyoocyo, mikwa-lwaangu Sizwiifë bisë boongë lukanyu mu kuvoondë Yeesu. 54Mu bwaawu, Yeesu wusë siitë mu kube lyaatë fë ciyalëlë fë meeyi Sizwiifë. Kasi naandi wuyendë ku libweeti lin'ka mu ntaandu ciyumi ku bwaalë bën'telaangë Efalayiimë, kwaawu kuye kalë yimunë bilaanzi byaandi.

55N'saangu Sizwiifë wu Paakë wabë wabelëmë, mpaapë baatu bëyeendë ku Yelusaleemë mu kulyomisi sinyitu syaawu ntetë n'saangu kutoonë. 56Baawu bëlëtoombaangë Yeesu, i baawu babë mu n'zo-Nzaambi baawu bëlëkufusënaangë baveekë yi baveekë: « Beeno buni lum'balilë? Naandi wun'kwisë ku n'saangu voo moniko? » 57Bëkuluutu singangë-Nzaambi i Sifalisyaanu bëvaanë n'swa ti wunë wun'zaabë fanë kukeeli, naandi wufwenikini kubëkaambë bwiinji bën'kaangë.

Currently Selected:

Za 11: NTVIL

Highlight

Copy